ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ចិន​ប្រតិកម្ម​នឹង​អ្នកស្រី Harris ដែល​ថា ចិន​បង្ខិតបង្ខំ បំភិតបំភ័យ នៅ​សមុទ្រ​ចិន​ខាងត្បង


រូបឯកសារ៖ អ្នកនាំពាក្យ​ក្រសួង​ការបរទេស​ចិន​លោក Wang Wenbin ថ្លែង​ក្នុង​សន្និសីទ​សារព័ត៌មាន​មួយ​នៅឯ​ក្រសួង​ការបរទេស​ចិន​ក្នុង​ទីក្រុង​ប៉េកាំង កាលពី​ថ្ងៃសុក្រ ទី១៣ ខែវិច្ឆិកា ឆ្នាំ២០២០។

អនុ​ប្រធានាធិបតី​អាមេរិក​អ្នកស្រី​ Kamala Harris ​ក្នុង​ដំណើរ​ទស្សន​កិច្ច​ទៅ​ប្រទេស​សិង្ហបុរី​ បាន​និយាយ​នៅ​ថ្ងៃ​អង្គារថា​ ប្រទេស​ចិន​ នៅតែ​បន្ត​បង្ខិត​បង្ខំ​ បំភិត​បំភ័យ​និង​ទាមទារ​ទឹកដី​ភាគច្រើន​នៃ​សមុទ្រ​ចិន​ខាង​ត្បូង​ដែល​ធ្វើ​ឱ្យ​ប៉ះពាល់​សណ្តាប់​ធ្នាប់​ផ្អែក​ច្បាប់​ និង​គំរាម​កំហែង​ដល់​អធិប​តេយ្យ​ភាព​របស់​ប្រជាជាតិ​នានា។​

អ្នកស្រី​ Harris ​បាន​មាន​ប្រសាសន៍​ថា​ «សហ​រដ្ឋ​អាមេរិក​នៅ​ជាមួយ​សម្ព័ន្ធ​មិត្ត ​និង​ដៃគូ​របស់​យើងប្រឈម​នឹង​ការ​គំរាម​កំហែង​ទាំង​នេះ។ ហើយ​ខ្ញុំ​ត្រូវ​តែ​បញ្ជាក់​ច្បាស់​ថា​៖ ​ការ​ចូលរួម​របស់​យើង​នៅ​អាស៊ី​អាគ្នេយ៍​ និង​ឥណ្ឌូ-ប៉ាស៊ីហ្វិក​ មិន​ដើម្បី​ប្រឆាំង​នឹង​ប្រទេស​ណាមួយ​ ហើយ​ក៏​មិន​តម្រូវឲ្យ​អ្នកណា​ម្នាក់​ជ្រើសរើស​រវាង​ប្រទេស​នានា​ដែរ។​ ផ្ទុយទៅ​វិញ​ ការ​ចូលរួម​របស់​យើង​ គឺ​សំដៅឆ្ពោះ​ទៅ​រក​ចក្ខុវិស័យ​សុទិដ្ឋិនិយម​សម្រាប់​ការ​ចូលរួម​និង​ភាពជា​ដៃគូ​របស់​យើង​នៅក្នុង​តំបន់​នេះ»។​

អ្នក​នាំ​ពាក្យ​ក្រសួង​ការ​ប្រទេស​ចិន​លោក Wang Wenbin បាន​ឆ្លើយ​តបដោយ​និយាយ​ថា សហរដ្ឋ​អាមេរិក ​បាន​ស្វះស្វែង​បង្កើតប្រព័ន្ធ​មួយ​ដែល​ក្នុង​នោះ ខ្លួន​អាច «បង្ខូច សង្កត់សង្កិន បង្ខិត​បង្ខំ​ និង​សម្លុត ប្រទេស​ដទៃ​ដោយ​ចេតនា ហើយ​មិន​រង​ផល​វិបាក​អ្វី​នោះ​ទេ»។

រដ្ឋបាល​របស់​លោក​ប្រធានាធិបតី ​Joe Biden​ បាន​យក​ការ​ទប់ទល់​ឥទ្ធិពល​របស់​ប្រទេស​ចិន​ ជាផ្នែក​សំខាន់​មួយ​នៃ​គោល​នយោបាយ​ការ​បរទេស​របស់​ខ្លួន។

អ្នកស្រី​ Harris ​បាន​បន្ត​ទស្សន​កិច្ច​ទៅ​កាន់​ប្រទេស​វៀតណាម​នៅ​ថ្ងៃ​អង្គារ បន្ទាប់ពី​ពន្យារ​ពេល​ដោយសារ​បញ្ហា​សុខភាព​ដែល​អាច​ទាក់ទង​ទៅនឹង​រោគ​សញ្ញា ​Havana ​ដ៏អាថ៌​កំបាំង។ ​អ្នកស្រី​បាន​ទៅ​ដល់​រដ្ឋធានី​ហាណូយ បន្ទាប់ពី​ពន្យារ​ពេលបីម៉ោង​នៅ​ប្រទេស​សិង្ហបុរី៕

ព័ត៌មានខ្លះ​ក្នុង​សេចក្តី​រាយ​ការណ៍​នេះ​ ដក​ស្រង់​ពី​ទីភ្នាក់ងារ​សារ​ព័ត៌មាន​ The Associated Press Agence France-Presse និង​ Reuters

XS
SM
MD
LG