ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធានាធិបតី​ចិន​​​ប្រើ​ច្បាប់​ដើម្បី​រឹតបន្តឹង​ការ​ក្តោប​ក្តាប់​អំណាច


លោក​​ប្រធានាធិបតី​ Xi Jingping នឹង​ប្រើប្រាស់​ច្បាប់​ ជា​ឧបករណ៍​សម្រាប់ បិទ​មាត់​អ្នក​ប្រឆាំង​ និង​អ្នក​គាំទ្រ​ពួកគេ​នៅ​ក្នុង​ប្រព័ន្ធ​តុលាការ។
លោក​​ប្រធានាធិបតី​ Xi Jingping នឹង​ប្រើប្រាស់​ច្បាប់​ ជា​ឧបករណ៍​សម្រាប់ បិទ​មាត់​អ្នក​ប្រឆាំង​ និង​អ្នក​គាំទ្រ​ពួកគេ​នៅ​ក្នុង​ប្រព័ន្ធ​តុលាការ។

ការ​រីក​រាលដាល​នៃ​ការ​បង្រ្កាប​មេធាវី​និង​សកម្មជនសិទ្ធិមនុស្ស​ក្នុង​រយៈ​ពេល​បី​សប្តាហ៍​កន្លង​ទៅ​នេះ​បាន​ជំរុញ​ឱ្យ​មាន​ការ​ព្រួយបារម្ភ​កាន់​តែ​ខ្លាំង​ឡើង​ថា​ លោកប្រធានាធិបតី​ Xi Jingping នឹង​ប្រើប្រាស់​ច្បាប់​ ជា​ឧបករណ៍​សម្រាប់ បិទ​មាត់​អ្នក​ប្រឆាំង​ និង​អ្នក​គាំទ្រ​ពួកគេ​នៅ​ក្នុង​ប្រព័ន្ធ​តុលាការ។

តាំង​ពី​លោក​បាន​ ឡើង​កាន់​តំណែង​មក​ លោក​ ប្រធានាធិបតី​ Xi បាន​ផ្ដោត​ទៅ​លើ​សារៈ​សំខាន់​នៃ​និតិរដ្ឋ និង​ការ​គ្រប់គ្រង​ផ្អែក​លើ​ច្បាប់។ រដ្ឋាភិបាល​ បាន​និយាយ​ថា​ ចំណុច​សំខាន់​មួយ​របស់​យុទ្ធនាការ​ប្រឆាំង​អំពើ​ពុករលួយ គឺ​ ការ​ធ្វើ​ឲ្យ​សង្គម​មាន​យុត្តិធម៌​ និង​ការពារ​ការរំលោភ​បំពាន​ ពី​អ្នក​មាន​អំណាច។ ឆ្នាំ​មុន​ លោក​ប្រធានាធិបតី បាន​យក របៀបវារៈ​សំខាន់​ក្នុង​កិច្ច​ប្រជុំ​បក្ស​ថ្នាក់​កំពូល ។

ប៉ុន្តែ​ ក្នុង​ពេល​ជា​មួយ​គ្នា​នេះ​ លោក​ប្រធានាធិបតី​ Xi បាន​បង្កើន​ការ​រឹតត្បិត​ក្នុងសង្គម​ និងការ​រីក​រាលដាល​នៃ​ការ​ចាប់ខ្លួន​មេធាវី​ចាប់​តាំង​ពី​លោកចូល​កាន់​អំណាច បាន​បង្ហាញ​ភាព​ផ្ទុយ​ទៅ​វិញ​។ លោក​ Hsu Szechien ​ជា​អ្នក​វិទ្យាសាស្ត្រ​នយោបាយ​នៃ វិទ្យាស្ថាន​ស្រាវជ្រាវ Academia Sincia នៅ តៃវ៉ាន់ បាន​និយាយថា​៖

«តាម​ការពិត នោះ​ជា​ការ​គ្រប់​គ្រង​ដោយ​យក​ច្បាប់​មក​ប្រើ​ប្រាស់ ។ លោក Xi Jingping ជា​អ្នក​គ្រប់គ្រង​ប្រើប្រាស់​អំណាចនិតិបញ្ញត្តិ​ ឬ ប្រព័ន្ធ​ច្បាប់​ដើម្បី​សម្រេច​តាម​ឆន្ទៈ​គ្រប់គ្រង​របស់​លោក​ ទៅ​លើ​ការិយាធិបតេយ្យ និង​ទៅ​លើ​សង្គម ។ »

យុទ្ធវិធី​នេះ​ត្រូវ​គេ​មើល​ឃើញ​យ៉ាង​ច្បាស់លាស់​ ក្នុង​យុទ្ធនាការ​ដែល​កំពុង​ធ្វើ​ឡើង​ជា​បន្ត​ដើម្បី​ប្រឆាំង​នឹង​មេធាវី​ និង​សកម្មជនចិន​ ជា​ច្រើន ​ដែល​ធ្លាប់​ការពារ​ អ្នក​ប្រឆាំង អ្នក​និពន្ធ​ និង​វិចិត្រករ​ ល្បី​ៗ​របស់ ប្រទេស​នេះ។

ក្រុម​មេធាវី​សិទ្ធិមនុស្ស​របស់​ប្រទេស​ចិន​បាន​ថ្លែង​ថា​ មាន​មេធាវី​និងសកម្មជន​ ច្រើន​ជាង​ ២៥០​នាក់​ ត្រូវ​បាន​ប៉ូលីស​ចាប់​ខ្លួន​ដើម្បី​សួរ​ចម្លើយ តាំង​ពីដើម​ខែ​កក្កដា​មក​ ដែល​ក្នុង​ចំណោម​អ្នក​ទាំង​នោះ​១៥​នាក់​បាន​ជាប់​ទោស​ឧក្រិដ្ឋ។

អ្នកស្រី Maya Wang អ្នក​ស្រាវជ្រាវ​ជនជាតិ​ចិន​របស់​អង្គការ​ឃ្លាំ​មើល​សិទ្ធិមនុស្ស​ ឬ​ Human Rights Watch ដែល​មាន​ទីស្នាក់ការ​នៅ​ទីក្រុងNew York បាន​និយាយ​ថា​សកម្មភាព​ទាំងនេះ​ នាំឲ្យ​ឆ្នាំ​នេះ​ ជា​ឆ្នាំ​អាក្រក់​បំផុត​នៃ​កំណត់​ត្រា​សិទ្ធិ​មនុស្ស​របស់​ប្រទេស​ចិន​ ក្នុង​រយៈពេល​២​ទសវត្ស។

«លោក Xi ឡើង​កាន់​តំណែង​ដោយ​មាន​អារម្មណ៍​ថា​បក្ស​មាន​វិបត្តិ​មួយ​ ហើយ​លោក​ចង់​ពង្រឹង​ គោល​ជំហរ​របស់​បក្ស​ដោយ​ការ​ប្រមូល​អំណាច ។ ដូច្នេះ ការ​ដក​សកម្មជន ទាំង​នេះ​ជា​ផ្នែក​១​ នៃ​យុទ្ធសាស្រ្ត​ ពី​ព្រោះ​បក្ស​មិន​ចង់​ឲ្យ​នរណា​ម្នាក់​ប្រឆាំង​និង​ទស្សនៈ​របស់​ខ្លួនសម្រាប់​ប្រទេស​ចិន​ឡើយ។

កាល​ពី​ខែ​តុលាឆ្នាំ​មុន មន្ត្រី​ជាន់​ខ្ពស់​របស់​បក្ស​កុម្មុយនិស្ត​បាន​ជួប​ប្រជុំ​ក្នុង​កិច្ចប្រជុំ យ៉ាង​សំខាន់​១​ដែល​ត្រូវ​បាន​ពណ៌នា​ថា​នេះ​ជា​ការរៀបចំ​ ផ្លូវ​ឆ្ពោះ​ទៅ​កាន់​ប្រទេស​ដែល​មាន​និតិរដ្ឋ​។ មន្ត្រី​មួយ​ចំនួន​បាន​តាំង​ចិត្ត​ដើម្បីកែប្រែ​ប្រព័ន្ធ​តុលាការ​ឲ្យ​កាន់​តែ​មាន​ឯករាជ្យ​ជាង​មុន​ និង​ ជំរុញ​កិច្ចការ​ប្រឆាំង​អំពី​ពុក​រលួយ​របស់​ប្រទេស។

ជិត​មួយ​ឆ្នាំ​ក្រោយ​មក​ អ្នក​វិភាគនិយាយ​ថា​ កំណែ​ទម្រង់​នេះមិន​បាន​ធ្វើ​អ្វី​ច្រើន​ដើម្បី​កែប្រែ​សង្គម​ចិន​ដែល​បក្ស​កុម្មុយនិស្ត​ នៅ​តែ​ជា​បក្ស​ដែល​ធំ​ជាង​ច្បាប់​ ។

សកម្មជន​សិទ្ធិមនុស្ស​មួយ​ក្រុម​ដែល​សង្កេត​មើល​ករណី​ចាប់​ខ្លួន​មេធាវី​ គឺក្រុម​មេធាវី​សិទ្ធិមនុស្ស​របស់​ប្រទេស​ចិន​ដែល​មាន​មូលដ្ឋាន​នៅ​ទី​ក្រុង​ ហុងកុង​ បាន​ថ្លែង​ថា​ករណី​មួយ​ចំនួន​មិន​ទាន់​មាន​បទ​ចោទ​ឧក្រិដ្ឋកម្ម​ ហើយ​នៅ​មិន​ទាន់​មាន​ព័ត៌មាន​ថា​តើ​ជនជាប់ចោទនោះ​កំពុង​ស្ថិត​នៅ​ទីណា​ទេ។ ពួកគេ​ក៏​មិន​បាន​ទទួល​សេវាកម្ម​ផ្លូវ​ច្បាប់​ ដែល​ជា​ការ​បំពាន​យ៉ាង​ច្បាស់​ លើ​នីតិវិធី​ព្រហ្មទណ្ឌ​របស់​ប្រទេស​ចិន​ខ្លួន​ឯង។

លោក Tang Jingling​ ជា​មេធាវី​សិទ្ធិមនុស្ស​ដ៏​ល្បី​ឈ្មោះ​ម្នាក់ ដែល​ត្រូវបាន​ចាប់​ខ្លួន​កាល​ពី​មួយ​ឆ្នាំ​មុន​ ដោយសង្ស័យ​ថា​ បាន​បង្ក​ជម្លោះ​និង​បង្ក​ភាព​ចលាចល ប៉ុន្តែ​ក្រោយ​មក​បាន​ជាប់​ចោទ​ពី​បទ​ញុះញង់​ធ្វើ​វិទ្ធង្សនា​ប្រឆាំង​រដ្ឋាភិបាល។ លោក​បាន​ឡើង​តុលាការ​កាល​ពី​អាទិត្យ​មុន ​ប៉ុន្តែ​លទ្ធផល​ពី​ករណី​នេះ​នៅ​មិន​ទាន់​បញ្ចេញ​នៅ​ឡើយទេ ។

ជា​ធម្មតា​សកម្មជន​ និង​ មេធាវី​ សិទ្ធិ​មនុស្ស​ ទទួល​រង​ការ​ជាប់​ចោទ​ ទោស​ស្រាល​ គឺ​ពី​បទ​ បង្ក​ជម្លោះ​និង​បង្ក​ភាព​ចលាចល ឬ​ទោស​ធ្ងន់​គឺ​ពី​បទ​ញុះញង់​ធ្វើ​វិទ្ធង្សនា​ប្រឆាំង​រដ្ឋាភិបាល ។

ការ​ដាក់​ទោស​ស្រាល​ បាន​ប្រើប្រាស់​កាន់​តែ​ច្រើនដើម្បី​រឹតត្បិត​ការនិយាយ​តាម​អ៊ីនធឺណិត​ និង ការ​បញ្ចេញ​មតិ​តាម​វិស័យ​សិល្បៈ​ ។

នៅ​ពេល​ដែល​មេធាវី​ជាប់​ក្នុង​មន្ទីរឃុំឃាំង​និង​ពេល​ឡើង​តុលាការ​ ពួក​គេ​ទទួល​រង​ការ​រំលោភ​បំពាន​ផ្ទាល់​ ពី​ភ្នាក់ងារ​សមត្ថកិច្ច​ ។

លោក Tang បាន​និយាយ​ថា​ នៅ​ពេល​លោក​ជាប់​ក្នុង​មន្ទីរ​ឃុំឃាំង សមត្ថកិច្ច​បាន​ធ្វើ​ទារុណកម្ម​លើ​រាងកាយ​លោក។

កាល​ពី​សប្ដាហ៍មុន​អ្នក​កាសែត​ និង​ អ្នក​ការទូត ត្រូវបាន​គេ​រារាំង​មិន​ឲ្យ​ចូល​រួម​ក្នុង​ការ​កាត់​ទោស​ទីក្រុង​ Guangzhou ។ លោក​ Tang បាន​កាត់​ទោសស្រប​ពេល​ជា​មួយ​គ្នា​ទៅ​នឹង​ការ​កាត់ទោស​គ្រូ​បង្រៀន​ និង​សកម្មជន​អ្នក​និពន្ធ​ ដែល​គេ​ស្គាល់​ថា​ជា​ ជន​ទាំង​បី​របស់​ Guangzhou​ ។ មេធាវី​ការពារ​ក្តី​របស់​ ពួកគេ​និយាយ​ថា​ខណៈពេល​មាន​ដំណើរការ​តុលាការ​មន្ត្រី​សមត្ថកិច្ច​មិន​អនុញ្ញាត​ឲ្យពួកគេ​ហៅ​សាក្សី​នោះ​ទេ​។

ជន​ទាំង​បី​របស់​ Guangzhou បាន​ជាប់ចោទ​ពី​បទ​ញុះញង់​ធ្វើ​វិទ្ធង្សនា​ប្រឆាំង​រដ្ឋាភិបាល​ដែល​ជា​ទោស​ ដែល​អាច​ដាក់​ឲ្យ​ជាប់​ពន្ធនាគារ​រហូត​ដល់​១៥​ឆ្នាំ​បើ​រក​ឃើ​ញ​ថា​មាន​ទោស ។

លោក Pu Zhiqiang ជា​មេធាវី​សិទ្ធិ​មនុស្ស​ដែល​អាជ្ញាធរ​បាន​ចាប់​ខ្លួន​កាល​ពី​ឆ្នាំ​មុន​ ក្នុង​អម្លុង​ខួប​អនុស្សាវរីយ៍​លើក​ទី​២៥​នៃ​ការបង្ក្រាប​ដ៏​ឃោរឃៅ​ទៅ​លើ​អ្នក​តវ៉ា​នៅ​ ទីលាន Tiananmen ។ លោក​ត្រូវ​គេ​ចាប់ខ្លួន​អស់​រយៈពេល​មួយ​ឆ្នាំ​មុន​ ទទួល​ការ​ចោទ​ប្រកាន់​នៅ​ខែ​ឧសភា។ លោក​កំពុង​រង់ចាំ​ការ​កាត់ទោស​នៅ​ពេល​នេះ ។

បទ​ចោទ​ប្រកាន់​លើ​លោក​ គឺ​ការ​ញុះញង់​ឲ្យ​មាន​ការ​ប្រកាន់​ពូជសាសន៍​ និង ពី​បទ​ បង្ក​ជម្លោះ​និង​បង្ក​ភាព​ចលាចល ដែល​ភាគ​ច្រើន​ផ្អែក​ទៅ​ការ​បញ្ចេញ​យោបល់​របស់​លោក​តាម​ បណ្ដាញ​សង្គម ។

ខណៈ ពេល​ដែល​លោក​ជាប់ឃុំឃាំង​ ​លោក​ Mo Shaopoing ជាមេធាវី​លោក Pu បាន​និយាយ​ថា​កូន​ក្តី​របស់​លោក​មិន​បាន​ទទួល​ការ​មើល​ថែទាំ​ខាង​ផ្នែក​សុខភាព​ឲ្យ​បាន​ត្រឹមត្រូវ ហើយ​មិន​បាន​ទទួល​បាន​ការ​ប្រឹក្សា​យោបល់​ពី​មេធាវី​ច្រើន​ជាង​២០​ថ្ងៃ​ ។

«លោក​ PU ត្រូវ​បាន​គេ​ដាក់​ក្នុងបញ្ជី​ជា​ករណី​ពិសេស​ ដែល​មិន​ដូច​ជា​បទឧក្រិដ្ឋ​ដទៃ​ទៀត​ ដូច្នេះ​យើង​ជា​មេធាវី​មិន​អាច​ចូល​ជួប​ជាមួយ​កូនក្ដី​ពេល​ណា​ក៏​បាន​នោះ​ទេ។យើង​បាន​បញ្ជាក់​យ៉ាង​ច្បាស់​ក្នុង​សំបុត្រ​របស់​មេធាវី​ថា ការធ្វើ​បែប​នេះ​បំពាន​ច្បាប់ ។ ប៉ុន្តែ​មន្ត្រី​ប៉ូលីស​និយាយ​ប្រាប់​យើងថា ពួក​គេ​មាន​បញ្ហា​លំបាក​ដែល​មិន​អាច​និយាយ​បាន។​ មន្ត្រី​សមត្ថកិច្ច​ទាំង​នេះ​មិន​បាន​ផ្ដល់​ហេតុផល​ណា​មួយទេ។ »

បណ្ដាញ​ផ្សព្វផ្សាយ​របស់​រដ្ឋ​បាន​ជួយ​បង្ខូច​ឈ្មោះមេធាវី​ទាំង​នោះ​ ដែល​បង្ក​ឲ្យ​មាន​ផល​ប៉ះពាល់​គួរ​ឲ្យ​រន្ធត់​មួយ។អ្នក​វិភាគ​និយាយ​ថា វា​ជា​ចម្បាំង​ដែល​រដ្ឋាភិបាល​មិន​អាច​ឈ្នះ​ក្នុង​រយៈ​ពេល​វែង។

លោក Hsu នៃ វិទ្យាស្ថានAcademia Sincia និយាយ​ថា៖ «វា​បាន​ធ្វើ​ឲ្យ​មនុស្ស​សាមញ្ញ​ និង​អង្គការ​ NGO មួយ​ចំនួន​ភ័យខ្លាច​ តែ​ខ្ញុំ​ជឿ​ថា​ភាពភ័យខ្លាច​នេះ​មាន​ប្រ​សិទ្ធភាព​រយៈពេល​ខ្លី​ ដោយ​សារ​ក្នុង​ចិត្ត​ប្រជាជន​ វា​ជា​អំពើ​ដែល​មិន​អាច​ទទួល​យក​បាន​នេះ​ទេ »។

ការរីក​រាលដាល​នៃ​ការចាប់ខ្លួន​មេធាវី​ក្នុង​ប្រ​ទេស​ចិន​ត្រូវ​បានអន្តរជាតិ​ដឹង​ឮ​ ហើយ​បាន​ធ្វើ​ឲ្យ​អន្តរជាតិ​ ដូចជា​ អង្គការ​សហ​ប្រជាជាតិ សហព័ន្ធ​អឺរ៉ុប និង​ សហរដ្ឋ​អាមេរិក​ថ្កោល​ទោស ។

សមាគម​មេធាវី​ពី​ប្រទេស​មួយ​ចំនួន​បាន​រួម​គ្នា​សរសេរ​លិខិត​ចំហរ​មួយ​សម្ដែងការព្រួយ​បារម្ភ​ពី​បញ្ហា​នេះ ជូន​ប្រធានាធិបតី ​Xi ​។​

ខណៈ​ដែល​ប្រទេស​ចិន​មិន​សូវ​ពេញ​ចិត្ត​និង​ការ​គាបសង្កត់​របស់​អន្តរជាតិ​ ក្រុម​សិទ្ធិ​មនុស្ស​បាន​ជំរុញ​ឲ្យ​អន្តរជាតិ​បន្ត​សម្តែង​ការព្រួយ​បារម្ភ​លើ​សេរីភាព​ក្នុង​ការ​បញ្ចេញ​យោបល់​ក្នុង​ប្រទេស​ចិន ។

អ្នក​ស្រី​ Maya Wang នៃអង្គការ​ Human Right Watch ថ្លែងថា៖ « ដើម្បី​ធ្វើ​ឲ្យ​មាន​កិច្ច​សហប្រតិបត្តិការ​ល្អ​ជា​មួយ​ប្រទេស​ចិននិង​រដ្ឋាភិបាល​ប្រទេស​ផ្សេង​ៗ​លើ​ពិភពលោក​ ទោះ​បី​កិច្ចប្រតិបត្តិការ​នោះ​ផ្ដោត​លើ​សេដ្ឋកិច្ច​ក៏​ដោយ​ រដ្ឋាភិបាល​ប្រទេស​ទាំង​នេះ​ត្រូវ​តែ​និយាយ​ពី​បញ្ហា​នេះ។ ជា​ពិសេស​នៅ​ប៉ុន្មាន​ខែ​ខាង​មុខ​នេះ​ លោក Xi Jinping នឹង​ទៅ​ទស្សនៈកិច្ច​ផ្លូវ​រដ្ឋ​នៅចក្រភព​អង់គ្លេស និង​ សហរដ្ឋ​អាមេរិច ហើយ​ខ្ញុំ​គិត​ថា​មេដឹកនាំ​ទាំង​នោះ ​ត្រូវ​តែ​និយាយ​រឿង​នេះ ។

ប្រែ​សម្រួល​ដោយ មាន ឥស្សរាយស

XS
SM
MD
LG