ទីភ្នាក់ងារសារព័ត៌មានស៊ីនហ៊ួររបស់រដ្ឋចិនបានប្រាប់ឲ្យដឹងថា ប្រធានាធិបតីចិន ស៊ី ជីងពីង (Xi Jinping) នឹងធ្វើដំណើរបំពេញទស្សនកិច្ចជាផ្លូវការលើកទីមួយទៅកាន់សហរដ្ឋអាមេរិកនៅខែកញ្ញា។
ពេលវេលានៃដំណើរបំពេញទស្សនកិច្ចត្រូវបានប្រកាសបន្ទាប់ពីលោកស៊ី បាននិយាយតាមទូរស័ព្ទជាមួយលោកប្រធានាធិបតីសហរដ្ឋអាមេរិក បារ៉ាក់ អូបាម៉ា។
ទីភ្នាក់ងារសារព័ត៌មានស៊ីនហួរបានរាយការណ៍ថា «ក្នុងអំឡុងពេលនៃការសន្ទនានោះ ភាគីទាំង២បានព្រមព្រៀងគ្នាធ្វើការរៀបចំឲ្យបានពេញលេញដើម្បីធានាថា ដំណើរបំពេញទស្សនកិច្ចនោះទទួលបានជោគជ័យ»។
សេតវិមានប្រាប់ឲ្យដឹងថា លោកអូបាម៉ាបានជំរុញឲ្យសមភាគីចិនរបស់លោកឲ្យជំរុញប្រទេសលោក «មានការរីកលូតលាស់នៃការប្រើប្រាស់ទំនិញនិងអត្រាប្តូរប្រាក់ដែលកំណត់ទៅតាមទីផ្សារ»។ លោកប្រធានាធិបតីសហរដ្ឋអាមេរិក ក៏បាននិយាយឡើងវិញពីការតាំងចិត្តរបស់លោក ដើម្បីឈានដល់សន្ធិសញ្ញាវិនិយោគទុនទ្វេភាគីជាមួយរដ្ឋាភិបាលទីក្រុងប៉េកាំង។
សេតវិមានប្រាប់ឲ្យដឹងថា លោកអូបាម៉ានិងលោកស៊ី ក៏បានពិភាក្សាពីសន្តិសុខប្រព័ន្ធអ៊ីនធើណិត និងការចរចាអន្តរជាតិដែលដឹកនាំដោយសហរដ្ឋអាមេរិកជាមួយប្រទេសអ៊ីរ៉ង់ស្តីពីកម្មវិធីអាវុធនុយក្លេអ៊ែរបស់ខ្លួន។
កាលពីពេលថ្មីៗនេះ សហរដ្ឋអាមេរិកបានចោទប្រកាន់ការវាយប្រហារតាមប្រព័ន្ធអ៊ីនធើណិតដែលធ្វើឡើងដោយពួកអ្នកវាយប្រហារចិនប្រឆាំងក្រុមហ៊ុនអាមេរិកាំងនានានិងគោលដៅសំខាន់ៗរបស់រដ្ឋាភិបាល។ ចិនបានច្រានចោលការចោទប្រកាន់ទាំងនោះ។
កាលពីថ្ងៃអង្គារ សេតវិមានបានប្រកាសបង្កើតទីភ្នាក់ងារសហព័ន្ធមួយដើម្បីវិភាគការគំរាមកំហែងដល់សន្តិសុខប្រព័ន្ធអ៊ីនធើណិត របស់ជាតិនិងសម្របសម្រួលយុទ្ធសាស្រ្ត ដើម្បីប្រយុទ្ធក្រុមអ្នកចូលលួចមើល៕
