ប្រទេសចិនបានចិនបញ្ជូនក្រុមអវកាសយានិកដំបូងទៅកាន់ស្ថានីយអវកាសអចិន្ត្រៃយ៍ថ្មីរបស់ខ្លួនក្នុងតារាវិថីនៅព្រឹកថ្ងៃព្រហស្បតិ៍នេះ។ អវកាសយានិកជើងចាស់លោកNie Haisheng និងលោកLiu Bomingបានចាកចេញពីមជ្ឈមណ្ឌលបាញ់បង្ហោះផ្កាយរណបJiuquanនៅភាគពាយព្យប្រទេសចិនតាមយានអវកាស Shenzhou-12 ។
មនុស្សជាច្រើនបានជូនពរអវកាសយានិកទាំងបីនាក់នៅក្នុងពិធីដ៏ឱឡារិកមួយមុនពេលពួកគេឡើងជិះរថយន្តទៅកាន់កន្លែងបាញ់បង្ហោះយានអវកាសរបស់ពួកគេ។នេះជាបេសកកម្មអវកាសរបស់ប្រទេសចិនដែលមានមនុស្សបើកដំបូងគេក្នុងរយៈពេល៥ឆ្នាំ។
អ្នកទាំងបីត្រូវបានគេរំពឹងថានឹងទៅដល់ម៉ូឌុលដំបូងនៃស្ថានីយ Tianhe មានន័យថា «សួគ៌ាសុខដុម»នៅល្ងាចថ្ងៃព្រហស្បតិ៍ហើយពួកគេនឹងធ្វើការរយៈពេល៣ខែយកឧបករណ៍បំពាក់ម៉ូឌុលនេះនិងសាកល្បងវា។
នេះជាបេសកកម្មលើកទីបីនៃបេសកកម្មចំនួន១១ដើម្បីបំពាក់សម្ភារៈបន្ថែមសម្រាប់ស្ថានីយអវកាសនេះមុនពេលវាចាប់ផ្តើមដំណើរការពេញលេញនៅឆ្នាំក្រោយ។ស្ថានីយថ្មីត្រូវបានគេរំពឹងថានឹងដំណើរការរយៈពេល១០ ឆ្នាំ។
ស្ថានីយនេះអាចមានអាយុយូរជាងស្ថានីយអវកាសអន្ដរជាតិដែលដឹកនាំដោយសហរដ្ឋអាមេរិកដែលអាចនឹងចប់បន្ទាប់ពីការផ្តល់មូលនិធិសម្រាប់ស្ថានីយអវកាសនេះផុតកំណត់នៅឆ្នាំ២០២៤។ប្រទេសចិនមិនដែលបានបញ្ជូនអវកាសយានិកទៅស្ថានីយអវកាសអន្ដរជាតិទេដោយសារតែច្បាប់របស់សហរដ្ឋអាមេរិកមិនឲ្យទីភ្នាក់ងារអវកាសណាសា (NASA ) របស់ស.រ.អា.សហការជាមួយប្រទេសចិន។
ប្រទេសចិនកំពុងតែបង្កើតកម្មវិធីអវកាសរបស់ខ្លួនយ៉ាងខ្លាំងជាឧទាហរណ៍នៃការលើកសម្ពស់មុខមាត់ជាសកលនិងកម្លាំងបច្ចេកវិទ្យា។ចិនបានក្លាយជាប្រទេសទី៣ក្នុងការបញ្ជូនមនុស្សទៅក្នុងអវកាសក្នុងឆ្នាំ២០០៣បន្ទាប់ពីសហរដ្ឋអាមេរិកនិងរុស្ស៊ីនិងបានដំណើរការស្ថានីយអវកាសពិសោធន៍បណ្តោះអាសន្នចំនួន២ដោយក្រុមអវកាសយានិក។
ទើបតែនៅឆ្នាំនេះប្រទេសចិនបានបញ្ជូនយានអង្កេតដោយគ្មានមនុស្សបើកចូលទៅក្នុងតារាវិថីជុំវិញភពព្រះអង្គារចំណែកឯយានអង្កេតមួយទៀតបាននាំយកសំណាកដំបូងពីភពព្រះច័ន្ទក្នុងពេលជាង៤០ឆ្នាំ៕
