ប្រព័ន្ធផ្សព្វផ្សាយរដ្ឋរបស់ចិនបានផ្សព្វផ្សាយអំពីការតវ៉ានៅក្នុងសហរដ្ឋអាមេរិក និងបានលើកឡើងពីការគំរាមរបស់លោកប្រធានាធិបតី Donald Trump នៅក្នុងការប្រើទាហានដើម្បីបញ្ចប់ភាពចលាចលហិង្សាណាមួយនៃការតវ៉ានេះ។
ការលើកឡើងរបស់ប្រព័ន្ធផ្សព្វផ្សាយចិនទាំងនេះបានធ្វើឡើង ស្របពេលដែលខួបទី ៣១ នៃការបង្ក្រាបរបស់អាជ្ញាធរចិនលើអ្នកតវ៉ាប្រជាធិបតេយ្យនៅទីលាន Tiananmen កាលពីឆ្នាំ ១៩៨៩ ចូលមកដល់នៅថ្ងៃស្អែក។
អស់រយៈពេលជាច្រើនថ្ងៃមកហើយ ប្រព័ន្ធផ្សព្វផ្សាយរបស់ចិនបានផ្សាយអំពីការតវ៉ានៅក្នុងសហរដ្ឋអាមេរិកទាក់ទិននឹងការស្លាប់របស់លោក George Floyd ដែលបានស្លាប់ បន្ទាប់ពីប៉ូលិសម្នាក់យកជង្គង់សង្កត់ករបស់លោក។
អ្នកនាំពាក្យក្រសួងការបរទេសចិនលោក Zhao Lijian បានបញ្ជាក់ក្នុងសន្និសីទកាសែតនៅថ្ងៃពុធនេះថា៖ «ចិនតែងតែប្រឆាំងនឹងការរើសអើងពូជសាសន៍។ យើងសង្ឃឹមថា រដ្ឋាភិបាលសហរដ្ឋអាមេរិកនឹងចាត់វិធានការម៉ឺងម៉ាត់នៅក្នុងការបំពេញកាតព្វកិច្ចស្របតាមអនុសញ្ញាអន្តរជាតិស្ដីពីការលុបបំបាត់គ្រប់ទម្រង់ទាំងអស់នៃការរើសអើសពូជសាសន៍ ដើម្បីការពារសិទ្ធិស្របច្បាប់របស់ជាតិសាសន៍ភាគតិច»។
អ្នកតាមដានស្ថានការណ៍ថា ការផ្សាយអំពីការតវ៉ានេះចង់បង្ហាញឲ្យឃើញអំពីភាពខុសស្រឡះផ្ទុយពីអ្វីដែលអ្នកនយោបាយអាមេរិកាំងគាំទ្រការតវ៉ាប្រជាធិបតេយ្យនៅក្នុងទីក្រុងហុងកុង។
អ្នកស្រី Yuan Zeng សាស្ត្រាចារ្យផ្នែកប្រព័ន្ធផ្សព្វផ្សាយ និងទំនាក់ទំនង នៃសាកលវិទ្យាល័យ Leeds បាននិយាយថា៖ «យើងអាចឃើញយ៉ាងច្បាស់ថា ប្រព័ន្ធផ្សព្វផ្សាយរបស់ចិនកំពុងប្រើភាពចលាចលនៅក្នុងសហរដ្ឋអាមេរិក ដើម្បីជាលេសបញ្ជាក់ថា វិធានការរបស់ចិនលើសំណើច្បាប់សន្តិសុខជាតិសម្រាប់ទីក្រុងហុងកុងគឺត្រឹមត្រូវ និងដើម្បីវាយបកទៅវិញចំពោះការរិះគន់របស់សហរដ្ឋអាមេរិក»៕
