ក្រសួងការបរទេសអូស្ត្រាលីនិយាយកាលពីថ្ងៃអង្គារថា ខ្លួននឹងស៊ើបអង្កេតករណីវាយប្រហារដោយប៉ូលិសអាមេរិកទៅលើអ្នកសារព័ត៌មានអូស្ត្រាលីពីររូបនៅក្រៅសេតវិមានក្នុងរដ្ឋធានីវ៉ាស៊ីនតោន ខណៈអាជ្ញាធរបានបំបែកហ្វូងបាតុករនៅតំបន់នោះដើម្បីបើកផ្លូវឲ្យលោកប្រធានាធិបតីត្រាំថតរូប។
វីដេអូបង្ហាញអ្នកសារព័ត៌មាននាង Amelia Brace ត្រូវវាយនឹងដំបងប៉ូលិសខណៈអ្នកកាន់កាម៉េរាលោក Tim Myers ត្រូវប៉ូលិសដាល់ចំមុខ ក្នុងពេលកំពុងផ្សាយផ្ទាល់។
ឧប្បទ្ទវហេតុនេះត្រូវបានផ្សាយទៅទូទាំងប្រទេសអូស្ត្រាលីនិងបាននាំឲ្យមានការរន្ធត់ខ្លាំងនៅក្នុងប្រទេសមួយដែលជាសម្ព័ន្ធមិត្តរបស់សហរដ្ឋអាមេរិក។ អ្នកសារព័ត៌មានអូស្ត្រាលីក៏ថាពួកគេត្រូវគេបាញ់នឹងគ្រាប់កាំភ្លើងជ័រដែរ។
រដ្ឋមន្ត្រីការបរទេសអូស្ត្រាលីលោកស្រី Marise Payne ថាអូស្ត្រាលីកំពុងរកនីតិវិធីសម្តែងការ«បារម្ភខ្លាំង»របស់ខ្លួននេះដែលជាសញ្ញាថាអូស្ត្រាលីនឹងដាក់ពាក្យបណ្តឹងផ្លូវការអំពីរឿងនេះ។
លោកប្រធានាធិបតីត្រាំកំពុងរងការរិះគន់ខ្លាំងអំពីរបៀបដែលលោកចាត់ចែងក្នុងការគ្រប់គ្រងបាតុកម្មទូទាំងប្រទេសនេះ៕
