ភ្ជាប់​ទៅ​គេហទំព័រ​ទាក់ទង

ចិន​ច្រាល​ចោល​ការ​ពាក់​ព័ន្ធ​​ក្នុង​ការ​ដឹក​ជញ្ជូន​ប្រេង​ខុសច្បាប់​​ឲ្យ​កូរ៉េ​ខាង​ជើង


នាវា​ Lighthouse Winmore ត្រូវ​បាន​គេ​ឃើញ​នៅ​កំពង់​ផែ Yeosu ក្នុង​សមុទ្រ​​​កូរ៉េ​ខាង​ត្បូង កាល​ពី​ថ្ងៃ​ទី​២៩ ខែ​ធ្នូ ឆ្នាំ​២០១៧។ ប្រទេស​កូរ៉េខាង​ត្បូង​បាន​ចាប់​នាវា​នេះ​ហើយ​បាន​ត្រួត​ពិនិត្យ​លើ​នាវា​នេះកាល​ពីខែ​វិច្ឆិកា ដោយសារ​តែ​បាន​ដឹក​ប្រេង​ទៅកូរ៉េ​ខាង​ត្បូង​បំពាន​លើ​ទណ្ឌកម្ម។

​ចិន​បាន​ច្រាន​ចោល​ការ​សម្រប​សម្រួល​ការ​ដឹក​ជញ្ជូន​ប្រេង​ទៅ​ឲ្យ​កូរ៉េខាង​ជើង​ដែល​ជា​ការ​រំលោភ​ការ​ដាក់​ទណ្ឌកម្ម​របស់​ក្រុម​ប្រឹក្សា​សន្តិសុខ​របស់​អង្គការ​សហប្រជាជាតិ។

ការ​បដិសេធ​នេះ​ធ្វើ​ឡើង​មួយ​ថ្ងៃ​បន្ទាប់​ពី​ប្រធានា​ធិបតីអាមេរិក​ដូណាល់ ​ត្រាំ​ បាន​ចោទ​ប្រកាន់​រដ្ឋាភិបាល​ក្រុង​ប៉េកាំង​ពី​ការ​ដឹក​ជញ្ជូន​ប្រេង​ឲ្យ​រដ្ឋាភិបាល​ក្រុង​ព្យុងយ៉ាង។

លោកស្រី ​Hua Chunying​ អ្នកនាំ​ពាក្យ​ក្រសួង​ការបរទេស​ចិន​បាន​ប្រាប់​ពួក​អ្នក​យក​ព័ត៌មាន​កាល​ពី​ថ្ងៃ​សុក្រ​នៅឯ​សន្និសីទ​កាសែត​ថា៖ «ចិន​បាន​អនុវត្ត​យ៉ាង​ពេញ​លេញ​និង​តឹងរ៉ឹង​នូវ​សេចក្តី​សម្រេច​របស់​ក្រុម​ប្រឹក្សា​សន្តិសុខនិង​បំពេញ​ទៅ​តាម​កាតព្វកិច្ច​អន្តរជាតិ។ យើង​មិន​ដែល​អនុញ្ញាត​ឲ្យ​ពលរដ្ឋនិង​សហគ្រាស​ចិន​ពាក់​ព័ន្ធ​ក្នុង​សកម្មភាព​នានា​ដែល​រំលោភ​សេចក្តី​សម្រេច​របស់​ក្រុម​ប្រឹក្សា​សន្តិសុខអង្គការ​សហ​ប្រជា​ជាតិ​ទេ‍»។

​ថ្វី​បើ​ចិន​និយាយ​យ៉ាង​ទទូច​ថា ​ការ​ដាក់​ទណ្ឌកម្មទាំង​នោះ​បាន​ត្រូវ​អនុវត្ត​ក៏​ដោយ ​ការ​មន្ទិល​សង្ស័យនៅ​តែ​មាន​នៅ​ក្នុង​សហរដ្ឋ​អាមេរិក​ ​កូរ៉េខាង​ត្បូង​និង​ជប៉ុន ​អំពី​ភាព​ច្រឡោះ​ប្រហោង​បន្ត​មាន​ឡើង។ ​ហើយ​ការ​បដិសេធ​ម្តងហើយ​ម្តង​ទៀត​របស់​ចិនមិន​បាន​រារាំង​ប្រធានា​ធិបតី​ ត្រាំ​ មិន​ឲ្យ​បញ្ជូន​សារ​តាម​ប្រព័ន្ធ​ Twitter ​កាល​ពី​ថ្ងៃ​ព្រហស្បតិ៍​ថា ​លោក​មាន​ការ​អាក់​អន់​ចិត្ត​យ៉ាង​ខ្លាំង​ដែល​ចិន​អនុញ្ញាត​ឲ្យ​ប្រេង​ចូល​ក្នុង​ប្រទេស​កូរ៉េ​ខាង​ជើង។

​ក្រុម​ប្រឹក្សា​សន្តិសុខរបស់​អង្គការ​សហប្រជាជាតិ​កាល​ពីពេល​មុន ​បាន​ដាក់​ទណ្ឌ​កម្ម​ថ្មីដែល​បាន​ធ្វើ​ឡើង​ដើម្បី​កម្រិត​ការ​នាំ​ប្រេង​ចេញ​ចូល​របស់​កូរ៉េ​ខាង​ជើង​នៅ​ក្នុង​ការ​ឆ្លើយ​តប​ទៅ​នឹងការ​សាកល្បង​កាំជ្រួច​វង់​ប្រតិបត្តិការ​ឆ្ងាយ​កាល​ពី​ពេល​ថ្មីៗ​នេះ​របស់​កូរ៉េខាង​ជើង។​ កាល​ពី​ខែ​វិច្ឆិកា ​កូរ៉េខាង​ជើង​បាន​សាក​ល្បង​កាំជ្រួចអន្តរទ្វីប​របស់​ខ្លួន​ដែលពួក​អ្នក​ជំនាញ​ការ​ជា​ច្រើន​របស់​សហរដ្ឋ​អាមេរិកបាន​ព្រមាន​ថា ​កាំជ្រួច​នោះ​នឹង​មាន​សមត្ថភាព​វាយ​ប្រហារ​នៅ​លើ​ដី​សហរដ្ឋ​អាមេរិក៕

XS
SM
MD
LG