លោកប្រធានាធិបតីសហរដ្ឋអាមេរិកដូណាល់ ត្រាំបានចោទប្រកាន់ចិនកាលពីថ្ងៃព្រហស្បតិ៍ពីការសម្របសម្រួលការដឹកជញ្ជូនប្រេងចូលក្នុងប្រទេសកូរ៉េខាងជើង ថ្វីបើចិនទទូចថា ខ្លួនមិនបានរំលោភការដាក់ទណ្ឌកម្មរបស់អង្គការសហ ប្រជាជាតិដើម្បីកម្រិតការដឹកជញ្ជូនប្រេងទៅកាន់ប្រទេសនោះក៏ដោយ។
លោកប្រធានាធិបតីត្រាំបានសរសេរនៅលើប្រព័ន្ធ Twitter ថា «មានការអាក់អន់យ៉ាងខ្លាំងដែលចិនកំពុងអនុញ្ញាតឲ្យប្រេងហូរចូលក្នុងប្រទេសកូរ៉េខាងជើង។ មិនមានដំណោះស្រាយប្រកបដោយមិត្តភាពដល់បញ្ហាកូរ៉េខាងជើងទេ ប្រសិនបើ បញ្ហានេះកើតមានឡើងនោះ»។
កាសែតកូរ៉េខាងត្បូងបានរាយការណ៍កាលពីព្រឹកថ្ងៃព្រហស្បតិ័ម្សិលមិញថា កប៉ាល់របស់ចិននិងកូរ៉េខាងជើងបានផ្ទេរប្រេងឥន្ធនៈដោយខុសច្បាប់នៅឯសមុទ្រចូលក្នុងប្រទេសកូរ៉េខាងជើង។
ក្រុមប្រឹក្សាសន្តិសុខរបស់អង្គការសហប្រជាជាតិកាលពីសប្តាហ៍មុនបានដាក់ទណ្ឌកម្មថ្មីដែលធ្វើឡើងដើម្បីកម្រិតការនាំប្រេងចូលរបស់កូរ៉េខាងជើងនៅក្នុងការឆ្លើយតបទៅនឹងការសាកល្បងកាំជ្រួចមីស៊ីលវង់ប្រតិបត្តិការឆ្ងាយកាលពីពេលថ្មីៗនេះរបស់កូរ៉េខាងជើង។ កាលពីខែវិច្ឆិកា កូរ៉េខាងជើងបានបាញ់បង្ហោះសាកល្បងកាំជ្រួចមីស៊ីលបាល់លីស្ទិកអន្តរទ្វីបកាលពីពេលថ្មីៗនេះរបស់ខ្លួនដែលពួកអ្នកជំនាញជាច្រើនរបស់សហរដ្ឋអាមេរិកបានព្រមានថា កាំជ្រួចមីស៊ីលនោះមានលទ្ធភាពវាយប្រហារទៅលើដីគោករបស់សហរដ្ឋអាមេរិក។
ការដាក់ទណ្ឌកម្មស្វះស្វែងរារាំងហាមឃាត់កានាំប្រេងចេញចំនួន៩០ភាគរយទៅកាន់កូរ៉េខាងជើងដោយកម្រិតចំនួនច្រើនបំផុត៥សែនធុងក្នុងមួយឆ្នាំហើយនឹងកម្រិតប្រេងឆៅសម្រាប់នាំចេញ៤លានធុងក្នុងមួយឆ្នាំៗ។
ចិនបាននិយាយម្តងហើយម្តងទៀតថា ខ្លួនកំពុងអនុវត្តសេចក្តីសម្រេចចិត្តប្រឆាំងនឹងកូរ៉េខាងជើង ថ្វីបើមានការមន្ទិលសង្ស័យដោយសហរដ្ឋអាមេរិក កូរ៉េខាងត្បូងនិងជប៉ុនថា ភាពចន្លោះប្រហោងនៃកិច្ចព្រមព្រៀងនោះនៅតែមាន៕
