កោះតៃវ៉ាន់និងប្រទេសជប៉ុនកំពុងធ្វើការងារឆ្ពោះទៅកាន់ការចេញចូលផ្ទៃទឹកដែលសម្បូរទៅដោយត្រីនៅជុំវិញកោះ Okinotori នៅកណ្តាលមហាសមុទ្រប៉ាស៊ីហ្វិក ក្នុងចំណាត់ការមួយដែលអាចធ្វើឲ្យមានការរិះគន់យ៉ាងខ្លាំងពីប្រទេសចិន។
កាលពីថ្ងៃចន្ទ រដ្ឋាភិបាលទាំង២បានបើកការចរចាឆ្ពោះទៅកាន់កិច្ចព្រមព្រៀងមួយដែលនៅទីបញ្ចប់អាចឲ្យនាវាកោះតៃវ៉ាន់ប្រើប្រាស់ផ្ទៃទឹកនៅជុំវិញកោះដែលស្ទើរលិចទឹកដែលស្ថិតនៅចម្ងាយ១៧៤០គីឡូម៉ែត្រភាគខាងត្បូងរដ្ឋធានីតូក្យូ។
ជប៉ុនបានកាន់កាប់កោះតូចមួយដែលស្ថិតនៅក្នុងបឹងទឹកប្រៃតំបន់ត្រូពិច ហើយមានស្ថានីយ៍ស្រាវជ្រាវមួយនៅទីនោះ។ ជប៉ុនជឿថា ការអះអាងនោះទាក់ទិននឹងតំបន់សេដ្ឋកិច្ចផ្តាច់មុខក្នុងសមុទ្រដែលមានទំហំ ៣៧០៤គីឡូម៉ែត្រជុំវិញកោះ Okinotori។ កោះតៃវ៉ាន់និយាយថា គេត្រូវតែអនុញ្ញាតឲ្យអ្នកនេសាទរបស់ខ្លួនប្រើតំបន់នោះជាផ្ទៃទឹកអន្តរជាតិ។
ទោះជាយ៉ាងណាក៏ដោយ ចិនមើលឃើញកោះតៃវ៉ាន់ដែលគ្រប់គ្រងដោយខ្លួនឯងជាផ្នែកមួយនៃទឹកដីរបស់ខ្លួនជាជាងជារដ្ឋមួយដែលមានសិទ្ធិធ្វើការចរចាជាមួយរដ្ឋាភិបាលខាងក្រៅ។ ចិនក៏ដណ្តើមការត្រួតត្រាកោះ Okinotori របស់ជប៉ុនផងដែរ។
លោក Fabrizio Bozzato អ្នកស្រាវជ្រាវសមាគមយុទ្ធសាស្រ្តរបស់តៃវ៉ាន់បាននិយាយថា៖ «ខ្ញុំគិតថា ចិននឹងនិយាយថា កិច្ចព្រមព្រៀងបែបនោះរំលោភគោលនយោបាយចិនមួយហើយជាការប៉ះពាល់អធិបតេយ្យភាពរបស់ចិន»៕
