រដ្ឋមន្ត្រីការបរទសចិនលោក Wang Yi បាននិយាយនៅថ្ងៃចន្ទនេះថា សហរដ្ឋអាមេរិកនិងប្រទេសចិន អាចធ្វើការជាមួយគ្នាលើបញ្ហានានាបាន ដូចជាបញ្ហាប្រែប្រួលអាកាសធាតុ និងបញ្ហាជំងឺកូវីដ១៩ ជាដើម ប្រសិនបើប្រទេសទាំងពីរ ធ្វើឲ្យប្រសើរឡើងវិញនូវទំនាក់ទំនងទ្វេភាគីដែលមានបញ្ហាកន្លងមក។
លោក Wang បាននិយាយថា រដ្ឋាភិបាលក្រុងប៉េកាំង បានត្រៀមខ្លួនរួចហើយដើម្បីបើកឲ្យមានកិច្ចសន្ទនាប្រកបដោយផ្លែផ្កាឡើងវិញជាមួយរដ្ឋាភិបាលក្រុងវ៉ាស៊ីនតោន បន្ទាប់ពីទំនាក់ទំនងរវាងប្រទេសទាំងពីរ បានធ្លាក់ចុះដល់កម្រិតទាបបំផុតនៅពេលសហរដ្ឋអាមេរិកស្ថិតក្រោមការដឹកនាំរបស់លោកអតីតប្រធានាធិបតី Donald Trump ដែលនេះ ជាកម្រិតទាបបំផុតក្នុងរយៈពេលប៉ុន្មានទសវត្សរ៍ចុងក្រោយនេះ។
លោក Wang បានអំពាវនាវដល់រដ្ឋាភិបាលក្រុងវ៉ាស៊ីនតោនឲ្យដកចេញនូវពន្ធគយដែលលោក Trump បានដាក់លើទំនិញរបស់ចិនកន្លងមក និងលះបង់ចោលនូវអ្វីដែលលោកបាននិយាយថា ជាការគាបសង្កត់មិនសមហេតុផលលើវិស័យបច្ចេកវិទ្យារបស់ចិន។
លោក Wang បានបញ្ជាក់ថា ទាំងនេះ គឺជាជំហានដែលនឹងបង្កើតឲ្យមាន«លក្ខខណ្ឌចាំបាច់នានា» សម្រាប់កិច្ចសហប្រតិបត្តិការ។
លោក Wang បានជំរុញរដ្ឋាភិបាលក្រុងវ៉ាស៊ីនតោនឲ្យគោរពផលប្រយោជន៍គោលរបស់ប្រទេសចិន បញ្ឈប់«ការបង្ខូចកេរ្តិ៍ឈ្មោះ»របស់គណបក្សកុម្មុយនីស្តចិន បញ្ឈប់ការជ្រៀតជ្រែកចូលក្នុងកិច្ចការផ្ទៃក្នុងរបស់រដ្ឋាភិបាលក្រុងប៉េកាំង និងបញ្ឈប់«ការសមគំនិត»ជាមួយកម្លាំងផ្ដាច់ខ្លួនទាក់ទិននឹងរឿងឯករាជ្យភាពរបស់កោះតៃវ៉ាន់។
រដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងប៉េកាំង មានជម្លោះជាមួយគ្នាលើបញ្ហាជាច្រើនដូចជាបញ្ហាពាណិជ្ជកម្ម រឿងចោទប្រកាន់រំលោភសិទ្ធិមនុស្សលើជាតិសាសន៍អ៊ុយហ្គ័រ (Uighur) នៅតំបន់ Xinjiang និងបញ្ហាទាក់ទិននឹងការទាមទាររបស់ចិនលើដែនកោះនានានៅក្នុងសមុទ្រចិនខាងត្បូងជាដើម៕
