ក្នុងឆ្នាំកន្លងទៅនេះ ប្រជាប្រិយភាពនៃតារានៅតាមប្រព័ន្ធអ៊ីនធឺណិតនៅប្រទេសចិនកើនឡើងយ៉ាងខ្លាំង ហើយបានបង្កើតវិស័យទស្សនាវីដេអូផ្សាយផ្ទាល់តាមប្រព័ន្ធអ៊ីនធឺណិតយ៉ាងធំមួយ ដែលបានធ្វើឲ្យមនុស្សមួយចំនួនក្លាយទៅជាសេដ្ឋី។
ប៉ុន្តែ ស្របពេលដែលវិស័យនេះកំពុងមានប្រជាប្រិយភាពយ៉ាងខ្លាំង អាជ្ញាធរក៏កំពុងអនុវត្តការគ្រប់គ្រងយ៉ាងតឹងរ៉ឹង ដែលធ្វើឲ្យវិស័យដែលកំពុងលូតលាស់យ៉ាងរហ័សនេះក្លាយជាគោលដៅនៃការបង្រ្កាបរបស់មន្ត្រី។
ការកើនឡើងនៃតារាអ៊ីនធឺណិត បានលើកទឹកចិត្តឲ្យយុវវ័យជំនាន់ក្រោយរបស់ប្រទេសចិន ជាពិសេសចាប់ពីយុវវ័យដែលកើតនៅក្នុងទសវត្សរ៍៩០ ឡើងទៅឲ្យមានគំនិតឈោងចាប់ប្រជាប្រិយភាពនៅក្នុងទីផ្សារទស្សនាវីដេអូផ្សាយតាមប្រព័ន្ធអ៊ីនធឺណិតក្នុងស្រុក។ គេហទំព័រទិន្នន័យប្រព័ន្ធអ៊ីនធឺណិតដែលមានឈ្មោះថា Statista បានព្យាករណ៍ថា វិស័យនេះនឹងមានតម្លៃយ៉ាងតិច៩រយលានដុល្លារក្នុងឆ្នាំ២០១៦ ដែលកើនឡើង៥៥ ភាគរយពីឆ្នាំ២០១៥ ជាមួយនឹងក្រុមទស្សនិកជនលើសពី៥រយលាននាក់។
តារាល្បីតាមប្រព័ន្ធអ៊ីនធឺណិតដែលភាសាចិនហៅថា Wang Hong
តារាតាមប្រព័ន្ធអ៊ីនធឺណិត ឬជាភាសាចិនហៅថា «Wang Hong» សំដៅទៅលើអ្នកដែលក្លាយជាតារាតាមប្រព័ន្ធអ៊ីនធឺណិត ដែលអាចបង្វិលប្រជាប្រិយភាពនៅលើប្រព័ន្ធអ៊ីនធឺណិតរបស់ពួកគេឲ្យទៅជាជំនួញជាក់ស្តែងក្នុងវិស័យផ្សេងៗទៀត មិនត្រឹមតែនៅក្នុងវិស័យកម្សាន្ត សម្ផស្ស និងម៉ូដទាន់សម័យ។
Huang Xianer ជានិស្សិតមហាវិទ្យាល័យ ក្នុងជំនាញការផ្សព្វផ្សាយ។ និស្សិតអាយុ២០ឆ្នាំរូបនេះ ជាយុវវ័យម្នាក់ក្នុងចំណោមយុវវ័យផ្សេងទៀតដែលមានសុបិនចង់ក្លាយជា «Wang Hong» ហើយក្នុងនោះក៏មានមិត្តភ័ក្ដិរបស់នាងផងដែរ។
Huang បានប្រាប់ VOA ថា៖ «ក្រោយពីខ្ញុំបានបញ្ចប់ការសិក្សា[ពីមហាវិទ្យាល័យនៅរដូវក្តៅ] យុគសម័យអ៊ីនធឺណិតបានរីកដុះដាលខ្លាំង ហើយវិស័យទស្សនាវីដេអូផ្សាយតាមប្រព័ន្ធអ៊ីនធឺណិតក៏ចាប់ផ្តើមកើនឡើងយ៉ាងឆាប់រហ័ស។ មិត្តរួមថ្នាក់របស់ខ្ញុំមួយចំនួន ក៏បានប្រឡូកក្នុងវិស័យនេះផងដែរ»។
ស្របពេលដែលតារាអ៊ីនធឺណិតស្រីៗវ័យក្មេងជាច្រើនបានច្រៀង ឬរាំ និងនិយាយសាសងជាមួយបុរសៗនៅតាមប្រព័ន្ធអ៊ីនធឺណិត Huangបានរកឃើញប្រធានបទផ្សេង។ នាងបានប្រើប្រាស់ការហ្វឹកហាត់របស់នាងក្នុងនាមជាអ្នកជំនាញទេសចរណ៍មួយរូប ដើម្បីផលិតវីដេអូទេសចរខ្នាតខ្លីក្នុងទីក្រុង។ វីដេអូទាំងនេះ បានថត និងផលិតមុនពេលបង្ហោះចូលប្រព័ន្ធវីដេអូផ្សាយផ្ទាល់របស់ក្រុមហ៊ុននាងក្នុងបណ្ដាញ Youku ដែលជាYoutube របស់ប្រទេសចិន។
ចំណូលពីចំនួនអ្នកចូលទស្សនា(ចំនួនចូលមើលគេហទំព័រអ៊ីនធឺណិត) និងការឧបត្ថម្ភពីក្រុមហ៊ុន ជាប្រភពចំណូលនៃពាណិជ្ជកម្មតាមប្រព័ន្ធអ៊ីនធឺណិត ប៉ុន្តែវាមិនទាន់ក្លាយជាផលចំណេញទេ ព្រោះ Huang ទើបតែចាប់ផ្ដើមទាក់ទាញអ្នកតាមដានទស្សនារាប់ពាន់នាក់។ នេះបើយោងតាមក្រុមហ៊ុនរបស់នាង ដែលមានឈ្មោះថា Vermodel។ ក្រុមហ៊ុនខ្នាតតូច ដែលមានបុគ្គលិក១០នាក់មួយនេះ បានចុះកិច្ចសន្យាជាមួយមនុស្សលើអ៊ីនធឺណិត ជាង៣០នាក់។
វិថីទៅកាន់តារា
ជំនាន់ដំបូងនៃតារាប្រព័ន្ធអ៊ីនធឺណិត ដែលល្បីបំផុតនៅប្រទេសចិន មានទាំងអ្នកផ្នែកអក្សរសាស្រ្ត ដូចជា អ្នកនិពន្ធតាមអ៊ីនធឺណិត Han Han ដែលបានក្លាយជាមនុស្សមានឥទ្ធិពលជាងគេប្រចាំឆ្នាំ២០១០ ចុះផ្សាយដោយទស្សនាវដ្ដី Time។
តាំងពីពេលនោះមក ជាមួយនឹងការរីកចម្រើនដល់កំពូលរបស់បណ្ដាញសង្គម ដែលបានគាំទ្រដោយបច្ចេកវិទ្យាសម្រាប់វីដេអូតាមប្លុក(Blog) អ្នកប្រើប្រាស់ប្រព័ន្ធអ៊ីនធឺណិតនៅប្រទេសចិន ត្រូវបានអនុញ្ញាតឲ្យចែករំលែករូបភាពនិងវីដេអូ ដែលបង្កើតដោយអ្នកប្រើប្រាស់ ដើម្បីបង្កើនប្រជាប្រិយភាព។ នេះជាសម្តីរបស់លោក Meng Deming ប្រធាននៃ Qingdao Micro Innovation Marketing Planning Co. ។
លោកMengនិយាយថា៖ តាមរយៈការវាយលុកនៃគ្រឿងអេឡិចត្រូនិចកាន់នឹងដៃបាន ការរីកសាយរបស់វីដេអូអ៊ីនធឺណិតបានកើនឡើងនូវសន្ទុះដែលធ្វើឲ្យវិថីទៅកាន់តារារបស់ Wang Hong កាន់តែងាយស្រួលជាងមុន។
លោកបន្ថែមទៀតថា ភាពជោគជ័យរបស់ Papi Jiang ដែលការសម្ដែងកំប្លែងនិយាយក្នុងចង្វាក់ញាប់របស់គាត់បានបង្កើតជានិន្នាការថ្មីមួយ ក្នុងវិស័យដែលទើបតែលេចចេញនេះ។
លោក Meng និយាយថា៖ «ក្នុងឆ្នាំ២០១៦ សេដ្ឋកិច្ច នៃតារាអ៊ីនធឺណិត(Wang Hong)នេះ បានរីកចម្រើនខ្លាំង ដោយសារតែ[ការកើនឡើង]នៃការបង្ហោះវីដេអូ។ ឧទាហរណ៍ Papi Jiang ដែលបានប្រមូលមូលនិធិសម្រាប់នាងក្នុងដើមឆ្នាំនេះ ហើយនាងបានក្លាយជាប្រធានបទដែលមនុស្សគ្រប់គ្នាចាប់អារម្មណ៍»។
វីដេអូកំប្លែងនិយាយម្នាក់ឯងរបស់Jiang បានបង្កើតភាពសើចក្អាកក្អាយក្នុងប្រធានបទសាមញ្ញ ដែលមានទាំងទំនាក់ទំនងរវាងបុរស និងស្ត្រីនៅប្រទេសចិន។
ក្នុងរយៈពេលបួនខែ វីដេអូរបស់នាងត្រូវបានចុចមើលលើសពី២៩០លានដង។
នាងបានក្លាយជាប្រធានបទក្តៅៗក្នុងរយៈពេលមួយយប់នៅខែមីនា នៅពេលដែលអ្នកបណ្តាក់ទុនមូលធននិយមម្នាក់បានបណ្ដាក់ទុន១,៧លានដុល្លា និងអ្នកដេញថ្លៃបានឲ្យថ្លៃរហូតដល់៣លានដុល្លារ ដើម្បីបានតារាអ៊ីនធឺណិតរូបនេះផ្សាយពាណិជ្ជកម្មយីហោរបស់ពួកគេ ក្នុងកម្មវិធីដេញថ្លៃវីដេអូពាណិជ្ជកម្មមួយនៅខែមេសា។
ដូចនេះ ស្ថានភាពសេដ្ឋកិច្ចរបស់តារាអ៊ីនធឺណិតនៅប្រទេសចិន នឹងអាចជោគជ័យជាងនេះទៅទៀត ប្រសិនបើវិសាលភាពរបស់តារាអ៊ីនធឺណិតពង្រីកដោយរួមបញ្ចូលទស្សនៈរបស់អ្នកមានឥទ្ធិពលនៅក្នុងវិស័យផ្សេងៗ ដែលទ្រទ្រង់គំរូពាណិជ្ជកម្មដែលអាចសម្រេចបានតាមអ៊ីនធឺណិត។ នេះបើតាមសម្តីរបស់អ្នកវិភាគ។
ការគ្រប់គ្រងប្រព័ន្ធអ៊ីនធឺណិត
ប៉ុន្តែការគ្រប់គ្រងប្រព័ន្ធអ៊ីនធឺណិតទ្រង់ទ្រាយធំ ដែលមានទាំងការហាមឃាត់ការទស្សនាវីដេអូផ្សាយផ្ទាល់តាមប្រព័ន្ធអ៊ីនធឺណិតក្នុងពេលថ្មីៗនេះ បានវាយប្រហារដល់ស្ថានភាពវិស័យនេះទាំងមូល ទោះបីជាឥទ្ធិពលជះលើអ្នកប្រើប្រាស់ប្រព័ន្ធអ៊ីនធឺណិតត្រូវបានប៉ាន់ស្មានថា មានកម្រិតនៅឡើយ។ នេះជាការពិពណ៌នាបន្ថែមរបស់លោក Meng។
ក្នុងកម្រិតបុគ្គល ឧទាហរណ៍ដូចជាJiang ត្រូវបានគេរាយការណ៍ថា មានបណ្ដាញសង្គមមួយចំនួនបានលុបចោលខ្លឹមសារមួយចំនួនដែលនាងបានបង្ហោះ។ ហើយក្នុងនោះ អាជ្ញាធរបានសន្មតថានាងបានប្រើភាសាជេរប្រមាថ ឬភាសារំលោភបំពាន។
Vermodel និយាយថា ទេពកោសល្យរបស់ពួកគេមិនទាន់ទទួលបានការព្រមានអ្វីនៅឡើយទេ ក្រៅពីការដាស់តឿនពីបណ្ដាញសង្គមផ្ទាល់ ដើម្បីធានាការផ្សាយផ្ទាល់វីដេអូរបស់ពួកគេមាន«យុវវ័យភាព និងមិនមានការប៉ះពាល់ផ្សេងៗ»។
បើយោងតាមសេចក្តីប្រកាសមួយពីក្រសួងវប្បធម៌នៅដើមខែធ្នូ ក្នុងវិស័យទាំងមូល គ្មានវីដេអូផ្សាយផ្ទាល់ណានឹងត្រូវបានអនុញ្ញាតទេ ប្រសិនបើបណ្តាញណាមួយក្នុងបណ្ដាញផ្សាយផ្ទាល់ទាំង២០០ក្នុងប្រទេស មិនអាចធានាតាមលិខិតអនុញ្ញាត។
អ្នកសម្ដែងតាមវីដេអូផ្សាយផ្ទាល់ ក៏តម្រូវឲ្យចុះឈ្មោះពិតរបស់ពួកគេក្នុងបណ្ដាញប្រព័ន្ធផ្សព្វផ្សាយ ដែលនឹងទទួលខុសត្រូវចំពោះខ្លឹមសារដែលពួកគេបង្ហោះ។ នេះបើតាមការបន្ថែមនៅក្នុងសេចក្ដីប្រកាស ដែលដើរទន្ទឹមនឹងបទបញ្ជាដែលរដ្ឋបាលនៃប្រព័ន្ធផ្សព្វផ្សាយ ការបោះពុម្ព វិទ្យុ និងទូរទស្សន៍ បានធ្វើការកែតម្រូវចុងក្រោយនៅខែសីហា។
បើយោងតាមការរាយការណ៍របស់ប្រព័ន្ធផ្សព្វផ្សាយក្នុងស្រុក ការរៀបចំឡើងវិញនៃវិស័យនេះគឺមិនអាចចៀសផុតឡើយ ស្របពេលដែលបណ្ដាញផ្សាយផ្ទាល់ទាំង២០០ក្នុងប្រទេស ដែលមានទាំង douyu.com, live.bilibili.com និងhuya.comអាចស្ថិតនៅក្រោយរ៉ាដាឃ្លាំមើលរបស់រដ្ឋបាល។
ការរារាំងសេរីភាពក្នុងការបញ្ចេញមតិ
ទោះបីជាយ៉ាងណាក៏ដោយ លោក Qiao Mu សាស្ត្រាចារ្យមួយរូបនៅសាកលវិទ្យាល័យសិក្សាបរទេសប៉េកាំង(Beijing Foreign Studies University) បានលើកឡើងថា គោលដៅពិតប្រាកដនៃការរឹតបន្តឹងការគ្រប់គ្រងរបស់អាជ្ញាធរ គួរតែជាអ្នកមានឥទ្ធិពលក្នុងការអភិវឌ្ឍនយោបាយ និងព្រឹត្តិការណ៍ចម្រូងចម្រាសក្នុងសង្គម។
លោក Qiaoនិយាយថា៖ «អ្វីដែលអាជ្ញាធរចង់គ្រប់គ្រងពិតប្រាកដនោះ គឺខ្លឹមសារនយោបាយ ដោយសារកម្មវិធីផ្សាយផ្ទាល់ខ្លះ ឬក្រុមពិភាក្សាខ្លះអាចមានខ្លឹមសារទាក់ទងនឹងនយោបាយ ឬបញ្ហាសង្គម។ នេះបានក្លាយជាប្រធានបទ ដែលអាជ្ញាធរព្យាយាមបង្ក្រាប»។
លោកសាស្ត្រាចារ្យបានបន្ថែមទៀតថា ការហាមឃាត់ការផ្សាយផ្ទាល់ថ្មីៗនេះ នឹងដើរទន្ទឹមនឹងការគ្រប់គ្រងប្រព័ន្ធអ៊ីនធឺណិតទ្រង់ទ្រាយធំ ដែលអាជ្ញាធរបានដាក់បញ្ចូលគ្នា ដើម្បីរារាំងសេរីភាពក្នុងការបញ្ចេញមតិក្នុងប្រព័ន្ធអ៊ីនធឺណិត ឬក្រៅពីប្រព័ន្ធអ៊ីនធឺណិត។
តាមសម្តីរបស់ Qiao ទោះបីជាយ៉ាងណាក៏ដោយ វិស័យកម្សាន្តនឹងទទួលឥទ្ធិពលមានកម្រិត ខណៈពេលដែលបណ្ដាញទំនាក់ទំនងនឹងមិនគាំទ្រខ្លឹមសារនយោបាយ ដែលពួកគេនឹងតម្រូវឲ្យអនុវត្តការរិតត្បិតខ្លឹមសារ៕
កំណត់សម្គាល់៖ សេចក្តីរាយការណ៍នេះ មានការចូលរួមចំណែករាយការណ៍ពីលោក Bill Ide នៃVOA ដែលប្រចាំការនៅទីក្រុងប៉េកាំង។
ប្រែសម្រួលដោយ វិញ សុជាតា
