លោក Paul Biya ប្រធានាធិបតីរបស់ប្រទេសកាមេរូន (Cameroon) បានស្វាគមន៍ការចូលរួមរបស់កងទ័ពអាមេរិកក្នុងការវាយប្រហារប្រឆាំងនឹងក្រុម Boko Haram។ ប៉ុន្តែ ពលរដ្ឋកាមេរូនជាច្រើនមិនទាន់បានយល់ពីតួនាទីរបស់កងទ័ពនេះ នៅក្នុងសង្គ្រាមនៅឡើយទេ។
នៅក្នុងសារចុងឆ្នាំរបស់លោក លោក Paul Biya ប្រធានាធិបតីរបស់ប្រទេសកាមេរូន (Cameroon) លោកបាននិយាយថា ក្រុមឧទ្ទាម Boko Haram នៅតែជាឧបសគ្គចម្បងមួយសម្រាប់ការអភិវឌ្ឍ សន្តិភាព និងសន្តិសុខនៅក្នុងប្រទេសនេះ ហើយលោកបានសរសើរនូវអ្វីដែលលោកហៅថា បទពិសោធន៍ និងមានភាពស្ទាត់ជំនាញរបស់កងទ័ពអាមេរិកក្នុងការជួយប្រទេសកាមេរូន។
លោកបាននិយាយថា លោកសូមអរគុណជាពិសេសទៅកាន់រដ្ឋាភិបាលអាមេរិកដែលបានបញ្ជូនកងទ័ព មកជួយយោធាកាមេរូនក្នុងការរំដោះប្រទេសនេះចេញពីក្រុមឧទ្ទាម Boko Haram។ លោកនិយាយថា លោកពិតជាសប្បាយរីករាយនឹងទំនុកចិត្តរបស់ពលរដ្ឋអាមេរិក ជាពិសេសដោយសារតែឥឡូវនេះកងទ័ពអាមេរិកកំពុងផ្តល់ព័ត៌មាន និងការបណ្តុះបណ្តាលសំខាន់ៗទៅកាន់យោធានៃប្រទេសរបស់លោក។
មេដឹកនាំយុវជនកាន់សាសនាឥស្លាមវ័យ៣៩ឆ្នាំម្នាក់ឈ្មោះ Bouba Ahijo និយាយថា ពលរដ្ឋនៅក្នុងក្រុង Garoua ភាគខាងជើងនៃប្រទេសកាមេរូនទទួលបានដំណឹងថា ទាហានអាមេរិកមកទីនេះដើម្បីជួយរំដោះពួកគេពីភាពយង់ឃ្នងរបស់ក្រុមឧទ្ទាម Boko Haram។ ប៉ុន្តែ លោកបាននិយាយថា លោកនៅតែមិនទាន់ដឹងថាតើទាហានអាមេរិកទាំងនោះបានធ្វើអ្វីខ្លះនោះទេ បន្ទាប់ពីពួកគេបានមកដល់ជាងពីរខែទៅហើយនោះ។
លោកនិយាយថា លោករំពឹងថា កងកម្លាំងអាមេរិកនឹងធ្វើការរួមប្រយុទ្ធជាមួយនឹងទាហានកាមេរូនដើម្បីយកឈ្នះលើក្រុមឧទ្ទាម Boko Haram ប៉ុន្តែ ផ្ទុយទៅវិញ ពួកគេស្ថិតនៅក្នុងទីស្នាក់ការរបស់ពួកគេចាប់តាំងពីពេលដែលពួកគេបានមកដល់។ លោកបានចោទជាសំណួរថា តើហេតុអ្វីបានជាទាហានអាមេរិកមិនវាយប្រហារលើក្រុមឧទ្ទាម Boko Haram ដូចអ្វីដែលលោកបានឮថា ពួកគេបានវាយប្រហារមូលដ្ឋានទ័ពរបស់រដ្ឋឥស្លាមនៅក្នុងប្រទេសអ៊ីរ៉ាក់។
ប្រទេសកាមេរូនបានប្រយុទ្ធជាមួយក្រុមឧទ្ទាម Boko Haram ដែលបានទន្រ្ទានចូលទឹកដីខ្លួនពីប្រទេសនីហ្សេរីយ៉ាកាលពីបីឆ្នាំមុន។ យោងទៅតាមអង្គការសហប្រជាជាតិ ពលរដ្ឋជាង២០.០០០នាក់បានបាត់បង់ជីវិត និងមនុស្សជាង២លាននាក់ត្រូវបានជម្លៀសចេញ។
មេបញ្ជាការកងទ័ពជើងទឹក លោកវរសេនីយ៍ Mike Davis បានពិពណ៌នាប្រភេទជំនួយរបស់អាមេរិកដល់កងទ័ពកាមេរូននៅក្នុងការវាយប្រហារប្រឆាំងនឹងក្រុមឧទ្ទាម Boko Haram។
«រដ្ឋាភិបាលកាមេរូនបានស្នើសុំរដ្ឋាភិបាលអាមេរិកដើម្បីជួយពួកគេប្រយុទ្ធប្រឆាំងនឹងក្រុមឧទ្ទាម Boko Haram។ ដូច្នេះ អ្វីដេលយើងកំពុងតែធ្វើគឺជួយរដ្ឋាភិបាលកាមេរូនក្នុងការវាយប្រហារលើក្រុមឧទ្ទាម Boko Haram។ ការគាំទ្រនោះធ្វើឡើងតាមរយៈការបង្រៀនបើកយន្តហោះដោយបញ្ជាពីចម្ងាយ វគ្គបណ្តុះបណ្តាល និងផ្នែកសន្តិសុខមួយចំនួនទៀត»។
លោកឧត្តមសេនីយ៍ Ndjonkep Mehomy Frederick ដែលជាមេបញ្ជាការម្នាក់ក្នុងចំណោមមេបញ្ជាការកំពូលៗរបស់កាមេរូនដែលកំពុងប្រយុទ្ធនឹងក្រុមឧទ្ទាម Boko Haram និយាយថា ជំនួយដែលពួកគេកំពុងទទួលបានពីទាហានអាមេរិកគឺ វគ្គបណ្តុះបណ្តាលជាមូលដ្ឋាន និងការចែករំលែកព័ត៌មានស៊ើបការណ៍។
លោកនិយាយថា ទាហានអាមេរិកមានយន្តហោះគ្មានមនុស្សបើក (drones) ទំនើបៗដែលអាចផ្តល់ឲ្យពួកគេនូវព័ត៌មានសំខាន់ៗទាន់ពេលវេលា ហើយពួកគេអាចធ្វើអន្តរាគមន៍ប្រឆាំងនឹងក្រុមភេវរកម្មនៅកន្លែងណាក៏ដោយឲ្យតែមានការវាយប្រហារកើតឡើង ឬមានការរៀបចំផែនការវាយប្រហារ។ លោកនិយាយថា ទាហានអាមេរិកបានសហការយ៉ាងពេញលេញក្នុងការតាមដាន និងការចែករំលែកព័ត៌មាន ដែលមានសារៈសំខាន់យ៉ាងខ្លាំងនៅក្នុងសង្រ្គាមប្រឆាំងនឹងក្រុមភេវរកម្ម។
អ្នកនាំពាក្យរបស់យោធាកាមេរូន លោកវីរសេនីយ៍ Didier Badjeck និយាយថា ពលរដ្ឋមិនគួររំពឹងទុកថា ទាហានអាមេរិកស្ថិតនៅសមរភូមិជួរមុខនោះទេ ប៉ុន្តែ ពួកគេគួរគិតថា ទាហានអាមេរិកជាផ្នែកយ៉ាងសំខាន់មួយនៅក្នុងជ័យជម្នះរបស់កាមេរូនប្រឆាំងនឹងក្រុមបះបោរ។
លោកនិយាយថា ទាហានអាមេរិកស្ថិតនៅក្នុងប្រទេសកាមេរូនដើម្បីជួយបង្រ្កាបក្រុមឧទ្ទាម Boko Haram ជាមួយនឹងបច្ចេកវិទ្យាទំនើបៗរបស់ខ្លួន ហើយថាចាប់ពីខែកុម្ភៈ ឆ្នាំ២០១៦ ពួកគេនឹងចេញប្រតិបត្តិការពេញលេញ នៅពេលដែលពលទាហានដែលនៅសេសសល់នឹងមកដល់ប្រទេសកាមេរូន ដើម្បីបង្រ្គប់ចំនួន៣០០ដូចអ្វីដែលលោកប្រធានាធិបតីបារ៉ាក់ អូបាម៉ា បានសន្យា។
នៅក្នុងខែធ្នូ ប្រទេសកាមេរូនបានប្រកាសថា ទាហានរបស់ខ្លួន និងទាហាននីហ្សេរីយ៉ា បានរំដោះមនុស្សជាង៩០០នាក់ ពីមូលដ្ឋានរបស់ក្រុមឧទ្ទាម Boko Haram។ ក្រុមមន្រ្តីរដ្ឋាភិបាលបាននិយាយថា ពួកគេបានទទួលផលប្រយោជន៍ពីអ្នកជំនាញបច្ចេកទេសរបស់អាមេរិក។
យោធាអាមេរិកកំពុងរៀបចំមូលដ្ឋានយន្តហោះគ្មានមនុស្សបើកដំបូងរបស់ខ្លួននៅក្នុងតំបន់អាហ្វ្រិក ហើយប្រទេសកាមេរូនជឿថា មូលដ្ឋាននោះទំនងជានឹងធ្វើនៅក្នុងប្រទេសរបស់ខ្លួន។ ទាហានរបស់ប្រជាជាតិអាហ្វ្រិកកណ្តាលកំពុងតែរៀនពីរបៀបប្រើប្រាស់យន្តហោះគ្មានមនុស្សបើកសម្រាប់ឈ្លបយកការណ៍ ដែលយន្តហោះនេះយកមកពីកងទ័ពជើងទឹករបស់អាមេរិក៕
ប្រែសម្រួលដោយ ប៊ុន ប៉េងហ៊ុយ
