ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រទេស​កាមេរ៉ូន​កំណត់​យកថ្ងៃទី៧ ខែ​តុលា ខាង​មុខ សម្រាប់​ការ​បោះឆ្នោត​ប្រធានាធិបតី


រូបភាព​ឯកសារ៖ ពពែ​មួយ​ក្បាលដើរ​កាត់​អគារដែល​ត្រូវ​ឆេះខ្ទេចខ្ទី​ក្នុង​ខេត្ត​ Kembong ភាគ​និរតី​ប្រទេស​កាម៉េរូនកាលពី​ថ្ងៃទី២៩​ ខែ​ ធ្នូ ឆ្នាំ ២០១៧។
រូបភាព​ឯកសារ៖ ពពែ​មួយ​ក្បាលដើរ​កាត់​អគារដែល​ត្រូវ​ឆេះខ្ទេចខ្ទី​ក្នុង​ខេត្ត​ Kembong ភាគ​និរតី​ប្រទេស​កាម៉េរូនកាលពី​ថ្ងៃទី២៩​ ខែ​ ធ្នូ ឆ្នាំ ២០១៧។

ប្រទេស​កាមេរ៉ូន​បាន​កំណត់​យក​ថ្ងៃ​ទី ៧ ខែ​តុលា ខាង​មុខ ជា​ថ្ងៃ​បោះឆ្នោត​ជ្រើសរើស​ប្រធានាធិបតី។ ប៉ុន្តែ​គេ​នៅ​តែ​មាន​ចម្ងល់​នៅ​ឡើយ​ថា តើ​ការ​បោះឆ្នោត​នេះ​នឹង​អាច​ប្រព្រឹត្ត​ទៅ​បាន​ទេ​នៅ​ក្នុង​តំបន់​ដែល​និយាយ​ភាសា​អង់គ្លេស​ចំនួន​ពីរ​នៅ​ក្នុង​ប្រទេស​នេះ ដែល​នៅ​ក្នុង​តំបន់​នោះ អ្នក​បំបែក​ខ្លួន​កំពុង​តែ​វាយ​ប្រយុទ្ធ​ដើម្បី​ទាមទារ​ឯករាជ្យ។

លោក Abdoul-Karimou គឺ​ជា​អនុប្រធាន​គ្រប់គ្រង​នៃ​គណៈកម្មការ​រៀប​ចំ​ការ​បោះឆ្នោត​របស់​ប្រទេស​កាមេរ៉ូន។

លោក​បាន​និយាយ​ថា គណៈកម្មការ​រៀបចំ​ការ​បោះឆ្នោត មិន​ទាន់​ទទួល​បាន​ឯកសារ​ពី​បេក្ខជន​ប្រធានាធិបតី ណា​ម្នាក់​ទេ ប៉ុន្តែ​ខ្លួន​រំពឹង​ថា​នឹង​ទទួល​បាន​នា​ពេល​ខាង​មុខ។

លោក​បាន​និយាយ​ថា​ បើ​យោង​ទៅ​តាម​ច្បាប់​បោះឆ្នោត​របស់​ប្រទេស​កាមេរ៉ូន​ ប្រជា​ពលរដ្ឋ​ដែល​ចង់​ឈរ​ឈ្មោះ​ជា​ប្រធានាធិបតី​ អាច​មាន​ពេល​រហូត​ដល់​ថ្ងៃ​ទី​១៩ ខែ​កក្កដា​ខាងមុខ​ ក្នុង​ការ​បញ្ជូន​ឯកសារ​របស់​ពួកគេ​ឲ្យ​គណៈកម្មការ​រៀបចំ​ការ​បោះឆ្នោត​សម្រាប់​ធ្វើ​ការ​ត្រួតពិនិត្យ។

មាន​មនុស្ស​ប្រមាណ​ជា​១២នាក់​ហើយ​ ដែល​បាន​ប្រកាស​ពី​បំណង​របស់​ពួកគេ​ក្នុង​ការ​ឈរ​ឈ្មោះ​ជា​ប្រធានាធិបតី ដែល​ក្នុង​នោះ​រួម​មាន​ទាំង​ លោក Joshua Osih មក​ពី​គណបក្ស​រណសិរ្ស​សង្គម​ប្រជាធិបតេយ្យ ដែល​ជា​គណបក្ស​ប្រឆាំង​ដ៏​ចម្បង លោក Akere Muna ដែល​ជា​មេធាវី​ និង​ជា​អតីត​អនុប្រធាន​អង្គការ​តម្លាភាព​អន្តរជាតិ (Transparency International) លោក Maurice Kamto ដែល​ជា​ប្រធាន​ចលនា​នៃ​ការ​ចាប់​កំណើត​ឡើង​វិញ​របស់​ប្រទេស​កាមេរ៉ូន និង​លោក Kabral Libi ដែល​ជា​អ្នក​កាសែត​ផង​ដែរ។

ប្រធានាធិបតី​ដែល​កំពុង​កាន់​តំណែង​លោក Paul Biya ដែល​បាន​ធ្វើ​ជា​ប្រធានាធិបតី​ជាង​៣៥ឆ្នាំ​ហើយ​នោះ​ មិន​បាន​ប្រាប់​ទេ​ថា​ លោក​នឹង​ឈរ​ឈ្មោះ​បោះឆ្នោត។ ប៉ុន្តែ​មាន​ការ​អំពាវនាវ​ពី​សំណាក់​គណបក្ស​របស់​លោក មេដឹកនាំ​បែប​បុរាណ និង​គណបក្ស​ប្រឆាំង​មួយ​ចំនួន ឲ្យ​លោក​ឈរ​ឈ្មោះ​ជា​បេក្ខជន​របស់​ពួកគេ។

មេដឹកនាំ​បែប​បុរាណ និង​តំណាងរាស្ត្រ​លោក Chaffa Isaac បាន​និយាយ​ថា​ ពួកគេ​កំពុង​តែ​ស្នើ​ឲ្យ​លោក Biya ឈរ​ឈ្មោះ​ជា​ប្រធានាធិបតី ដោយ​រំពឹង​ថា ការ​ជាប់​ឆ្នោត​របស់​លោក​ អាច​នាំ​សន្តិភាព​ ដល់​តំបន់​ភាគ​ពាយព្យ​ដែល​ប្រឆាំង​នឹង​រដ្ឋាភិបាល ហើយ​លោក​នឹង​អនុវត្ត​បញ្ចប់​គម្រោងអភិវឌ្ឍ ដែល​លោក​បាន​ផ្ដួចផ្ដើម​ឡើង​សម្រាប់​ប្រទេស​ទាំងមូល។

«យើង​កំពុង​តែ​អំពាវនាវ​ឲ្យ​លោក​ប្រធានាធិបតី Pual Biya ចាត់​វិធាន​ការ​សមរម្យ​នានា​ដើម្បី​បង្កើត​បរិយាកាស​អំណោយ​ផល​មួយ ដែល​ជា​បរិយាកាស​សម្រាប់​សន្តិភាព​នៅ​ក្នុង​ប្រទេស​កាមេរ៉ូន និង​ជា​បរិយាកាស​សម្រាប់​ការ​បោះឆ្នោត​ដោយ​ជោគជ័យ​ ដែល​នៅ​ក្នុង​ការ​បោះឆ្នោត​នោះ លោក​គឺ​ជា​បេក្ខជន​ឈរ​ឈ្មោះ​មួយ​រូប​ផង​ដែរ​»។

ប៉ុន្តែ​លោក Joshua Osih មក​ពី​គណបក្ស​រណសិរ្ស​សង្គម​ប្រជាធិបតេយ្យ​បាន​និយាយ​ថា លោក​គិត​ថា ការ​បោះឆ្នោត​គឺ​មិន​អាច​ប្រព្រឹត្ត​ទៅ​បាន​ដោយ​ជោគជ័យ​ទេ នៅ​តំបន់​ភាគ​ពាយព្យ និង​តំបន់​ភាគ​និរតី​ដែល​នៅ​ទីនោះ​ពួក​យោធា​កំពុង​តែ​ប្រយុទ្ធ​ជា​មួយ​ក្រុម​ប្រដាប់​អាវុធ​ដែល​ទាម​ទារ​ឲ្យ​មាន​ការ​បង្កើត​រដ្ឋ​ដែល​និយាយ​ភាសា​អង់គ្លេស។

ប្រហែល​ជា​២០​ភាគរយ​នៃ​ប្រជាជន​កាមេរ៉ូន​សរុបចំនួន​២៣លាន​នាក់​ គឺ​ជា​អ្នក​ដែល​ប្រើប្រាស់​ភាសា​អង់គ្លេស​នៅ​ក្នុង​ប្រទេស​ដែល​និយាយ​ពីរ​ភាសា​នេះ​ ដែល​នៅ​ក្នុង​ប្រទេស​នេះ​ភាសា​បារាំង​គឺ​ជា​ភាសា​ចម្បង។

ជម្លោះ​នេះ​បាន​ធ្វើ​ឲ្យ​ទាហាន យុទ្ធជន​ប្រដាប់​អាវុធ និង​ពលរដ្ឋ​ ប្រមាណ​ជាង​២៥០​នាក់​ស្លាប់​បាត់បង់​ជីវិត​។ វា​ក៏​បាន​ធ្វើ​ឲ្យ​មនុស្ស​ប្រមាណ​ជា​១៦ម៉ឺន​នាក់​ផ្លាស់​ទី​កន្លែង​នៅ​ក្នុង​ប្រទេស​នេះ​ និង​បង្ខំ​ឲ្យ​មនុស្ស​រាប់​ម៉ឺន​នាក់​ទៀត​ឆ្លង​ព្រំដែន​ទៅ​កាន់​ប្រទេស​នីហ្សេរីយ៉ា។

លោក Joshua Osih និយាយ​ថា៖ «ការ​បោះឆ្នោត​នៅ​ភាគ​ពាយព្យ និង​និរតី​ គឺ​មិន​អាច​ធ្វើ​ឡើង​បាន​ទេ​នៅ​ក្នុង​កាលៈទេសៈ​បច្ចុប្បន្ន​នេះ»។

កាល​ពី​សប្ដាហ៍​មុន​ អ្នក​តំណាងរាស្ត្រ​នៅ​ក្នុង​សភា បាន​អនុម័ត​ច្បាប់​មួយ​ដែល​ពន្យា​អាណត្តិ​របស់​ពួកគេ​ចំនួន​១២ខែ ដោយ​សំអាង​ថា​ ប្រទេស​កាមេរ៉ូន​ មិន​អាច​រៀបចំ​ការ​បោះឆ្នោត​សភា​ និង​ការ​បោះឆ្នោត​ជ្រើសរើស​ប្រធានាធិបតី​ក្នុង​ឆ្នាំ​តែ​មួយ​បាន​ទេ។

អ្នក​តំណាងរាស្ត្រ​ខ្លះ​បាន​និយាយ​ថា​ ពួកគេ​បោះឆ្នោត​គាំ​ទ្រ​សំណើ​ច្បាប់​នេះ​ ពីព្រោះ​វិបត្តិ​នៅ​ក្នុង​តំបន់​និយាយ​ភាសា​អង់គ្លេស​ នឹង​រាំងស្ទះ​ដល់​ការ​បោះឆ្នោត។

កាល​ពី​ខែ​មិនា​ឆ្នាំ​មុន ការ​បោះឆ្នោត​ជ្រើសរើស​សមាជិក​ព្រឹទ្ធសភា​ មិន​អាច​ធ្វើ​បាន​ឡើយ​នៅ​ឯ​តំបន់​រដ្ឋបាលManyu និង​តំបន់​រដ្ឋបាលLebialem ដែល​សមាជិក​ក្រុម​ប្រឹក្សា​ខ្លះ​នៃ​តំបន់​ទាំង​នោះ ត្រូវ​បាន​ចាប់​ខ្លួន និង​ឃុំ​ខ្លួន​ដោយ​ក្រុម​ប្រដាប់​អាវុធ។

អ្នក​ទាមទារ​បំបែក​រដ្ឋ​ដែល​ប្រដាប់​ដោយ​អាវុធ​ បាន​គំរាម​ថា​នឹង​រារាំង​ការ​បោះឆ្នោត​ដែល​នឹង​ធ្វើ​ឡើង​នៅ​ក្នុង​តំបន់​ដែល​និយាយ​ភាសា​អង់គ្លេស។ រដ្ឋាភិបាល​និយាយ​ថា​ ខ្លួន​នឹង​ធានា​សន្តិសុខ​ និង​សុវត្ថិភាព​ជូន​អ្នក​បោះឆ្នោត។

ប្រែ​សម្រួល​ដោយ យូ សុធារី

XS
SM
MD
LG