ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ពល​រដ្ឋ​អាមេរិកាំង​ដើម​កំណើត​ខ្មែរនាំ​គ្នាតវ៉ា ​គ្រា​ដែល​ការ​បណ្តេញ​ចេញ​ពី​ប្រទេស​អាមេរិក​​កើនឡើង


រូបឯកសារ៖ ពលរដ្ឋខ្មែរមួយរូបដែលត្រូវបានបញ្ជូនត្រឡប់មកប្រទេសកម្ពុជាវិញ។ 

នៅ​ក្រោមរដ្ឋបាល​លោក​ត្រាំ ​ទី​ភ្នាក់​ងារ​ពង្រឹង​ច្បាប់​អន្តោ​ប្រវេសន៍ និង ពន្ធ​គយ ហៅ​កាត់​ថា​ ICE​ ត្រូវ​បាន​បញ្ជា​ឲ្យ​ធ្វើ​ការ​បញ្ជូន​ខ្លួន ឲ្យ​បាន​ខ្លាំង​ក្លា ហើយ​ឲ្យ​ផ្តោត​អារម្មណ៍​ជា​ពិសេស​ទៅ​លើ​ពល​រដ្ឋ​កម្ពុជា។

ពល​រដ្ឋ​អាមេរិកាំង​ដើម​កំណើត​ខ្មែរ តទល់ចំពោះ​ការបណ្តេញ​ចេញ​ពី​ប្រទេស​អាមេរិក​ ​ដែលកាន់​តែ​កើន​ចំនួន​ឡើង។ ក្រុម​មេធាវី​របស់​ពួកគេ ព្យាយាមបញ្ឈប់​បញ្ជា​បណ្តេញ​ពួក​គេ​ទៅ​ប្រទេស​កម្ពុជា​វិញ ដោយ​បាន​ទទួល​ជោគជ័យ​ខ្លះៗ។

រហូត​មក​ទល់ថ្ងៃ​សុក្រ​មុន​អ្នក​ស្រី សឿន នាថ បាន​ត្រៀម​កូន​ៗ​របស់​អ្នកស្រី សម្រាប់​ថ្ងៃ​ដែល​ស.រ.អា​បញ្ជូនឪពុក​របស់​ពួកគេ ពីស.រ.អា​ទៅ​កាន់​ប្រទេស​កម្ពុជា​វិញ ដោយសារ​ទោស​ឧក្រិដ្ឋកម្ម​មួយ​កាល​ពី​២០​ឆ្នាំ​មុន។

ប្តី​របស់​អ្នក​ស្រី គឺ​លោក ស៊ា អ៊ុន ត្រូវ​បាន​ឃុំ​ខ្លួន​ក្រោម​កម្មវិធីផ្លាស់​ប្តូរ​ទី​លំនៅ​ យ៉ាង​ចម្រូង​ចម្រាស​មួយ ដែល​បញ្ជូន​ជន​ជាតិ​កម្ពុជារាប់​រយ​នាក់ ដែល​បាន​រស់នៅ​ក្នុង​ស.រ.អា ​ហើយ​ដែល​ភាគ​ច្រើនជា​ជន​ភៀស​ខ្លួន​នោះ ឲ្យ​ត្រឡប់​ទៅ​ប្រទេស​កម្ពុជា​វិញ ដោយសារទោសព្រហ្មទណ្ឌ​កម្រិត​ស្រាល តាំង​ពី​ឆ្នាំ​២០០២មក។

អ្នក​ស្រី សឿន នាថ ដែល​មាន​ផ្ទៃ​ពោះ​ជិត​គ្រប់​ខែ​ហើយ​នោះ វេទនា​ខ្លាំង​ណាស់ ក្នុង​រយៈ​ពេល​ប៉ុន្មាន​ខែ​ចុង​ក្រោយនេះ គឺ​ចាប់​តាំង​ពីពេល​ដែលប្តី​ អ្នកស្រី ត្រូវ​បាន​ទី​ភ្នាក់​ងារ​ពង្រឹង​ច្បាប់​អន្តោ​ប្រវេសន៍ និង ពន្ធ​គយ ហៅ​កាត់​ថា​ ICE ចាប់​ខ្លួន តាំង​ពី​ថ្ងៃ​ទី​៥​កញ្ញា​មក។

«មួយ​យប់​ៗ​ខ្ញុំ​យំ​រហូត​ដល់​គេង​លក់ ពី​ព្រោះ​ខ្ញុំ​អស់សង្ឃឹម។ តើ​ឲ្យ​ខ្ញុំ​ជួយ​ប្តី​ខ្ញុំ​យ៉ាង​ម៉េច បើ​សិន​ជា​ខ្ញុំមិន​ដឹង​អ្វី​សោះ អំពីប្រព័ន្ធ​ច្បាប់​នោះ»។

សំណាង​ល្អ អ្នក​ស្រី​ នាថ ​បាន​រក​ឃើញមនុស្ស​ម្នាក់​ដែល​ចេះច្បាប់​អន្តោ​ប្រវេសន៍​យ៉ាង​ច្បាស់​លាស់ គឺមេធាវី Kevin Lo ​នៃ​អង្គការការពារ​សិទ្ធិ​ជន​អន្តោ​ប្រវេសន៍​អាស៊ី Asian Law Caucus ហៅ​កាត់​ថា ALC។ សំណាង​របស់​ប្តី​អ្នកស្រី ក៏​បាន​ចាប់​ផ្តើមផ្លាស់​ប្តូរ។

អង្គការ ALC និង​អង្គការ​ផ្សេង​ទៀត កំពុង​តែដាក់​ពាក្យ​បណ្តឹង​ជា​ក្រុមមួយ ដើម្បី​តវ៉ា​ចំពោះ​ការ​ឃុំ​ខ្លួនឡើង​វិញ នូវ​ពល​រដ្ឋ​កម្ពុជា​ ដែល​ទទួល​បាន​បទ​បញ្ជាចុង​ក្រោយ ឲ្យ បញ្ជូនខ្លួន​ចេញ​ពី​ស.រ.អា ហើយ​តាំង​ពី​ខែ​តុលា ឆ្នាំ​២០១៧​មក​បានជួយឲ្យ​មនុស្ស​យ៉ាង​ហោច​ណាស់​ ១៥​នាក់ រស់​នៅ​ក្នុង​ស.រ.អា​ជា​បន្ត​ទៅទៀត។

លោក អ៊ុន ​ត្រូវ​បាន​កាត់ទោស​កាល​ពី​ឆ្នាំ​១៩៩៨ ក្នុង​បទ​លួច​គាស់​ទ្វារ​ចូល​ផ្ទះ​គេ ដែល​នៅ​ពេល​នោះ​ត្រូវ​ចាត់​ទុក​ថា​ជាបទ​ល្មើស​ឧក្រិដ្ឋកម្ម។ លោក​បាន​អង្គុយ​ក្នុង​រថ​យន្ត នៅ​ពេល​ដែល​ការគាស់​ទ្វារ​នោះ​កើ​ត​ឡើង ហើយ​លោក​មាន​ជម្រើស​ទទួល​យក​ការចោទ​ប្រកាន់​ក្នុង​បទល្មើស​មជ្ឈិម ប៉ុន្តែ​បាន​សុខ​ចិត្ត​ទទួល​យក​ទោសព្រហ្មទណ្ឌ​វិញ ដើម្បី​ឲ្យ​មិត្ត​របស់​លោក ដែល​បាន​រក​ឃើញ​ថា​មាន​ទោស​ពីមុន​មក​ម្តង​រួច​ទៅ​ហើយ​នោះ អាច​ជៀស​វាង​ទោស​ទី២។

បន្ទាប់​ពី​អ្នក​ស្រី នាថ បានទាក់​ទង​ជាមួយ​លោក Lo កាល​ពី​ខែ​កញ្ញា​រួច​មក លោក Lo និង​ក្រុម​ការងារ​របស់​លោក រក​ឃើញភ្លាម​ៗ​ថា បទ​ចោទ​ប្រកាន់លោក​ អ៊ុន ត្រូវបាន​គេ​ប្តូរ​ចំណាត់​ថ្នាក់វិញ​ហើយ ហើយ​លែង​ក្លាយ​ជាបទ​ល្មើស​មួយ​ដែលតម្រូវ​ឲ្យ​បណ្តេញ​ចេញ​ពី​ស.រ.អា​ទៀត​ហើយ។​ រឿងនេះ​នាំ​ឲ្យ​មាន​សេចក្តី​សង្ឃឹម​បន្តិច​ឡើង​វិញ។

កាល​ពី​ថ្ងៃ​សុក្រ​មុន លោក ស៊ា អ៊ុន បាន​ទទួល​ការ​អនុញាតឲ្យ​ស្ថិត​នៅ​ស.រ.អា​ជា​បន្ត​ នៅ​នាទី​ចុង​ក្រោយ មុនពេល​យន្ត​ហោះ​ដែល​ដឹក​ពល​រដ្ឋ​កម្ពុជា​ជាង​៤០​នាក់ ហោះពី​ទីក្រុង​El Paso រដ្ឋ Texas សំដៅ​ទៅ​រាជ​ធានី​ភ្នំពេញ នៅ​ថ្ងៃ​អង្គារ​បន្ទាប់​។

លោក Lo បាន​ថ្លែង​ថា ក្រុម​ការងារ​របស់​លោក ថែម​ទាំង​បាន​ជួយ​ឲ្យ​ពល​រដ្ឋ​កម្ពុជា៥​នាក់​ទៀត ឲ្យ​នៅ​ស.រ.អា​ជា​បន្ត។ អ្នក​ទាំង​៥​នោះមាន​ឈ្មោះ​ត្រូវ​បញ្ជូន​ទៅ​ប្រទេស​កម្ពុជា​វិញ ក្នុង​ជើង​យន្ត​ហោះ​ ដែល​ដឹក​អ្នក​ត្រូវ​បញ្ជូន​ទៅ​វិញ ចំនួនច្រើនបំផុត បើ​ប្រៀប​ធៀប​ជា​មួយ​ការ​បញ្ជូន​ពី​មុន​ៗ​មកនោះ។

«ខ្ញុំជឿ​ជាក់​យ៉ាង​ច្បាស់​ថា ពិត​ជា​មាន​អ្នក​ផ្សេងទៀត​នៅ​លើ​យន្ត​ហោះ​នោះ ដែល​អាចសើរើករណីបញ្ជូន​ខ្លួន​របស់​ពួកគេទៅ​វិញ»។ នេះ​ជា​សម្តីរបស់​មេធាវី Lo ​ក្នុង​អ៊ីម៉ែល​មួយប្រាប់​វីអូអេ។

លោក​បាន​បន្ត​ទៀត​ថា «ក្រុម​មេធាវីនៃ​អង្គការការពារ​សិទ្ធិ​ជន​អន្តោ​ប្រវេសន៍​អាស៊ី Asian Law Caucus បានការពារ​កូន​ក្តីពីភាគ​ខាងជើង​នៃរដ្ឋ​ California និង​ពី​តំបន់​ជ្រលង​ភ្នំ​ប៉ែក​កណ្តាល នៃ​រដ្ឋ California ក្នុង​ការ​ចាប់​ខ្លួន​ក្នុង​ផ្ទះ​នីមួយៗ ដោយ​ភ្នាក់ងារ ICE ហើយ​យើង​តែ​ង​តែ​រក​ឃើញ​អ្នក​មាន​ជម្រើស ហើយ​បន្ទាប់​មក​បាន​ជួយ​ពួក​គេ​ខ្លះ ឲ្យឡើង​តវ៉ា​ក្នុង​តុលាការ »។

នៅ​ក្រោមរដ្ឋបាល​លោក​ត្រាំ ​ទី​ភ្នាក់​ងារ​ពង្រឹង​ច្បាប់​អន្តោ​ប្រវេសន៍ និង ពន្ធ​គយ ហៅ​កាត់​ថា​ ICE​ ត្រូវ​បាន​បញ្ជា​ឲ្យ​ធ្វើ​ការ​បញ្ជូន​ខ្លួន ឲ្យ​បាន​ខ្លាំង​ក្លា ហើយ​ឲ្យ​ផ្តោត​អារម្មណ៍​ជា​ពិសេស​ទៅ​លើ​ពល​រដ្ឋ​កម្ពុជា។

នៅ​ចុង​ឆ្នាំ​២០១៦ ឬ​ ដើម​ឆ្នាំ ២០១៧ ក្រុម​មន្ត្រី​កម្ពុជា ដែលជា​ញឹកញយបាន​សម្តែង​នូវ​ការ​មិន​ពេញ​ចិត្ត​ចំពោះ​កម្មវិធី​បញ្ជូន​ខ្លួន​នេះ បាន​ចាប់​ផ្តើម​បដិសេធ​ឈប់​ទទួលអ្នក​ដែល​ត្រូវ​បញ្ជូន​ខ្លួន​ទៅ​កម្ពុជា​វិញ​នោះ។

ប៉ុន្តែការ​រឹង​ទទឹង​របស់​ពួក​គេ នៅ​មិន​បាន​យូរ​ទេ។

មន្ត្រីទីភ្នាក់​ងារ ICE ទទួល​បន្ទុកកិច្ច​ការ​សាធារណៈ លោក Brendan Raedy បាន​ប្រាប់​ VOAថា ការ​ដាក់​ទណ្ណកម្ម​លើ​ទិដ្ឋាការ​សម្រាប់​មន្ត្រី​រដ្ឋាភិបាល​កម្ពុជា​កាល​ពី​ថ្ងៃ​ទី​១៣​កញ្ញា​ឆ្នាំ២០១៧ ​គឺដោយ​សារការ​ខ្វះកិច្ច​សហការណ៍ជា​ប្រវត្តិសាស្ត្របែប​នេះ ហើយ​បាននាំ​ឲ្យរដ្ឋាភិបាល​កម្ពុជា យល់​ព្រម​ទទួល​យក​អ្នក​ដែល​ត្រូវ​បញ្ជូន​ខ្លួន​ សារ​ឡើង​វិញ។ លោក​ Brendan Raedy បាន​សរសេរ​ក្នុង​សារ​អ៊ីម៉ែលទៅ​កាន់​ VOA ថា «ដោយ​សារ​ការ​ដាក់​ទណ្ឌកម្ម និង កិច្ច​ប្រឹង​ប្រែង​ខាង​ផ្លូវ​ការទូត​ជា​បន្ត​បន្ទាប់ ការ​បញ្ជូន​មនុស្ស​ទៅ​កាន់​ប្រទេស​កម្ពុជា​វិញ​បាន​កើន​ឡើង​ចំនួន ២៧៩​ភាគរយ ពី​ឆ្នាំ​សារពើពន្ធ ២០១៧ ដល់​ឆ្នាំ​សារពើពន្ធ ២០១៨»។

VOA​ មិន​អាច​ទាក់​ទង​មន្ត្រី​រដ្ឋាភិបាល​កម្ពុជា​ដើម្បី​សុំ​អត្ថាធិប្បាយ សម្រាប់​អត្ថបទ​នេះ​ទេ។

ទីភ្នាក់​ងារ​ ICE បាន​បញ្ជូន​ពលរដ្ឋ​កម្ពុជា ១១០​នាក់ ក្នុង​ឆ្នាំ​សារពើពន្ធ ២០១៨។

លោក Raedy ​បាន​ថ្លែង​ថា «ទោះ​ជា​មាន​ការ​ជឿនលឿន​ទៅ​មុខ​បែប​នេះ​ក៍​ដោយ» ក៏​នៅ​មាន​ជន​ជាតិ​កម្ពុជា ចំនួន ១​៨៥៥​នាក់ នៅ​ក្នុង​ស.រ.អា ដែល​មានបទ​បញ្ជា​ចុង​ក្រោយឲ្យ​បញ្ជូន​ខ្លួន​ទៅវិញ ហើយ​ក្នុងចំណោម​អ្នក​ទាំង​នោះ ១៣៦២​នាក់ ជា​ឧក្រិដ្ឋជន​ជាប់​ទោស បើ​គិត​មក​ទល់​ថ្ងៃ​ទី​១៧ កញ្ញា។

ប៉ុន្តែ​គ្រា​ដែល​ការ​ចូល​ចាប់​ខ្លួន​ក្នុង​ផ្ទះ ដើម្បី​បញ្ជូន​ទៅ​វិញ និង​ការ​ដាក់​សម្ពាធ​ កើន​ឡើង​នោះ ការ​តវ៉ា​ក៏​កើន​ឡើង​ដែរ។

ក្រុម​មេធាវី​នៃ​អង្គការALC ​កំពុង​តែ​សម្គាល់​ជន​ដែល​ត្រូវបានបញ្ជូន​ខ្លួនទៅ​វិញ នៅ​ក្នុង​រាជ​ធានី​ភ្នំពេញ ដែល​ពួកគេ​ជឿ​ថា មាន​មូល​ហេតុ​ជាក់​លាក់ ដើម្បីពិនិត្យ​មើល​ករណី​ពួក​គេឡើង​វិញ។ កាល​ពី​ខែ​វិច្ឆិកា​កន្លង​ទៅ​នេះ លោក ផន តឹម ដែល​ត្រូវ​បាន​បញ្ជូន​ខ្លួន​ទៅ​ប្រទេស​កម្ពុជា​វិញ ដោយ​សារការ​រក​ឃើញ​ថា​មាន​ទោស​ក្នុង​បទមាន​កញ្ឆា​ជាប់​ខ្លួន ដើម្បី​លក់​នោះ បាន​ក្លាយ​ជា​អ្នក​ទីមួយ​ ដែលត្រូវ​បាន​អនុញាត ឲ្យ​ត្រឡប់​មក​រស់​នៅ​ក្នុង​សរអា​វិញ។

មួយ​ថ្ងៃ​ក្រោយ​ពី​លោក​បាន​បញ្ជូន​ខ្លួន​ចេញ ទោស​របស់​លោក តឹម ត្រូវ​បានលុបចោល​វិញ ដោយ​សារ​វាជាបញ្ហាសាមញ្ញ​មួយ​ នៅក្នុង​ករណី​បញ្ជូន​ខ្លួន​ជន​ជាតិ​កម្ពុជា​ទាំង​ឡាយ។ ចៅ​ក្រម​ម្នាក់​បាន​រក​ឃើញ​ថា​លោក​ តឹម មិន​ត្រូវ​បានគេ​ប្រាប់ឲ្យ​បាន​ត្រឹម​ត្រូវ អំពីផល​ប៉ះ​ពាល់ខាង​វិស័យ​អន្តោ​ប្រវេសន៍ ដែល​អាច​កើតមាន​ឡើង​ បើសិន​ជា​លោក​ទទួល​កំហុស។

អង្គការ​ ALC បាន​ប្រើ​ប្រាស់​សេចក្តី​សម្រេច​របស់​ចៅ​ក្រម​នេះ ដើម្បីលប់​ចោល​បញ្ជា​បញ្ជូន​លោក​ទៅ​កម្ពុជា​វិញ ហើយ​សង្ឃឹម​ថា នៅ​ពេល​ឆាប់​ៗ​ខាង​មុខ​នេះ នឹង​អាច​ជួយ​ឲ្យ​លោក ក្លាយ​ជាមនុស្ស​ទី​មួយ នៃជនជាតិ​កម្ពុជា​ដែល​ត្រូវ​បញ្ជូន​ ដែលត្រូវទទួល​បាន​បណ្ណ័​ជា​អ្នក​រស់​នៅ​ក្នុង​សរអា​ជា​អចិន្ត្រៃ ហៅ​ថា Green Card ។

អង្គការ​ ALC កំពុង​តែ​សង្ឃឹម​ថា ​ក្នុង​ចំណោម​អ្នក​ដែល​ត្រូវ​បាន​បញ្ជូន​ទៅ​កម្ពុជា​វិញ កាល​ពី​ថ្ងៃ​អង្គារ​នេះ មានច្រើន​ថែម​ទៀត នឹងអាច​មាន​ករណី​ដូចលោក តឹម ដោយ​សារ​សំណើរ​សុំ​លើក​លែង​ទោស ដែលបាន​ស្នើ​ឡើង​ដោយ អភិបាល​រដ្ឋ California លោក​Jerry Brown ដែល​នឹង​ចេញ​ពី​តំណែង​នៅ​ពេល​ឆាប់ៗ​ខាង​មុខ​នេះ។

លោក Lo ថ្លែង​ថា «ទោះ​ជាយន្ត​ហោះបាន​ចាក​ចេញ​ផុត​ទៅ​ហើយ​ក៏​ដោយ ក៏ការ​លើក​លែង​ទោសពី​លោក​អភិបាល​រដ្ឋ អាច​នាំមនុស្ស​មក​វិញ លប់​ទោស​ពួក​គេ​ចោល​ហើយ លុប​ចោល​ការ​បញ្ជូន​ខ្លួនទៅវិញ យ៉ាង​ពិត​ប្រាកដ​មួយ»។

នៅ​ពេល​ដែល​ប្តី​អ្នក​ស្រី​នៅ​ជាប់​ឃុំ​នៅ​ឡើយ ប៉ុន្តែរួច​ផុត​ពីការ​បញ្ជូន​ខ្លួន​ទៅវិញ រហូត​ដល់​ខែ​ឧសភា​ក៏​ដោយ ក្តី​សង្ឃឹម​របស់​អ្នក​ស្រី សឿន នាថ ដើម្បី​ជួប​ជុំ​ជាមួយ​ប្តី​អ្នកស្រី​ឡើង​វិញ ពឹង​ផ្អែក​ទៅ​លើលោក​អភិបាល​រដ្ឋ Jerry Brown។ អ្នក​ស្រី​និយាយ​ថា​៖

«នៅ​ថ្ងៃ​សុក្រទី​២១ធ្នូ​ នេះ ខ្ញុំជឿ​ថា​លោក​អភិបាល​រដ្ឋ Brown នឹង​ប្រកាស​លើក​លែង​ទោស​ប្តី​នាង​ខ្ញុំ ពី​ព្រោះ​ថ្ងៃ​ច័ន្ទសប្តាហ៍ក្រោយ ជា​ថ្ងៃមុនបុណ្យ​ណូអែល ហើយ​ខ្ញុំ​មិន​ជឿថា​លោក​អភិបាល​រដ្ឋ នឹង​ចេញ​មុខ​នៅ​មុន​ថ្ងៃ​បុណ្យណូអែល ដើម្បី​ធ្វើ​សេចក្តី​ប្រកាស​នោះ​ទេ»។

បើ​សិន​ជា​រឿងនេះ​កើត​ឡើង​មែន​នោះ លោក​ ស៊ា អ៊ុន នឹង​ត្រឡប់​មក​ផ្ទះ​វិញ​ ២​ថ្ងៃ​ក្រោយ​ថ្ងៃ​ខួប​កំណើតទី​៤ ​របស់​កូន​ស្រីលោក ប៉ុន្តែ​យ៉ាង​ហោច​ណាស់ ក៏ទាន់​ថ្ងៃ​បុណ្យ​ណូអែល​ដែរ។

ប្រែសម្រួល​ដោយ ប៉ូច រាសី

XS
SM
MD
LG