ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក ​ហ៊ុន សែន​អបអរ​សាទរ​កូរ៉េ​ទាំង​ពីរ​ ខណៈ​លោក​រិះគន់​ប្រទេស​មួយ​ចំនួន


រូបឯកសារ៖ លោក​នាយក​រដ្ឋមន្រ្តី​ហ៊ុន សែន ថ្លែង​នៅ​ក្នុង​​​វេទិកា​ថ្នាក់ជាតិ​លើកទីមួយ​ស្ដី​អំពី​«​ការការពារ និង​អភិរក្ស​ធនធាន​ធម្មជាតិ​»​ នៅ​វិមា​ន​សន្តិភាព នៅ​ថ្ងៃ​ច័ន្ទ ទី​២២​ ខែ​សីហា ឆ្នាំ​២០១៦ នា​រាជធានីភ្នំពេញ។​អង្គការ​សង្គមស៊ីវិល សកម្មជន​បរិស្ថាន​រាប់​សិប​នាក់សម្ដែងការ​ព្រួយបារម្ភ​អំពី​បញ្ហា​បរិស្ថាន​នៅ​កម្ពុជា​។ (ឡេង ឡែន/VOA)

លោក​ក៏​បាន​ផ្ញើរ​សារ​ថា ​ជំហរ​របស់​កម្ពុជា​គឺ​អបអរ​សាទរ​ការ​ស្រុះស្រួល​គ្នា​រវាង​កូរ៉េទាំង​ពីរ​ ​ហើយ​លោក​អំពាវនាវ​ឲ្យ​មាន​ដំណើរ​ឆ្ពោះ​ទៅ​មុខ​បន្ត​ទៀត។​ លោក​ក៏​បាន​រិះគន់​ថា ​ប្រទេស​មួយ​ចំនួន​មិន​ពេញ​ចិត្ត​នឹង​​ការ​ត្រូវ​រ៉ូវ​គ្នា​នេះ​ទេ។

លោក​នាយករដ្ឋមន្រ្តី​ហ៊ុន សែន ​នៅ​ថ្ងៃ​អង្គារ​នេះ ​បាន​អំពាវនាវ​ឲ្យ​មេដឹកនាំ​កូរ៉េ​ទាំងពីរ​បន្ត​ជំហាន​ឆ្ពោះ​ទៅ​មុខ​ទៀត ​ដើម្បី​ស្វែង​រក​ការ​ចរចា​មួយ ​ខណៈ​លោក​បាន​រិះគន់​ប្រទេស​មួយ​ចំនួន​ដែល​លោក​ថា ​ មិន​សប្បាយ​ចិត្ត​នឹង​ការ​ត្រូវ​រ៉ូវ​គ្នា​របស់​ប្រទេស​កូរ៉េ​ទាំង​ពីរ។​

មួយ​រយៈ​ចុងក្រោយ​នេះ ​មេដឹកនាំ​របស់​កូរ៉េ​ខាង​ត្បូង ​និង​កូរ៉េ​ខាង​ជើង​បាន​ចាប់​ផ្តើម​បោះ​ដៃ​រក​គ្នា​ដែល​ជា​សញ្ញា​មួយ​សម្រាប់​ការ​ចរចា​របស់​កូរ៉េ​ទាំង​ពីរ​នៅ​ពេល​ខាង​មុខ។ កាល​ពី​ថ្ងៃ​ច័ន្ទក្រសួង​បង្រួប​បង្រួម​កូរ៉េ​នៃ​ប្រទេស​កូរ៉េ​ខាង​ត្បូង​បាន​បញ្ជាក់​ថា​ ដំណើរ​ទស្សនកិច្ច​របស់​គណៈ​ប្រតិភូ​កីឡា​អូឡាំពិក​របស់​កូរ៉េ​ខាង​ជើង​បាន​បើក​ទ្វារ​ឲ្យ​មាន​កិច្ច​សហ​ប្រតិបត្តិការ​បន្ថែម​ទៀត​ ដែល​អាច​ជួយ​បន្ធូរបន្ថយ​ភាព​តានតឹង​នា​ពេល​ថ្មីៗ​នេះ​ ពាក់ព័ន្ធ​នឹង​ការ​គំរាមកំហែង ​ក៏​ដូចជា​ការ​សាកល្បង​អាវុធ​នុយក្លេអ៊ែរ ​និង​មីស៊ីល​ជា​ច្រើន​លើក​ច្រើន​សារ​របស់​រដ្ឋាភិបាល​ក្រុង​ព្យុងយ៉ាង ​ក្នុង​រយៈពេល​ពីរ​ឆ្នាំ​ចុង​ក្រោយ​នេះ។ ប៉ុន្តែ​សហ​អាមេរិក​កំពុង​រង់ចាំ​មើល​សញ្ញា​បន្ត​ទៀត ​ហើយ​ថា​ ទណ្ឌកម្ម​លើ​កូរ៉េ​ខាង​ជើង​នៅ​តែ​បន្ត​មាន ​និង​នៅតែ​ខ្លាំង​ដដែល។​

ក្នុង​ពិធី​ចែក​សញ្ញាប័ត្រ​ដល់​និស្សិត​នៅ​រាជធានី​ភ្នំពេញ ​លោក​ ហ៊ុន សែន​បាន​ថ្លែង​ថា ​ជំហរ​របស់​កម្ពុជាគឺ​ស្វាគមន៍​ដំណើរ​ការ​ទៅ​មុខ​មួយ​នេះ ​ហើយ​បន្ត​លើក​ទឹក​ចិត្ត​ឲ្យ​មាន​ជំហាន​ទៅ​មុខ​ទៀត ​ដើម្បី​អាច​ឈាន​ទៅ​រក​ការ​ចរចា​មួយ។​

លោក​មាន​ប្រសាសន៍​ថា៖​

«កុំ​ចាំ​តែ​ក្តៅ ​នាំ​គ្នា​ស្រែក​ជេរ​ ហើយ​ដល់​ត្រជាក់ ​បែរ​ជា​នាំ​គ្នា​នៅ​ស្ងៀម។ ​អីចឹងកម្ពុជា​សូម​និយាយ​ហើយ​ សូម​ថា ​អបអរ​សាទរ​ជាមួយ​នឹង​ដំណើរ​ទៅ​មុខ​របស់​កូរ៉េ​ទាំង​ពីរ​ដែល​ជា​បង​ប្អូន​ខ្លួន​ឯង។ ​កាយ​វិការ​ទាំង​សង​ខាង​នេះ​បាន​បង្ហាញ​ឲ្យ​ឃើញ​អំពី​ការ​ចង់​ស្រុះស្រួល​គ្នា ​បើ​ទោះ​បី​ជា​របប​នយោបាយ​មិន​ត្រូវ​គ្នា។ ​ក៏​ប៉ុន្តែ​គឺ​អ្នក​ជិត​ខាង​គ្នា»។​

ស្រប​ពេល​នឹង​ការ​អបអរ​សាទរ​នេះ ​លោក​ហ៊ុន សែន​ ដែល​មាន​ទំនាក់​ទំនង​ស្និទ្ធ​បំផុត​នឹង​ប្រទេស​ចិន ​ក៏​បាន​ថ្លែង​រិះគន់​ប្រទេស​មួយ​ចំនួន ​ដោយ​មិន​បញ្ចេញ​ឈ្មោះ ​ដោយ​លោក​ថា​ ប្រទេស​ទាំង​នោះ​មិន​សប្បាយ​ចិត្ត​នឹង​ការ​ត្រូវរ៉ូវ​គ្នា​របស់​កូរ៉េ​ទាំងពីរ។​

លោក​បាន​ថ្លែង​ថា៖​

«ក៏​ប៉ុន្តែ​ប៉ុន្មាន​ថ្ងៃ​ថ្មីៗ​នេះ​ យើង​ពិត​ជា​មាន​ការ​លើក​ទឹក​ចិត្ត​មួយ ​ដោយ​សារ​មេដឹកនាំ​កូរ៉េ​ខាង​ជើង ​និង​មេដឹក​នាំ​កូរ៉េ​ខាង​ត្បូង ​ដែល​ជា​បងប្អូន​ជាមួយ​គ្នា​នេះ ​គេ​រក​វិធី​សន្ទនា​គ្នា​ ដែល​ខ្ញុំ​គិត​ថា ​ប្រទេស​មហា​អំណាច​ទាំង​អស់ ​មិន​ថា ​មហា​អំណាច ​ឬ​ក៏​មិន​មហា​អំណាច​ទេ ​គួរ​តែ​ត្រូវ​អបអរ​សាទរ​ និង​លើក​ទឹក​ចិត្ត​ឲ្យ​កូរ៉េ​ទាំងពីរ​សហការ​គ្នា»។​

លោក​ហ៊ុន សែន​បាន​បញ្ជាក់​បន្ថែម​ថា៖​

«ខ្ញុំ​ពិត​ជា​មាន​ការ​ធុញទ្រាន់​ និង​ទើសទាល់​ជាមួយ​ឥរិយាបថ​របស់​ប្រទេស​ខ្លះ ​ដែល​ឃើញ​កូរ៉េ​ខាង​ជើង ​កូរ៉េ​ខាង​ត្បូង​ត្រូវរ៉ូវ​គ្នា ​បែរ​ជា​សម្តែង​ការ​មិន​សប្បាយ​ចិត្ត​ ​ហើយ​រក​វិធី​ដាក់​គំនាប​បន្ថែម។ ​គួរណាស់​ពេល​ហ្នឹង ​ឲ្យ​តែ​សភាព​ការណ៍​អ្នក​ទាំង​ពីរ​គេ​ត្រូវ​គ្នា​ទៅ ​យើង​ជួយ​អរ​ទៅ វា​ម៉េច?»​

អ្នកនាំ​ពាក្យ​ស្ថានទូត​អាមេរិក​ប្រចាំ​នៅ​កម្ពុជា​ Arend Zwartjes​ មាន​ប្រសាសន៍​ថា ​ស្ថានទូតមិន​មាន​ការ​អធិប្បាយ​លើ​បញ្ហា​នេះ​ទេ។​

កាល​ពី​ថ្ងៃ​ច័ន្ទ ​អនុប្រធានាធិបតី​អាមេរិក​គឺ​លោក ​Mike Pence ​ត្រូវ​បាន​ដកស្រង់សម្តី​ដោយ​កាសែត​ Washington Post​ ថា ​សហ​រដ្ឋអាមេរិក​បាន​ត្រៀម​ខ្លួន​រួច​ជា​ស្រេច​ក្នុង​ការ​ភ្ជាប់​ទំនាក់​ទំនង​ដើម្បី​ឈាន​ទៅ​រក​ការ​ពិភាក្សា​អំពី​ការ​បញ្ចប់​កម្ម​វិធី​នុយក្លេអ៊ែរ​របស់​កូរ៉េ​ខាង​ជើង។​ ប៉ុន្តែ​លោក​ថា ​មិន​មាន​ទណ្ឌកម្ម​អ្វី​ដែល​ត្រូវ​បន្ធូរ​បន្ថយ​នោះ​ទេ។​

លោក​បញ្ជាក់​ថា៖​

«ដូច្នេះ​យុទ្ធនាការ​ដាក់​សម្ពាធ​អតិបរមា​គឺ​នឹង​បន្ត​និង​ធ្វើ​ឲ្យ​រឹត​តែ​ខ្លាំង​ឡើង។ ​ប៉ុន្តែ​ប្រសិន​បើ​អ្នក​ចង់​ចរចា ​យើង​នឹង​ចរចា»។​

កាល​ពី​ថ្ងៃ​ច័ន្ទ ​រដ្ឋមន្រ្តី​ការបរទេស​ជប៉ុន​គឺ​លោក Taro Kono ​ដែល​បាន​មក​បំពេញ​ទស្សនកិច្ច​នៅ​ប្រទេស​សិង្ហបុរី​ ដែល​ជា​ប្រធាន​អាស៊ាន​នៅ​ឆ្នាំ​នេះ ​បាន​យល់ស្រប​ជាមួយ​សមភាគី​របស់​លោក​គឺលោក ​Vivian Balakrishna ​ក្នុង​ការ​សហការ​គ្នា​កុំ​ឲ្យ​កូរ៉េ​ខាង​ជើង​ដោះ​ខ្លួន​ចេញពី​ទណ្ឌកម្ម​របស់​ក្រុម​ប្រឹក្សា​សន្តិសុខ​អង្គការ​សហ​ប្រជាជាតិ។​

កាលពី​ខែ​សីហា​ ឆ្នាំ​២០១៧ ​នៅក្នុង​កិច្ច​ប្រជុំ​នៅ​ប្រទេស​ហ្វីលីពីន បណ្តាប្រទេស​សមាជិក​អាស៊ាន​បានផ្ញើរ​«សារ​ខ្លាំងៗ»​ទៅ​ប្រទេស​កូរ៉េ​ខាង​ជើង ​លើ​បញ្ហា​អាវុធ​នុយក្លេអ៊ែរ​ និង​ការ​បាញ់​កាំជ្រួច​មីស៊ីល​ជាបន្ត​បន្ទាប់។ ​ពួកគេ​បាន​លើក​ឡើង​ថា​ សមាជិក​របស់​ខ្លួន​អាច​ដើរ​តួនាទី​ណា​មួយ​នៅ​ក្នុង​ការ​ស្វែង​រក​សន្តិភាព​ដល់​ឧបទ្វីប​កូរ៉េ។​

លោក ​Paul Chambers ​សាស្ត្រាចារ្យ​ ​និង​ជា​ទី​ប្រឹក្សា​ស្ដីពីបញ្ហា​អន្តរជាតិ​នៃ​សាកល​វិទ្យាល័យ​ Naresuan​ ក្នុង​ប្រទេស​ថៃ​ ​បាន​ថ្លែង​ប្រាប់​ VOA ថា​ អាស៊ាន​អាច និង​គួរ​តែ​មាន​សំឡេង​មួយ​ទៅ​លើ​បញ្ហា​នេះ ​តាម​រយៈ​វេទិកា​ថ្នាក់​តំបន់​អាស៊ាន​ (ASEAN Regional Forum) ​ដែល​ធ្លាប់​បាន​បំពេញ​ការងារ​ក្នុង​ការ​បញ្ចប់​ភាព​តានតឹង​រវាង​រដ្ឋ​អាស៊ាន​កាល​ពី​អតីត​កាល។​

លោក​បាន​ប្រាប់​ VOA ​តាម​រយៈ​អ៊ីមែល​ ឬ​សារ​អេឡិចត្រូនិក​ថា៖​

«តាម​ពិត​ទៅ ​ឥឡូវ​នេះ ​អាស៊ាន​គួរតែ​លើក​តម្កើង​នូវ​ដំណោះ​ស្រាយ​សម្រាប់​ជម្លោះ​របស់​កូរ៉េ​ទាំង​ពីរ ​តាមរយៈ​វេទិកា​ថ្នាក់​តំបន់​អាស៊ាន​ពីមុន ​ដោយ​សារ​វេទិកា​នេះ​ធ្លាប់​ទទួល​បាន​ជោគ​ជ័យ​កាល​ពី​អតីតកាល ​ហើយ​ស្នើ​វេទិកា​ថ្នាក់​តំបន់​នេះ​ទៅ​ភាគី​ទាំង​ពីរ​ ក្នុង​ការ​ផ្សព្វផ្សាយ​ថា​ អាស៊ាន​ជា​អ្នក​សម្រប​សម្រួល​មួយ​ដែល​គួរ​ជឿជាក់​សម្រាប់​ការ​ស្វែងរក​សន្តិភាព»។​

ជា​បន្ត​បន្ទាប់ ​រដ្ឋាភិបាល​កម្ពុជា​បាន​ថ្កោលទោស​ការ​បាញ់​សាកល្បង​នុយក្លេអ៊ែរ​របស់​កូរ៉េ​ខាង​ជើង។ ​កាល​ពី​ខែ​កញ្ញា​ ឆ្នាំ​២០១៧​ ក្រសួង​ការ​បរទេស​កម្ពុជា​បាន​ចេញ​សេចក្តី​ថ្លែង​ការណ៍​ ដោយ​លើក​ឡើង​ថា ​ខ្លួន​មាន​ការ​សោកស្តាយ​ ​និង​សម្តែង​ការ​ព្រួយ​បារម្ភ​យ៉ាង​ខ្លាំង​ចំពោះ​ការ​សាកល្បង​នុយក្លេអ៊ែរ​របស់​កូរ៉េ​ខាងជើង។

រដ្ឋាភិបាល​កម្ពុជា​ក៏​បាន​ទាមទារ​ឲ្យ​កូរ៉េ​ខាងជើង​«អនុវត្ត​ឲ្យ​បាន​ពេញលេញ​នូវ​សេចក្តី​សម្រេច​ចិត្ត​ពាក់ព័ន្ធ​ទាំង​អស់​របស់​ក្រុមប្រឹក្សា​សន្តិសុខ​អង្គការ​សហ​ប្រជាជាតិ​ ​និង​កាតព្វកិច្ច​អន្តរជាតិ​របស់​ខ្លួន​ ​ហើយ​នឹង​បញ្ឈប់​ការ​សាក​ល្បង​នុយក្លេអ៊ែរ ​និង​មីស៊ីល​គ្រប់​ប្រភេទ​ ​ក្នុង​គោល​បំណង​ការពារ​សន្តិភាព ​និង​ស្ថិរភាព​ នៅ​ក្នុង​ឧបទ្វីប​កូរ៉េ»។​

គួរ​បញ្ជាក់​ថា ​ទំនាក់​ទំនង​រវាង​ប្រទេស​កម្ពុជា​និង​កូរ៉េខាងជើង​បាន​បន្សល់​ទុកតាំង​ពី​ព្រះ​បាទ​នរោត្តម​ សីហនុ​ អំឡុង​សម័យ​កាល​ដឹកនាំ​ដោយ​មេដឹកនាំ​ផ្តាច់ការ​កូរ៉េ​ខាងជើង​គឺ​លោក​គីម អ៊ីលស៊ុង​ ​ដែល​កាល​នោះ​បាន​សង់​ព្រះរាជ​ដំណាក់​ថ្វាយ​ព្រះ​បាទ​នរោត្តម សីហនុ​ ក្នុង​ឆ្នាំ​១៩៧៤។ ​ទំនាក់ទំនង​ការទូត​រវាង​ប្រទេស​ទាំងពីរ​បាន​ចាប់​ផ្តើម​តាំង​ពីឆ្នាំ​១៩៦៥​ ​ហើយ​ព្រះ​បរមរតន​កោដ្ឋ​ក៏​ធ្លាប់​មាន​អង្គរក្ស​ជា​ជនជាតិ​កូរ៉េខាង​ជើង​ផង​ដែរ៕​

XS
SM
MD
LG