មេដឹកនាំនៃប្រទេសកូរ៉េខាងជើងបានអញ្ជើញសមភាគីកូរ៉េខាងត្បូងរបស់ គាត់ឱ្យទៅបំពេញទស្សនកិច្ចក្នុងកូរ៉េខាងជើងតាមពេលវេលាដ៏សមគួរបំផុតរបស់មេដឹកនាំកូរ៉េខាងត្បូង។
អ្នកស្រី Kim Yo Jong ដែលជាប្អូនស្រីរបស់មេដឹកនាំកូរ៉េខាងជើង Kim Jong Un បានប្រគល់សេចក្តីអញ្ជើញដោយផ្ទាល់នៅក្នុងជំនួបមួយជាមួយលោកប្រធានាធិបតីកូរ៉េខាងត្បូង Moon Jae-in នៅឯវិមានខៀវ។
មេដឹកនាំកូរ៉េខាងត្បូងរូបនេះបាននិយាយជាការឆ្លើយតបនឹងសេចក្តីអញ្ជើញនេះថា «ចូរយើងធ្វើឱ្យការណ៍នេះកើតឡើងបានដោយបង្កើតឱ្យមានស្ថានភាពជាចាំបាច់សម្រាប់ពេលអនាគត»។
គណបក្សនយោបាយនានានៅក្នុងប្រទេសកូរ៉េខាងត្បូងមានប្រតិកម្មចម្រុះដល់សេចក្តីអញ្ជើញនេះរបស់កូរ៉េខាងជើង។ ស្ត្រីជាអ្នកនាំពាក្យនៃគណបក្សប្រជាធិបតេយ្យគ្រប់គ្រងប្រទេសកូរ៉េខាងត្បូងបាននិយាយថាជំនួបជាមួយពួកកូរ៉េខាងជើង «បានបង្កើតឱ្យមានសន្ទុះសំខាន់មួយសម្រាប់កសាងសន្តិភាពលើឧបទ្វីបកូរ៉េ»។
ក៏ប៉ុន្តែគណបក្សប្រឆាំងបានសុំឱ្យមានការប្រុងប្រយ័ត្នហើយមានការសង្ស័យអំពីគោលបំណងពិតប្រាកដរបស់កូរ៉េខាងជើងក្នុងការធ្វើសេចក្តីអញ្ជើញនេះ។
ជាផ្លូវការ ប្អូនស្រីរបស់ Kim Jong Un ជាផ្នែកមួយនៃគណៈប្រតិភូកូរ៉េខាងជើងកម្រិតខ្ពស់មួយដែលចូលរួមក្នុងការប្រកួតកីឡា Olympics រដូវធ្លាក់ទឹកកកក្នុងប្រទេសកូរ៉េខាងត្បូង។
ក៏ប៉ុន្តែទោះជាយ៉ាងណាក៏ដោយក៏របាយការណ៍មួយរបស់ទីភ្នាក់ងារព័ត៌មាន Yonhap បានចែងថាអ្នកស្រីបានឋិតនៅក្នុងប្រទេសកូរ៉េខាងត្បូងក្នុងឋានៈជា «ប្រេសីតពិសេសម្នាក់របស់មេដឹកនាំកូរ៉េខាងជើង»។
អ្នកស្រី Kim Yo Jong ជាសមាជិកាទីមួយនៃគ្រួសារដែលគ្រប់គ្រងប្រទេសកូរ៉េខាងជើងយូរយាមកហើយដែលទៅបំពេញទស្សនកិច្ចក្នុងកូរ៉េខាងត្បូងចាប់តាំងពីការបញ្ចប់សង្គ្រាមកូរ៉េពីឆ្នាំ១៩៥០ដល់ឆ្នាំ១៩៥៣។
អ្នកស្រីជាសមាជិកាជាន់ខ្ពស់ម្នាក់នៃគណបក្សពលករកូរ៉េខាងជើងគ្រប់គ្រងប្រទេសនិងជាទីប្រឹក្សាសំខាន់ម្នាក់របស់បងប្រុសអ្នកស្រីផងដែរ៕
