ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ជំនួប​របស់​មេដឹកនាំ​កូរ៉េ​ទាំង​ពីរ​អាច​ប៉ះពាល់​ដល់​កិច្ច​ប្រឹងប្រែង​របស់​សហរដ្ឋ​អាមេរិក​ក្នុង​ការ​ដាក់​ទណ្ឌកម្ម​កូរ៉េ​ខាង​ជើង


ប្រធានាធិបតី​កូរ៉េ​ខាងត្បូង ​Moon Jae-in ចាប់ដៃ​ជាមួយ​Kim Yo Jong ប្អូនស្រី​របស់មេដឹកនាំ​កូរ៉េខាងជើងកាលពី​ថ្ងៃទី​១០​ កុម្ភៈ ២០១៨។

ការ​អញ្ជើញ​របស់​មេដឹកនាំ​កូរ៉េ​ខាង​ជើង​លោក Kim Jong Un ឲ្យ​មេដឹកនាំ​កូរ៉េ​ខាង​ត្បូង​លោក Moon Jae In ទៅ​ធ្វើ​ទស្សនកិច្ច​នៅ​ក្នុង​ទីក្រុង​ព្យុងយ៉ាង អាច​ធ្វើ​ឲ្យ​ប៉ះពាល់​ដល់​កិច្ច​ប្រឹងប្រែង​ការទូត​របស់​រដ្ឋាភិបាល​លោក Trump ក្នុង​ការ​ដាក់​សម្ពាធ​លើ​ប្រទេស​កូរ៉េ​ខាង​ជើង​ឲ្យ​លះបង់​កម្មវិធី​អាវុធ​នុយក្លេអ៊ែរ​របស់​ខ្លួន។ នេះ​បើ​តាម​ការ​បញ្ជាក់​របស់​អ្នក​វិភាគ​នានា។

លោក Kim Jong Un បាន​អញ្ជើញ​លោក Moon Jae In តាម​រយៈ​ប្អូន​ស្រី​របស់​លោក​គឺ​អ្នកស្រី Kim Yo Jong។ អ្នកស្រី Kim Yo Jong បាន​ធ្វើ​ទស្សនកិច្ច​នៅ​ក្នុង​ប្រទេស​កូរ៉េ​ខាង​ត្បូង​ដែល​ជា​ផ្នែក​មួយ​នៃ​ការ​ចូលរួម​របស់​គណៈប្រតិភូ​កូរ៉េ​ខាង​ជើង​នៅ​ក្នុង​ព្រឹត្តិការណ៍​កីឡា​អូឡាំពិក​រដូវ​រងា​នៅ​ក្នុង​ទីក្រុង PyeongChang ប្រទេស​កូរ៉េ​ខាង​ត្បូង។ នេះ​បើ​តាម​ការ​បញ្ជាក់​របស់​ការិយាល័យ​ប្រធានាធិបតី​កូរ៉េ​ខាង​ត្បូង​កាល​ពី​ថ្ងៃ​សៅរ៍​ម្សិលមិញ។

គំនិត​ផ្ដួចផ្ដើម​ផ្នែក​ការទូត​របស់​កូរ៉េ​ខាង​ជើង​នេះ​បាន​កើត​ឡើង​ស្រប​ពេល​ដែល​មាន​ការ​កើន​ឡើង​នូវ​ការ​ដាក់​សម្ពាធ​ពី​អន្តរជាតិ​ដែល​ដឹកនាំ​ដោយ​សហរដ្ឋ​អាមេរិក ក្នុង​គោល​បំណង​ដើម្បី​ដាក់​សម្ពាធ​ជា​អតិបរមា​ទាំង​ផ្នែក​សេដ្ឋកិច្ច និង​ផ្នែក​ការទូត​លើ​របប​ដឹកនាំ​កូរ៉េ​ខាង​ជើង។

កាល​ពី​អតីតកាល កិច្ច​ប្រជុំ​រវាង​កូរ៉េ​ខាង​ពីរ​ជា​រឿយៗ​បណ្ដាល​ឲ្យ​មាន​ការ​ផ្ដល់​ជំនួយ​ផ្នែក​សេដ្ឋកិច្ច​ដ៏​ក្រាស់ក្រែល​ទៅ​ឲ្យ​រដ្ឋាភិបាល​ក្រុង​ព្យុងយ៉ាង។ ប្រសិនបើ​លោក Moon Jae In ធ្វើ​តាម​អ្វី​ដែល​មេដឹកនាំ​កូរ៉េ​ខាង​ត្បូង​ធ្លាប់​ធ្វើ​កាល​ពី​លើក​មុន វា​អាច​ប៉ះពាល់​ដល់​យុទ្ធនាការ​របស់​រដ្ឋាភិបាល​លោក Trump ក្នុង​ការ​ដាក់​សម្ពាធ​លើ​កូរ៉េ​ខាង​ជើង។ នេះ​បើ​តាម​ការ​បញ្ជាក់​របស់​លោក Ken Gause ប្រធាន​ក្រុម​កិច្ចការ​អន្តរជាតិ​នៃ​មជ្ឈមណ្ឌល Center for Naval Analyses។

លោក Bruce Klinger អតីត​អ្នក​វិភាគ​របស់​ទីភ្នាក់ងារ CIA ដែល​នា​ពេល​បច្ចុប្បន្ន​នេះ​ជា​អ្នក​ស្រាវជ្រាវ​ជាន់​ខ្ពស់​នៃ​អង្គការ Heritage Foundation បាន​បញ្ជាក់​ថា រដ្ឋាភិបាល​កូរ៉េ​ខាង​ត្បូង​អាច​រំលោភ​លើ​ការ​ដាក់​ទណ្ឌកម្ម​អន្តរជាតិ​ក្នុង​ការ​ផ្ដល់​ជំនួយ​សេដ្ឋកិច្ច​ដល់​រដ្ឋាភិបាល​កូរ៉េ​ខាង​ជើង៕

XS
SM
MD
LG