ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

ករណី​ឆ្លង​ជំងឺ​កូវីដ​១៩​ បន្ត​កើន​ឡើង ខណៈ​រដ្ឋាភិបាល​ត្រៀម​បញ្ចប់​ការ​បិទ​ខ្ទប់​រាជធានី​​ភ្នំពេញ​និង​ក្រុង​តា​ខ្មៅ


អាជ្ញាធរ​រឹតបន្តឹង​ការ​ធ្វើ​ដំណើរ​កាន់​តែ​ខ្លាំង បន្ទាប់​ពី​អនុវត្ត​បំរាម​គោចរ​អស់រយៈពេល​មួយ​សប្តាហ៍ រាជធានីភ្នំពេញ នៅថ្ងៃទី២១ ខែមេសា ឆ្នាំ២០២១។ ភ្នំពេញ​មាន​សភាព​ស្ងប់ស្ងាត់ ក្នុង​អំឡុងពេល​បិទខ្ទប់នេះ។ (ហ៊ាន សុជាតា/វីអូអេ)

រដ្ឋាភិបាល​កម្ពុជា​ត្រៀម​បញ្ចប់​ការ​បិទ​ខ្ទប់​រាជ​ធានី​ភ្នំពេញ​និង​ក្រុង​តាខ្មៅ​នៃ​ខេត្ត​កណ្តាល ដែល​នឹង​បញ្ចប់​នៅ​ថ្ងៃ​ទី​ ៦ ខែ​ឧសភា​ត​ទៅ ស្រប​ពេល​ករណី​ឆ្លង​ជំងឺ​កូវីដ​១៩​ ជា​ពិសេស​ក្នុង​ភូមិ​សាស្រ្ត​រាជធានី​ភ្នំពេញ បន្ត​កើន​ឡើង។

ក្រសួង​សុខាភិបាល​កម្ពុជា​នៅ​ថ្ងៃ​អង្គារ​នេះ បាន​ប្រកាស​រក​ឃើញ​ករណី​ឆ្លង​ជំងឺ​កូវីដ​១៩ ​ថ្មី​ ចំនួន​ ៩៣៨​ នាក់ ដែល​ជា​ចំនួន​កំណត់​ត្រា​ការ​ឆ្លង​ប្រចាំ​ថ្ងៃ​ច្រើន​ជាង​គេ​បង្អស់ ចាប់​តាំង​ពី​ការ​ផ្ទុះ​ឆ្លង​ជំងឺ​កូវីដ​១៩។ កាល​ពី​ថ្ងៃ​ច័ន្ទ ក្រសួង​រក​ឃើញ​ករណី​ឆ្លង​ថ្មី​ជាង​ ៨០០ ​នាក់។ មនុស្ស​ជាង ​១ ​ម៉ឺន​នាក់ កំពុង​សម្រាក​ព្យាបាល​ជំងឺ​កូវីដ​១៩។ នេះ​បើ​យោង​តាម​ក្រសួង​សុខាភិបាល។

បើ​ទោះ​ករណី​ឆ្លង​នេះ​មិន​ទាន់​ស្រាក​ស្រាន្ត​នៅ​ឡើយ លោក​នាយករដ្ឋមន្រ្តី ហ៊ុន សែន កាល​ពី​ថ្ងៃ​ច័ន្ទ បាន​ចុះ​ហត្ថលេខា​លើ​សេចក្តី​សម្រេច​មួយ ដោយ​បញ្ចប់​ការ​បិទ​ខ្ទប់​ភូមិ​សាស្រ្ត​រាជធានី​ភ្នំពេញ និង​ក្រុង​តា​ខ្មៅ​នៃ​ខេត្ត​កណ្តាល ចាប់​ពី​ថ្ងៃ​ទី​ ៦ ខែ​ឧសភា បន្ទាប់​ពី​ការ​បិទ​ខ្ទប់​ ៣ ​សប្តាហ៍​មក​ហើយ។

លោក ហ៊ុន សែន មិន​បាន​បញ្ជាក់​អំពី​មូល​ហេតុ​នៃ​ការ​បញ្ចប់​ការ​បិទ​ខ្ទប់​នេះ​ថា​ តើ​អាជ្ញាធរ​សុខាភិបាល​អាច​គ្រប់គ្រង​ជំងឺ​នេះ​បាន​ឬ​យ៉ាង​ណា​នោះ​ទេ។

ប៉ុន្តែ​សេចក្តី​សម្រេច​របស់​រដ្ឋាភិបាល​បញ្ជាក់​ថា​ ការ​ដាក់​ចេញវិធាន​ការ​បិទ​ខ្ទប់​សម្រាប់​ផ្នែក​មួយ​ចំនួន​នៃ​ភូមិ​សាស្រ្ត​ទាំង​ ២ ជា​សមត្ថកិច្ច​របស់​គណៈ​អភិបាល​រាជធានី​ភ្នំពេញ ឬ​ខេត្ត​កណ្តាល។

លោក ម៉េត មាសភក្តី អ្នក​នាំពាក្យ​សាលា​រាជធានី​ភ្នំពេញ បាន​ប្រាប់​ VOA ​នៅ​ថ្ងៃ​អង្គារ​នេះ​ថា ​វិធាន​ការ​ថ្មី​ក្រោយ​បញ្ចប់ការ​បិទ​ខ្ទប់ សាលា​រាជធានី​កំពុង​ពិនិត្យ​មើល​លទ្ធភាព​នៃ​ការ​រៀបចំ ​ឬ​កែ​សម្រួល​តំបន់​ក្រហម​និង​តំបន់​លឿង​ទុំ​ឡើង​វិញ ខណៈ​ពង្រីក​ទំហំ​តំបន់​លឿង តាម​ការ​ប្រែ​ប្រួល​នៃ​ស្ថាន​ភាព​ផង​ដែរ។

អ្នក​នាំ​ពាក្យ​រូប​នោះ​ឲ្យ​ដឹង​ទៀត​ថា ​ពាក់ព័ន្ធ​នឹង​ចំណាត់​ការ​ជាក់​លាក់​ណា​មួយ​ចំពោះ​តំបន់​ដែល​បាន​បែង​ចែក​តាម​ពណ៌​អំឡុង​ពេល​បិទ​ខ្ទប់ គឺ​សាលា​រាជធានី​កំពុង​រង់ចាំ​សេចក្តី​សម្រេច​លម្អិត​បន្ថែម​ពី​រដ្ឋាភិបាល។

លោក​មាន​ប្រសាសន៍​ថា៖ «មុន​ពេល​ដែល​យើង​បើក​តំបន់​បិទ​ខ្ទប់​របស់​យើង​ហ្នឹង គឺ​យើង​ត្រូវ​បាន​ការ​អនុវត្ត​នូវ​គោលការណ៍​ថ្មី ហើយ​គោល​ការណ៍​ថ្មី​នេះ គឺ​យើង​កំពុង​រង់​ចាំ​នូវ​លិខិត​គតិ​យុត្តិ​ដើម្បី​ជម្រាប​ជូន​សាធារណៈ»។

បន្ទាប់​ពី​ការ​បិទ​ខ្ទប់​ទាំង​ស្រុង​អស់​រយៈ​ពេល​ ២ ​សប្តាហ៍ រដ្ឋាភិបាល​បាន​បន្ត​វិធាន​ការ​បិទ​ខ្ទប់​រយៈ​ពេល​ ១ ​សប្តាហ៍​បន្ថែម​ទៀត ប៉ុន្តែ​បាន​បែងចែក​ក្រុង​ភ្នំពេញ​ជា​៣​តំបន់​រួម​មាន តំបន់​ក្រហម តំបន់​លឿង​ទុំ និង​តំបន់​លឿង។

តំបន់​ក្រហម​ជា​តំបន់​រឹត​ត្បិត​ខ្លាំង​ដោយ​ហាមឃាត់​ការ​ធ្វើ​ដំណើរ ការ​ចេញ​ពី​ផ្ទះ​និង​អាជីវកម្ម​គ្រប់​ប្រភេទ។ តំបន់​លឿង​ទុំ​ជា​តំបន់​រឹតត្បិត​មធ្យម​ដោយ​មិន​ឲ្យ​មាន​ការ​ចេញ​ពី​ផ្ទះ ឬ​ធ្វើ​ដោយ​មិន​ចាំ​បាច់ ខណៈ​អាជីវកម្ម​ដែល​ចាត់​ទុក​ថាសំខាន់​ប៉ុណ្ណោះ​ត្រូវ​បាន​អនុញ្ញាត​ឲ្យ​ដំណើរ​ការ។ តំបន់​លឿង​ជា​តំបន់​រឹតត្បិត​ទាប ដោយ​អនុញ្ញាត​ឲ្យ​មាន​ការ​ធ្វើ​ដំណើរ​ជា​ទូទៅ​និង​ដំណើរ​ការ​អាជីវកម្ម​មួយ​ចំនួន។

លោក ​មាស នី អ្នកវិភាគ​សង្គម​មាន​ប្រសាសន៍​ថា ករណី​ឆ្លង​ថ្មី​ជា​បន្ត​បន្ទាប់​ជា​សម្ពាធ​បន្ថែម​លើ​វិស័យ​សុខា​ភិបាល​កម្ពុជា។ លោក​ចាត់​ទុក​ថា កិច្ច​ប្រែង​ប្រែង​របស់​រដ្ឋាភិបាល​នៃ​ការ​បិទ​ខ្ទប់​ទីក្រុង​ដើម្បី​ផ្តាច់​ការ​ឆ្លង​ជំងឺ​កូវីដ​១៩ មិន​ទាន់​ទទួល​បាន​ជោគ​ជ័យ​នោះ​ទេ ស្រប​ពេល​ដែល​ការ​បិទ​ខ្ទប់​បាន​បង្ក​ផល​ប៉ះ​ពាល់​មក​លើ​ជីវ​ភាពរបស់​ពលរដ្ឋ ហើយ​ចំនួន​ករណី​ឆ្លង​នៅ​បន្ត​កើន​ឡើង។

លោក​បញ្ជាក់​ថា៖ «នេះ​គឺ​ជា​បញ្ហា​ព្រួយបារម្ភ​មួយ​ដែល​យើង​គិត​ថា នឹង​មាន​ការ​រាលដាល​ធំ​ទៀត​ទៅ​ណា។ ហើយ​យើង​មិន​ដឹង​ថា រដ្ឋាភិបាល​អាច​ផ្លាស់ប្តូរ​ជំហរ​នៅ​ក្នុង​រយៈពេល​ពីរ​បី​ថ្ងៃ​ខាង​មុខ​ទៀត​យ៉ាង​ម៉េច​យើង​អត់​ដឹង​ទេ។ ប្រសិន​បើ​ចំនួន​នេះ វា​នឹង​អាច​កើនឡើង​កាន់​តែ​ខ្ពស់​ថែម​ទៀត​នោះ»។

ខណៈ​ករណី​ឆ្លង​ជំងឺ​កូវីដ​១៩​នៅ​បន្ត​កើន​ឡើង​លោក​ស្រី Li Ailan តំណាងអង្គការ​សុខភាព​ពិភព​លោក​ប្រចាំ​កម្ពុជា​ បាន​លើក​ឡើង​នៅ​ក្នុង​សារ​មួយ​តាម​បណ្តាញ​សង្គម ​Twitter ​កាល​ពី​ថ្ងៃ​ទី​ ២ ខែ​ឧសភា​ក្នុង​ន័យ​ដើម​ថា៖

«ដូច្នេះ​ជា​ការ​សំខាន់​នៅ​ក្នុង​ការ​បន្ត​ចំណាត់​ការ​ជា​រួម​របស់​យើង​ដើម្បី​លុប​បំបាត់​វីរុស​ (កូរ៉ូណា)​ នៅ​កម្ពុជា។ វីរុស​នេះ​នៅ​តែ​បន្ត​រាត​ត្បាត​ហើយ​យើង​សង្ឃឹម​ថា ​ស្ថានភាព​ជំងឺ​កូវីដ​១៩ នឹង​មាន​ភាព​ប្រសើរ​ឡើង​វិញ។ ការ​បន្ធូរ​បន្ថយ​វិធាន​ការ​ប្រឆាំង​ជំងឺ​កូវីដ​១៩ លឿន​ពេក និង​ឆាប់​ពេក​អាច​បង្ក​លទ្ធភាព​នៃ​ការ​កើន​ឡើង​នៃ​ករណី​ឆ្លង»៕

XS
SM
MD
LG