រដ្ឋាភិបាលកម្ពុជាបានសន្យាពន្លឿនការចាក់វ៉ាក់សាំងបង្ការជំងឺកូវីដ១៩ ឱ្យបានរលូនជូនពលរដ្ឋកម្ពុជាប្រមាណ ១០លាននាក់ ដែលក្នុងនោះរដ្ឋាភិបាលត្រូវការវ៉ាក់សាំង ២០លានដូស ដោយរំពឹងថា វ៉ាក់សាំងខ្លះនឹងដឹកមកដល់កម្ពុជាជាបណ្តើរៗ ចាប់ពីខែកុម្ភៈ ឆ្នាំ២០២១នេះទៅ។
ការប្រកាសនេះធ្វើឡើងកាលពីព្រឹកថ្ងៃពុធ តាមរយៈលោក វង្សី វិស្សុត រដ្ឋលេខាធិការប្រចាំការ នៃក្រសួងសេដ្ឋកិច្ចនិងហិរញ្ញវត្ថុ នៅក្នុងវេទិកាសាធារណៈស្តីពីការគ្រប់គ្រងម៉ាក្រូសេដ្ឋកិច្ចនិងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១។
លោក វង្សី វិស្សុត លើកឡើងទៀតថា ការពន្លឿនការចាក់វ៉ាក់សាំងនេះ គឺក្នុងគោលបំណងស្ដារស្ថានភាពសេដ្ឋកិច្ច និងសង្គម ឱ្យមានភាពប្រក្រតីឡើងវិញក្រោយកម្ពុជា រងការរំខានដោយរោគរាតត្បាតជាសាកលមួយនេះ។
លោក វិស្សុត ថ្លែងថា៖ «ជាទស្សនវិស័យកម្ពុជាអាចជាប្រទេសមួយក្រ ប៉ុន្តែក៏មានល្បឿនលឿនជាងគេដែរក្នុងការចាក់វ៉ាក់សាំង។ ហើយហ្នឹងហើយជាសញ្ញាណមួយល្អបំផុតសម្រាប់ការងើបឡើងនៃសេដ្ឋកិច្ច ជាសញ្ញាណមួយល្អបំផុតក្នុងការទាក់ទាញវិនិយោគ ដែលកំពុងមានឱកាសធំក្នុងតំបន់យើងនេះ»។
មន្ត្រីធំបំផុតលំដាប់ទីពីរនៅក្រសួងហិរញ្ញវត្ថុរូបនេះ បន្ថែមថា មកដល់ពេលវេលានេះថវិកា ដើម្បីជាវវ៉ាក់សាំងលែងជាបញ្ហាទៀតហើយសម្រាប់កម្ពុជា ដោយកម្ពុជានឹងទទួលបានជំនួយវ៉ាក់សាំងសរុប ១១លានដូស ក្នុងចំណោម ២០លានដូស ដែលត្រូវការ។
«ដូច្នេះបើនិយាយពីវត្តមានវ៉ាក់សាំងស្រុកខ្មែរ ដូចលែងចោទជាបញ្ហាធំហើយ។ សំខាន់យើងត្រូវរៀបចំឃ្លាំងដឹកជញ្ជូន ត្រូវចាក់វ៉ាក់សាំងតាមនីតិវិធី ហើយគ្រប់គ្រងសំណល់ទេដែលពិបាក។ ចាប់ផ្តើមចុះឈ្មោះឥឡូវយើងរៀបចំ Platform ហើយៗ ... Readiness ត្រៀមអស់ហើយៗ»។
គិតត្រឹមពេលនេះមានវ៉ាក់សាំងជាច្រើនដែលតម្រង់ជួររង់ចាំការទទួលស្គាល់ពីអង្គការសុខភាពពិភពលោក។ ក៏ប៉ុន្តែពុំទាន់មានវ៉ាក់សាំងណាមួយត្រូវបានទទួលស្គាល់ពីអង្គការសុខភាពពិភពលោកនេះទេ ក្រៅតែពីការផ្តល់ការអនុញ្ញាតដោយរដ្ឋជាសមាជិកនីមួយៗ។
ក្នុងករណីកម្ពុជាបើតាមការលើកឡើងរបស់លោក វង្សី វិស្សុត កម្ពុជានឹងទទួលទិញផង និងទទួលជំនួយផង នូវវ៉ាក់សាំងពីក្រុមហ៊ុនរបស់ចិនគឺ Sinovac Biotech និង Sinopharm ពីក្រុមហ៊ុនរបស់រុស្ស៊ីគឺ Sputnik V ពីក្រុមហ៊ុនរបស់អង់គ្លេស-ថៃគឺ Oxford-AstraZeneca។
ឯកអគ្គរដ្ឋទូតឥណ្ឌា ក៏ទើបថ្លែងថា ឥណ្ឌាដែលជាមជ្ឈមណ្ឌលផលិតវ៉ាក់សាំងធំបំផុតរបស់ពិភពលោកអំឡុងពេលកូវីដនេះ ក៏កំពុងពិចារណាគ្រោងបញ្ជូនជំនួយវ៉ាក់សាំងដល់កម្ពុជាផងដែរ។
បើយោងសារព័ត៌មានអន្តរជាតិដឹនូវយ៉កថាមស៍ (The New York Times) ដែលតាមដានអំពីដំណើរការនៃការផលិតនិងទទួលស្គាល់វ៉ាក់សាំងបង្ហាញថា វ៉ាក់សាំងឈ្មោះ CoronaVac របស់ក្រុមហ៊ុន Sinovac Biotech មានប្រសិទ្ធិភាពសរុបត្រឹមតែជាង ៥០% ដែលជាកម្រិតអប្បបរមាបានកំណត់ដោយទីភ្នាក់ងារនិយតកម្មជាច្រើន សម្រាប់ការផ្តល់សិទ្ធិចាក់វ៉ាក់សាំងការពារមេរោគ។
ក្រុមអ្នកស្រាវជ្រាវអំពីប្រសិទ្ធភាពវ៉ាក់នៅប្រទេសប្រេស៊ីល បានបង្ហាញលទ្ធផលនេះ។
ទោះបីជាមានប្រសិទ្ធភាពតិចតួចក៏ដោយ ប្រទេសមួយចំនួនដូចជាប្រទេសឥណ្ឌូនេស៊ី តួកគីនិងប្រេស៊ីល បានអនុញ្ញាតការដំណើរការនៃការចាក់វ៉ាក់សាំងឈ្មោះ CoronaVac របស់ក្រុមហ៊ុន Sinovac Biotech នេះ។
សាស្ត្រាចារ្យ ឈា ឆវណ្ណ នាយកនៃវិទ្យាស្ថានជាតិសុខភាពសាធារណៈកម្ពុជា លើកឡើងថា រដ្ឋាភិបាលគិតគូរហើយពីសុវត្ថិភាពក្នុងការដំណើរការចាក់វ៉ាក់សាំង និងផែនការរើសអ្នកអាទិភាព។
លោកប្រាប់វីអូអេថា សម្រាប់ក្រុមអ្នកបច្ចេកទេសដូចជាលោកជាដើម កំពុងរង់ចាំទទួលព័ត៌មានលម្អិតផ្នែកបច្ចេកទេសនៃវ៉ាក់សាំង។
«ដូចឡានអញ្ចឹងតែគេឲ្យមកគេហ្នឹងឲ្យ Manual មកហើយមិនឲ្យមកទទេទេ។ ពេលវាមកវាត្រូវមានព័ត៌មានដែលលម្អិត ដែលមិនមែនជាព័ត៌មានទូទៅទេ តែវាព័ត៌មានបច្ចេកទេសបើឲ្យមកគេភ្ជាប់ព័ត៌មានអស់ហ្នឹងហើយ»។
លោក ឈា ឆវណ្ណ បន្តថាក្រុមបច្ចេកទេសក៏កំពុងតាមដានអំពីផលប៉ះពាល់របស់វ៉ាក់សាំង នៅប្រទេសដទៃទៀតដែលកំពុងដំណើរការនៃការចាក់វ៉ាក់សាំង។
«ទោះបីឥឡូវយើងមិនទាន់មានព័ត៌មានលម្អិតទាក់ទងជាមួយវ៉ាក់សាំងហ្នឹង ប៉ុន្តែខ្ញុំគិតថា យើងនឹងតាមមើលសភាពការណ៍នៅប្រទេសគេផ្សេងៗទៀត ដែលគេចាក់មុនយើង។ ហ្នឹងក៏ជាឧទាហរណ៍មួយដែលយើងសិក្សាពីគេដែរ។ យើងតាមមើលគេសិនទម្រាំមកដល់យើងពេលហ្នឹង យើងបានអីថ្មីថែមមកទៀតពីគេ ដែលចាក់មុនយើងហ្នឹង»។
លោក ឆវណ្ណ បន្ថែមថា រដ្ឋាភិបាលនិងប្រជាពលរដ្ឋត្រូវមានការប្រុងប្រយ័ត្នអំពីប្រភេទវ៉ាក់សាំងដែលត្រូវចាក់ជូនមនុស្សមានវ័យចាស់ជរា ហើយកុមារាកុមារីមិនទាន់គ្រប់អាយុ មិនទាន់ចាំបាច់ត្រូវការវ៉ាក់សាំងនៅឡើយទេ។
ទោះជាយ៉ាងណាលោកថា វ៉ាក់សាំង «ផលិតដើម្បីជួយមនុស្ស» ដូចនេះលោកមានទំនុកចិត្តថា វានឹងជួយការពារពីការឆ្លងជំងឺកូវីដជាជាងការព្រួយបារម្ភ អំពីគុណភាពវ៉ាក់សាំង។
«ហើយខ្ញុំក៏មិនគិតថាវាបណ្តាលឲ្យគ្រោះថ្នាក់អីដែរ ព្រោះវ៉ាក់សាំងអ្វីដែលគេបារម្ភគឺរឿងReaction [ប្រតិកម្ម] ទេ។ប៉ុន្តែ អ្នកណាក៏មានដែររឿងប្រតិកម្មហ្នឹងនោះ។ ថ្នាំយើងប្រើធម្មតា ក៏វាមានប្រតិកម្មដែរ»។
លោក ឆវណ្ណ បន្ថែមថា៖ «អ៊ីចឹងវិធីដែលយើងគិត គឺយើងគិតរឿងថាតើយើងត្រៀមលក្ខណៈយ៉ាងម៉េចបើសិនជាមានប្រតិកម្មបែបណាយើងជួយយ៉ាងម៉េច អីម៉េច។ យើងគិតអញ្ចឹងវិញ។ គេក៏ពិនិត្យសុវត្ថិភាពគេដែរមុននឹងគេធ្វើ។ អញ្ចឹងយើងគិតបន្តពីហ្នឹងមក។ យើងមិនមែនទៅឆែកពីគេឡើងវិញពីសូន្យមកទេ។ យើងចង់ដឹងអីបន្ថែមយើងពិនិត្យមើលតទៀត ហើយគោលការណ៍យើងគឺការពារសុវត្ថិភាពទាក់ទងនឹងរឿងប្រតិកម្ម ហ្នឹងទេ»។
កាលពីដំណាច់ខែធ្នូឆ្នាំទៅលោកនាយករដ្ឋមន្ត្រី ហ៊ុន សែន លើកឡើងថា កម្ពុជានឹងទទួលប្រើតែវ៉ាក់សាំងណាដែលទទួលស្គាល់ដោយអង្គការសុខភាពពិភពលោក (World Health Organization) ប៉ុណ្ណោះតែក្រោយមក នៅពាក់កណ្តាលខែមករានេះលោកប្ដូរចិត្ត ដោយបានប្រកាសទទួលជំនួយវ៉ាក់សាំង Sinopharm ១លានដូស ពីរដ្ឋាភិបាលចិន ហើយថា រដ្ឋាភិបាលកម្ពុជានឹងគ្រោងចាក់ជូនក្រុមអាទិភាព៥០ម៉ឺននាក់ដំបូងគេ។
លោក ហ៊ុន សែន បន្តទៀតថា ក្រុមអាទិភាពទាំងនោះ រួមមានអ្នកបម្រើការងារដែលនៅជុំវិញរូបលោកព្រះមហាក្សត្រ ប្រធានព្រឹទ្ធសភាប្រធានរដ្ឋសភា ក៏ដូចជាក្រុមជួរមុខដែលរួមមានគ្រូពេទ្យ គ្រូបង្រៀន កងកម្លាំងប្រដាប់អាវុធគ្រប់ប្រភេទ នគរបាលយុត្តិធម៌គ្រប់ផ្នែក អ្នកអនាម័យ អ្នករត់ម៉ូតូឌុបកង់បី និងតាក់ស៊ីជាដើម៕
