ក្រសួងសុខាភិបាលកម្ពុជា បានកម្រិតចំនួនភ្ញៀវក្នុងតុពិសារភោជនីហារ នាពិធីមង្គលការមិនឱ្យលើសពីប្រាំនាក់ឡើយក្នុងមួយតុៗ ដែលនេះជាវិធានការប្រឆាំងនឹងជំងឺកូវីដ១៩។
ក្នុងលិខិតផ្ញើជូនអភិបាលខេត្តរាជធានីចុះថ្ងៃអង្គារ ទី២៦ ខែមករានេះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានកត់សម្គាល់អំពីការអនុវត្តន៍វិធានការការពារបង្ការជំងឺកូវីដ១៩ តាមពិធីបុណ្យនិងមង្គលការថា «នៅមានកម្រិតទាបនៅឡើយ»។
លោក ម៉ម ប៊ុនហេង បានណែនាំដល់អាជ្ញាធរថ្នាក់ខេត្តរាជធានីថា មុននឹងអនុញ្ញាតដល់សំណើសុំរៀបចំពិធីមង្គលការ ត្រូវយកវិធានការការពារសុខភាពរបស់រដ្ឋជាបន្ទាត់វាស់វែង រួមមានការដាក់ពង្រាយម៉ាស៊ីនវាស់កម្ដៅ អាល់កុលលាងដៃអនាម័យ ម្ហូបអាហារ និងរក្សាគន្លាត ១,៥ម៉ែត្រ។
លិខិតដដែលបន្តថា៖ «រៀបតុអាហារដោយកំណត់ចំនួនភ្ញៀវអង្គុយត្រឹមប្រាំនាក់ក្នុងមួយតុ ដែលទំលាប់ពីមុនអង្គុយ ១០នាក់»។
នេះជាវិធានការថ្មីចុងក្រោយរបស់រដ្ឋអំណាចកម្ពុជាប្រយុទ្ធនឹងជំងឺឆ្លងជាសាកលនេះ បន្ទាប់ពីមានករណីផ្ទុះឆ្លងក្នុងសហគមន៍ពីរលើកកាលពីខែវិច្ឆិកា ហើយទើបបិទបញ្ចប់នៅខែធ្នូកន្លងទៅ។
កម្ពុជារក្សាស្ថិតិការឆ្លងកូវីដ១៩ សរុបនៅត្រឹម ៤៦០ករណី គិតត្រឹមថ្ងៃអង្គារ ពោលគឺមួយឆ្នាំគត់ គិតពីពេលរកឃើញករណីទីមួយនៅខេត្តព្រះសីហនុ កាលពីថ្ងៃទី២៧ ខែមករា ឆ្នាំ២០២០។
លោក ហ៊ុន សែន នាយករដ្ឋមន្ត្រីបញ្ជាក់ធានាអំពីសេចក្ដីប្រាថ្នាចង់ចាក់វ៉ាក់សាំង ១លានដូស បង្ការជំងឺកូវីដ១៩ ដែលជាជំនួយរបស់ប្រទេសចិនដល់អ្នកបម្រើការងារនៅជួរមុខប្រយុទ្ធនឹងវីរុសនេះ និងកងកម្លាំងប្រដាប់អាវុធសរុប ៥០ម៉ឺននាក់ នៅមុនបុណ្យចូលឆ្នាំខ្មែរខាងមុខនេះ៕
