ប្រទេសកម្ពុជាគ្រោងនឹងទទួលបានវ៉ាក់សាំងបង្ការជំងឺកូវីដ១៩ ដំបូង ចំនួន ៣ សែនដូសពីប្រទេសចិននៅខែក្រោយ ខណៈកម្ពុជាបានរកឃើញការឆ្លងវីរុសជំងឺកូវីដ១៩ ចំនួន ៧ ករណីបន្ថែមទៀតកាលពីថ្ងៃពុធ។ នេះបើយោងតាមមន្ត្រីជាន់ខ្ពស់សុខាភិបាលកម្ពុជា។
សារព័ត៌មានវីអូឌីបានដកស្រង់សម្តីរបស់អ្នកនាំពាក្យក្រសួងសុខាភិបាលកម្ពុជាអ្នកស្រី ឱ វណ្ណឌីន ដែលបាននិយាយថា រដ្ឋាភិបាលចិននឹងផ្តល់វ៉ាក់សាំងរបស់ក្រុមហ៊ុនស៊ីណូហ្វាម (Sinopharm) ដល់កម្ពុជាចំនួន ៣០ ម៉ឺនដូសនេះជាមុនសិនក្នុងដំណាក់កាលដំបូងនៅក្នុងខែកុម្ភៈ ដែលត្រូវជាខែចូលឆ្នាំថ្មីប្រពៃណីចិន។
កាលពីសប្តាហ៍មុន លោកនាយករដ្ឋមន្ត្រី ហ៊ុន សែន បានប្រកាសថា ចិនបានសន្យាផ្តល់វ៉ាក់សាំងបង្ការជំងឺកូវីដ១៩ ចំនួន ១ លានដូសដល់កម្ពុជា។
ការប្រកាសទទួលយកវ៉ាក់សាំងចិននេះធ្វើឡើង នៅពេលដែលកម្ពុជាមានករណីឆ្លងថ្មីនៃជំងឺកូវីដ១៩ ចំនួន ៧ ករណីទៀតកាលពីថ្ងៃពុធ ក្នុងចំណោមពលរដ្ឋខ្មែរដែលបានវិលត្រឡប់មកពីប្រទេសថៃ។
ករណីឆ្លងថ្មីចុងក្រោយបំផុតនេះ នាំឲ្យចំនួនអ្នកឆ្លងជំងឺកូវីដ១៩ សរុបក្នុងប្រទេសកម្ពុជាកើនដល់ ៤៤៨ នាក់ គិតត្រឹមថ្ងៃទី ២០ ខែមករា។ នេះបើយោងតាមក្រសួងសុខាភិបាល៕
