គណៈរដ្ឋមន្រ្តីកម្ពុជានៅព្រឹកថ្ងៃសុក្រនេះ សម្រេចអនុម័តវិសោធនកម្មក្រមព្រហ្មទណ្ឌ ដោយចែងដាក់ទោសអ្នកប្រមាថព្រះមហាក្សត្រឲ្យជាប់ពន្ធនាគារពី១ឆ្នាំទៅ៥ឆ្នាំ និងពិន័យជាប្រាក់ពី ២លានរៀល ទៅ១០លាន រៀល។ នេះបើតាមអ្នកនាំពាក្យរាជរដ្ឋាភិបាលកម្ពុជា។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តីប្រាប់ VOA នារសៀលថ្ងៃសុក្រនេះថា លោកនាយករដ្ឋមន្រ្តី ហ៊ុន សែន បានដឹកនាំកិច្ចប្រជុំគណៈរដ្ឋមន្រ្តី ដោយអនុម័តសេចក្តីព្រាងវិសោធនកម្មច្បាប់មួយចំនួនដូចជា សេចក្តីព្រាងវិសោធនកម្មរដ្ឋធម្មនុញ្ញ សេចក្តីព្រាងវិសោធនកម្មក្រមព្រហ្មទណ្ឌ និងរបៀបវារៈមួយចំនួនទៀត។
លោកបន្តថា បទល្មើសប្រមាថអង្គព្រះមហាក្សត្រ ត្រូវរៀបចំជាមាត្រាថ្មីមួយបន្ថែមទៀត គឺមាត្រា ៤៣៧ នៃក្រមព្រហ្មទណ្ឌ ដែលមានខ្លឹមសារជារួមថា ការប្រមាថចំពោះអង្គព្រះមហាក្សត្រត្រូវផ្តន្ទាទោសដាក់ពន្ធនាគារពី១ឆ្នាំ ទៅ៥ឆ្នាំ និងពិន័យជាប្រាក់ពី ២លានរៀល ទៅ១០លានរៀល។ លោកថា ចំពោះនីតិបុគ្គលក៏អាចត្រូវបានផ្តនា្ទទោសពិន័យជាប្រាក់ពី១០លានរៀល ទៅ៥០លានរៀល ព្រមទាំងទោសបន្ថែមមួយ ឬច្រើន ក្នុងករណីដែលតុលាការរកឃើញថា មានពិរុទ្ធភាពពាក់ព័ន្ធនឹងការប្រមាថចំពោះអង្គព្រះមហាក្សត្រ។
លោក ផៃ ស៊ីផាន បន្ថែមថា ការសម្រេចធ្វើវិសោធនកម្មដាក់ទោសអ្នកប្រមាថព្រះមហាក្សត្រនៅពេលនេះ គឺដោយសារមានសំណើពីក្រុមប្រឹក្សាធម្មនុញ្ញ និងបន្ទាប់ពីមានករណីប្រមាថព្រះមហាក្សត្រកើតមានជាបន្តបន្ទាប់។
លោកបញ្ជាក់ថា៖
«ដោយសារយើងឃើញមានការកើនឡើងនៃអ្នកវាយប្រហារ ប៉ះពាល់ដល់ព្រះមហាក្សត្រជាទីសក្ការៈរបស់យើងទាំងអស់គ្នា ទើបបានយើងចាប់ផ្តើម។ ហើយការចាប់ផ្តើមនេះយើងបានពិភាក្សា យើងបានពិនិត្យពិច័យ សិក្សាអំពីប្រទេសដែលមានព្រះមហាក្សត្រអាស្រ័យរដ្ឋធម្មនុញ្ញ ដូចជាប្រទេសអង់គ្លេស ព្រះរាជាណាចក្រថៃ និងប្រទេសដទៃទៀត យើងធ្វើលំនាំប្រហាក់ប្រហែលគ្នា»។
លោក ផៃ ស៊ីផាន បញ្ជាក់ថា សេចក្តីព្រាងវិសោធនកម្មច្បាប់ដែលគណៈរដ្ឋមន្ត្រីទើបតែអនុម័តនៅព្រឹកនេះ នឹងបញ្ជូនទៅរដ្ឋសភាដើម្បីអនុម័ត នាសប្តាហ៍ក្រោយ។
បើតាមច្បាប់របស់ព្រះរាជាណាចក្រថៃ ដែលជាប្រទេសជាប់ព្រំដែនរបស់កម្ពុជាចែងថា ការប្រមាថព្រះមហាក្សត្រ នឹងត្រូវជាប់ទោសពី៣ ទៅ១៥ឆ្នាំ។ ច្បាប់នេះត្រូវបានរងការរិះគន់ជារឿយៗពី អង្គការសង្គមស៊ីវិលនិងអ្នកការពារសិទ្ធិមនុស្សអន្តរជាតិ ដែលមើលឃើញថា វាហាក់ដូចជាមានទម្ងន់ធ្ងន់ហួសពេកសម្រាប់អ្នកប្រព្រឹត្តបទល្មើសនេះ។
លោក អ៊ុំ ដារ៉ាវុធ អ្នកនាំពាក្យព្រះបរមរាជវាំងសុំមិនធ្វើអត្ថាធិប្បាយ ដោយបញ្ជាក់ថា លោកមិនទាន់ទទួលបានសេចក្តីព្រាងវិសោធនកម្មច្បាប់នោះនៅឡើយ។
បើទោះបីជាសេចក្តីព្រាងច្បាប់ទាំងនេះត្រូវបានគណៈរដ្ឋមន្រ្តីអនុម័ត និងត្រៀមបញ្ជូនទៅរដ្ឋសភាក្តី ប៉ុន្តែ ឯកសារដែលជាសេចក្តីព្រាងច្បាប់ទាំងនោះមិនទាន់ត្រូវបានបង្ហាញជាសាធារណៈ ឬដាក់ឱ្យមានការពិគ្រោះយោបល់ឲ្យបានទូលំទូលាយនោះទេ។
លោក អំ សំអាត មន្រ្តីជាន់ខ្ពស់ផ្នែកអង្កេតនៃអង្គការការពារសិទ្ធិមនុស្សលីកាដូ លើកឡើងថា លោកគាំទ្រចំពោះការរៀបចំច្បាប់ចែងការពារព្រះមហាក្សត្រ។ ប៉ុន្តែលោកបានរិះគន់ចំពោះការធ្វើវិសោធនកម្មច្បាប់ទាំងនោះដោយមិនមានការចូលរួមពិភាក្សាពីភាគីពាក់ព័ន្ធ និងការមិនផ្សព្វផ្សាយអត្ថន័យនៃសេចក្តីព្រាងទាំងនោះជាសាធារណៈ។
លោកមានប្រសាសន៍ថា៖
«នៅប្រទេសគេដែលប្រកាន់លទ្ធិប្រជាធិបតេយ្យ សេចក្តីព្រាងច្បាប់ក្តី ឬក៏ការធ្វើវិសោធនកម្មច្បាប់ក្តី អាសេចក្តីព្រាងហ្នឹងគេអាចនឹងមានការដាក់ពិគ្រោះយោបល់ជាសាធារណៈ ដើម្បីទទួលនូវយោបល់ផ្សេងៗទៀតពីអ្នកជំនាញ ឬក៏អ្នកពាក់ព័ន្ធហ្នឹង ដើម្បីធ្វើយ៉ាងណាឲ្យច្បាប់ហ្នឹងជាធរមានអនុវត្តទៅវាមានប្រសិទ្ធភាព ហើយមិនមានបញ្ហាចម្រូងចម្រាសដូចច្បាប់មុនៗមក យើងឃើញថា មានបញ្ហាចម្រូងចម្រាសច្រើនដែរ ច្បាប់មួយចំនួន»។
កន្លងមក ការប្រមាថអង្គព្រះមហាក្សត្រតាមរយៈការបង្ហោះរូបភាព និងប្រើពាក្យមិនគប្បីតាមបណ្តាញសង្គម Facebook គឺជាប្រធានបទដែលប្រជាពលរដ្ឋខ្មែរជជែកគ្នា និងបញ្ចេញការមិនពេញចិត្តចំពោះទង្វើរបស់អ្នកបង្ហោះនោះ។ គណនី Facebook ទាំងនោះភាគច្រើនមានឈ្មោះជាភាសាបរទេស ដែលមានជាភាសាអង់គ្លេស និងថៃជាដើម។
ការបង្កើតមាត្រាថ្មីដាក់ទោសទណ្ឌអ្នកប្រមាថព្រះមហាក្សត្រខ្មែរ គឺធ្វើឡើងមិនប៉ុន្មានថ្ងៃ ក្រោយពីមានការកាត់ទោសលោក លឺ ឡាយស្រេង អតីតឧបនាយករដ្ឋមន្ត្រី ស្តីពីការបរិហារកេរ្តិ៍លោក ហ៊ុន សែន និងហៅព្រះមហាក្សត្រខ្មែរថាជា«មាន់គ្រៀវ» ក្នុងទូរស័ព្ទឯកជនដែលគេលួចថតសំឡេងរបស់លោក។ តុលាការបានកាត់ទោសលោក លឺ ឡាយស្រេង ពីបទបរិហារកេរ្តិ៍លោក ហ៊ុន សែន ដោយតម្រូវឲ្យលោកបង់សំណងចូលរដ្ឋចំនួន៨លានរៀល និងសងជំងឺចិត្តទៅលោក ហ៊ុន សែន ចំនួន៥០០លានរៀល។
ក្រៅពីនេះគេមើលឃើញថា ករណីប្រមាថព្រះមហាក្សត្រនៅកម្ពុជា មិនទាន់មានការចាប់ខ្លួនបុគ្គលមកផ្តន្ទាទោសនៅឡើយ ប៉ុន្តែកាលពីឆ្នាំ២០១៦ ទាក់ទងនឹងករណីគំរាមសម្លាប់ និងប្រមាថថ្នាក់ដឹកនាំរដ្ឋាភិបាលតាមបណ្ដាញសង្គមនេះ តុលាការបានចាត់ការលើករណីមួយចំនួន ដូចជា ករណីគំរាមសម្លាប់លោក ស ខេង រដ្ឋមន្ត្រីក្រសួងមហាផ្ទៃ ករណីគំរាមសម្លាប់លោក សុខ ទូច ប្រធានក្រុមស្រាវជ្រាវបញ្ហាព្រំដែនជាដើម៕
