បន្ទាប់ពីលោកនាយករដ្ឋមន្រ្តី ហ៊ុន សែន ប្រកាសប្តឹងលោក លឺ ឡាយស្រេង ថា បានប្រមាថព្រះមហាក្សត្រ និងនិយាយបរិហារលោក នៅថ្ងៃអង្គារនេះ រដ្ឋមន្រ្តីក្រសួងយុត្តិធម៌ក៏បានចេញមុខប្តឹងលោក លឺ ឡាយស្រេង ពីបទប្រមាថព្រះមហាក្សត្រ។ បណ្តឹងនេះធ្វើឡើងស្របពេលដែលមេធាវីរបស់លោក ហ៊ុន សែន ប្តឹងលោក លឺ ឡាយស្រេង ពីបទបរិហារកេរ្តិ៍ និងទាមទារឲ្យសងជំងឺចិត្តលោក ហ៊ុន សែន ចំនួន៥០០លានរៀល។
ក្រោយពីការជំរុញរបស់លោក ហ៊ុន សែន នៅថ្ងៃអង្គារនេះ លោក លឺ ឡាយស្រេង អតីតឧបនាយករដ្ឋមន្ត្រីមកពីគណបក្សរាជានិយម ហ៊្វុនស៊ិនប៉ិច រងពាក្យបណ្តឹងយ៉ាងហោចណាស់ចំនួនពីរ រួមទាំងការប្រមាថព្រះមហាក្សត្រនរោត្តម សីហមុនី និងបណ្តឹងបរិហារកេរិ៍្តលោក ហ៊ុន សែន។
ក្នុងពាក្យបណ្តឹងដែលត្រូវបានផ្សព្វផ្សាយជាសាធារណៈនៅថ្ងៃអង្គារនេះ លោក អង្គ វង្ស វឌ្ឍនា រដ្ឋមន្ដ្រីក្រសួងយុត្តិធម៌ បានដាក់ពាក្យបណ្ដឹងទៅសាលាដំបូងរាជធានីភ្នំពេញ ដោយប្ដឹងលោក លឺ ឡាយស្រេង ពីបទប្រមាថយ៉ាងធ្ងន់ធ្ងរដល់ព្រះចេស្ដាអង្គព្រះមហាក្សត្រ។ លោកបានបញ្ជាក់ក្នុងពាក្យបណ្តឹងនោះថា លោក លឺ ឡាយស្រេង បានប្រើសម្តីមិនសមរម្យ ដែលលោកថា ជាការប្រមាថយ៉ាងធ្ងន់ធ្ងរលើព្រះមហាក្សត្រ។
លោក អង្គ វង្សវឌ្ឍានា បានសរសេរបណ្តឹងនោះក្នុងន័យដើមថា៖
«ក្រសួងយុត្តិធម៌ស្នើឯកឧត្តមពិនិត្យដោយយកចិត្តទុកដាក់ ចាត់វិធានការតាមផ្លូវច្បាប់ជាបន្ទាន់ និងតឹងរ៉ឹងបំផុតទៅតាមនីតិវិធីច្បាប់ជាធរមាន ចំពោះករណីប្រមាថយ៉ាងធ្ងន់ធ្ងរដល់ព្រះចេស្តាអង្គព្រះមហាក្សត្រនៃយើង»។
បណ្ដឹងផ្សេងមួយទៀតរបស់រដ្ឋមន្ដ្រីក្រសួងយុត្តិធម៌ ដែលបានដាក់ចូលទៅកាន់អយ្យការអមសាលាដំបូងរាជធានីភ្នំពេញ នារសៀលថ្ងៃអង្គារនេះ ធ្វើឡើងស្របពេលដែលពាក្យបណ្ដឹងរបស់លោកនាយករដ្ឋមន្រ្តី ហ៊ុន សែន តាមរយៈមេធាវីរបស់លោក គឺលោក គី តិច ក៏បានដាក់ចូលសាលាដំបូងរាជធានីភ្នំពេញផងដែរ។ លោក ហ៊ុន សែន ប្ដឹងលោក លឺ ឡាយស្រេង ពីបទប្រមាថយ៉ាងធ្ងន់ធ្ងរដល់អង្គព្រះមហាក្សត្រ និងពីបទបរិហាកេរ្ដិ៍ ដែលចោទថា លោកបានផ្ដល់លុយដល់មន្ដ្រីគណបក្សហ៊្វុនស៊ិនប៉ិចក្នុងម្នាក់២ម៉ឺនដុល្លារ។
លោក គី តិច មេធាវីការពារក្តីឲ្យលោក ហ៊ុន សែន ប្រាប់អ្នកសារព័ត៌មាន ក្រោយចេញពីដាក់ពាក្យបណ្តឹងនៅតុលាការកាលពីសៀលថ្ងៃអង្គារនេះថា លោកបានប្តឹងលោក លឺ ឡាយស្រេង ទៅកាន់សាលាដំបូងរាជធានីភ្នំពេញ ពីបទបរិហារកេរ្តិ៍ជាសាធារណៈ និងស្នើឲ្យតុលាការផ្តន្ទាទោសលោកតាមច្បាប់ ព្រមទាំងទាមទារសំណងជំងឺចិត្តចំនួន៥០០លានរៀលឲ្យលោកនាយករដ្ឋមន្រ្តី ហ៊ុន សែន។
លោក គី តិច បញ្ជាក់ថា៖
«សុំឲ្យតំណាងអយ្យការអមសាលាដំបូងរាជធានីភ្នំពេញ និងសាលាដំបូងរាជធានីភ្នំពេញ សុំឲ្យទី១ ធ្វើការចោទប្រកាន់ និងផ្តន្ទាទោស លើឈ្មោះ លឺ ឡាយស្រេង តាមច្បាប់។ ចំណុចទី២គឺទាមទារឲ្យ លឺ ឡាយស្រេង សងសំណងជំងឺចិត្តចំពោះការធ្វើឲ្យបាត់បង់កិត្តិយស កិត្តិស័ព្ទរបស់សម្តេចនាយករដ្ឋមន្រ្តី ចំនួន៥០០លានរៀល។
ចំណុចទី៣គឺសុំឲ្យតុលាការប្រកាសការផ្តន្ទាទោសបន្ថែម តាមមាត្រា៣១០ នៃក្រមព្រហ្មទណ្ឌ»។
ក្រៅពីបណ្តឹងរបស់លោក ហ៊ុន សែន និងបណ្តឹងរបស់រដ្ឋមន្រ្តីក្រសួងយុត្តិធម៌ គណបក្សហ៊្វុនស៊ិនប៉ិចរបស់សម្តេចក្រុមព្រះនរោត្តមរណឬទ្ធិ ក៏បានប្រកាសប្តឹងលោក លឺ ឡាយស្រេង ផងដែរ។
ការដាក់ពាក្យបណ្តឹងជាបន្តបន្ទាប់ប្រឆាំងនឹងលោក លឺ ឡាយស្រេង ធ្វើឡើងមិនបានប៉ុន្មានថ្ងៃក្រោយពេលលោក ហ៊ុន សែន ដ៏មានឥទ្ធិពលជំរុញឱ្យមានការដាក់ពាក្យបណ្តឹងនានា ដោយផ្អែកទៅលើខ្សែអាត់សំឡេងបានមកពីការលួចថត ក្នុងកិច្ចសន្ទនាតាមទូរស័ព្ទឯកជនរបស់លោក លឺ ឡាយស្រេង។
សំឡេងនៃការសន្ទនាតាមទូរស័ព្ទឯកជនរបស់អតីតឧបនាយករដ្ឋមន្រ្តីកម្ពុជារូបនេះ ត្រូវបានគេលួចថត ហើយបង្ហោះជាសាធារណៈតាមរយៈទំព័រហ្វេសប៊ុកឈ្មោះ «សី ហា» កាលពីថ្ងៃអាទិត្យ ដោយលោកបានហៅព្រះបាទនរោត្តមសីហមុនី ថា ជា «មាន់គ្រៀវ»។ លោក លឺ ឡាយស្រេង ក៏បានលើកឡើងពីគម្រោងដែលគណបក្សហ៊្វុនស៊ិនប៉ិច ត្រៀមទទួលយកអាសនៈរបស់គណបក្សសង្គ្រោះជាតិ ដែលប្រឈមនឹងការរំលាយ និងថា លោកនាយករដ្ឋមន្រ្តី ហ៊ុន សែន ឲ្យលុយទៅមន្ត្រីគណបក្សហ៊្វុនស៊ិនប៉ិចម្នាក់២ម៉ឺនដុល្លារសហរដ្ឋអាមេរិក។
ទំព័រហ្វេសប៊ុកឈ្មោះ «សី ហា» គឺជាទំព័រហ្វេសប៊ុក ដែលតែងបង្ហោះរាល់ខ្សែអាត់សំឡេងសន្ទនាតាមទូរស័ព្ទឯកជនរបស់មន្រ្តីជាន់ខ្ពស់គណបក្សសង្គ្រោះជាតិកន្លងមក។ រាល់ការបង្ហោះសំឡេងសន្ទនាក្នុងទំព័រហ្វេសប៊ុកនោះ គេបានអង្គភាពសារព័ត៌មានហ្វ្រេសញូវ ដែលស្និទ្ធនឹងរដ្ឋាភិបាល តែងយកទៅផ្សព្វផ្សាយបន្ត។
ទោះយ៉ាងណាក៏ដោយ មិនទាន់មានចំណាត់ការផ្លូវច្បាប់ណាមួយប្រឆំាងនឹងការលួចថតសំឡេងទូរស័ព្ទឯកជន និងការបង្ហោះជាសាធារណៈនៅឡើយនោះទេ បើទោះជាកម្ពុជាមានច្បាប់រួចយ៉ាងណាក៏ដោយ។
យោងតាមមាត្រា៣០១នៃក្រមព្រហ្មទណ្ឌព្រះរាជាណាចក្រកម្ពុជា អំពើស្តាប់ ឬថតសម្តីដែលនិយាយជាឯកជន ឬជាការសម្ងាត់ ដោយគ្មានការយល់ព្រមពីបុគ្គលដែលមានការពាក់ព័ន្ធនោះ ត្រូវផ្តន្ទាទោសដាក់ពន្ធនាគារពី១ខែ ទៅ១ឆ្នាំ និងពិន័យជាប្រាក់ពីមួយសែនរៀលទៅ២សែនរៀល។
អ្នកច្បាប់លើកឡើងថា ការអនុវត្តច្បាប់នៅប្រទេសកម្ពុជាមានភាពមិនច្បាស់លាស់និងថា ការលួចថតសំឡេងឯកជនភាពមិនត្រូវបានចាត់ទុកជាភស្តុតាងនោះទេ ចំណែកបទប្រមាថព្រះមហាក្សត្រក៏មិនមានចែងក្នុងក្រមព្រហ្មទណ្ឌនោះដែរ៕
