ភ្លាមៗបន្ទាប់ពីលោក ចូ បាយដិន (Joe Biden) បេក្ខជនប្រធានាធិបតីខាងគណបក្សប្រជាធិបតេយ្យ បានប្រកាសជ្រើសរើសលោកស្រីសមាជិកព្រឹទ្ធសភានៃរដ្ឋកាលីហ្វ័ញ៉ា ខាម៉ាឡា ហារីស (Kamala Harris) កាលពីថ្ងៃអង្គារ ឲ្យក្លាយជាបេក្ខជនអនុប្រធានាធិបតីនោះ ពលរដ្ឋខ្មែរអាមេរិកាំងមួយចំនួនក្នុងរដ្ឋកាលីហ្វ័ញ៉ាបានគាំទ្រការជ្រើសរើសនេះយ៉ាងខ្លាំង ដោយបានចាត់ទុកថា នេះជាគំរូនៃការលើកកម្ពស់តម្លៃស្ត្រីជាប្រវត្តិសាស្ត្រ។
លោកស្រី ស៊ូលី សារ៉ូ ពលរដ្ឋខ្មែរអាមេរិកាំងក្នុងទីក្រុងឡងប៊ិច រដ្ឋកាលីហ្វ័ញ៉ា និងជាបេក្ខជនក្រុមប្រឹក្សាក្រុងឡងប៊ិច បានថ្លែងកោតសរសើរលោកស្រី ខាម៉ាឡា ហារីស ថាជាស្ត្រីមានបទពិសោធន៍ដែលអាចលើកកម្ពស់តម្លៃស្ត្រី និងជួយសហគមន៍ខ្មែរ ស្តាប់បញ្ហាខ្មែរច្រើន ប្រសិនបើលោកស្រីបានក្លាយជាអនុប្រធានាធិបតី។
«ខ្ញុំសប្បាយចិត្តហើយគាំទ្រគាត់។ គាត់ស្ត្រីដែរ ប៉ុន្តែគាត់ពូកែ គាត់ខ្លាំងខាងច្បាប់»។
លោកស្រីបានបន្ថែមថា លោកស្រី ហារីស អាចជួយដល់សេដ្ឋកិច្ច ការធានាសុខភាព បញ្ហាអន្តោប្រវេសន៍ ការបណ្តេញជនជាតិខ្មែរចេញទៅប្រទេសកម្ពុជាដោយបង្ខំ និងបញ្ហាសង្គមជាច្រើនទៀត ដោយសារថា លោកស្រីដឹងពីសុខទុក្ខរបស់ជនអន្តោប្រវេសន៍ច្រើន។
លោកស្រី ខាម៉ាឡា ហារីស ជាជនជាតិអាមេរិកាំងស្បែកខ្មៅ និងកាត់អាស៊ីដំបូងផងហើយ ធ្លាប់បំពេញកិច្ចការជាប្រធានរដ្ឋអាជ្ញា និងធ្លាប់ឈរឈ្មោះជាបេក្ខជនប្រធានាធិបតីសម្រាប់គណបក្សប្រជាធិបតេយ្យផងដែរ។
លោក ខាន់យ៉ា ប្រាជ្ញ ពលរដ្ឋខ្មែរអាមេរិកាំងនៅក្នុងក្រុងសាន់ហ្រ្វាន់ស៊ីស្កូ រដ្ឋកាលីហ្វ័ញ៉ាបានចាត់ទុកការជ្រើសរើសស្ត្រីឲ្យមានតួនាទីធំលំដាប់កំពូលដឹកនាំប្រទេសគឺជាការផ្តល់តម្លៃស្ត្រីយ៉ាងខ្លាំង ហើយនឹងជួយលើកទឹកចិត្តស្ត្រីក្មេងៗឲ្យរឹតតែមានការតស៊ូនិងប្រឹងប្រែងឈានឡើងដល់កម្រិតកំពូល។
«ដូចថាពីដើមមិនសូវមានអ្នករៀនសូត្រឲ្យឆ្លាតប៉ុន្មាន ដល់ពេលឃើញអីចឹងមនុស្សស្ត្រីគឺខ្លាំងចេញមកអីចឹង ហើយដល់កូនខ្មែរស្រីៗជំនាន់ក្រោយហ្នឹង ឃើញអីចឹងខំរៀន»។
លោកបន្តថា ការដឹកនាំប្រទេសអាចមានដំណើរការល្អ ដោយសារតែមានស្ត្រីជាអ្នកផ្តល់ការពិគ្រោះយោបល់លើបញ្ហាលម្អិតជាច្រើន។ ហើយលោកអាចនឹងធ្វើទំនាក់ទំនងដើម្បីស្វែងរកជំនួយពីលោកស្រីចំពោះការសិក្សាអប់រំដល់ពលរដ្ឋខ្មែរនិងបញ្ហាសុខមាលភាពផ្សេងទៀត។ លោក អ៊ីន សួន ពលរដ្ឋខ្មែរអាមេរិកាំងនៅក្នុងទីក្រុងអូកឡែន រដ្ឋកាលីហ្វ័ញ៉ា បានថ្លែងថា ការជ្រើសរើសបេក្ខជនអនុប្រធានាធិបតីជាស្ត្រីនេះនឹងមានការសាទរខ្លាំងពីសហគមន៍អាស៊ី ហើយបង្កើនភាពក្លាហានដល់ស្រី្តខ្មែរ។
«ភាពក្លាហាននេះអាចជួយលើកទឹកចិត្តដល់នារីខ្មែរ ដល់នារីអាស៊ី ដល់ឃើញអីចឹងទៅ ខ្ញុំជឿថា គាត់មានការជឿជាក់ សប្បាយចិត្ត»។
លោកជឿជាក់ដែរថា លោកស្រីហារីសទំនងជាអាចជួយកាត់បន្ថយភាពតានតឹងនៃការចោទប្រកាន់រើសអើងជាតិសាសន៍ដែលបានកើតឡើងចុងក្រោយនេះផងដែរ។
ការប្រកួតប្រជែងដណ្តើមយកតំណែងជាប្រធានាធិបតីនិងអនុប្រធានាធិបតី រវាងគណបក្សសាធារណរដ្ឋនិងគណបក្សប្រជាធិបតេយ្យ តាមរយ:ការបោះឆ្នោតនឹងធ្វើឡើងនៅថ្ងៃទី៣ ខែវិច្ឆិកា ឆ្នាំ២០២០នេះ៕
