នៅពេលលោក សម រង្ស៉ី មេដឹកនាំក្រុមជំទាស់ដែលកំពុងនិរទេសខ្លួននៅក្រៅប្រទេសប្រកាសពីការប៉ុនប៉ងចូលមកកាន់ប្រទេសវិញជាមួយនឹងសមាជិកសភាអឺរ៉ុបខ្លះនោះ ក្រសួងការបរទេសកម្ពុជា បានព្រមានជាមុនពីភាពខុសច្បាប់ការទូតអន្តរ ជាតិនិងអធិបតេយ្យភាពកម្ពុជា។
បើតាមសេចក្តីថ្លែងការណ៍របស់អ្នកនាំពាក្យក្រសួងការបរទេសកម្ពុជាបានបញ្ជាក់ពី ការភ្ញាក់ផ្អើលនិងរំលឹកឲ្យដឹងពីច្បាប់ការទូត ច្បាប់អន្តោប្រវេសន៍ ដែលតម្រូវឲ្យជន បរទេសគិតគូពីសន្តិសុខជាតិ ផលវិបាកនានាដែលកើតចេញពីការបន្លំនិងមធ្យោបាយខុសច្បាប់កម្ពុជា។
សេចក្តីថ្លែងការណ៍នោះក៏បានបញ្ជាក់តាមខ្លឹមសារដើមថា៖ «នៅក្នុងបរិបទនេះ បើសិនជាមានការអនុវត្តបែបនេះ ពីសំណាក់សមាជិកសភាសហភាពអឺរ៉ុបមួយចំនួនតូចទាំងនោះ ក្រសួងការបរទេសនិងសហប្រតិបត្តិការអន្តរជាតិ សូមសម្តែងនូវការខកចិត្តយ៉ាងខ្លាំងនិងចាត់ទុកទង្វើអស់ទាំងនេះ ជាទង្វើគ្មានលក្ខណៈការទូតនិងមិនគោរពអធិប្បតេយ្យភាព និងនីតិរដ្ឋនៃព្រះរាជាណាចក្រកម្ពុជា»។
សេចក្តីថ្លែងការណ៍ដដែលក៏ព្រមានឲ្យដឹងជាមុនទៀតពីការរក្សាសន្តិភាពនិងស្ថិរភាព របស់កម្ពុជាដែលមានខ្លឹមសារដើមថា៖ «ក្រសួងការបរទេសនិងកិច្ចសហប្រតិបត្តិការអន្តរជាតិ សូមស្នើយ៉ាងទទូចដល់អ្នក នយោបាយបរទេសខាងលើអស់ទាំងនោះ ពិចារណាឡើងវិញជាបន្ទាន់នូវទង្វើដែលបង្កប់ដោយឧបាយកលនយោបាយ និង គ្មានលក្ខណៈការទូត។ ម្យ៉ាងវិញទៀត ក្រសួងការបរទេសនិងសហប្រតិបត្តិការអន្តរជាតិ សូមអះអាងសារជាថ្មីនូវការប្តេជ្ញា ចិត្តឥតងាករេរបស់កម្ពុជាក្នុងការលើកកម្ពស់នីតិរដ្ឋ និង ក្នុងការថែរក្សាសន្តិភាព ស្ថិរភាព និងសណ្តាប់ធ្នាប់សាធារណៈ ដែលប្រជាជនកម្ពុជាកំពុងទទួលបានសព្វថ្ងៃនេះ»។
ក្រសួងការបរទេសមិនបានបង្ហាញឈ្មោះឬសមាជិកសភាប្រទេសណាដែលត្រូវអម ដំណើរលោក សម រង្ស៉ី មកកាន់ប្រទេសកម្ពុជានោះទេ តែបញ្ជាក់បន្ថែមថា លោក សម រង្ស៉ីត្រូវបានចោទប្រកាន់និងកាត់ទោសឲ្យជាប់ពន្ធនាគារជាច្រើនករណី រាប់ទាំងអំពើ ក្បត់ជាតិ បទញុះញង់មិនឲ្យយោធិនស្តាប់បញ្ជាជាដើម។
លោក សម រង្ស៉ី មេដឹកនាំក្រុមជំទាស់ម្នាក់ បានប្រកាសឥតឈប់ឈរពីការវិលត្រឡប់ ទៅកាន់ប្រទេសកម្ពុជាវិញ នៅពេលខាងមុខឆាប់ៗនេះដើម្បីស្តារប្រជាធិបតេយ្យនិង សិទ្ធិមនុស្សឡើងវិញ និង ទាមទារឲ្យមានការដោះលែងលោកកឹម សុខា ប្រធានគណ បក្សសង្គ្រោះជាតិត្រូវរំលាយដែលលោកសម រង្ស៉ី និងក្រុមមន្ត្រីបានអះអាងថានឹង មានក្រុមសមាជិកសភាអឺរ៉ុបមួយចំនួននឹងអមដំណើរលោកទៅកាន់ប្រទេសកម្ពុជាវិញ។
លោក នាយករដ្ឋមន្ត្រី ហ៊ុន សែន បានអះអាងប៉ុន្មានថ្ងៃថ្មីៗនេះថា លោក សម រង្ស៉ី ដែលលោកចាត់ទុកថាមានបញ្ហាផ្លូវច្បាប់នឹងត្រូវចាប់ខ្លួនទៅកាន់ដាក់គុក តែអ្នកផ្សេង ដែលគ្មានបញ្ហាផ្លូវច្បាប់ លោកនឹងមិនធ្វើអ្វីឡើយ។ ក្រុមប្រទេសមហាអំណាច រួមទាំងសហរដ្ឋអាមេរិក សហភាពអឺរ៉ុប ដែលជាទីផ្សារដ៏ធំនៃទំនិញកម្ពុជា ហើយកំពុង ពិនិត្យមើលពីការចង់ព្យួរប្រព័ន្ធអនុគ្រោះពន្ធ ចង់ឃើញក្រុមអ្នកនយោបាយកម្ពុជា ដោះស្រាយបញ្ហាដោយសន្តិវិធី ក្រោយពីគណបក្សសង្គ្រោះជាតិត្រូវរំលាយនៅមុន ការបោះឆ្នោតខែកក្កដាឆ្នាំ២០១៨៕
