បីថ្ងៃក្រោយពីលោកនាយករដ្ឋមន្ត្រី ហ៊ុន សែន បានបង្គាប់បញ្ជាក្រុមមន្ត្រីរបស់ខ្លួនពីថ្នាក់លើដល់ថ្នាក់មូលដ្ឋាន ឲ្យប្រុងប្រយ័ត្នចំពោះការប៉ុនប៉ងជាថ្មី ដើម្បីធ្វើបដិវត្តន៍ពណ៌ប្រឆាំងរដ្ឋាភិបាលនោះ លោក សម រង្ស៊ី ដែលត្រូវគេលើកតាំងឲ្យធ្វើជាប្រធានស្តីទីនៃអតីតគណបក្សសង្គ្រោះជាតិ បាននិយាយបញ្ជោះទៅវិញថា «ប្រជារាស្ត្រកម្ពុជាត្រូវផ្តួលរំលំ» របបគ្រប់គ្រងរបស់លោក ហ៊ុន សែន។
កាលពីថ្ងៃទី៧ ខែឧសភា លោកនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជាបានចេញលិខិតណែនាំមួយដល់ក្រុមមន្ត្រីរបស់ខ្លួន ឲ្យធ្វើយុទ្ធនាការអប់រំប្រជាពលរដ្ឋដើម្បីពង្រឹងការគ្រប់គ្រងសភាពការណ៍ឲ្យបាននៅទូទាំងប្រទេស។
លិខិតនោះបាននិយាយយោងដល់ផែនការរបស់លោក សម រង្ស៊ី ដែលមានគម្រោងវិលត្រឡប់មកប្រទេសកម្ពុជាវិញនៅឆ្នាំ ២០១៩ នេះ។
ការវិលត្រឡប់មកវិញរបស់លោក សម រង្ស៊ី ដែលលោក ហ៊ុន សែន ចាត់ទុកថា «ក្នុងគោលបំណងដឹកនាំការធ្វើបដិវត្តពណ៌សាជាថ្មី» ដើម្បីផ្តួលរំលំរបបគ្រប់គ្រងរបស់លោក។ លោក ហ៊ុន សែន ហៅការណ៍នេះថាជាទង្វើខុសនឹងច្បាប់រដ្ឋធម្មនុញ្ញ ដែលអាចនាំឲ្យប្រទេសកម្ពុជា «ធ្លាក់ក្នុងវិបត្តិចលាចលវឹកវរ»។ ដើម្បីទប់ស្កាត់បញ្ហានេះ លោកហ៊ុន សែន បានបង្គាប់ឲ្យក្រុមការងារគណបក្សកាន់អំណាចរបស់លោក ក្រុមអាជ្ញាធរ និងកងកម្លាំង រៀបចំវេទិកាសាធារណៈនៅគ្រប់ភូមិ ឃុំ ដើម្បីផ្សព្វផ្សាយអប់រំប្រជាពលរដ្ឋអំពីផលវិបាកនៃការផ្តួលរំលំរដ្ឋាភិបាលតាមរយៈសកម្មភាពបដិវត្តន៍ពណ៌»។
ក្រៅពីនោះលោកប្រមុខរដ្ឋាភិបាលខ្មែរក៏បានជំរុញឲ្យមានការកែទម្រង់ និងការដោះស្រាយបញ្ហាជូនពលរដ្ឋនិងធ្វើអំពើល្អជាមួយពលរដ្ឋជាដើម។
នៅលើទំព័រហ្វេសប៊ុករបស់ខ្លួននៅថ្ងៃសុក្រនេះ ដែលជាការឆ្លើយតបទៅនឹងលិខិតបង្គាប់បញ្ជារបស់លោកនាយករដ្ឋមន្ត្រី ហ៊ុន សែន លោក សម រង្ស៊ី នៅតែចាត់ទុកថារដ្ឋាភិបាលបច្ចុប្បន្នគឺជារដ្ឋាភិបាល «ខុសច្បាប់» ហើយថា «ប្រជារាស្ត្រខ្មែរ ត្រូវតែផ្តួលរំលំ» របបនេះ។លោក សម រង្ស៊ី បន្ថែមថា ក្នុងករណីដែលរដ្ឋាភិបាល «ចាប់ផ្តើមគិតគូរធ្វើអំពើល្អ» សម្រាប់ប្រជាពលរដ្ឋនៅពេលនេះគឺមានន័យថា «របបនេះធ្លាប់តែធ្វើអំពើអាក្រក់»។
លោក សម រង្ស៊ី មេដឹកនាំគណបក្សប្រឆាំង បានឆ្លើយតបនឹងលិខិតដែលលោកនាយករដ្ឋមន្រ្តី ហ៊ុន សែន បញ្ជាឲ្យក្រុមការងារថ្នាក់ជាតិចុះអប់រំពលរដ្ឋដើម្បីទប់ស្កាត់បដិវត្តពណ៌ថា រដ្ឋាភិបាលកម្ពុជាគួរដោះស្រាយបញ្ហាក្នុងសង្គម ដើម្បីកាត់បន្ថយកំហឹងរបស់ប្រជាពលរដ្ឋ ជាជាងចុះណែនាំប្រជាពលរដ្ឋ។
លោក សម រង្ស៊ី បានបន្ថែមថា ប្រសិនបើលោកនាយករដ្ឋមន្ត្រី ហ៊ុន សែន «ចង់កាត់បន្ថយកំហឹងរបស់ប្រជារាស្ត្រ» នោះ លោកនាយករដ្ឋមន្រ្តីត្រូវដោះស្រាយបញ្ហាផ្សេងៗដែលប្រជាពលរដ្ឋកំពុងប្រឈម និង«កំពុងទទួលរងទុក្ខមានដូចជាបញ្ហាដីធ្លី ផ្ទះសម្បែងនិងទ្រព្យសម្បត្តិផ្សេងៗ បញ្ឈប់អំពើពុករលួយនិងបញ្ហាបំណុល» ជាដើម។
លោក សុខ ឥសាន អ្នកនាំពាក្យគណបក្សប្រជាជនកម្ពុជាកំពុងកាន់អំណាចប្រាប់ VOA ថា ការចុះអប់រំនិងណែនាំប្រជាពលរដ្ឋអំពីផលប៉ះពាល់នៃបដិវត្តន៍ពណ៌នេះធ្លាប់ធ្វើជាហូរហែរមក ប៉ុន្តែលោកថា លិខិតដែលទើបចេញជាថ្មីនេះ គឺគ្រាន់តែជាការរំឭកបន្ថែមប៉ុណ្ណោះ។ លោក សុខ ឥសាន បន្ថែមថា សម្រាប់ការថ្លែងរបស់លោក សម រង្ស៊ី ដែលថា ប្រជាជនចងកំហឹងជាមួយរដ្ឋាភិបាលគឺគ្រាន់តែជាការកុហកប៉ុណ្ណោះ។
«ប្រជាពលរដ្ឋ ក៏ដូចជាកងទ័ព កម្មករនិយោជិតទូទាំងប្រទេស គ្មានកំហឹងអីជាមួយរដ្ឋាភិបាលទេ។ ពីព្រោះរាល់បាតុភាពអសកម្មមួយចំនួន ដែលកើតឡើងដោយមន្រ្តីថ្នាក់ក្រោមៗហ្នឹងគឺថាត្រូវបានរដ្ឋាភិបាលចាត់វិធានការដោះស្រាយបានទាន់ពេលវេលា»។
ក្នុងរយៈពេលប៉ុន្មានឆ្នាំមកនេះ ការវាយប្រហារគ្នាតាមរយៈពាក្យសម្តីលើបណ្តាញសង្គម រវាងលោកនាយករដ្ឋមន្រ្តី ហ៊ុន សែន និងលោក សម រង្ស៊ី អតីតមេដឹកនាំគណបក្សជំទាស់ដែលបានភៀសខ្លួនចេញពីប្រទេសកម្ពុជា នៅមុនការរំលាយគណបក្សសង្គ្រោះជាតិ បានក្លាយជាវប្បធម៌ទៅហើយ។
លោកបណ្ឌិត មាស នី អ្នកសិក្សាពីការវិវត្តសង្គម និងជាអ្នកវិភាគនយោបាយឯករាជ្យលើកឡើងថា លិខិតដែលចេញដោយលោកនាយករដ្ឋមន្រ្តី ហ៊ុន សែន បង្ហាញឲ្យឃើញថា រដ្ឋាភិបាលនៅតែបារម្ភអំពីការងើបបះបោរពីសំណាក់ប្រជាពលរដ្ឋ។ លោកបន្តថា ការអប់រំ ឬការគំរាមកំហែងណាមួយ នឹងមិនអាចមានប្រសិទ្ធភាពនោះទេ ប្រសិនបើរដ្ឋាភិបាលមិនដោះស្រាយបញ្ហាអយុត្តិធម៌សង្គមឲ្យមានប្រសិទ្ធភាព។
«រឿងសំខាន់គឺការធ្វើកំណែទម្រង់ កាត់បន្ថយនូវការរំលោភសិទ្ធិមនុស្ស ហើយនិងកាត់បន្ថយអំពើអយុត្តិធម៌ផ្សេងៗ ហើយធ្វើម៉េចឲ្យប្រព័ន្ធយុត្តិធម៌ហ្នឹងបំពេញតួនាទីឲ្យត្រូវទៅតាមតួនាទីឯករាជ្យទៅ អាហ្នឹងបញ្ហាបដិវត្តន៍ពណ៌វានឹងមិនកើតឡើងទេបាទ»។
កាលពីខែកុម្ភៈ ឆ្នាំ២០១៧ រដ្ឋាភិបាលកម្ពុជាបានចេញផ្សាយសៀវភៅ «ស» រៀបរាប់ថា កម្ពុជាកំពុងកើតមាននូវបដិវត្តន៍ពណ៌ រៀបចំឡើងដោយគណបក្សសង្គ្រោះជាតិ និងថា មានអង្គការសង្គមស៊ីវិលជាតិនិងអន្តរជាតិប្រមាណជា ៣០០ បានចូលរួមក្នុងបដិវត្តន៍ពណ៌នោះ ដើម្បីផ្ដួលរំលំរដ្ឋាភិបាលកម្ពុជា៕
