រដ្ឋសភាកម្ពុជាដែលគ្រប់គ្រងដោយគណបក្សប្រជាជនកម្ពុជា បានសម្តែងការខកចិត្តនិងច្រានចោលទាំងស្រុងចំពោះសេចក្តីសម្រេចរបស់សភាអឺរ៉ុប កាលពីពេលកន្លងទៅស្តីពី«ការបង្រ្កាបជាបន្តបន្ទាប់ទៅលើក្រុមអ្នកនយោបាយប្រឆាំងនៅកម្ពុជា» ដោយលើកឡើងថាតំណាងរាស្រ្តរបស់សភាអឺរ៉ុបទទួលបានរបាយការណ៍ខុសពីអ្នកនយោបាយមួយចំនួន។
កាលពីសប្តាហ៍មុន សមាជិកសភាអឺរ៉ុបភាគច្រើនលើសលប់ បានបោះឆ្នោតសម្រេចលើញត្តិមួយ ដោយបង្ហាញក្តីព្រួយបារម្ភអំពីការបន្តបង្រ្កាបនយោបាយនៅកម្ពុជា ហើយបានជំរុញឱ្យគណៈកម្មការអឺរ៉ុបត្រៀមខ្លួនក្នុងការដកឋានៈប្រព័ន្ធអនុគ្រោះពន្ធ (Everthing But Arms ឬ EBA)ទាំងស្រុង ប្រសិនបើការបោះឆ្នោតនាពេលខាងមុខ មិនយុត្តិធម៌។ សមាជិកសភាអឺរ៉ុបបានបង្ហាញ «ក្តីព្រួយបារម្ភយ៉ាងខ្លាំង» ទៅលើការដើរថយក្រោយនៃសិទ្ធិមនុស្សក្នុងប្រទេសកម្ពុជា នៅមុនការបោះឆ្នោតឃុំសង្កាត់នៅក្នុងខែមិថុនា ឆ្នាំ២០២២ និងការបោះឆ្នោតថ្នាក់ជាតិនៅឆ្នាំ២០២៣។
ពួកគេក៏បារម្ភយ៉ាងខ្លាំងអំពីការតាមដានសកម្មភាពអនឡាញ និងការគំរាមលើការបញ្ចេញមតិដោយសេរី និងសិទ្ធិឯកជនភាព។
ជាការឆ្លើយតប រដ្ឋសភាកម្ពុជាដែលមានតំណាងរាស្រ្តទាំង១២៥រូបមកពីគណបក្សប្រជាជនកម្ពុជា បានចេញសេចក្តីថ្លែងការណ៍មួយ ចុះថ្ងៃទី៩ ខែឧសភា ឆ្នាំ២០២២ ដោយលើកឡើងថាសេចក្តីសម្រេចរបស់សភាអឺរ៉ុប គឺជា «ការបំភ្លៃ ការលម្អៀង មានចរិតនយោបាយ» ប្រកាន់ភាគីម្ខាងៗ និងខ្វះការគោរពដល់រដ្ឋអធិបតេយ្យ។
រដ្ឋសភាបញ្ជាក់ថា សេចក្តីសម្រេចកាលពីសប្តាហ៍មុន ក៏ដូចជាសេចក្តីសម្រេចមុនៗរបស់សភាអឺរ៉ុប មានចេតនាមើលរំលងវឌ្ឍនភាពនៃកំណែទម្រង់លើផ្នែកសិទ្ធិមនុស្ស លទ្ធិប្រជាធិបតេយ្យនៅកម្ពុជា និងថាសភាអឺរ៉ុបបែរជាផ្អែកទាំងស្រុងតែទៅលើប្រភពព័ត៌មានដែលគ្មានការបញ្ជាក់ច្បាស់លាស់ ផ្តល់ដោយ«អ្នកនយោបាយឆ្វេងនិយម» និង«ពួកប្រជាកលនិយម» «សកម្មជននយោបាយជ្រុលនិយម» និងអង្គការសិទ្ធិមនុស្ស ដែលប្រឆាំងនឹងរដ្ឋាភិបាល។
នៅក្នុងសេចក្តីថ្លែងការណ៍ រដ្ឋសភាបានប្រកាន់ជំហរថា ការរិះគន់របស់សភាអឺរ៉ុបចំពោះការគ្រប់គ្រងដោយឯកបក្ស គឺជាការរិះគន់ដោយគ្មានហេតុផល ដោយសារគណបក្សប្រជាជនកម្ពុជា ដែលជាគណបក្សដឹកនាំប្រទេស ទទួលបានការបោះឆ្នោតគាំទ្រដោយពលរដ្ឋកម្ពុជា តាមលទ្ធិប្រជាធិបតេយ្យស្របតាមរដ្ឋធម្មនុញ្ញ។
រដ្ឋសភាបានបន្តលើកឡើងថា កម្ពុជាបានធ្វើវិសោធនកម្មលើច្បាប់ស្តីពីគណបក្សនយោបាយ ដើម្បីឱ្យអ្នកនយោបាយដែលត្រូវបានតុលាការហាមឃាត់ អាចអនុវត្តសិទ្ធិនយោបាយរបស់ខ្លួនឡើងវិញ និងថាករណីជំនុំជម្រះក្តីរបស់លោក កឹម សុខា តែងធ្វើឡើងស្របតាមគោលការណ៍តម្លាភាព និងមានការចូលរួមពីគ្រប់ភាគី។
ដំណាលគ្នានេះដែរ រដ្ឋសភាក៏ជំរុញឱ្យសហគមន៍អឺរ៉ុបបញ្ចៀសពីការអនុវត្តស្តង់ដាពីរដើម្បីរក្សាតម្លាភាពនិងការទទួលខុសត្រូវក្នុងការអនុវត្តសេរីភាពនៃការបញ្ចេញមតិ សមាគម និងការជួបប្រជុំដោយសន្តិវិធី ដូចមានចែងក្នុងកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ។
អ្នកវិភាគសង្គមនិងនយោបាយ លោក មាស នី និយាយថាជាសិទ្ធិរបស់រដ្ឋាភិបាលក្នុងការយល់ស្រប ឬបដិសេធណាមួយ។ ប៉ុន្តែប្រសិនបើអ្វីដែលសភាអឺរ៉ុបបានលើកឡើងជាការណ៍ពិត លោកយល់ថានឹងមានផលវិបាកផ្សេងៗ បើសិនរដ្ឋាភិបាលមិនយកចិត្តទុកដាក់លើការកែប្រែចំណុចចន្លោះប្រហោង។
លោកថ្លែងថា៖ «ខ្ញុំមិនរិះគន់អីទៅលើការឆ្លើយតបអីនោះទេ។ ខ្ញុំគិតថា នេះជាការឆ្លើយតបធម្មតារបស់ប្រទេសនីមួយៗ ដើម្បីការពារខ្លួនទេ ក៏ប៉ុន្តែសំខាន់គឺរឿងពិតជាក់ស្តែងកើតឡើង។ ប្រសិនបើការរំលោភ ឬក៏ការគំរាមកំហែងនៅតែមានបន្តទៀត មែនដូចគេថានោះ អាហ្នឹងវា នៅខាងក្រោយ គឺវាកាន់តែមានរឿងច្រើនថែមទៀត ហើយអ្នកដែលទទួលផលប៉ះពាល់គឺរដ្ឋាភិបាលកម្ពុជា និងពលរដ្ឋកម្ពុជា»។
នាយករងទទួលបន្ទុកផ្នែកឃ្លាំមើលនៃអង្គការលីកាដូ លោក អំ សំអាត ថ្លែងថា លទ្ធភាពនៃការដាក់បន្ទុកបន្ថែមលើប្រព័ន្ធអនុគ្រោះពន្ធរបស់កម្ពុជាដែលទទួលបានពីប្រទេសក្នុងសហគមន៍អឺរ៉ុប អាចមានកាន់តែខ្ពស់ ប្រសិនបើរដ្ឋាភិបាលបន្តប្រកាន់យកទំនោរច្រានចោលរាល់សេចក្តីសម្រេចរបស់សភាអឺរ៉ុប ខណៈលោកសង្កត់ធ្ងន់ថា ការដកប្រព័ន្ធអនុគ្រោះពន្ធ EBA ចំនួន២០% កាលពីឆ្នាំ២០២០ គឺបស្ចិមប្រទេសទាមទារឱ្យគោរពលទ្ធិប្រជាធិបតេយ្យ និងសិទ្ធិមនុស្សនៅកម្ពុជា។
លោកថ្លែងថា៖ «កម្ពុជាយើងតែងតែធ្វើការបដិសេធចោលចំណុចទាំងអស់នេះ ហើយរដ្ឋសភាក៏បានបដិសេធ។ អ្វីដែលយើងបារម្ភ យើងបារម្ភទាក់ទងនឹងការអនុម័តបន្ថែមទៀតពាក់ព័ន្ធនឹងការអនុគ្រោះពន្ធ EBA ពីព្រោះអ្នកដែលរងផលប៉ះពាល់ ប្រសិនបើមានការព្យួរ ឬក៏ការបន្ថែមការអនុគ្រោះពន្ធ EBA នេះ គឺកម្មករកម្មការិនីលើវិស័យវាយនភណ្ឌ និងកាត់ដេរ ក៏ដូចជាបងប្អូនកសិករផងដែរ»។
លោកបន្ថែមថា រដ្ឋាភិបាលកម្ពុជាគួរចាត់ទុកការផ្តោតលើការកែតម្រូវចំណុចខ្វះខាត ឬបញ្ហាប្រឈមផ្សេងៗតាមការលើកឡើងរបស់សភាអឺរ៉ុបថាជា «រឿងល្អ» និង«ផលចំណេញ» ជាជាងការចោទប្រកាន់ ឬច្រានចោលរាល់សេចក្តីសម្រចណាមួយរបស់សភាអឺរ៉ុប។
គួរបញ្ជាក់ថា កាលពីខែសីហា ឆ្នាំ២០២០ សហភាពអឺរ៉ុបបានសម្រេចកាត់ផ្តាច់ប្រព័ន្ធអនុគ្រោះពន្ធ«គ្រប់មុខទំនិញ លើកលែងសព្វាវុធ» ឬ Everything But Arms (EBA) ចំនួន២០%ពីកម្ពុជា ដែលប៉ះពាល់ដល់ការនាំចេញសម្លៀកបំពាក់ទៅប្រទេសនៅអឺរ៉ុប។ ការដកប្រព័ន្ធអនុគ្រោះពន្ធ EBA មួយផ្នែក នេះកើតឡើងបន្ទាប់ពីសហភាពអឺរ៉ុបបានរកឃើញការរំលោភសិទ្ធិមនុស្សធ្ងន់ធ្ងរជាប្រព័ន្ធ និងការធ្លាក់ចុះលទ្ធិប្រជាធិបតេយ្យក្នុងប្រទេសកម្ពុជា៕
រដ្ឋសភាច្រានចោលញត្តិរបស់សភាអឺរ៉ុបដោយថាទទួលរបាយការណ៍ខុសអំពីលំហនយោបាយនិងសេរីភាពនៅកម្ពុជា
ភ្នំពេញ —
