ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ពុំ​មាន​ករណី​ឆ្លង​វីរុស​ថ្មី​ជាង​២​សប្តាហ៍ ​ប៉ុន្តែ​ WHO ​ជំរុញ​​ឲ្យ​កម្ពុជា​បន្ត​​ប្រុង​ប្រយ័ត្ន​ខ្ពស់


លោកស្រី Li Ailan (ឆ្វេង) តំណាងអង្គការសុខភាពពិភពលោក និង លោក ម៉ម ប៊ុនហេង (ស្ដាំ) រដ្ឋមន្រ្តីក្រសួងសុខាភិបាល ថ្លែងក្នុងសន្និសីទសារព័ត៌មាន ស្តីពីស្ថានភាពជំងឺកូវីដនៅកម្ពុជា កាលពីថ្ងៃច័ន្ទ ទី២៧ ខែមេសា ឆ្នាំ២០២០។ (ស៊ុន ណារិន/VOA Khmer)
លោកស្រី Li Ailan (ឆ្វេង) តំណាងអង្គការសុខភាពពិភពលោក និង លោក ម៉ម ប៊ុនហេង (ស្ដាំ) រដ្ឋមន្រ្តីក្រសួងសុខាភិបាល ថ្លែងក្នុងសន្និសីទសារព័ត៌មាន ស្តីពីស្ថានភាពជំងឺកូវីដនៅកម្ពុជា កាលពីថ្ងៃច័ន្ទ ទី២៧ ខែមេសា ឆ្នាំ២០២០។ (ស៊ុន ណារិន/VOA Khmer)

មន្រ្តី​ក្រសួង​សុខាភិបាល​កម្ពុជា ​នៅ​ថ្ងៃ​ច័ន្ទ​នេះ ​លើក​ឡើង​ថា​ ក្រសួង​បាន​ធ្វើ​តេស្ត​រក​វីរុស​កូរ៉ូណា​លើ​ក្រុម​មនុស្ស​ដែល​សង្ស័យ​ទាំង​អស់ ហើយ​រក​មិន​ឃើញ​ករណី​ឆ្លង​ថ្មី​នោះ​ទេ ​ក្នុង​រយៈ​ពេល​ជាង​២​សប្តាហ៍​នេះ។

ប៉ុន្តែ​ពួកគេ​បាន​អំពាវនាវ​ឲ្យ​មាន​ការ​ប្រុង​ប្រយ័ត្ន​ជានិច្ច ខណៈ​មន្រ្តី​អង្គការ​សុខភាព​ពិភព​លោក(WHO)​ប្រចាំ​នៅ​កម្ពុជា​ជំរុញ​ឲ្យត្រៀម​ខ្លួន​សម្រាប់​ការ​ប្រយុទ្ធ​ប្រឆាំង​រយៈ​ពេល​វែង។

ក្នុង​សន្និសីទ​សារ​ព័ត៌មាន​មួយ​នៅ​ព្រឹក​ថ្ងៃ​ច័ន្ទ​នេះ រដ្ឋមន្រ្តី​ក្រសួង​សុខាភិបាល​ លោក ម៉ម ប៊ុន​ហេង​ បាន​ថ្លែង​ថា​ ជាង​២​សប្តាហ៍​មក​នេះ ​មិន​មាន​ករណី​ឆ្លង​ថ្មី​នៃ​វីរុស​កូរ៉ូណា​នោះ​ទេ ហើយ​ការ​ព្យាបាល​ជា​សះស្បើយ​បាន​កើន​ទៅ​ដល់​១១៩​នាក់ ​គឺ​នៅ​សល់​អ្នក​ជំងឺ​កូវីដ១៩​ តែ​៣​នាក់​ប៉ុណ្ណោះ។ ​ទោះ​ជា​យ៉ាងណា​ លោក ​ម៉ម ប៊ុន​ហេង ​អំពាវនាវ​ឲ្យ​ប្រជា​ពលរដ្ឋ​បន្ត​ប្រុង​ប្រយ័ត្ន​ខ្ពស់​ បើ​ទោះ​ពួកគេ​ចាប់​ផ្តើម​បើក​ការ​រកស៊ី​ឡើង​វិញ​ក៏​ដោយ។

លោក​មាន​ប្រសាសន៍​ថា៖​ «ដូច្នេះ​ក្រសួង​សុខាភិបាល​សូម​អំពាវនាវ​ដល់​បង​ប្អូន​ប្រជា​ពលរដ្ឋ​និង​សូម​មេត្តា​កុំ​យល់​ច្រឡំ​ថា ​ប្រទេស​កម្ពុជា​អស់​មាន​ការ​រាតត្បាត​វីរុស​កូវីដ១៩​ឲ្យ​សោះ»។​

លោក​រដ្ឋមន្រ្តី​បញ្ជាក់​បន្ថែម​ថា៖ ​«ដូច្នេះ​មាន​តែ​ការ​ប្រុង​ប្រយ័ត្ន​មួយ​គត់​ កុំ​ឲ្យ​ឆ្លង​ទៅ​សហគមន៍។​ មិន​បាច់​សួរ​ថា​គ្រោះ​ថ្នាក់​ខ្ពស់ គ្រោះ​ថ្នាក់​ទាប ​គ្រោះ​ថ្នាក់​ខ្សោយ​អី​ទេ»។

រដ្ឋមន្រ្តី​ក្រសួង​សុខាភិបាល​មាន​ប្រសាសន៍​ថា​ គេ​មិន​អាច​ទស្សន៍​ទាយ​អំពី​ជំងឺ​កូវីដ​១៩នេះ​ដូច​ជំងឺ​គ្រុន​ចាញ់ ​ឬ​គ្រុន​ឈាម​នោះ​ទេ ​ដូច្នេះ​លោក​មិន​ដឹង​ថា ​វា​ចប់​នៅ​ពេល​ណា​នោះ​ទេ។​ លោក​បន្ថែម​ថា អាកាស​ធាតុ​ក្តៅ ​និង​ភ្លៀង​នៅ​កម្ពុជា​មិន​អាច​ទប់ស្កាត់​វីរុស​កូរ៉ូណា​បាន​ឡើយ។

តំណាង​អង្គការ​សុខភាព​ពិភព​លោក​ប្រចាំ​ប្រទេស​កម្ពុជា ​លោកស្រី​ Li Ailan ​បាន​ថ្លែង​ថា ​កម្ពុជា​ត្រូវ​តែ​ប្រុង​ប្រយ័ត្ន​ខ្ពស់​ ហើយ​ត្រូវ​តែ​ត្រៀម​ឲ្យ​បាន​ត្រឹម​ត្រូវ​មុន​នឹង​ដាក់​ដំណើរ​ការ​ការ​រក​ស៊ី​ឡើង​វិញ ​ការ​បើក​សាលារៀន ​និង​ការ​ធ្វើ​ដំណើរ​ជាដើម។

លោក​ស្រី​បន្ត​ថា​ ប្រជាជន​ត្រូវ​មាន​ការ​ប្រុង​ប្រយ័ត្ន​ខ្ពស់​ ដោយ​សារ​ជំងឺ​នេះ​មិន​ទាន់​បញ្ចប់​នៅ​ក្នុង​ពិភព​លោក​នោះ​ទេ ​ហើយ​លទ្ធភាព​ឆ្លង​តាម​សហគមន៍​នៅ​តែ​មាន។

លោកស្រី​បាន​ថ្លែង​ថា៖​ «ប្រទេស​កម្ពុជា​បំពេញ​ការងារ​បាន​យ៉ាង​ល្អ​ណាស់​ក្នុង​ការ​ឆ្លើយ​តប​នឹង​ការ​ឆ្លង​១២២​នាក់​ដំបូង។​ យើង​មិន​មាន​ករណី​ឆ្លង​ថ្មី​នោះ​ទេ ហើយ​វា​ជា​ដំណឹង​ល្អ។ ប៉ុន្តែ​ដូច​ខ្ញុំ​បាន​និយាយ​ហើយ​ថា​ យើង​ត្រូវ​តែ​រួច​រាល់​សម្រាប់​ការ​ប្រយុទ្ធ​ប្រឆាំង​រយៈ​ពេល​វែង ពីព្រោះ​វីរុស​កូរ៉ូណា​នេះ​នឹង​មិន​សាបសូន្យ​លឿន​នោះ​ទេ»។​

អ្នក​នាំពាក្យ​របស់​ក្រសួង​សុខាភិបាល​លោកស្រី ​ឱ វណ្ណឌីន​ មាន​ប្រសាសន៍​ថា​ វីរុស​កូរ៉ូណា​នេះ​អាច​ឆ្លង​លឿន ​ដែល​ទាម​ទារ​ឲ្យ​មាន​ការ​ប្រុង​ប្រយ័ត្ន​ជាប់​ជា​និច្ច។

លោកស្រី​មាន​ប្រសាសន៍​ថា៖​ «ប៉ុន្តែ​អ្វី​ដែល​យើង​ចង់​បញ្ជាក់​ជូន​សាធារណ​ជន​គឺ​ស្ថានភាព​របស់​យើង​ស្ថិត​ក្នុង​Alarming ​មាន​ន័យ​ថា​ ស្ថិត​ក្នុង​ស្ថានភាព​មួយ​ដែល​យើង​ត្រូវ​មាន​ការ​ប្រុង​ប្រយ័ត្ន​ខ្ពស់​ជាប់​ជានិច្ច។ បើ​យើង​និយាយ​មួយ​បែប​ទៀត​ថា​ ហានិភ័យ​របស់​យើង​ហានិភ័យ​របស់​បុគ្គល​ម្នាក់ៗ​គឺ​មិន​ទាប​ទេ»។​

បើ​តាម​ក្រសួង​សុខាភិបាល​ការ​ធ្វើ​តេស្ត​សំណាក​នៅ​កម្ពុជា ​សរុប​មាន​ចំនួន​១១.៥៧៦​គិត​ចាប់​ពី​ខែ​មករា​មក​ដល់​ថ្ងៃ​ទី​២៦​ខែ​មេសា។ ​ កាល​ពី​ថ្ងៃ​ច័ន្ទ​សប្តាហ៍​មុន ​ ក្រសួង​សុខាភិបាល​បាន​ប្រកាស​ថា​សំណាក​ដែល​បាន​ធ្វើ​តេស្ត​សរុប​មាន​ចំនួន​ជាង​៩.៧៩២។ ​ដូច្នេះ ​ប្រមាណ​មួយ​សប្តាហ៍​នេះ ​ក្រសួង​សុខាភិបាល​បាន​ធ្វើ​តេស្ត​សំណាក​ប្រមាណ​១.៧៨០។

អ្នក​នាំពាក្យ​ក្រសួង​សុខាភិបាល​ម្នាក់​ទៀត​ លោក​ លី សូវ៉ាន់ ​មាន​ប្រសាសន៍​ថា​ ក្នុង​ចំណោម​សំណាក​ជាង​១.៧០០​ មនុស្ស​ប្រមាណ​១.៥០០​នាក់​ត្រូវ​បាន​ធ្វើ​តេស្ត​ក្នុង​នោះ​មាន​អ្នក​សង្ស័យ​អ្នក​ប៉ះពាល់​ដោយ​ផ្ទាល់ ​ឬ​ប្រយោល ​និង​កម្មករ​រោងចក្រ​កាត់​ដេរ​ជាង​១០០​នាក់​ដែល​ត្រូវ​បាន​ធ្វើ​តេស្ត​រក​វីរុស​កូរ៉ូណា។​

បើ​តាម​លោក ​លី សូវ៉ាន់ កម្ពុជា​មាន​ប្រព័ន្ធ​តាម​ដាន​ជា​ប្រចាំ​លើ​ជំងឺ​ផ្តាសាយ ​និង​ជំងឺ​សួត​ដែល​លោក​ថា​មិន​មាន​ការ​កើន​ឡើង​ជំងឺ​សួត​គួរ​ឲ្យ​កត់​សម្គាល់​នោះ​ទេ។

លោក​មាន​ប្រសាសន៍​ថា៖ ​«រហូត​មក​ដល់​ពេល​នេះ ​យើង​អត់​ទាន់​ឃើញ​ថា​ ជំងឺ​រលាក​សួត​របស់​យើង​មាន​ការ​កើន​ឡើង​ខុស​ធម្មតា​នៅ​ឡើយ​ទេ។​ តាម​ទិន្នន័យ​ដែល​យើង​ពិគ្រោះ​ជំងឺ​ហ្នឹង​ ក៏​អត់​មាន​ឃើញ​ការ​កើន​ឡើង​គួរ​ឲ្យ​កត់​សម្គាល់​ដែរ។ ​អ៊ីចឹង​មាន​ន័យ​ថា​ ទិន្នន័យ​ដែល​យើង​ប្រមូល​គ្រប់​ជ្រុង​ជ្រោយ​ហ្នឹង​បញ្ជាក់​ថា​ យើង​ពិត​ជា​គ្មាន​ករណី​ហ្នឹង[ឆ្លង​ថ្មី]​នៅ​ក្នុង​ប្រទេស​របស់​យើង​ទេ»។​

បើ​តាម​ លោក ម៉ម ប៊ុន​ហេង ​ ក្រសួង​សុខាភិបាល​មាន​ក្រុម​ឆ្លើយ​តប​បន្ទាន់​ប្រមាណ​២.៩១០​នាក់ ​នៅ​តាម​មូលដ្ឋាន ​ដែល​លោក​ថា​ ​ក្រុម​នេះ​ធ្វើ​ការ​ងារ​បាន​ល្អ។

លោក​មាន​ប្រសាសន៍​ថា៖ «ក្រុម​ឆ្លើយ​តប​បន្ទាន់​នេះ​បាន​ធ្វើ​លំហាត់​ច្រើន​លើក​ច្រើន​សា។ ដូច្នេះ​បាន​យើង​ឃើញ​ថា​ ឆ្លើយ​តប​កូវីដ​នេះ​បាន​រហ័ស។​ ដោយសារ​អ្នក​ទាំង​នោះ​មាន​ភាព​ប៉ិន​ប្រសប់​ហើយ​ឆ្លើយ​តប​បាន​រហ័ស។ ​គេ​កំពុង​ធ្វើ​ការ​ងារ​ហ្នឹង​ មិន​មែន​ចាំ​ដល់​មាន​បញ្ហា​ យើង​ធ្វើ​ទេ។ យើង​ត្រៀម​លក្ខណៈ​ជា​និច្ច»។​

គួរ​បញ្ជាក់​ថា ​កាល​ពី​សប្តាហ៍​មុន​ ក្រុម​ការងារ​សុខាភិបាល​បាន​ត្រួត​ពិនិត្យ​សុខភាព​កម្មករ​រោងចក្រ​កាត់​ដេរ​ជាង​៥​ពាន់​នាក់ ​ហើយ​ក្នុង​នោះ​មាន​តែ​ ១១២​ នាក់​ប៉ុណ្ណោះ​ដែល​ត្រូវ​បាន​ធ្វើ​តេស្ត​រក​វីរុស​កូរ៉ូណា ​ហើយ​ពួក​គេ​មាន​លទ្ធផល​អវិជ្ជមាន។​

អ្នក​នាំពាក្យ​ក្រសួង​សុខាភិបាល​ម្នាក់​ទៀត ​លោកស្រី ​យក់ សម្បត្តិ ​មាន​ប្រសាសន៍​ថា​ចំនួន​ជន​បរទេស​ធ្វើ​ដំណើរ​ចូល​មក​កម្ពុជា ​មាន​តិច​តួចណាស់​នា​ពេល​នេះ។ លោកស្រី​បញ្ជាក់​ថា​នៅ​ថ្ងៃ​ខ្លះ​នៅ​ភ្នំពេញ ​មាន​តែ​៥​ទៅ​៦​នាក់​ប៉ុណ្ណោះនៅ​ក្រុង​ព្រះសីហនុ ​មាន​១០​ទៅ​១៥​នាក់​ ហើយ​នៅ​ខេត្ត​សៀមរាប ​មិន​មាន​នោះ​ទេ។ ​លោកស្រី​បន្ត​ថា ​ ជន​បរទេស​ដែល​ចូល​មក​កម្ពុជា​ត្រូវ​មាន​បណ្ណ​សុខភាព​បញ្ជាក់​ថា​ មិន​មាន​ជំងឺ​កូវីដ​១៩ ​រយៈ​ពេល​៧២​ម៉ោង ​មាន​លិខិត​ធានា​រ៉ាប់​រង​សុខភាព ​ដែល​មាន​ទឹក​ប្រាក់​៥​ម៉ឺន​ដុល្លារ ​និង​ត្រូវ​ដាក់​ខ្លួន​ឯង​ឲ្យ​នៅ​ដាច់​ដោយ​ឡែក​រយៈ​ពេល​១៤​ថ្ងៃ៕​

XS
SM
MD
LG