ក្នុងដំណើរទស្សនកិច្ចផ្លូវរដ្ឋរយៈពេលពីរថ្ងៃរបស់នាយករដ្ឋមន្ត្រីប្រទេសឡាវនៅកម្ពុជារដ្ឋាភិបាលទីក្រុងភ្នំពេញរបស់លោកនាយករដ្ឋមន្ត្រី ហ៊ុន សែនបានផ្តល់ជំនួយសុខាភិបាល និងហិរញ្ញវត្ថុមួយចំនួនជូនរដ្ឋាភិបាលទីក្រុងវៀងចន្ទន៍ ដែលកំពុងប្រឈមនឹងសេចក្តីត្រូវការហិរញ្ញប្បទានដើម្បីទប់ទល់ការវាយលុកពីជំងឺកូវីដ១៩។
បើតាមទំព័រហ្វេសប៊ុកផ្លូវការរបស់នាយករដ្ឋមន្ត្រីកម្ពុជា លោក ហ៊ុន សែន កម្ពុជាបានផ្តល់ប្រាក់ដល់នាយករដ្ឋមន្ត្រីឡាវលោក ផនខាំ វិផាវ៉ាន់ (Phankham Viphavanh) ចំនួន១៣លានដុល្លារអាមេរិក ដែលក្នុងនោះ ៣លានដុល្លារជាថវិការបស់រដ្ឋាភិបាលកម្ពុជា និង១០លានដុល្លារទៀត គឺជាថវិការបស់ក្រុមហ៊ុនឯកជន។
ក្នុងជំនួបរវាងលោក ហ៊ុន សែន និងលោក ផនខាំ វិផាវ៉ាន់ នៅឯវិមានសន្តិភាពក្នុងទីក្រុងភ្នំពេញ រដ្ឋាភិបាលកម្ពុជា ក៏បានប្រកាសផ្តល់ជំនួយវ៉ាក់សាំងស៊ីណូវ៉ាក់ចំនួន៥០ម៉ឺនដូស និងរថយន្តពីរគ្រឿងថែមទៀតជូនប្រទេសឡាវដើម្បីប្រយុទ្ធប្រឆាំងនឹងកូវីដ១៩ផងដែរ។
ភាគីឡាវ បានសម្តែងការអបអរសាទរចំពោះលោកនាយករដ្ឋមន្ត្រី ហ៊ុន សែន ដែលបានទទួលជោគជ័យលើគ្រប់វិស័យទាំងកិច្ចប្រជុំអាស៊ីអឺរ៉ុបកាលពីពេលថ្មីៗនេះ និងការទទួលធ្វើជាប្រធានអាស៊ាននៅឆ្នាំក្រោយ។
ទំព័រហ្វេសប៊ុកផ្លូវការរបស់លោកនាយករដ្ឋមន្ត្រីហ៊ុន សែន បានកត់សម្គាល់នូវការគាំទ្ររបស់លោក ផនខាំ វិផាវ៉ាន់ ចំពោះភាពជាអ្នកដឹកនាំអាស៊ាននៅឆ្នាំក្រោយតាមន័យដើមថា៖ «ក្នុងន័យនេះ ឯកឧត្តមក៏បានសម្តែងនូវការគាំទ្រ និងសន្យាសហការជាមួយនឹងកម្ពុជា ដើម្បីធ្វើយ៉ាងណាឲ្យកម្ពុជាដឹកនាំកិច្ចប្រជុំអាស៊ានឲ្យទទួលបានជោគជ័យ»។
បើតាមហ្វេសប៊ុករបស់លោក ហ៊ុន សែន នាយករដ្ឋមន្ត្រីឡាវបានស្នើសុំឲ្យមានការបន្តការផ្លាស់ប្តូរទស្សនកិច្ចទៅវិញទៅមកដើម្បីបញ្ចប់ការងារដែលបានព្រមព្រៀងគ្នា ក្នុងនោះមានកិច្ចព្រមព្រៀង ក៏ដូចជាកិច្ចសហប្រតិបត្តិការក្នុងភាពជាដៃគូគ្រប់ជ្រុងជ្រោយ ការជំរុញឲ្យគណៈកម្មការចម្រុះព្រំដែនបន្តធ្វើការយ៉ាងណាតាមគោលដៅដែលថ្នាក់ដឹកនាំបានសម្រេច និងការជំរុញកិច្ចសហប្រតិបត្តិការលើវិស័យពាណិជ្ជកម្ម វប្បធម៌ និងទេសចរណ៍រវាងប្រទេសទាំងពីរ។
ក្នុងពេលបំពេញទស្សនកិច្ចនៅកម្ពុជានាយករដ្ឋមន្ត្រីឡាវ ក៏បានជួបសម្តែងការគួរសមជាមួយមេដឹកនាំកម្ពុជាសំខាន់ៗផ្សេងទៀត រួមមានប្រធានព្រឹទ្ធសភាលោក សាយ ឈុំ និងប្រធានរដ្ឋសភាលោក ហេង សំរិន។
បន្ថែមពីនេះ ភាគីឡាវដែលស្ថាបនាទំនប់វារីអគ្គិសនីច្រើននៅលើតួទន្លេមេគង្គ និងរងការរិះគន់ពីអង្គការជាតិ និងអន្តរជាតិក៏ចាប់អារម្មណ៍លើផ្នែកថាមពលផងដែរ ក្នុងដំណើរទស្សនកិច្ចមកប្រទេសកម្ពុជា។
លោក Daovong Phonekeo រដ្ឋមន្ត្រីថាមពលនិងរ៉ែរបស់ប្រទេសឡាវក៏បានជួបពិភាក្សាការងារជាមួយលោក ស៊ុយ សែម រដ្ឋមន្រ្តីក្រសួងរ៉ែ និងថាមពលកម្ពុជា ដោយភាគីទាំងពីរបានឯកភាពគ្នាបន្តពង្រឹងនិងពង្រីកកិច្ចសហប្រតិបត្តិការលើវិស័យថាមពលទាំងក្របខណ្ឌបច្ចេកទេស និងពាណិជ្ជកម្មបន្ថែមទៀត និងការផ្លាស់ប្តូរទស្សនកិច្ចសិក្សាសម្រាប់គម្រោងវារីអគ្គិសនីនៃប្រទេសទាំងពីរ គឺវារីអគ្គិសនីដនសាហុង និងវារីអគ្គិសនីសេសានក្រោម២ នាពេលខាងមុខ។ នេះ បើតាមសេចក្តីប្រកាសរបស់ទីស្តីការក្រសួងរ៉ែនិងថាមពលកម្ពុជា។
ដំណើរទស្សនកិច្ចរបស់នាយករដ្ឋមន្ត្រីឡាវ លោក ផនខាំ វិផាវ៉ាន់ (Phankham Viphavanh) កើតមានឡើងដំណាលគ្នានឹងពេលមានសេចក្តីរាយការណ៍ពីប្រទេសឡាវមកថា រដ្ឋាភិបាលទីក្រុងវៀងចន្ទន៍កំពុងត្រូវការការគាំទ្រខាងហិរញ្ញវត្ថុទ្រង់ទ្រាយធំដើម្បីដោះស្រាយបញ្ហាបំណុល និងគោលនយោបាយសារពើពន្ធ។ ទឹកប្រាក់ដែលរដ្ឋាភិបាលប្រទេសនេះត្រូវការ ដើម្បីឆ្លើយតបទៅនឹងបញ្ហាសារពើពន្ធ និងការទូទាត់បំណុលក្នុងស្រុក និងក្រៅប្រទេសឲ្យបានមុនឆ្នាំនេះ គឺមានចំនួនប្រមាណ១,៨ពាន់លានដុល្លារអាមេរិក។ នេះ បើតាមសារព័ត៌មាន Vientiane Times។
វីអូអេមិនទាន់អាចសុំការអធិប្បាយបន្ថែមពីអ្នកនាំពាក្យក្រសួងការបរទេសកម្ពុជាលោក កុយ គួង និងមន្ត្រីស្ថានទូតឡាវប្រចាំទីក្រុងភ្នំពេញបានទេ នៅថ្ងៃអង្គារនេះ។
អ្នកវិភាគនយោបាយ លោក សេង សារី យល់ថាការផ្តល់ជំនួយរបស់កម្ពុជាជូនភាគីឡាវមានទឹកប្រាក់១៣លានដុល្លារអាមេរិកនោះ ជាផ្នែកមួយជួយឲ្យឡាវអាចឆ្លើយតបទៅនឹងផលប៉ះពាល់នានាដែលបង្កឡើងដោយជំងឺកូវីដ១៩។
លោកប្រាប់វីអូអេនៅថ្ងៃអង្គារនេះថា៖ «ខ្ញុំគិតថា អំណោយ១៣លានដុល្លារហ្នឹង វាអាចជាអំណោយដែលជួយដោះស្រាយបញ្ហារឿងកូវីដ និងក៏ជាផ្នែកមួយនៃកិច្ចសហប្រតិបត្តិការជួយគ្នាទៅវិញទៅមកទៅតាមលទ្ធភាព ដើម្បីទប់ស្កាត់នឹងកូវីដ ឬក៏ស្តារស្ថានភាពណាមួយក្រោយកូវីដអ៊ីចឹងទៅ»។
អ្នកវិភាគនយោបាយរូបនេះបន្ថែមថា កម្ពុជាក៏ត្រូវការការគាំទ្ររបស់ឡាវនៅពេលខ្លួនធ្វើជាប្រធានអាស៊ាននៅឆ្នាំ២០២២ ជាពេលដែលកម្ពុជាត្រូវសម្របសម្រួលបញ្ហាជាប់គាំងមួយចំនួនដូចជាការប្រកួតប្រជែងនយោបាយភូមិសាស្ត្ររវាងចិន និងសហរដ្ឋអាមេរិកនៅសមុទ្រចិនខាងត្បូង វិបត្តិនយោបាយនៅប្រទេសភូមា និងការចងក្រងសម្ព័ន្ធមិត្តរបស់អូស្ត្រាលី ជាមួយអង់គ្លេស និងសហរដ្ឋអាមេរិកក្នុងតំបន់អាស៊ីប៉ាស៊ីហ្វិក។
លោកថ្លែងថា៖ «អ៊ីចឹងហើយ ខ្ញុំគិតថា អំឡុងពេលឆ្នាំ២០២២នេះ ប្រហែលប្រទេសកម្ពុជា ត្រូវការការជួយច្រើនពីប្រទេសជិតខាង ក៏ដូចជាសមាជិកអាស៊ានផ្សេងទៀត ដើម្បីធានាទៅលើដំណើរការនៃការដឹកនាំអាស៊ានផង ហើយធានាទៅលើប្រសិទ្ធភាពនៃការដោះស្រាយបញ្ហានៅក្នុងតំបន់ផង»។
កម្ពុជាធ្លាប់ធ្វើជាប្រធានអាស៊ានលើកចុងក្រោយកាលពីឆ្នាំ២០១២ ដោយនៅពេលនោះកម្ពុជាត្រូវបណ្តាញព័ត៌មានអន្តរជាតិរាយការណ៍ថា បានធ្វើឲ្យខកខានដំណើរនៃការចេញសេចក្តីថ្លែងការណ៍រួមស្តីពីបញ្ហាសមុទ្រចិនខាងត្បូងដែលរដ្ឋាភិបាលក្រុងប៉េកាំងទាមទារកាន់កាប់ស្ទើរតែទាំងអស់៕
