លោក ហ៊ុន សែន នាយករដ្ឋមន្ត្រីកម្ពុជាបានផ្ញើលិខិតពិសេសមួយទៅលោកបាន់ គីមូន (Ban Ki-moon) អគ្គលេខាធិការអង្គការសហប្រជាជាតិ ដើម្បីសុំខ្ចីផែនទីផ្លូវការ ដែលដាក់តម្កល់នៅអង្គការសហប្រជាជាតិ សម្រាប់ផ្ទៀងផ្ទាត់ជាមួយផែនទីដែលកំពុងប្រើប្រាស់ក្នុងការបោះបង្គោលព្រំដែនសព្វថ្ងៃ។ នេះបើយោងតាមលិខិតផ្ទាល់របស់លោក ហ៊ុន សែនដែលផ្ញើចេញកាលពីថ្ងៃច័ន្ទ។
ការស្នើសុំនេះគឺធ្វើឡើងប៉ុន្មានថ្ងៃប៉ុណ្ណោះបន្ទាប់ពីគណបក្សជំទាស់ដែលមានសំឡេងភាគតិចនៅរដ្ឋសភាចោទថា រដ្ឋបាលលោកហ៊ុន សែនកំពុងប្រើប្រាស់ផែនទីចម្លង និងមិនផ្លូវការក្នុងការបោះបង្គោលព្រំដែនជាមួយប្រទេសវៀតណាម និងមានការបាត់បង់ទឹកដីកម្ពុជា។
នៅក្នុងសារលិខិតមួយដែល VOA ទទួលបាននោះ លោកនាយករដ្ឋមន្ត្រី ហ៊ុន សែនសរសេរលិខិតផ្ញើទៅកាន់លោកបាន់ គីមូន (Ban Ki-moon) អគ្គលេខាធិការអង្គការសហប្រជាជាតិដោយបានស្នើសុំខ្ចីផែនទីដើមទាំងអស់ ខ្នាត១ភាគ១០០.០០០ ដែលបោះពុម្ពដោយក្រុមភូមិសាស្រ្តឥណ្ឌូចិន ហើយផែនទីនេះត្រូវបានយកទៅតម្កល់ទុកនៅក្នុងអង្គការសហប្រជាជាតិចាប់តាំងពីឆ្នាំ១៩៦៤ ដោយព្រះបាទព្រះបរមរតនកោដ្ឋ នរោត្តម សីហនុ។
លោកនាយករដ្ឋមន្ត្រីក៏បានបញ្ជាក់ផងដែរថា ផែនទីដើមនេះមានសារៈសំខាន់សម្រាប់កម្ពុជា«ក្នុងការរៀបចំ និងការអនុវត្តការងាររបស់ខ្លួនក្នុងការកំណត់បោះបង្គោលព្រំដែនរវាងព្រះរាជាណាចក្រកម្ពុជានិងប្រទេសជិតខាង ក៏ដូចជាក្នុងគោលបំណងបញ្ចៀស និងបញ្ចប់នូវការញុះញង់បង្កើតស្មារតីជាតិនិយមជ្រុល ហើយធ្វើឲ្យមានការភាន់ច្រឡំនៅក្នុងចំណោមសាធារណមតិជាតិ និងអន្តរជាតិ»។
លោកហ៊ុន សែនបានសរសេរក្នុងលិខិតចុះថ្ងៃច័ន្ទនេះថា៖ «ខ្ញុំសូមស្នើឯកឧត្តមអគ្គលេខាធិការមេត្តាអនុញ្ញាតឱ្យរាជរដ្ឋាភិបាលកម្ពុជាខ្ចីផែនទីដើមទាំងអស់ ដែលកម្ពុជាបានតម្កល់ទុកនៅអង្គការសហប្រជាជាតិនោះដើម្បីយកមកប្រើប្រាស់ផ្ទៀងផ្ទាត់បញ្ជាក់អំពីភាពត្រឹមត្រូវពិតប្រាដកជាមួយដែនទីដែលរាជរដ្ឋាភិបាលបានប្រើប្រាស់សម្រាប់កំណត់ព្រំដែនគោក និងព្រំដែនទឹក»។
កាលពីចុងខែមិថុនាកន្លងទៅ យ៉ាងហោចណាស់មានមនុស្ស១០នាក់បានរងរបួស បន្ទាប់ពីមានការប៉ះទង្គិចគ្នារវាងក្រុមសកម្មជនព្រំដែនកម្ពុជាជាមួយនឹងអាជ្ញាធរវៀតណាមក្នុងពេលក្រុមសកម្មជនព្រំដែនកម្ពុជាព្យាយាមទៅពិនិត្យមើលចំណុចព្រំដែន ដែលសង្ស័យថា មានភាពមិនប្រក្រតីនោះ។ ក្នុងចំណោមអ្នករងរបួសមានលោករៀល ខេមរិន្ទ្រ អ្នកតំណាងរាស្ត្រគណបក្សសង្គ្រោះជាតិ។
លោក អ៊ុំ សំអាន តំណាងរាស្ត្រគណបក្សសង្គ្រោះជាតិដែលបានធ្វើការតស៊ូមតិរឿងបញ្ហាព្រំដែននេះ បានស្វាគមន៍សំណើរបស់លោកនាយករដ្ឋមន្ត្រី ហ៊ុន សែន ទៅកាន់អង្គការសហប្រជាជាតិនេះ។ លោកបានប្រាប់ VOA ថា ការស្នើសុំនេះបញ្ជាក់ពីភាពមិនច្បាស់លាស់នៃផែនទីដែលកំពុងតែប្រើប្រាស់ក្នុងការបោះបង្គោលព្រំដែនកម្ពុជាជាមួយប្រទេសជិតខាងនាពេលកន្លងមកនេះ។
«រដ្ឋាភិបាលគួរតែធ្វើរឿងនេះយូរមកហើយ មិនគួរធ្វើរឿងនេះឥឡូវនេះទេ។ បើអញ្ចឹង បើគាត់ស្នើឥឡូវនេះគឺបញ្ជាក់ថា ផែនទីដែលរដ្ឋាភិបាលប្រើប្រាស់កន្លងមកគឺមិនត្រឹមត្រូវ ក្លែងក្លាយ ព្រោះបើផែនទីហ្នឹងត្រឹមត្រូវពិតប្រាកដ ចាំបាច់ខ្ចីគេធ្វើអី? បើទោះបីជាយ៉ាងណាក៏ដោយ យើងមានការស្វាគមន៍ដែលរដ្ឋាភិបាលបានស្នើសុំផែនទីពីអង្គការសហប្រជាជាតិ»។
លោក អ៊ុំ សំអាន ក៏បានឲ្យដឹងផងដែរថា រដ្ឋាភិបាលកម្ពុជាគួរតែបង្កើតគណៈកម្មការថ្មីមួយ ដោយមានសមាសភាពចូលរួមដោយគណបក្សកាន់អំណាច គណបក្សជំទាស់ សង្គមស៊ីវិល និងមន្ត្រីជំនាញពីអង្គការសហប្រជាជាតិផងដែរ ដើម្បីបញ្ជាក់ពីភាពពិតប្រាកដក្នុងដំណើរការបោះបង្គោលព្រំដែន ឬក៏បង្កើតជាឧត្តមក្រុមប្រឹក្សាជាតិដែលធ្លាប់បានធ្វើកាលពីពេលកន្លងទៅ។
លោក ផៃ ស៊ីផាន អ្នកនាំពាក្យនៃទីស្តីការគណៈរដ្ឋមន្ត្រី បានច្រានចោលការលើកឡើងរបស់លោក អ៊ុំ សំអាន ដោយលោកលើកឡើងថា ការងារបោះបង្គោលព្រំដែនគឺជាការងាររបស់រដ្ឋាភិបាលដែលមិនអាចឡូកឡំជាមួយគណបក្សនយោបាយនោះទេ។ លើសពីនេះទៀត ការស្នើសុំរបស់លោក ហ៊ុន សែន គឺជាការទទួលខុសត្រូវរបស់រដ្ឋាភិបាលដើម្បីបញ្ជាក់ជូនសាធារណជន។
«អ្វីដែលសម្រេចអគ្គមហាសេនាបតីតេជោហ៊ុន សែនលោកបានផ្ញើលិខិតទៅសុំខ្ចី ដើម្បីមកមើល ឲ្យគណៈកម្មការទាំងអស់ចូលរួមមើលហ្នឹងគឺជាការទទួលខុសត្រូវខ្ពស់របស់រដ្ឋាភិបាលកម្ពុជា ក៏ដូចជាការទទួលខុសត្រូវជាប្រវត្តិសាស្ត្រ ដែលយើងធ្លាប់បានប្រើប្រាស់ផែនទីដល់ទៅបីរួចមកហើយ»។
កាលពីថ្ងៃព្រហស្បតិ៍សប្ដាហ៍មុន លោក វ៉ា គឹមហុង ប្រធានគណៈកម្មការចម្រុះកិច្ចការព្រំដែនកម្ពុជា បានធ្វើបទបង្ហាញមួយដ៏ចម្រូងចម្រាសរយៈពេលជាង២ម៉ោង ដោយបង្ហាញផែនទីនានាដែលក្រុមការងាររបស់លោកប្រើប្រាស់សម្រាប់បោះបង្គោលព្រំដែនជាមួយប្រទេសវៀតណាមនោះ។ ក្នុងនោះក៏មានផែនទីដែលលោកអះអាងថា បានថតចំណងពីផែនទីពិតដែលតម្កល់នៅក្នុងអង្គការសហប្រជាជាតិនិងផែនទី២៦កំណាត់ដែលបន្សល់ទុកពីសម័យសង្គមរាស្ត្រនិយមផងដែរ។ ជាមួយគ្នានោះដែរ លោកក៏បានបញ្ជាក់ថា ប្រធានគណៈកម្មការចម្រុះកិច្ចការព្រំដែនកម្ពុជាក៏ប្រើប្រាស់ផែនទីស គ្មានខ្សែបន្ទាត់ព្រំដែន ដែលបោះពុម្ពដោយវៀតណាមសម្រាប់ធ្វើជាឯកសារយោងផងដែរ។
លោក វ៉ា គឹមហុងបានបញ្ជាក់ប្រាប់ VOA កាលពីថ្ងៃច័ន្ទផងដែរថា កិច្ចប្រជុំរវាងគណៈកម្មការចម្រុះព្រំដែនកម្ពុជា និងវៀតណាមនៅតែបន្តធ្វើ ដើម្បីពន្លឿនការបោះបង្គោលព្រំដែនរវាងប្រទេសទាំងពីរតទៀត។ លោកក៏បានឲ្យដឹងផងដែរថា ការប្រជុំនៃគណៈកម្មការរបស់ប្រទេសទាំងពីររយៈពេលបីថ្ងៃនោះ នឹងធ្វើឡើងនៅថ្ងៃអង្គារខាងមុខ ក្នុងរាជធានីភ្នំពេញ ជំនួសឲ្យខេត្តសៀមរាប៕
