ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កម្ពុជា​រំឭក​ខួប​ប្រាំពីរ​ឆ្នាំ​នៃ​ការសោយ​ទិវង្គត អតីត​មហាក្សត្រ​ព្រះបាទ​នរោត្តម​សីហនុ


នៅ​ថ្ងៃទី​១៥ ខែ​តុលា ឆ្នាំ​២០១៩ ក្រុម​មន្ត្រី​យោធា​ផ្តល់​ការគោរព​ដល់​អតីត​ព្រះមហាក្សត្រ​ព្រះបាទ នរោត្តម សីហនុ ក្នុង​ខួប​គម្រប់​ប្រាំពីរ​ឆ្នាំ​នៃ​ការ​សោយ​ទិវង្គត​របស់​ព្រះអង្គ ក្នុង​រាជធានី​ភ្នំពេញ។ (ហ៊ុល រស្មី/VOA)
នៅ​ថ្ងៃទី​១៥ ខែ​តុលា ឆ្នាំ​២០១៩ ក្រុម​មន្ត្រី​យោធា​ផ្តល់​ការគោរព​ដល់​អតីត​ព្រះមហាក្សត្រ​ព្រះបាទ នរោត្តម សីហនុ ក្នុង​ខួប​គម្រប់​ប្រាំពីរ​ឆ្នាំ​នៃ​ការ​សោយ​ទិវង្គត​របស់​ព្រះអង្គ ក្នុង​រាជធានី​ភ្នំពេញ។ (ហ៊ុល រស្មី/VOA)

នៅថ្ងៃទី១៥ ខែតុលា​នេះ កាលពី​ប្រាំពីរ​ឆ្នាំមុន​ព្រះមហា​វីរក្សត្រ នរោត្តម សីហនុ បាន​យាង​ចូល​ទិវង្គត។ នៅថ្ងៃនេះ ក្រុម​មន្ត្រី​រដ្ឋាភិបាល​និង​អ្នកវិភាគ​បាន​លើក​ពី​ស្នា​ព្រះហស្ត​របស់​ព្រះអង្គ ខណៈ​ស្ថានទូត​ចិន​ប្រចាំ​ទីក្រុង​ភ្នំពេញ ចាត់ទុក​ថា ព្រះអង្គ​គឺជា​មិត្ត​អមត​របស់​ប្រជាជន​ចិន។

នៅ​ចំពោះ​មុខរូប​សំណាក ​ព្រះ​បរមកោដ្ឋ នរោត្តម សីហនុ ​នៅ​កណ្ដាល​ក្រុង​ភ្នំពេញ​ ក្រុម​មន្ត្រី​ជាន់​ខ្ពស់​របស់​រដ្ឋាភិបាល​កម្ពុជា​ មក​ពី​ស្ថាប័ន​ផ្សេងៗ ដែល​ស្លៀកពាក់​ឯកសណ្ឋាន​ផ្លូវ​ការ បាន​នាំ​យក​កម្រងផ្កា​មក​ដាក់​ថ្វាយ​ និង​បង្ហាញ​ការ​គោរព​ដល់​ព្រះ​វិញ្ញាណក្ខន្ធ​របស់​អង្គ។

នៅ​ថ្ងៃ​ទី​១៥​ខែ​តុលា​ ឆ្នាំ​២០១២ ពោល​គឺ​កាល​ពី​ប្រាំពីរ​ឆ្នាំ​មុន​ព្រះ​មហា​វីរក្សត្រ​នរោត្តម សីហនុ បាន​យាង​ចូល​ទិវង្គត ក្នុង​ទីក្រុង​ប៉េកាំង នៃ​សាធារណរដ្ឋ​ប្រជាមានិត​ចិន ក្នុង​ព្រះជន្ម​៩០ ព្រះវស្សា។


ក្នុង​ពិធី​រំឭក​ខួប​នៃ​ការ​យាង​ចូល​ទិវង្គត​នេះ ក្រុម​មន្ត្រី​រដ្ឋាភិបាល​និង​អ្នកវិភាគ​បាន​រំលឹក​ពី​អនុស្សាវរីយ៍​និង​កេរ្តិ៍​ដំណែល​របស់​ព្រះ​អង្គ។​

បន្ទាប់​ពី​ការ​ដាក់​កម្រង​ផ្កា​នៅ​ក្នុង​ទី​តម្កល់​រូប​សំណាក​អតីត​ព្រះមហាក្សត្រ​ខ្មែរ​នរោត្តម​សីហនុ​ នាយ​ឧត្តម​សេនីយ៍​ ឈុំ​ សុជាតិ​ អ្នកនាំ​ពាក្យ​ក្រសួង​ការពារ​ជាតិ​ ប្រាប់​អ្នកកាសែត​ថា៖

«យើង​ទាំង​អស់​គ្នា​ ចាំ​មិន​ភ្លេច​ទេ​ នូវ​គុណូបការៈ​ របស់​សម្ដេច​តា​ វីរភាព​សម្ដេច​តា​ ដែល​ដណ្ដើម​បាន​ឯករាជ្យ​ ជូន​ប្រទេស​ជាតិ​យើង»។

ក្រុម​មន្ត្រី​រដ្ឋាភិបាល​កម្ពុជា​ដាក់​កម្រង​ផ្កា​នៅ​រូប​សំណាក​អតីត​ព្រះមហាក្សត្រ​ព្រះបាទ​នរោត្តម​ សីហនុ​ ថ្ងៃទី​១៥​ ខែ​តុលា ឆ្នាំ​២០១៩។ (ហ៊ុល រស្មី/VOA)
ក្រុម​មន្ត្រី​រដ្ឋាភិបាល​កម្ពុជា​ដាក់​កម្រង​ផ្កា​នៅ​រូប​សំណាក​អតីត​ព្រះមហាក្សត្រ​ព្រះបាទ​នរោត្តម​ សីហនុ​ ថ្ងៃទី​១៥​ ខែ​តុលា ឆ្នាំ​២០១៩។ (ហ៊ុល រស្មី/VOA)

ដោយ​មាន​ក្រុម​មន្ត្រី​អម​សងខាង​ លោក ​វង សូត្រ​ រដ្ឋមន្ត្រី​ក្រសួង​សង្គម​កិច្ច មានប្រសាសន៍ថា​ ស្នាព្រះហស្ត​របស់​អតីត​មហាក្សត្រ​ មិន​អាច​បំភ្លេច​បានទេ​។

«យើង​ទាំង​អស់​គ្នា​នៅតែ​បន្ត​ចង​ចាំ។ យើង​នៅ​តែ​បន្ត​ ចងចាំ​នូវ​អ្វី​ដែល​លោក​បាន​បន្សល់​ទុក​ [ជូន]ប្រជាជន​កម្ពុជា​ទាំងមូល​បាទ»។​

កេរដំណែល​ព្រះ​បរម​រតនៈ​កោដ្ឋ មាន​ភាព​លាយ​ចម្រុះគ្នា តែ​ជា​ការពិត​ដែល​មាន​មនុស្ស​ជាច្រើន ចាត់​ទុក​ការ​ដឹក​នាំ​ប្រទេស​របស់​ព្រះ​អង្គ ក្នុង​អំឡុង​ទសវត្សរ៍​ ១៩៥០ និង ១៩៦០ ថា​ជា​សម័យ​ដ៏​រុង​រឿង​នៃ​ប្រទេស​កម្ពុជា គឺ​នៅ​ពេល​ដែល​ព្រះ​មហាក្សត្រ​នរោត្តម​សីហនុ បាន​ទាម​ទារ​ឯករាជ្យ​ពី​ប្រទេស​បារាំង​ ជូន​ប្រទេស​កម្ពុជា ហើយ​បាន​លើក​ស្ទួយ​វិស័យ​សុខាភិបាល​និង​អប់រំ​របស់​ប្រទេស​ជាតិ។

ប៉ុន្តែ​ក្រោយ​រដ្ឋ​សភា​ទម្លាក់​ព្រះ​អង្គ​ចេញ​ពី​តំណែង​ក្នុង​រដ្ឋ​ប្រហារ​មិន​បង្ហូរ​ឈាម​មួយ នៅ​ឆ្នាំ​១៩៧០ ប្រទេស​កម្ពុជា​បាន​រមៀល​ធ្លាក់ក្នុង​សង្គ្រាម​ស៊ីវិល និង​ឈាន​ដល់​របប​កាប់​សម្លាប់​របស់​ពួក​ខ្មែរ​ក្រហម។ មនុស្ស​ជិត​ពីរ​លាន​នាក់​បាន​ស្លាប់​និង​ត្រូវ​បាន​សម្លាប់។

លោក​បណ្ឌិត ​ឡៅ ម៉ុងហៃ​ អ្នកវិភាគ​នយោបាយ​មួយ​រូប​ ចាត់​ទុក​ថា​ អតីត​ព្រះមហាក្សត្រ​ខ្មែរ​ព្រះបាទ​នរោត្តម​ សីហនុ​ ជា​ស្ថាបនិក​ឯករាជ្យ​ប្រទេស​កម្ពុជា​ ដោយ​ព្រះអង្គ​បាន​បញ្ចប់​ការ​ត្រួត​ត្រា​របស់​បរទេស​មក​លើ​កម្ពុជា​។ លោក​គូស​បញ្ជាក់​ថា​ ព្រះអង្គ​ក៏​ជា​អ្នកផ្សះផ្សា​ និង​បង្រួប​បង្រួម​ជាតិ​ដ៏​មាន​សារៈសំខាន់​មួយ​រូប​ក្រោយ​ការ​ដួល​រលំ​របស់​របប​ខ្មែរក្រហម​ និង​ការសម្រេច​បាន​កិច្ច​ព្រមព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១។ លោក​បាន​រំឭក​ទៀត​ថា​ ព្រះអង្គ​ក៏​មាន​ប្រវត្តិ​ដឹកនាំ​ប្រទេស​តាម​របៀប​ផ្ដាច់​ការ​ផង​ដែរ​ តែថា​ ក្រោម​ការ​គ្រប់គ្រង​របស់​ព្រះអង្គ​ គ្មាន​ការ​ដណ្ដើម​ដី​ពី​រាស្ត្រ​ទៅ​ឲ្យ​ក្រុមហ៊ុន​ឯកជន​នោះ​ទេ។

លោក​បណ្ឌិត ​ឡៅ ម៉ុងហៃ​ បន្ថែម​ថា​អតីត​ព្រះមហាក្សត្រ​ មាន​ព្រះរាជ​ទំនាក់​ទំនង​ទូលាយ​ជាមួយ​ប្រជា​រាស្ត្រ​ក្រីក្រ​ ហើយ​មានការ​ឆ្លើយតប​ជាប្រចាំ​ចំពោះ​សំណើ និង​ញត្តិ​នានា​របស់​រាស្ត្រ​ផង​ដែរ មិន​ដូច​អង្គ​ព្រះមហាក្សត្រ​សព្វថ្ងៃ​ ដែល​មាន​ការ​ឆ្លើយតប​ទៅ​នឹង​ញត្តិ​របស់​រាស្ត្រ​ដោយ​កម្រ។

នៅ​ចំ​ថ្ងៃ​ប្រារព្ធ​ខួប​ទី​៧​នៃ​ការ​យាង​សោយ​ទិវង្គត​របស់​ព្រះ​មហា​វីរក្សត្រ​នរោត្តម សីហនុ នៅ​ថ្ងៃ​នេះ ស្ថាន​ទូច​ចិន​ប្រចាំ​ទីក្រុង​ភ្នំពេញ​ បាន​ដាក់​រូប​ថត​មួយ​សន្លឹក​ធំ​របស់​ព្រះ​អង្គលើ​ទំព័រ​ហ្វេសប៊ុក​របស់​ខ្លួន។

ស្ថានទូត​ចិន​បាន​សរសេរ​យ៉ាង​ដូច្នេះ​ថា «ព្រះអង្គ​ជា​មិត្ត​ចាស់​នៃ​ប្រជាជន​ចិន យើង​ទាំង​អស់​គ្នា​ចងចាំ​ព្រះអង្គ​ជា​រៀង​រហូត»៕​

XS
SM
MD
LG