ភ្ជាប់​ទៅ​គេហទំព័រ​ទាក់ទង

កម្ពុជា​រក្សា​ជំហរ​សម្របសម្រួល​ក្នុង​ជម្លោះ​សមុទ្រ​ចិន​ខាងត្បូង


រូបភាព​​ផែនទី​​នៃ​សមុទ្រ​​ចិន​​ខាងត្បូង

រដ្ឋាភិបាល​កម្ពុជា​បាន​បញ្ជាក់​ជំហរ​របស់​ខ្លួន​នៅ​ថ្ងៃ​អង្គារ​នេះ​ថា​ ប្រទេស​កម្ពុជា​នឹង​នៅ​បន្ត​ជា​អ្នក​សម្រប​សម្រួល​ដើម្បីបន្ធូរ​ភាព​តាន​តឹង​នៅ​ក្នុង​តំបន់​សមុទ្រ​ចិន​ខាង​ត្បូង​ដែល​ជាប់​គាំង​ដោយ​សារ​ជម្លោះ​រវាង​ប្រទេស​ចិន​និង​ប្រទេស​មួយ​ចំនួន​នៅ​ក្នុង​តំបន់​អាស៊ី​ភាគ​អាគ្នេយ៍។​ នេះ​បើ​តាម​ការ​បញ្ជាក់​របស់​មន្រ្តី​ជាន់​ខ្ពស់​មួយរូប​នៃ​ក្រសួង​ការបរទេស​កម្ពុជា។​

លោក​ចែម​ វិទ្យា​ អនុរដ្ឋលេខា​ធិការ​ក្រសួ​ងការ​បរទេស​បាន​ថ្លែង​ប្រាប់​អ្នកសារព័ត៌​មាន​នៅ​ទីស្តី​ការ​ក្រសួង​ បន្ទាប់​ពី​ជំនួប​មួយ​រវាង​លោក​ហោ​ ណាំហុង​ រដ្ឋមន្ត្រី​ក្រសួង​ការបទេស ​និង​លោកXu Bu​ ឯកអគ្គរដ្ឋទូត​ចិន​ថ្មី​ប្រចាំ​សមាគម​អាស៊ាន​ ថា ​ប្រទេស​កម្ពុជា​ចង់​ឃើញ​ប្រទេស​ចិន​និង​អាស៊ាន​រក្សាទំនាក់​ទំនង​ល្អ​ដើម្បី​ឲ្យ​មាន​ស្ថិរភាព​នយោបាយ​ មាន​សន្តិ​សុខ​យូរ​អង្វែង​ ដែល​ជា​កត្តា​មួយ​ធ្វើ​ឲ្យ​កំណើនសេដ្ឋកិច្ច​ក្នុងតំបន់​អាស៊ី​អាគ្នេយ៍​ និង​អាស៊ី​ប៉ាស៊ីហ្វិក ​ស្ថិតស្ថេរ​យូរអង្វែង។​

«កម្ពុជា​នឹង​គឺថា​ ចង់​សម្រប​សម្រួល​ ធ្វើ​យ៉ាង​ម៉េចឲ្យ​បន្ធូរ​បរិយាកាស​រវាង​ប្រទេស​អាស៊ាន​និង​ចិន ​ព្រោះ​យើង​យល់ថា​ដំណោះស្រាយ​នានា​យើង​មិន​អាច​ធ្វើ​ដោយ​យើង​អត់​និយាយ​ជាមួយ​គ្នា​ទេ​ បើ​យើង​ធ្វើ​រកដំណោះ​ស្រាយ​ការទូត​វាទាល់​តែយើង​និយាយ​គ្នា ​បើ​យើង​មិន​និយាយ​គ្នា​មិនអាច​រក​ដំណោះ​ស្រាយ​បាន​ទេ»។

លោក​Xu Bu ​ឯកអគ្គរដ្ឋទូត​ចិន​ប្រចាំ​តំបន់​អាស៊ាន​ពុំបញ្ជាក់​ឲ្យ​បាន​លម្អិត​នៅ​ចំពោះ​មុខ​អ្នក​សារព័ត៌មាន​ លើ​បញ្ហា​សមុទ្រ​ចិន​ខាង​ត្បូង​នេះ​ទេ​ ដោយ​លោក​គ្រាន់តែថ្លែង​កោតសរសើរប្រទេស​កម្ពុជា​ក្នុង​ការ​សម្រប​សម្រួល​សន្តិសុខ​ជាមួយ​បណ្តាប្រទេស​នៅ​ក្នុង​តំបន់​អាស៊ី​អាគេ្នយ៍។​

ប្រទេស​ចិន​ធ្លាប់​បាន​អះអាង​ថា​ ខ្លួន​កាន់​កាប់​៩០​ភាគរយ​នៃ​តំបន់​ដែន​ទឹក​យុទ្ធសាស្រ្ត​ជាច្រើន​នៅ​ក្នុង​សមុទ្រចិន​ភាគខាងត្បូង​ ហើយ​ចិន​ក៏ធ្លាប់​បាន​និយាយ​ដដែលៗ​ថា ​អាស៊ាន​មិនមែន​ជាភាគី​នៃ​ជម្លោះ​នៅ​ក្នុងតំបន់​សមុទ្រ​ចិន​ខាង​ត្បូង​នេះ​ទេ។​ ប្រទេស​ចិន​បាន​បញ្ជាក់​ផងដែរ​ថា​ ជម្លោះ​ដែល​កើត​មាន​នៅ​ក្នុង​តំបន់​សមុទ្រ​នេះ​ គួរ​ត្រូវ​ដោះ​ស្រាយ​ដោយ​ទ្វេភាគី។​ នៅ​ក្នុង​តំបន់​សមាគម​ប្រជាជាតិ​អាស៊ីអាគ្នេយ៍​មាន ប្រទេស​វៀតណាម​ ហ្វីលីពីន ​ព្រុយណេ ​និង​ម៉ាឡេស៊ី​បាន​ប្រជែង​អះ​អាង​ជាម្ចាស់​កម្មសិទ្ធិ​ក្នុង​តំបន់​សមុទ្រ​ជម្លោះ​មួយ​នេះ។​

រដ្ឋាភិបាល​កម្ពុជា​ធ្លាប់​បាន​ប្រកាស​ដែរ​ថា​ ដំណោះស្រាយ​លើ​ការ​អះអាង​ទាមទារ​ធ្វើ​ម្ចាស់​ទឹកដី​ក្នុង​តំបន់​សមុទ្រ​ចិន​ភាគខាង​ត្បូង ​ត្រូវតែ​រកឲ្យ​បានដោយ​ប្រទេស​ដែល​ជាប់​ពាក់​ព័ន្ធ​នឹង​ជម្លោះ​នេះ។​

លោក​បណ្ឌិត​សុខ ទូច ​សាកល​វិទ្យាធិការ​នៃ​សាកល​វិទ្យាល័យ​ខេមរៈ ​មាន​ប្រសាសន៍​ប្រាប់​វីអូអេ​ថា កម្ពុជា​មាន​ឥទ្ធិពល​តិចតួច​ណាស់​នៅ​ក្នុង​ការ​សម្រប​សម្រួល​បន្ធូរបន្ថយ​ទំនាស់​នេះ ​ដោយ​លោក​បាន​ពន្យល់​ថា៖​

«មិនៗ​ មិនច្រើនទេ​ មិន​ច្រើន​ទេ​។ យើង​ដឹងហើយថា​អាស៊ាន មាន​ប្រព័ន្ធ​ផ្សេង​គ្នា​ អាស៊ាន​មាន​ឈ្មោះ​តែ​អាស៊ាន​តែ​មួយ​ជោគ​វាសនា​តែ​មួយ មាន​តែ​ពាក្យ​ទេ​។ ការណ៍ពិត​អាស៊ានគឺ​បែក​ខ្ញែក​គ្នាទាំង​អស់​។ យើង​ឃើញហើយ​អាស៊ាន​ចិន​ អាស៊ាន​អាមេរិក​ អាស៊ាន​អូស្រ្តាលី​ មាន​បងធំ​នៅ​ពីក្រោយ​ខ្នង​រៀងៗខ្លួន​ ហើយ​ក្នុង​ការ​សម្រប​សម្រួល​ណាមួយ​ខ្ញុំ​ជឿជាក់​ថា​នេះ​ជា​ការលំបាក»។​

លោក​សុខ​ ទូច​បាន​បន្ថែម​ថា ទោះបី​ប្រទេស​ចិន​កំពុងមាន​ទំនាស់​ជាមួយ​ប្រទេស​មួយ​ចំនួន​ក្នុង​តំបន់អាស៊ីអាគ្នេយ៍​ ប្រទេសចិន​នឹង​មិន​ប្រើ​មធ្យោបាយ​ក្តៅ​ដោះ​ស្រាយ​ទំនាស់​នេះទេ ដោយ​ប្រទេស​នេះ​នៅ​បន្ត​រក្សាយុទ្ធសាស្រ្ត​អភិវឌ្ឍន៍​សេដ្ឋកិច្ច​របស់​ខ្លួន​ចាប់​តាំង​ពី​ឆ្នាំ​១៩៣០​ គឺ​មុន​ពេល​ដែល​បដិវត្តន៍​លទ្ធិ​កុម្មុយនីស្ត​កើត​ឡើង​នៅ​ឆ្នាំ​១៩៤៩។​

នៅ​ពេល​ដែល​ប្រទេស​កម្ពុជា​ធ្វើជាប្រធាន​នៃ​កិច្ច​ប្រជុំ​កំពូល​អាស៊ាន​ក្នុង​ឆ្នាំ​២០១២​ សមាគមនេះខក​ខាន​មិន​បាន​ចេញ​សេចក្តី​ថ្លែង​ការណ៍​រួម​ជាលើក​ដំបូង​ដើម្បី​បញ្ជាក់​ពី​ជំហរ​របស់​អាស៊ាន​ក្នុង​តំបន់​សមុទ្រ​ចិន​ភាគ​ខាង​ត្បូង​នេះ ​ចាប់​ពី​ការបង្កើត​ឡើង​នៃ​សមាគម​អាស៊ាន​ក្នុង​ឆ្នាំ​១៩៦៧។​

ប្រទេស​ចិន​បាន​ផ្តល់​ជំនួយ​ច្រើន​សន្ធឹក​សន្ធាប់​ដល់​ប្រទេស​កម្ពុជា​ ក្នុង​នោះ​មាន​ជំនួយ​ហិរញ្ញវត្ថុ ​និង​ជំនួយ​គាំទ្រ​ផ្នែក​យោធា៕ ​

XS
SM
MD
LG