ភ្ជាប់​ទៅ​គេហទំព័រ​ទាក់ទង

ជនរងគ្រោះ​រំលោភដីធ្លី​​ជួបជុំ​គ្នា​ប្រារព្ធ​ទិវា​សិទ្ធិ​លំនៅឋាន​ពិភពលោក

  • ហេង រស្មី

ជន​រងគ្រោះសហគមន៍​ដី​ក្រហមប្រារព្វ​ខួប​លើក​ទី​៧នៃ​ការ​ដេញចេញ​ពីលំនៅដ្ឋាន។ ដោយ៖ ហេង រស្មី
ភ្នំពេញ៖ សហគមន៍​ដែល​រងគ្រោះ​ដោយសារ​ការ​បណ្តេញ​ចេញចំនួន​៤០​នៅ​ថ្ងៃ​ចន្ទ​នេះ​បាន​នាំ​គ្នា​ប្រារព្វ​ខួប​លើក​ទី​៧ ចំពេល​ទិវា​លំនៅ​ដ្ឋាន​ពិភពលោក​ ដើម្បី​ទាម​ទារ​រដ្ឋា​ភិបាល​និង​រដ្ឋ​សភា​ឲ្យ​ផ្តល់​ទី​ជម្រក​សម​រម្យ និង​ដោះលែង​សកម្មជន​តវ៉ា​ដី​ធ្លី​ចំនួន​ពីរនាក់​ដែល​កំពុង​ជាប់​ឃុំក្នុងពន្ឋនាគារ។​
ស្រប​ពេល​ដែល​ក្រុម​ប្រជា​ពលរដ្ឋ​ដែល​រង​គ្រោះ​រឿង​វិវាទ​ដី​ធ្លីនៅទី​ក្រុង​ភ្នំ​ពេញ​ប្រារព្វ​ខួប​នៃ​ការ​បណ្តេញ​ចេញ សមាគម​អ្នក​ប្រជា​ធិ​បតេយ្យបាន​ដាក់​ញត្តិ​ថ្វាយ​ព្រះ​មហា​ក្សត្រ​ដើម្បី​ឲ្យ​ជួយ​អន្ត្ររាគមន៍​ដោះលែង​លោក​ម៉ម សូណង់ដូ។​
លោក ម៉ម សូណង់​ដូ នាយក​ស្ថានីយ៍​វីទ្យុ​សម្បុក​ឃ្មុំ និង​ជា​ប្រធាន​សមាគម​អ្នក​ប្រជា​ធិបតេយ្យ​ត្រូវ​បាន​តុលាការ​ក្រុង​ភ្នំ​ពេញ​កាល​ពី​ថ្ងៃ​ទី​០១ ខែ​តុលា ​កាត់​ទោស​ឲ្យ​ជាប់​ពន្ឋ​នាគារ​រយៈ​ពេល​២០​ឆ្នាំ​និង​ពិន័យ​ជា​ប្រាក់​ចំនួន​១០​លាន​រៀល​គឺ​ប្រមាណ​២.៥០០​ដុល្លារ​អាមេរិក បន្ទាប់​ពី​តុលាការ​រក​ឃើញ​ថា​លោក​ជាប់​ពាក់​ព័ន្ឋ​នឹង​ការ​បង្កើត​តំបន់​អបគមន៍​ខុស​ច្បាប់​នៅ​ក្នុង​ខេត្ត​ក្រចេះ​ដើម្បី​ផ្តួល​រំលំ​រដ្ឋាភិបាល​របស់​លោក​នាយក​រដ្ឋ​មន្ត្រី​ហ៊ុន សែន ​ដែល​បាន​គ្រប់​គ្រង​ប្រទេស​អស់​រយៈពេល​៣០​ឆ្នាំ។
ក្រុម​អ្នក​ចូល​រួម​បាន​ពាក់​អាវ​ពណ៌​ខ្មៅ កាន់​បដា​និង​ពាក់​មួក​ធ្វើ​ពី​ក្រដាស​រូប​ផ្ទះ​ ពាក់​នៅ​លើ​ក្បាល​គ្រប់ៗ​គ្នា​ដើម្បី​អ្វី​មួយ​ដែល​ពួក​គេ​បាន​អះ​អាង​ថា ពួកគេ​ត្រូវការ​ទី​ជម្រក​សមរម្យ​បន្ទាប់​ពី​មាន​ការ​បណ្តេញ​ចេញ​។
ក្រុម​សមត្ថកិច្ច​ត្រូវ​បាន​ដាក់​ពង្រាយ​ក្បែរៗ​ក្រុម​អ្នក​តវ៉ា​ក៏​ប៉ុន្តែ​មិន​មាន​ការ​បង្ក្រាប​ពី​អាជ្ញាធរ​ទេ។​
«ត​ស៊ូៗៗ។ រួម​គ្នា​ការពារ​ផ្ទះ​របស់​យើង»។
នៅ​ក្បែរសហគមន៍​ដី​ក្រហម កន្លែង​នេះ​ត្រូវ​បាន​ក្រុម​ហ៊ុន៧​NG​ឈួស​ឆាយ​ដី​និង​ព័ទ្ឋ​របងជុំជិត។ ក្រុម​ប្រជាពលរដ្ឋ​បាន​អះ​អាង​ថា ក្រុម​ហ៊ុន​មាន​គម្រោង​ពុះ​ដី​ឡូតិ៍​លក់​ជា​ប្លង់ៗ​បន្ទាប់​ពី​មាន​ការ​បណ្តេញ​ចេញ​ដោយ​បង្ខំ​និង​លាយឡំ​ដោយ​អំពើ​ហឹង្សា​កាល​ពី​ប្រាំពីរ​ឆ្នាំ​មុន។​
​តំណាង​អ្នក​ដែល​រង​គ្រោះ​ដោយសារ​ការ​បណ្តេញ​ចេញ​ត្រូវបាន​ថ្លែង​សារ​ម្តង​ម្នាក់​ៗ​អំ​ពី​ទុក្ខ​លំ​បាក​បន្ទាប់​ពី​ការ​បណ្តេញ​ចេញ។​
អ្នកស្រី ឌុល ចន្ថា អតីត​តំណាង​សហគមន៍​ដី​ក្រហម​បាន​និយាយ​ថា របប​ខ្មែរ​ក្រហម​និង​របបដែល​គ្រប់​គ្រង​ដោយ​រដ្ឋាភិបាល​បច្ចុប្បន្ន​នេះ ដឹក​នាំ​ប្រទេស​បណ្តេញ​ប្រជាពលរដ្ឋ​ចេញ​ពី​ទី​ក្រុងមាន​ស្ថាន​ភាព​ដូច​គ្នា។ អ្នក​ស្រី​បាន​និយាយ​ទៀត​ថា អ្នក​ស្រី​កំពុង​ប្រឈម​មុខ​នឹង​ការ​បណ្តេញ​ចេញ​ជា​លើក​ទី​២​ទៀត​បន្ទាប់​ពី​ការ​បណ្តេញ​ចេញ​លើក​ទី​១​នៅ​សហគមន៍ដី​ក្រហម។
«ខ្ញុំ​ចង់​អំពាវ​នាវ​ឲ្យ​បង​ប្អូន​ក្រោក​ឡើង​ត​ស៊ូ​ជា​មតិ​ ជា​រូប​ភាព​អ្វីៗ​ដើម្បី​ទាម​ទារ​ឲ្យ​រដ្ឋា​ភិបាល​ប្រឹង​ប្រែង​យក​ភ្នែក​មើល​ប្រជា​ពលរដ្ឋ​ក្រី​ក្រ​ខ្លះ​ផង»​។​
អ្នក​ស្រី សយ កូលាប អតីត​អ្នក​ភូមិ​បឹងកក់​បាន​និយាយ​ថា សំណង​ចំនួន​៨​ពាន់​ដុល្លារ​ដែល​អ្នក​ស្រី​បាន​ទទួល​មិន​អាច​ជួយ​ទ្រង់​ទ្រង់​ជី​វភាព​របស់​ពួកគេ​បាន​ទេ។ អ្នក​ស្រី​បាន​និយាយ​ថា រដ្ឋា​ភិបាល​មិន​ដែល​បាន​ទៅ​សួរ​សុខ​ទុក្ខ​ប្រជា​ពលរដ្ឋ​ទេ​ក្រោយ​ពី​ការ​បណ្តេញ​ចេញ។
«វេទនា​ណាស់។ បើបង​ប្អូន​មិន​ជឿ​ទៅ​តាម​ដាន​ផ្ទះ​អ្នក​ដែល​បាន​ចាក​ចេញ​ជួប​ការ​លំបាក សម្បី​តែ​សាលាកូន​រៀន​ក៏​គ្មាន»។​
លោក​ស្រី​ពុង ឈីវ​ហ្គិច នាយិកា​អង្កការ​សិទ្ឋិ​មនុស្ស​លីកាដូ​បាន​និយាយ​ជាមួយ​ប្រជាពល​រដ្ឋ​រង​គ្រោះ​ថា សិទ្ឋិ​មាន​លំនៅឋាន​មាន​សារៈ​សំខាន់​ណាស់។ លោក​ស្រី​បាន​បញ្ជាក់​ថា នៅ​ក្នុង​ប្រទេស​និមួយៗ​ដែល​គេ​អនុវត្ត​បាន​ល្អ​បើ​អត់សិទ្ឋិ​លំនៅ​ដ្ឋាន​នោះ​ទេ​ ប្រជា​ពលរដ្ឋ​រស់​នៅ​មិន​ថ្លៃ​ថ្នូរ​ទេ​។​
«សូម​សំណូម​ពរ​ដ៏​ទទួច​បើ​មាន​ការ​អភិវឌ្ឃ​សូម​ឲ្យ​ផល​វិជ្ជមាន​របស់​ការ​អភិវឌ្ឃ​ហ្នឹង​ឲ្យ​មាន​សមភាព។ បាន​ន័យ​ថា ផល​វិជ្ជ​មាន​បាន​ដល់​ប្រជា​ពលរដ្ឋ​ជា​ច្រើន​លើស​លុប»។
នៅ​ក្នុង​ញ្ញត្តិ​ដែល​បាន​ដាក់​ជូន​លោក​ហេង សំ​រិន ប្រធាន​រដ្ឋ​សភា​ដោយ​ក្រុម​ប្រជា​ពលរដ្ឋ​ដែល​រង​គ្រោះ​ដោយ​សារ​ការ​បណ្តេញ​ចេញ​បាន​និយាយ​ថា​មាន​ប្រជា​ពលរដ្ឋ​ប្រមាណ​ជាង​៤០​ម៉ីន​នាក់​បាន​ទទួល​រង​ផល​ប៉ះ​ពាល់​ដោយសារ​ការ​បណ្តេញ​ចេញ​តាំង​ពី​ឆ្នាំ​២០០៣​មក។ ភាគ​ច្រើន​អ្នក​ដែល​ទទួល​រង​ផល​ប៉ះ​ពាល់​ដោយសារ​រដ្ឋាភិបាល​បាន​ធ្វើ​ដី​សម្បទាន​សេដ្ឋកិច្ច៕​
XS
SM
MD
LG