ភ្ជាប់​ទៅ​គេហទំព័រ​ទាក់ទង

អ្នក​ភូមិ​បឹង​កក់​និង​បូរី​កីឡាដាក់​មន្ត្រី​ពុក​រលួយ​ នៅ​មុខ​តុលាការ​​

  • ហេង រស្មី

​បាយ​សី​​ និង​មាន​រូប​ចម្លាក់​រូប​មនុស្ស​ដោយ​មាន​លាយ​ឡំ​ជា​មួយ​អំបិល​ សណ្តែក​ ​ម្ទេស​ព្រម​ទាំង​មាន​ទង់​ព្រលឹង​ធ្វើ​ពី​ក្រដាស​​អុជ​ធូក​
ភ្នំពេញ​៖ ក្រុម​អ្នក​ភូមិ​បឹង​កក់​និង​បូរី​កីឡា​ជា​ច្រើន ​រាប់​សិប​នាក់​ ​នៅ​ថ្ងៃ​អង្គារ​នេះ ​បាន​ប្រែ​ក្លាយ​ពី​ការ​ដាក់​ញត្តិ​នៅ​តាម​ស្ថាន​ទូត​បស្ចឹម​ប្រទេស​និង​រដ្ឋ​សភា​ មក​ជា​ការ​ចេញ​មុខ​តវ៉ា​ប្រឆាំង​ជា​ចំហ​ចំពោះ​តុលាការ​ក្រុង​ភ្នំពេញ​ ក្រោយ​ពី​សកម្ម​ជន​តវ៉ា​រឿង​វិវាទ​ដី​ធ្លី​ចំនួន​ពីរ​រូប​គឺ​អ្នក​ស្រី​ទឹម សាក់​មុន្នី​ និង​អ្នក​ស្រី​យោម​ បុប្ចា​ត្រូវ​បាន​តុលាការ​ចាប់​ដាក់​ពន្ធ​នាគារ​កាល​ពី​ដើម​ខែ​កញ្ញា។​

ការ​តវ៉ា​នៅ​ថ្ងៃ​នេះ​មាន​ភាព​ខុស​ប្លែក​គ្នា​ពី​ការ​តវ៉ា​លើក​មុនៗ។​ ក្រុម​អ្នក​តវ៉ា​បាន​យក​បាយ​សី និង​មាន​រូប​ចម្លាក់​រូប​មនុស្ស​ដោយ​មាន​លាយ​ឡំ​ជា​មួយ​អំបិល​ សណ្តែក​ ​ម្ទេស​ព្រម​ទាំង​មាន​ទង់​ព្រលឹង​ធ្វើ​ពី​ក្រដាសអុជ​ធូក​ដាក់​បណ្តា​សារ​នៅ​ចំពោះ​មុខ​តុលាការ​ក្រុង​ភ្នំពេញ​ បន្ទាប់​ពីការ​ទាម​ទារ​ឲ្យ​ដោះ​លែង​សកម្មជន​ទាំង​ពីរ​មិន​មាន​ដំណោះ​ស្រាយ។​

«សូម​ឲ្យ​បារមី​សក្តិសិទ្ធ​ទាំង​អស់ជួយ​ដល់​ប្រជា​ពលរដ្ឋ​ដែល​រង​គ្រោះ​ដោយ​សារ​ដី​ធ្លី​ ត្រូវ​មន្ត្រី​ពុក​រលួយ​នេះ​ធ្វើ​បាប​ សូម​ឲ្យ​វិនាស​អន្តរាយ​ វិនាស​អន្តរាយ»។​

យ៉ាង​តិច​មាន​ស្រី្ត​ម្នាក់​ដែល​អះ​អាង​ថា​ ជា​ម្តាយ​របស់​អ្នក​ស្រី​យោម បុប្ចា​ បាន​ដួល​សន្លប់​នៅ​កណ្តាល​ហ្វូង​បាតុករ​ ក្រោយ​មក​អ្នក​ស្រី​ត្រូវ​បាន​ក្រុម​អ្នក​តវ៉ា​បាន​គ្រា​ដាក់​រថ​យន្ត​ពេទ្យ​ដើម្បី​សង្គ្រោះ​បន្ទាន់។​

«កុំ​ឈរ​រោម​ពេក ​ឆាប់​ហៅ​ពេទ្យ​មក។​ តើ​ពួក​យើង​រស់​ដោយ​របៀបណា?»។​
មាន​ក្រុម​បាតុករ​ចំនួន​ពីរ​រូប​គឺ​កូន​ប្រុស​អ្នក​ស្រី​ទឹម សាក់​មុន្នី​ និង​កូន​ប្រុស​អ្នក​ស្រី​យោម​ បុប្ជាបានកោរសក់​ដើម្បី​អ្វី​មួយ​ដែល​ក្រុម​អ្នក​តវ៉ា​បាន​អះ​អាង​ថា​ ជា​ការ​ទាម​ទារ​ប្រឆាំង​នឹង​ភាព​អយុត្តិ​ធម៌។​

កូន​ប្រុស​អ្នក​ស្រី​យោម​ បុប្ជា​ ឈ្មោះ​លួស ​លី​ហួរ ​អាយុ​៨​ឆ្នាំ​ បាន​យំ​បណ្តើរ​និង​ទាម​ទារ​ឲ្យ​ដោះ​លែង​ម្តាយ​ប្អូន​ប្រុស​បណ្តើរ​ ក្នុង​ពេល​ដែល​ប្អូន​កំពុង​កោរ​សក់។​

«​ដោះ​លែង​ម្តាយ​ខ្ញុំ​មក​វិញ​មក»។​

អ្នក​ស្រី​យោម​ បុប្ជា​ សកម្ម​ជន​តវ៉ា​រឿង​វិវាទ​ដី​ធ្លី​នៅ​តំបន់​បឹងកក់​ ត្រូវ​បាន​អាជ្ញាធរ​ចាប់​ខ្លួន​កាល​ពី​ដើម​ខែ​កញ្ញា ​ហើយ​ក្រោយ​មក​ត្រូវ​បាន​តុលាការ​ក្រុង​ភ្នំ​ពេញ​ចេញ​ដី​ការ​សម្រេច​ឃុំ​ខ្លួន​ពី​បទ​ហិង្សា​ដោយ​ចេតនា។​

ចំណែក​អ្នក​ស្រី​ទឹម​ សាក់​មុន្នី​ សកម្ម​ជន​តវ៉ា​រឿង​វិវាទ​ដី​ធ្លី​នៅ​តំបន់​បូរីកីឡា​ ត្រូវ​បាន​តុលាការ​ចោទ​ប្រកាន់​ពីបទ​ញុះញង់​ឲ្យ​ប្រព្រឹត្ត​បទ​ឧក្រិដ្ឋ។ ​ជន​រង​គ្រោះ​ទាំង​ពីរ​កំពុង​ជាប់​ឃុំ​ឃាំង​នៅ​ក្នុង​ពន្ធនាគារ​ដើម្បី​រង់​ចាំ​ជំនុំ​ជម្រះ​ទោស។​

អ្នក​ស្រី​ទេព វន្នី​ តំណាង​អ្នក​ភូមិ​បឹងកក់​ បាន​និយាយ​ថា​ ការ​ចាប់​ខ្លួន​អ្នក​ស្រី​យោម​ បុប្ចា​ដាក់​ពន្ធ​នាគារ​គឺ​ជា​រឿង​អយុត្តិ​ធម៌។​ អ្នក​ស្រី​បាន​និយាយ​ថា​ ពួកគាត់​ទាម​ទារ​នៅ​ថ្ងៃ​នេះ​គឺ​ដើម្បី​ឲ្យ​មន្ត្រី​តុលាការ​ទាំង​អស់​គួរ​ប្រតិបត្តិ​ ខ្លួន​ជា​មនុស្ស​ល្អ​និង​គួរ​តែ​ដោះ​លែង​អ្នក​ដែល​គ្មាន​កំហុស ឲ្យចេញ​ពី​ពន្ធនាគារ។​

«ដូច្នេះ​ហើយ​ពួក​ខ្ញុំ​ធ្វើ​ពិធី​នេះ​ដើម្បី​ឲ្យ​ពួកគាត់​ដឹង​ថា ​អំពើ​ដែល​គាត់​ធ្វើ​ ពួកគាត់​នឹង​ទទួល​នូវ​អំពើ​ទាំង​នេះ​ឆាប់ៗ​ខាង​មុខ ​វិនាស​ អន្តរាយ​ទាន់​ហន់​ ស្លាប់​ដោយ​តៃ​ហោង​ ជិះ​ឡាន​ ក្រឡាប់​ឡាន​ ជិះ​ទូក​ លិច​ទូក​ ជិះ​យន្ត​ហោះ ​ក្រឡាប់​យន្ត​ហោះ​ នេះ​ជា​អំពើ​ដែល​ពួកគាត់​បាន​សាង»។​

អ្នក​ស្រី​ ជុំ ង៉ាន់​ តំណាង​អ្នក​ភូមិ​បូរី​កីឡាង​វិញ ​បាន​និយាយ​ថា​ តុលាការ​មាន​ភាព​លំអៀង​ចំពោះ​អ្នក​ស្រី​ទឹម សាក់​មុន្នី​ និង​អ្នក​ស្រី​យោម បុប្ជា។​ អ្នក​ស្រី​បាន​និយាយ​ទៀត​ថា តុលាការ​គួរ​តែ​ឯក​រាជ្យ​និង​គោរព​ច្បាប់​រដ្ឋ​ធម្មនុញ្ញ​ មិន​ត្រូវ​ចាប់​ប្រជា​ពលរដ្ឋ​គ្មាន​កំហុស​ដាក់​ពន្ធនាគារ​ទេ។​

«គេ​ប្លន់​ដី​ ហើយ​ចាប់​ម្ចាស់​ដាក់​គុក​ទៀត​ ដូច្នេះ​វា​អយុត្តិ​ធម៌​ចំពោះ​អ្នក​បឹងកក់​និង​បូរីកីឡា​ណាស់»។​

វីអូអេ​បាន​ព្យាយាម​ទាក់ទង​សុំការ​ឆ្លើយ​តបពី​លោក​ជីវ កេង​ ប្រធាន​តុលាការ​ក្រុង​ភ្នំពេញ តែមិន​អាច​ទាក់ទង​បាន​ទេ​នៅ​ថ្ងៃ​អង្គារ​នេះ។ វីអូអេ​បានព្យាយាម​ទាក់​ទង​លោក​តាម​ទូរ​ស័ព្ទ​ តែ​ពុំ​មាន​ការ​ឆ្លើយ​តប។​
ក្រុម​អ្នក​តវ៉ា​បាន​សម្រេច​បំបែក​ការ​ជូប​ប្រជុំ​នៅ​ពី​មុខ​តុលាការ​ដោយ​បាន​ដើរ​ស្រែក​តវ៉ា​តាមផ្លូវឆ្ពោះ​ទៅ​កាន់​គេហដ្ឋាន​របស់​ខ្លួន​វិញ​ ក៏ប៉ុន្តែ​ពេល​មក​ដល់​មុខ​ទីស្តី​ការ​គណៈរដ្ឋ​មន្ត្រី​ មាន​បាតុករ​ម្នាក់​ទៀត​បាន​ដួល​សន្លប់​ បែក​ក្បាល​ហូរ​ឈាម​ តែ​ពុំ​មាន​គ្រោះ​ថ្នាក់​ដល់​ជីវិត​ទេ៕
XS
SM
MD
LG