ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក ​​ហ៊ុន សែន ​​​ថា កម្ពុជា​តៀម​រួចរាល់​ដើម្បី​ជំរុញ​គម្រោង​ផ្លូវ​ក្រវ៉ាត់​ពាណិជ្ជកម្ម​របស់​ចិន


រូបឯកសារ៖ លោកនាយករដ្ឋមន្ត្រី ហ៊ុន សែន (ឆ្វេង) រៀប​នឹង​ចាប់ដៃជាមួយ​នឹង​ប្រធានាធិបតី​ចិន លោក ស៊ី ជីនពីង (ស្តាំ) នៅ​មុន​ជំនួប​មួយ នៅ​ឯ​មហាសាល​ប្រជាជន​ចិន​ក្នុង​ទីក្រុង ប៉េកាំង កាល​ពី​ថ្ងៃ​ទី ៧ ខែ វិច្ឆិកា ឆ្នាំ ២០១៤។

នៅ​ពេល​ចិន​ផ្តល់​លុយ​ រាប់រយ​លាន​ដុល្លារ​បន្ថែម​ទៀត ដើម្បី​បង្កើន​ចំណង​ទាក់​ទង​ប្រទេស​ទាំងពីរ​ និង​លើក​កម្ពស់​ផលិត​ផល​អង្ករ​របស់​កម្ពុជា​នោះ​ ​នាយក​រដ្ឋមន្ត្រី​ខ្មែរ​លោក​ហ៊ុន សែន​​បាន​ប្រកាស​ភ្លាមៗ​ថា​ កម្ពុជា​និង​ចិន​គឺ​គោរព​ស្រឡាញ់​គ្នា​ដូច​ជា​បងប្អូន។ ​លោក​ ហ៊ុន សែន​ ក៏​ប្រកាស​ថា ​នឹង​ចូលរួម​ជំរុញ​អនុវត្ត​គម្រោង​ផ្លូវ​ក្រវ៉ាត់​ពាណិជ្ជកម្ម​របស់​ចិន។

នាយក​រដ្ឋ​មន្ត្រី​កម្ពុជា​លោកហ៊ុន សែន​ ​ក្នុង​ពេល​ចាកចេញ​ពី​ប្រទេស​ចិន​ ​ទីដែល​លោក​បាន​ជួប​ក្រុមមេ​ដឹកនាំ​នៃ​រដ្ឋ​កុម្មុយនីស្តមួយ​នេះ ​បាន​បញ្ជាក់​ឲ្យ​ដឹង​ថា​ រដ្ឋាភិបាល​លោក​ត្រៀម​ក្នុង​ការ​ជំរុញគម្រោង​ផ្លូវ​ក្រវ៉ាត់​ពាណិជ្ជកម្ម​របស់​ចិន​ (Belt and Road Initiative) ដែល​អ្នក​វិភាគ​ជា​ច្រើន​យល់​ថា​ ជា​មហិច្ឆតា​បង្កើន​សកម្ម​ភាព​ពាណិជ្ជ​កម្ម​របស់​ចិន​នៅ​ទូទាំង​សាកល​លោក។​

លោកហ៊ុន សែនបាន​ទៅ​បំពេញ​ទស្សន​កិច្ច​នៅ​ប្រទេស​ចិន​ តាំង​ពី​ថ្ងៃ​ទី២០​ខែ​មករាឆ្នាំ​២០១៩​ ​ហើយ​លោក​គ្រោង​នឹង​មក​ដល់​ប្រទេស​កម្ពុជា​វិញ​នៅ​រសៀល​ថ្ងៃ​ពុធ​នេះ។​ នៅ​ឯ​ប្រទេស​ចិន​ ​លោកហ៊ុន សែនបាន​ជួប​ពិភាក្សា​ជាមួយ​ប្រធានាធិបតី​ចិន​លោកស៊ី ជីន​ពីង​ ​(Xi Jinping)​ ​នាយក​រដ្ឋមន្ត្រី​ចិន​លោក​លី ឃឺឈ័ង​ ​(Li Keqiang)​ ​និង​ប្រធាន​រដ្ឋសភាចិន​លោក​វ៉ាង យ៉ាង​ ​(Wang Yang)។​ នេះ​បើ​យោង​តាម​សារ​នយោបាយ​ខ្លីមួយ​ដែល​បាន​បង្ហោះ​នៅ​លើ​ទំព័រ​ហ្វេសប៊ុករបស់លោកហ៊ុន​ សែន​នៅ​ថ្ងៃ​ពុធ​នេះ។​

ទំព័រ​ហ្វេសប៊ុក​របស់​លោកហ៊ុន សែន​បាន​សរសេរ​ក្នុង​ន័យ​ដើម​ថា៖​

«នៅ​ក្នុង​ដំណើរ​ទស្សនកិច្ច​នេះ​ ខ្ញុំ​បាន​ជួប​ពិភាក្សា​ការងារ​ជាមួយលោក​ប្រធានាធិបតី​ចិន​ ​ស៊ី ជីនពីង​ លោក​នាយក​រដ្ឋមន្រ្តី​ លី​ ឃឺឈ័ង​ និង​ លោក​ប្រធាន​រដ្ឋ​សភា​ វ៉ាង យ៉ាង​ ដែល​បាន​រឹត​ចំណង​មិត្ត​ភាព​ប្រទេស​យើង​ទាំង​ពីរឲ្យ​កាន់​តែ​ល្អ​រឹង​មាំ​ថែម​ទៀត​ ជាពិសេស​គឺ​បាន​ពង្រឹង​និង​ពង្រីក​នូវ​កិច្ច​សហ​ប្រតិបត្តិការ​លើ​វិស័យ​សំខាន់ៗ​ដូចជា​ កសិកម្ម​ ​ពាណិជ្ជ​កម្ម​ វិនិយោគ ​ទេសចរណ៍​ ​និង​ហេដ្ឋារចនា​សម្ព័ន្ធ​ជាដើម»។​

ទំព័រ​ហ្វេសប៊ុក​លោក ហ៊ុន សែន​ បាន​បញ្ជាក់​ឲ្យ​ដឹង​ទៀត​ក្នុង​ន័យ​ដើម​ថា​៖

«កម្ពុជា​បាន​ត្រៀម​ខ្លួន​ជា​ស្រេច​រួច​ហើយ​ដើម្បី​ជំរុញ​គម្រោង​ផ្លូវ​១​ខ្សែ​ក្រវាត់​១​ជា​មួយ​ប្រទេស​ចិន​ឲ្យ​បាន​ជោគជ័យ។ ​ទន្ទឹម​នឹង​នេះ​ដែរ​ ប្រទេស​យើង​ទាំង​ពីរ​នឹង​ខិត​ខំ​ជំរុញ​ទំហំ​ពាណិជ្ជកម្ម​ឲ្យ​ឡើង​ដល់​១០​ពាន់លាន​ដុល្លារ​នៅ​ឆ្នាំ​២០២៣»។​

លោកហ៊ុន សែនបាន​បញ្ជាក់​ជាថ្មី​ទៀត​ថា​ ​ក្នុង​ទស្សន​កិច្ច​របស់​លោក​នៅ​ប្រទេស​ចិនគ្រា​នេះ​ រដ្ឋាភិបាល​ចិន​ដែល​លោក​ចាត់​ទុក​ថា​ជា​បង​ប្អូន​ បាន​ផ្តល់​ជំនួយ​ជិត​៦០០​លាន​ដុល្លារ​ ហើយ​បាន​ដំឡើងកូតា​ឲ្យ​កម្ពុជា​នាំអង្ករ​រហូត​ដល់​៤​សែន​តោន​ចូល​ទៅ​ប្រទេស​ចិន។​

ទំព័រ​ហ្វេសប៊ុក​របស់​លោក ហ៊ុន សែន បាន​សរសេរ​បន្ថែម​ក្នុង​ន័យ​ដើម​ថា៖​

«កម្ពុជា​និង​ចិនគឺ​គោរព​ស្រឡាញ់​គ្នា​ដូច​ជា​បងប្អូន។ ​ការ​រីក​ចម្រើន​របស់​កម្ពុជា​មក​ទល់​សព្វ​ថ្ងៃ​គឺ​មិន​អាច​កាត់​ផ្តាច់​ចេញ​ពី​ទំនាក់​ទំនង​ដ៏​ល្អ​ និង​ការ​ចូលរួម​របស់​មិត្ត​ចិន​បាន​ឡើយ»។​

ទំព័រ​ហ្វេសប៊ុក​របស់​លោក​ ហ៊ុន​ សែន ​បាន​បន្ត​ទៀត​ថា៖​

«ក្នុង​នាម​ប្រជា​ពលរដ្ឋ​ និង​ប្រទេស​កម្ពុជា​ និង​ក្នុង​នាម​ខ្ញុំ​ផ្ទាល់​ សូម​អរគុណ​រដ្ឋាភិបាល​ចិន​និង​ប្រជាជន​ចិន​ ដែល​ជានិច្ច​កាល​គឺ​តែងតែ​យក​ចិត្ត​ទុក​ដាក់​ជួយ​ដល់​កម្ពុជា​ឲ្យ​បាន​រីក​ចម្រើន​មក​ទល់​សព្វថ្ងៃ»។​

ដំណើរ​ទស្សនកិច្ច​របស់​លោកហ៊ុន សែនទៅ​កាន់​ប្រទេស​ចិនបាន​ធ្វើ​ឡើង​ នៅ​គ្រា​ដែល​កម្ពុជាបន្ត​ប្រឈម​នឹង​គំនាប​ខាង​ពាណិជ្ជ​កម្មពី​សហ​រដ្ឋ​អាមេរិក​ និង​សហ​ភាព​អឺរ៉ុប​ដែល​កាល​ពី​ពាក់​កណ្តាល​ខែមករា​ឆ្នាំ​២០១៩កន្លង​ទៅនេះ​ ​បាន​ប្រកាស​យក​ពន្ធ​លើ​ការ​នាំ​អង្ករ​របស់​ប្រទេសកម្ពុជា​ និង​ភូមា ឬ​មីយ៉ាន់ម៉ា​ចូល​ទៅ​ក្នុង​ទីផ្សារ​របស់​ខ្លួន​ តាម​វិធានការ​គាំពារ​ពាណិជ្ជកម្ម​មួយ។​

ការ​ត្រៀម​របស់​កម្ពុជា​ក្នុង​ការ​រុញ​ច្រាន​គម្រោង​ផ្លូវ​ក្រវ៉ាត់​ពាណិជ្ជកម្ម​របស់​ចិនឲ្យ​ដំណើរ​ការ​ទៅ​មុខ​នោះ​បាន​កើត​ឡើង​បន្ទាប់​ពី​កម្ពុជា​ត្រូវ​ក្រុម​មេដឹកនាំ​ និង​មន្ត្រី​ការពារ​ជាតិ​សហ​រដ្ឋ​អាមេរិកសង្ស័យ​ថា​ កំពុង​បើក​ឲ្យ​មាន​ការដាក់​មូលដ្ឋាន​ទ័ព​ជើង​ទឹកចិនក្នុង​ខេត្ត​កោះកុង​ប្រទេស​កម្ពុជា ​ជាទីដែល​កំពង់​ផែ​ទឹកជ្រៅ​មួយ​កំពុង​លេច​ចេញ​ជា​រូបរាង​ និង​បាន​ស្ថិត​ក្រោម​ការ​តាម​ដាន​របស់​អ្នក​ជំនាញ​ក្នុង​កិច្ចការ​សន្តិសុខ​តាម​ដែន​សមុទ្រ។​

កំពង់​ផែ​ទឹកជ្រៅ​នោះគឺ​ជា​ផ្នែក​មួយ​នៃ​គម្រោង​ដ៏ធំ​សម្បើម​របស់​ក្រុម​ហ៊ុន​ចិន​ឈ្មោះ ​Union Development Group​ (UDG) ​ដែល​បាន​និង​កំពុង​បន្ត​សាងសង​អាកាស​យានដ្ឋាន​ និង​អនុវត្ត​គម្រោងហេដ្ឋា​រចនា​សម្ព័ន្ធ​ខ្នាត​ធំ​ផ្សេងៗ​ទៀត​ ក្នុង​ខេត្ត​កោះកុងនោះ។​

ការ​សិក្សា​ស្រាវជ្រាវ​មួយ​មានឈ្មោះ​ថា​ ​«មហិច្ឆតា​ក្រសោប​យក៖​ ​បែប​ផែន​នៃ​ ​ការ​វិនិយោគ​លើ​គម្រោង​កំពង់​ផែ​ដោយ​ចិនកំពុង​តែ​ប្រែ​ផ្លាស់​យុទ្ធ​សាស្រ្ត​នៅ​តំបន់​ឥណ្ឌូប៉ាស៊ីហ្វិក» ​ដោយ​អង្គការ​ស្រាវជ្រាវ​មិន​ស្វែង​រក​ប្រាក់​ចំណេញ​ ​C4ADS ដែល​ចេញ​ផ្សាយ​កាលពី​ខែ​មេសាឆ្នាំ​២០១៧​ ​ដោយ​មជ្ឈមណ្ឌល​ដើម្បី​ការ​សិក្សា​ជាន់​ខ្ពស់​ផ្នែក​ការពារ​ជាតិ​ ​(Center for Advanced Defense Studies)​ ​ដែល​មាន​មូលដ្ឋាន​នៅ​រដ្ឋធានី​វ៉ាស៊ីនតោន​ សហរដ្ឋ​អាមេរិក​ បាន​ព្រមាន​ថា«តំបន់​អភិវឌ្ឍន៍​ខ្នាត​ធំ​ខាង​លើ​របស់​ក្រុមហ៊ុន​ ​UDG​ មាន​ជាប់​ពាក់ព័ន្ធ​នឹង​គណបក្ស​កុម្មុយនីស្ត​ចិន​ ​ជា​ផ្នែក​មួយ​នៃ​គម្រោង​ការ​យុទ្ធសាស្ត្រ​សន្តិសុខ​ ​និង​ភូមិ​សាស្ត្រ​នយោបាយ​របស់​ចិន​ នៅ​ក្នុង​តំបន់​ចុង​បូព៌ា ​ដូចជា​គម្រោង​ផ្លូវ​ក្រវ៉ាត់​ពាណិជ្ជកម្ម​របស់​ចិន ​(Belt and Road Initiative)​ជា​ដើម»។​

មួយ​ភាគ​ធំ​នៃ​ការ​វិនិយោគ​គម្រោងខាង​លើ​នេះត្រូវ​បាន​ជំរុញ​ដោយ​គម្រោង​ផ្លូវ​ក្រវ៉ាត់​ពាណិជ្ជកម្ម​របស់​ចិន​ដែល​នឹង​មាន​ការ​សាងសង់​ផ្លូវ​ ស្ពាន​ ផ្លូវដែក​ និង​រោង​ចក្រ​ថាមពល​ក្នុង​ប្រទេស​ជាង៧០ដើម្បី​ជំរុញ​ពាណិជ្ជកម្ម​នៅ​លើ​ពិភព​លោក​ឲ្យ​បាន​ជា​ប្រយោជន៍​របស់​ចិន ​ដែល​ត្រូវ​បាន​ឲ្យ​ឈ្មោះ​ថា​ជា​ការ​ជំរុញ​«ឈ្នះ-ឈ្នះ»របស់​ចិន​ដើម្បី​បង្កើត​ឱកាស​សេដ្ឋកិច្ច​នៅ​អាស៊ី ​និង​តំបន់​ឥណ្ឌូ​ប៉ាស៊ីហ្វិក ​ការ​វិនិយោគ​ផ្នែក​ហេដ្ឋារចនាសម្ព័ន្ធ​ ដូច​ជាកំពង់ផែ​ទឹកជ្រៅ​ កំពុង​តែ​ប្រឈម​នឹង​ការ​មន្ទិល​សង្ស័យ​កាន់​តែ​ខ្លាំង​ឡើង។​

អ្នកវិភាគ​មួយ​ចំនួន​«អះ​អាង​ថា ​គោលដៅ​ចម្បង​របស់​រដ្ឋាភិបាល​ក្រុង​ប៉េកាំង​គឺ ​ប្រមូលផ្តុំ​គ្រឿង​ ​ដោះ​ដូរ​ផ្នែក​នយោបាយ​ និង​សេដ្ឋកិច្ច​ដែល​ត្រូវ​បាន​បង្កើត​ឡើង​ ​ដោយ​គម្រោង​ផ្តល់​ហិរញ្ញប្បទាន​ដោយ​ចិន»។​ ​នេះ​បើយោង​ទៅ​តាម​របាយ​ការណ៍​ឆ្នាំ​២០១៧​របស់​អង្គការ​ស្រាវជ្រាវ​មិន​ស្វែងរក​ប្រាក់​ចំណេញ​ C4ADS។

យ៉ាងណាក៏ដោយ​ លោកហ៊ុន សែន​បានច្រាន​ចោល​ដំណឹង​នៃ​ការណ៍​ដែល​កម្ពុជាចង់​ឲ្យមាន​ការ​ដាក់​មូលដ្ឋាន​កង​ទ័ព​ជើង​ទឹក​ចិន​ក្នុង​ទឹកដី​កម្ពុជា។​ ​ដំណឹង​នេះ​ត្រូវ​បាន​រាយ​ការណ៍​ដោយ​កាសែត​បរទស​មួយ​ឈ្មោះ​ថា​ Asia Times ​កាលពី​ខែ​វិច្ឆិកាឆ្នាំ​២០១៨។​

ក្នុង​ដំណើរ​ទស្សន​កិច្ច​របស់​លោក​ទៅកាន់​ប្រទេស​ចិនចុង​ក្រោយ​នេះ ​លោកហ៊ុន សែនក៏​បាន​ប្រាប់​ក្រុម​និស្សិត​ខ្មែរដែល​កំពុង​រៀនសូត្រ​នៅ​ប្រទេស​ចិនថា​លោក​កំពុង​ខិត​ខំ​ធ្វើយ៉ាង​ណា​ឲ្យកម្ពុជា​ក្លាយ​ជាម្ចាស់​វាសនា​របស់​ខ្លួន​ ​ដោយ​មិន​អាច​ឲ្យ​បរទេស​ណា​មក​ជ្រៀតជ្រែក​កិច្ចការ​ផ្ទៃក្នុង​របស់​កម្ពុជា​បាន​ឡើយ។​

ភ្ជាប់​ជាមួយ​នឹង​ការ​ជួយ​របស់​ចិន​ខាង​ហិរញ្ញវត្ថុ​ដែល​ចេះ​តែកើន​ឡើង​នោះ​ លោក​ហ៊ុន​ ​សែន​ត្រូវគេ​រាយការណ៍​ថា​ លោក​បាន​ប្រាប់​ក្រុម​និស្សិត​កម្ពុជា​ក្នុង​ជំនួប​ដដែលនៅ​ប្រទេស​ចិន​នោះថា «ការ​ជួយ​របស់​ចិន​ ​[គឺ]​ដើម្បីការ​ធ្វើឲ្យ​រីក​ចម្រើន​ផ្នែក​សេដ្ឋកិច្ច​ ​និង​ពង្រឹង​ឯករាជ្យ​ភាព​ ​ទប់​ស្កាត់​ការ​ជ្រៀត​ជ្រែក​គ្រប់​រូប​ភាព​ទាំង​អស់​ពី​ខាង​ក្រៅ​ ​ដែល​មាន​មហិច្ឆតា​ផ្តួល​រំលំ​រាជ​រដ្ឋាភិបាល​កម្ពុជា»។​

ដំណើរ​ទស្សនកិច្ច​របស់​លោក​នាយក​រដ្ឋ​មន្ត្រី​ហ៊ុន សែន​ក្នុង​ប្រទេស​ចិន​កុម្មុយនីស្ត​រយៈ​ពេល​៤​ថ្ងៃ​ត្រូវ​បញ្ចប់​នៅ​ថ្ងៃ​ពុធ​នេះ។​ ​គណៈប្រតិភូ​កម្ពុជា​និង​លោក ហ៊ុន សែន បាន​ធ្វើ​មាតុភូមិ​និវត្តន៍​នៅ​ល្ងាច​ថ្ងៃ​ដដែល៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG