ភ្ជាប់​ទៅ​គេហទំព័រ​ទាក់ទង

តុលាការកំពូលកម្ពុជាសម្រេចរំលាយគណបក្សប្រឆាំងនិងនាំឲ្យមានការពង្រឹងការគ្រប់គ្រងបែបឯកបក្ស


រូបឯកសារ៖ លោក​ កឹម សុខា ប្រធាន​គណបក្ស​សង្គ្រោះជាតិ ​ស្វាគមន៍​អ្នក​គាំ​ទ្រ​កាល​ពីពេល​​ឃោសនា​បោះ​ឆ្នោត​ឃុំ​សង្កាត់​ឆ្នាំ ២០១៧។

ការ​រំលាយ​គណបក្ស​ប្រឆាំង​ពិតប្រាកដ​តែ​មួយ​គត់​របស់​ប្រទេស​កម្ពុជា​កាល​ពី​ព្រហស្បតិ៍​​ បាន​ធ្វើ​ឲ្យ​កិច្ច​ខិតខំ​​ប្រឹង​ប្រែង​ពហុភាគី​​អន្តរជាតិ​ដ៏​ធំ​បំផុត​នៅ​ក្នុង​ប្រវត្តិសាស្ត្រ​ ដើម្បី​​បង្កើត​របប​ប្រជាធិបតេយ្យ​នៅ​​ក្នុង​ប្រទេស​ក្រោយ​​សង្គ្រាម​​មួយ​នោះ ​ត្រូវ​បាន​បញ្ចប់។

សម្រាប់​ពលរដ្ឋកម្ពុជា​ដែល​បាន​ដាក់​ខ្លួន​ចូល​ទៅ​ក្នុង​បេសកកម្ម​និង​ធ្វើ​ការ​នៅ​ជួរ​ខាង​មុខ​ ដើម្បី​អនុវត្ត​លទ្ធិ​ប្រជាធិបតេយ្យនេះ សេចក្តីសម្រេច​របស់​តុលាការ​ដែល​ឯករាជ្យ​តែ​ឈ្មោះ​នេះ​ គឺ​ជា​វាយ​ប្រហារ​បង្ក​ការឈឺ​ចាប់​ខ្លាំង​មួយ ​ដែល​ចោទជា​សំណួរ​នានា​ឡើង។

នៅ​ឆ្នាំ​១៩៩៣​ អ្នក​ចូល​ធ្វើព័ត៌មាន​ទូរទស្សន៍​ថ្មី​ម្នាក់​គឺ​លោក ​ឆោម​ ប៊ុនហំ​ បាន​ត្រឡប់​មក​ប្រទេស​កំណើតដែល​លោក​បាន​រត់​ភៀស​ខ្លួនចោល​តាំង​ពី​ពេល​លោក​នៅជា​ក្មេង​ប្រុស​ស្រឡាំងកាំង​អាយុ​៦ឆ្នាំ​ម្នាក់​ ដើម្បី​មក​យក​ព័ត៌មាន​អំពីបេសកកម្ម​អន្តរាគមន៍​អន្តរជាតិ​ដ៏​ធំធេងដែល​គិត​ជា​ចំនួន​ទឹក​ប្រាក់​គឺ​១.៦០០​លាន​(១ពាន់​៦​រយ​លាន)​ដុល្លារ។

លោក​និយាយ​ដោយ​ស្រមៃ​ឡើង​វិញ​ពី​ពេល​ឆ្លង​កាត់​ប្រទេស​ពី​ព្រំដែន​ប្រទេស​ថៃ​នៅ​ទី​ក្រុង​ប៉ោយប៉ែត​ថា៖ «[​ពេល​នោះ]​ខ្ញុំ​នៅ​លើ​ឡាន​របស់​សហប្រជាជាតិ​របស់​អូស្ត្រាលី ​អ្នក​អាច​ឃើញ​ក្មេងៗ​បាន​លោត​ចុះឡើង​ ហើយ​គិត​ថា ​អង្គការ​សហប្រជាជាតិ​មក​ទី​នេះ​គឺដើម្បី​ជួយ​សង្គ្រោះ​ពួក​គេ​ហើយ»។

លោក​ ប៊ុនហំ​ ដែល​បាន​ចាប់​អាជីព​ជា​អ្នក​ថត​សំឡេង​និង​ជំនួយការ​ខាង​ថត​ បាន​ទៅ​ប្រឡូក​និងឃើញ​ជាក់​ស្តែង​នូវ​ការ​កក្រើក​ឡើង​នូវភាព​រំភើព​រីករាយ​យ៉ាង​ខ្លាំង​ នៅ​ក្នុង​ប្រទេស​មួយនេះ ​ដែល​បាន​ស្គាល់​តែ​ពី​ការ​ឈឺចាប់​និង​អំពើ​ហិង្សា​អស់​ជា​ច្រើន​ទសវត្ស​មក​ហើយ។

​អាជ្ញាធរ​អន្តរកាល​សហប្រជាជាតិ​នៅ​កម្ពុជាមាន​បេសកកម្មនាំ​ប្រជាធិបតេយ្យ​ចូល​មក​ក្នុង​ប្រទេស។

លោក គី តិច មេធាវីរបស់ក្រសួងមហាផ្ទៃមួយរូបក្នុងចំណោម៤រូប ប្រាប់អ្នកសារព័ត៌មានក្រោយចេញពីដាក់ភស្តុតាងបន្ថែមក្នុងសំណុំរឿងរំលាយគណបក្សសង្គ្រោះជាតិ នៅតុលាការកំពូលថ្ងៃទី១៣ ខែវិច្ឆិកា ឆ្នាំ២០១៧។(កាន់ វិច្ឆិកា/VOA)
លោក គី តិច មេធាវីរបស់ក្រសួងមហាផ្ទៃមួយរូបក្នុងចំណោម៤រូប ប្រាប់អ្នកសារព័ត៌មានក្រោយចេញពីដាក់ភស្តុតាងបន្ថែមក្នុងសំណុំរឿងរំលាយគណបក្សសង្គ្រោះជាតិ នៅតុលាការកំពូលថ្ងៃទី១៣ ខែវិច្ឆិកា ឆ្នាំ២០១៧។(កាន់ វិច្ឆិកា/VOA)

​បេសកកម្ម​នេះ​មិន​ត្រឹម​តែ​នាំ​មក​នូវ​ឱកាស​នៃ​ការ​បញ្ចប់​ការ​គ្រប់គ្រង​បែបផ្តាច់ការ​ប៉ុណ្ណោះ​ទេ​ ប៉ុន្តែ​ថែម​ទាំងនាំ​មក​នូវ​ការ​ផ្លាស់​ប្តូរ​នៃ​សកម្មភាព​សេដ្ឋកិច្ច​ពី​ការ​វិនិយោគ​ដោយ​ផ្ទាល់​និង​ពាណិជ្ជកម្ម​ដែល​កើត​ពី​ការ​ចំណាយហ៊ឺហា​សប្បាយ​របស់បុគ្គលិក​រក្សា​សន្តិភាព​ចំនួន​២​ម៉ឺន​នាក់។

លោក ប៊ុនហំ បាន​ថ្លែង​ថា៖ «វា​ហាក់​បី​ដូច​ជា​អ្នក​ណា​ម្នាក់​បាន​ទិញ​ផាវ​តម្លៃ​១​លាន​ដុល្លារ​ហើយ​បាន​ដុត​ផាវ​នេះនៅ​កណ្តាល​អធ្រាត្រ​នៅ​ប្រទេស​កម្ពុជា ​ហើយពេល​នោះ​ខ្ញុំ​មាន​អារម្មណ៍​យ៉ាង​ដូច្នេះ ​គឺ​ថា ប្រទេស​កម្ពុជា​នៅ​ពេល​ភ្លាមៗ​នោះ​ស្រាប់​តែ​មាន​ពន្លឺ»។

ប៉ុន្តែ​នៅ​ពេល​នេះ គឺបន្ទាប់​ពី​ជិត​២៥​ឆ្នាំ​ក្រោយ​មក​ មនុស្ស​មួយ​ជំនាន់​នោះ​ដែល​បាន​ដាក់​កាយ​ចិត្ត​កសាង​ទស្សនវិស័យ​ថ្មី​មួយមិន​ទាន់​មាន​សម្រាប់ប្រទេស​កម្ពុជា​ បាន​ត្រឹម​តែ​ឃើញ​ការ​ខកចិត្ត ​នៅ​ពេល​ដែល​ផាវ​នោះ​បាន​រលត់​ ហើយ​ភាព​ងងឹត​បាន​រាតត្បាត​ប្រទេស​សារ​ជា​ថ្មី​ម្តង​ទៀត។

តុលាការ​កំពូល​របស់​ប្រទេស​កម្ពុជា​បាន​សម្រេច​រំលាយ​គណបក្ស​សង្គ្រោះ​ជាតិ​ដែល​បាន​ឈ្នះ​សំឡេង​ឆ្នោត​ជិត​ពាក់​កណ្តាល​ពី​ការ​បោះឆ្នោត​ជាតិ​លើក​មុន​ ហើយ​តុលាការ​ក៏បាន​សម្រេចបញ្ឈប់​សមាជិក​១១៨​រូប​របស់​គណបក្ស​នេះ​មិន​ឲ្យ​ធ្វើ​នយោបាយ​រយៈពេល​៥​ឆ្នាំ។

តំបន់​ទំហំ​៦៥​ហិតា​ជុំវិញ​តុលាការ​កំពូល​ត្រូវ​បាន​ហ៊ុំព័ទ្ធ​ បន្សល់​នៅ​តែ​អ្នក​ទេសចរ​ដែល​មាន​ភាព​ងឿង​ឆ្ងល់​នៅ​ពេល​ពួក​គាត់​ចង់ចាក​ចេញ​ឬ​ត្រឡប់​ទៅ​សណ្ឋាគារ​របស់​ពួកគាត់​វិញ​ ហើយ​និង​ក្រុមអ្នក​សារព័ត៌មាន​មួយ​ចំនួន​តូច​ដែល​ត្រូវ​បាន​អនុញ្ញាត​ឲ្យ​ចូល​ទៅ​បរិវេណតុលាការ​កំពូល​នោះ។

អ្នក​សារ​ព័ត៌មាន​ចំនួន​២នាក់ គឺ​លោក​ អ៊ួន​ ឈិន​ និង​ លោក​ យាង​ សុធារិន​ ត្រូវ​បាន​ចាប់​ខ្លួន​កាល​ពី​ថ្ងៃ​អង្គារ​ ដោយ​ត្រូវរង​ការ​ចោទ​ប្រកាន់​ថា​ បាន​រាយការណ៍​ព័ត៌មាន​បញ្ជូន​ទៅ​វិទ្យុ​អាស៊ី​សេរី ដែល​បាន​បិទ​ដំណើរការ​នៅ​ប្រទេស​កម្ពុជា​កាល​ពី​ខែ​មុន​ដោយ​អះអាង​ថា​បាន​ទទួល​រង​ការ​គំរាម​កំហែង។

តុលាការកំពូលសម្រេចបន្ត​សវនាការ​លើ​បណ្តឹង​របស់​ក្រសួងមហាផ្ទៃ​ ដែល​បាន​ប្តឹង​សុំ​ឲ្យ​រំលាយ​គណបក្ស​សង្គ្រោះ​ជាតិ ទៅរសៀលម៉ោងពីរ។ (នូវ ពៅលក្ខិណា/VOA)
តុលាការកំពូលសម្រេចបន្ត​សវនាការ​លើ​បណ្តឹង​របស់​ក្រសួងមហាផ្ទៃ​ ដែល​បាន​ប្តឹង​សុំ​ឲ្យ​រំលាយ​គណបក្ស​សង្គ្រោះ​ជាតិ ទៅរសៀលម៉ោងពីរ។ (នូវ ពៅលក្ខិណា/VOA)

នៅ​មួយ​យប់​មុន​ពេល​ការ​បើក​សវនាការ​របស់​តុលាការ​កំពូល​ កង​កម្លាំង​សន្តិសុខ​ដែល​មាន​ទាំង​ប៉ូលីស​ យោធា​ និង អ្នក​យាមកាម​បាន​ទៅ​កាន់​ការិយាល័យ​អង្គការ​មិន​មែន​រដ្ឋាភិបាលលើ​សិទ្ធិ​មនុស្ស​ដែល​ល្បីៗ​មួយ​ចំនួន​ ដូច​ជា​សមាគម​អាដហុក​ (Adhoc)​ និង​ អង្គការ​លីកាដូ ​ដើម្បី​ពិនិត្យ​ថា​ តើ​អង្គការ​ទាំង​នេះ​បាន​ផ្តល់​ជម្រក​ឲ្យ​បាតុករ​ដែរ​ឬទេ​ ខណៈ​ដែល​មាន​ការ​រៀបចំ​បិទ​ផ្លូវ​នៅ​លើ​ដង​ផ្លូវ​សំខាន់ៗចូល​ទី​ភ្នំពេញ។

វា​ជា​បរិយាកាស​មួយ ​ដែល​លោក ​ឈិន ចាន់ណា​ (Chin Channa) អ្នក​បក​ប្រែ​សម្រាប់​តុលាការ​ខ្មែរ​ក្រហម​ដែល​បាន​គាំ​ទ្រ​ការ​បង្កើតតុលាការ​ឡើង​នេះ​នៅ​ចុង​សតវត្សទី​២០ ​បាន​ចង់​ចាំ​ច្បាស់ដែល​ដូច​នឹង​កាលលោកបាន​បួស​ធ្វើ​ជា​សង្ឃ​មុន​ពេល​មាន​ការ​បោះឆ្នោត​នៅ​ឆ្នាំ​១៩៩៣។

នៅ​ពេល​នោះ​ សេចក្តីត្រេកអរ​របស់​លោក​សម្រាប់​ការ​រស់​ឡើង​វិញ​របស់​អ្នក​រាជានិយម​គឺ​គណបក្ស​ប្រឆាំង​ហ៊្វុនស៊ិនប៉ិច​របស់ព្រះ​អង្គម្ចាស់​ នរោត្តម​ រណឫទ្ធិ​ បាន​ធ្វើ​ឲ្យ​លោក​តែង​តែត្រូវ​ខ្វែង​គំនិត​គ្នា​ជាមួយ​ក្រុម​អាជ្ញាធរ​របស់​គណបក្ស​ប្រជាជន​កម្ពុជា និង​ជាមួយ​មន្ត្រីសង្ឃ​ថ្នាក់​លើ​របស់​លោក។

លោក​បាន​និយាយ​ថា៖ «ព្រះ​សង្ឃ​ជា​ច្រើន​មាន​ការ​ភិត​ភ័យ​ ប៉ុន្តែ​សម្រាប់​ខ្ញុំ​ ខ្ញុំ​មិន​មាន​ការ​ភិតភ័យ​ធ្វើ​មួយ​ទេ»។ លោក​ក៏បាន​បន្ថែម​ថា​ លោក​ត្រូវ​បាន​គេ​ដេញចេញ​ពី​វត្ត​នៅ​ខេត្ត​បាត់ដំបង​ដោយ​ចៅអធិការ​វត្ត​ដែលខឹង​សម្បារ​នឹង​ការ​ចូលរួមសកម្មភាព​នយោបាយ​ឥត​ឈប់​ឈរ​របស់​លោក។

លោក​ ចាន់ណា​ ជឿជាក់​ថា​ កម្មវិធី​អភិបាលកិច្ច​នៅ​កម្ពុជា​បាន​បរាជ័យ​ដោយ​សារ​តែ​ការ​មិន​ព្រម​ចុះ​ចាញ់​របស់​គណបក្ស​ប្រជាជន​កម្ពុជា។

លោក​បាន​ថ្លែង​ថា៖ «កម្មវិធី​អភិបាលកិច្ច​នេះ​បាន​ដំណើរការ​ល្អ​រហូត​មក​ដល់​ពេល​នេះ។​ ខ្ញុំ​បាន​ធ្វើការ​ជា​មួយ​អង្គការ​ជា​ច្រើន​ហើយ​អង្គការ​ទាំង​នោះ​បាន​បណ្តុះបណ្តាល​ប្រជាជន​កម្ពុជា​ជា​ច្រើន​ រួមមានមន្ត្រី​រដ្ឋាភិបាល​ ​មន្តី្រ​ប៉ូលីស​ ចៅក្រម​ ព្រះរាជអាជ្ញា​ មេធាវី​ និង​ សិស្សានុសិស្ស​ ដូច្នេះ​ពួក​គេ​បាន​ឃើញពី​ការ​ដឹកនាំ​និង​ប្រព័ន្ធ​គ្រប់គ្រង​បែប​ថ្មី​នេះ»។

លោក​បន្ត​ថា៖ «ប៉ុន្តែ​គណបក្ស​កាន់​អំណាច​មិន​ដែលអាច​សម្រប​ទៅ​នឹង​ការ​ដឹកនាំ​ថ្មី​នេះ​ទេ​ ពួក​គេ​ព្យាយាម​នាំ​ប្រទេស​កម្ពុជា​ឲ្យ​វិល​ត្រឡប់​ទៅ​តាម​ការ​ដឹកនាំ​តាម​របប​កុម្មុយនិស្ត​វិញ‍»។

លោក ​ប៊ុនហំ​ មាន​ការ​ប្រយ័ត្ន​ប្រយែង​ជាង​មុន។

សុទិដ្ឋិនិយម​របស់​លោក​បាន​ចាប់​ផ្តើម​រារែក​បន្ទាប់​ពី​លោក​បាន​ចូលរួមក្នុងគណបក្ស ហ៊្វុនស៊ិនប៉ិច​ ហើយ​បាន​យល់​ដឹង​ពី​អសមត្ថភាព​របស់​គណបក្ស​នេះ។​

លោក​បាន​និយាយ​ថា៖ «ខ្ញុំ​បាន​ចាក​ចេញ​ពី​ព្រោះ​ខ្ញុំ​គិត​ថា ​ពួក​គេ​នឹង​មិន​ធ្វើ​អ្វី​ទេ​ ហើយ​ខ្ញុំ​មាន​អារម្មណ៍​ថា ​មិន​យូរប៉ុន្មាន ​គណបក្ស​ប្រជាជន​នឹង​ឈ្នះ​ ពី​ព្រោះ​ពួក​គេ​មិន​ដំណើរការ​ទៅ​ណា​សោះ»។

លោក​បាន​បន្ត​ថា៖ «វា​ហាក់​បី​ដូច​ជា​អាសនៈ​ត្រូវ​បាន​គេ​ទុក​ឲ្យ​សម្រាប់​ពួក​គេ​ ដូច្នេះ​ពួក​គេ​មិន​ចាំបាច់​ព្យាយាម​ប្រឹង​ប្រែង​ពេក​ក្នុង​ការ​កែ​ប្រែ​អ្វី​ទាំង​អស់ ​ហើយ​ខ្ញុំ​ដើរ​ចេញ​ព្រោះ​ខ្ញុំ​មាន​អារម្មណ៍​ថា​ នេះ​មិន​មែន​ជា​របៀបដែល​សង្គមមួយ​អាច​ត្រូវ​ផ្លាស់ប្តូរ​ទេ»។

រូបឯកសារ៖ កម្លាំងប៉ូលិសរក្សាសណ្តាប់ធ្នាប់​បិទផ្លូវមួយនៅក្បែរតុលាការឧទ្ធរណ៍នៅទីក្រុង​ភ្នំពេញ កាលពីថ្ងៃទី៣១ ខែតុលា ឆ្នាំ២០១៧។ កាលពីថ្ងៃអង្គារ តុលាការឧទ្ធរណ៍បាន​បើក​សវនាការស្តីអំពី​សេចក្តីសម្រេចរបស់តុលាការរាជធានីភ្នំពេញ ដែលបាន​សម្រេចឃុំខ្លួនលោក កឹម សុខា។
រូបឯកសារ៖ កម្លាំងប៉ូលិសរក្សាសណ្តាប់ធ្នាប់​បិទផ្លូវមួយនៅក្បែរតុលាការឧទ្ធរណ៍នៅទីក្រុង​ភ្នំពេញ កាលពីថ្ងៃទី៣១ ខែតុលា ឆ្នាំ២០១៧។ កាលពីថ្ងៃអង្គារ តុលាការឧទ្ធរណ៍បាន​បើក​សវនាការស្តីអំពី​សេចក្តីសម្រេចរបស់តុលាការរាជធានីភ្នំពេញ ដែលបាន​សម្រេចឃុំខ្លួនលោក កឹម សុខា។

​លោក​ស្រី​ ធីតា​ ឃឹះ​ បាន​ជួយ​នាំ​ពលរដ្ឋ​អាមេរិក​ដើម​កំណើត​ខ្មែរ​មកប្រទេស​កម្ពុជា​វិញ​នៅ​ឆ្នាំ​១៩៩៣​ ក្នុង​តួនាទី​ជួយ​បង្កើត​អង្គការ​សង្គម​ស៊ីវិល​និង​បង្រៀន​ថ្នាក់​ផ្សេងៗ​នៅ​សាកលវិទ្យាល័យ​ដែល​មិន​មាន​ធនធាន​គ្រប់គ្រាន់។ លោក​ស្រី​បាន​និយាយ​ថា​មូលហេតុ​នៃ​ការ​បរាជ័យ​របស់​បេសកកម្ម​អ៊ុនតាក់​មាន​ច្រើន​ខុសៗ​គ្នា។

លោក​ស្រី​បាន​រួម​ចំណែក​ដល់​ការតាក់តែង​រដ្ឋធម្មនុញ្ញ​កម្ពុជា ហើយ​ក្រោយ​មក​បាន​ស្ថាបនា​អង្គការ​សីលការ​ដើម្បី​ជំរុញ​ឲ្យ​ស្ត្រី​កម្ពុជា​បាន​ចូលរួម​កាន់​តែ​ច្រើន​នៅ​វិស័យ​នយោបាយ​ ដែល​នេះ​បាន​ធ្វើ​ឲ្យ​លោក​ស្រី​បាន​ចូលរួម​ការ​វិវត្ត​នយោបាយ​របស់​កម្ពុជា។

លោក​ស្រី​បាន​មាន​ប្រសាសន៍​ថា៖ «ជនជាតិ​ខ្មែរ​មិន​ចូលចិត្ត​ប្រឈម​នឹង​គ្នា​ទេ ​បើ​សិន​ជា​ពួក​គេ​មិន​ស្រុះស្រួល​គ្នា​ ពួក​គេ​សុខ​ចិត្ត​ដើរ​ចេញ​ពី​ស្ថានភាព​នោះ។ ប៉ុន្តែ​ នៅ​ក្នុង​របប​ប្រជាធិបតេយ្យ​ ពេលខ្លះ​អ្នក​ត្រូវ​មាន​ការ​តស៊ូ​និង​មិន​អាច​សម្រប​តាម​គេ​នោះ​ទេ​ ហើយ​ពលរដ្ឋ​កម្ពុជា​ជា​ច្រើន​បាន​ធ្វើ​ការ​សម្រប​សម្រួល​គ្នាច្រើន​ណាស់​តាំង​ពី​មាន​ការ​បោះឆ្នោត​របស់​អង្គការ​សហប្រជាជាតិ​មក»។

លោក​ស្រី​ ឃឹះ​ បាន​បន្ត​ថា​ ខណៈ​ដែល​ការ​អប់រំ​អំពី​សិទ្ធិ​មនុស្ស​នៅ​កម្ពុជា​បាន​រីក​ចម្រើន​ហើយ​ក៏​ដោយ​ រហូត​មក​ដល់​បច្ចុប្បន្ន ការ​បង្រៀន​ទៅ​សាធារណៈ​អំពី​សិទ្ធិ​ប្រជា​ពលរដ្ឋ​ដើម្បី​បង្កើត​ឲ្យ​មាន​ការ​យល់​ដឹង​ឲ្យ​កាន់​តែ​ច្បាស់​ពី​សិទ្ធិ​នយោបាយ​និង​វប្បធម៌​ប្រជាធិបតេយ្យ​នៅ​មាន​តិច​តួច​ណាស់។

លោក​ស្រី​បាន​បន្ថែម​ថា៖​ «ខ្ញុំ​គិត​ថា ​មាន​កត្តា​ដែល​ស្មុគស្មាញ​ច្រើន​ណាស់​នៅ​កម្ពុជា​នេះ។ ប្រជាជន​នៅ​មូលដ្ឋាន​និង​ប្រជា​ពលរដ្ឋ​ទូទៅ​ក្នុង​ស្រុក​ ពួកគេ​ចង់​បាន​ប្រជាធិបតេយ្យ​និង​សំឡេង​របស់​ពួក​គេ​ ក៏​ប៉ុន្តែ​មាន​មនុស្ស​ច្រើន​ណាស់​ដែល​មិន​បាន​ស្មោះ​ត្រង់​ក្នុង​ការ​ប្រាស្រ័យ​ទៅ​វិញ​ទៅ​មក​ ដូច្នេះ​មាន​ល្បិចកល​ច្រើន​ហើយ​និង​ការ​បោក​ប្រាស់​ច្រើន»។

អ្នក​អង្កេត​ការណ៍​ជា​ច្រើន​នាក់​បាន​ចង្អុល​បង្ហាញ​ពី​ការ​សម្រប​របស់​អ៊ុនតាក់​ដែល​ឲ្យ​លោក​ ហ៊ុន​ សែន​ ក្លាយ​ទៅ​ជា​នាយករដ្ឋមន្ត្រី​ទី​២​ ដើម្បី​បញ្ចៀស​ការ​គំរាម​កំហែង​របស់​លោក​អំពី​សង្គ្រាម​ស៊ីវិល​បន្ទាប់​ពី​គណបក្ស​ហ៊្វុនស៊ិនប៉ិច​បាន​ឈ្នះ​ឆ្នោត​នោះ​ ថាជា​កំហុស​មួយ ​ដែល​ជាបំផ្លាញ​យ៉ាង​ធ្ងន់ធ្ងរ​ដល់​លទ្ធភាព​នៃ​ការ​កសាង​របបប្រជាធិបតេយ្យ​នៅ​កម្ពុជា។

​លោក​ ប៊ុនហំ​ បាន​កត់​សម្គាល់​ថា ​ប្រជាជន​កម្ពុជា​ដែល​បាន​ឆ្លង​កាត់​សង្គ្រាម​ជា​ច្រើន​ ពេញ​ចិត្ត​នឹង​ការ​សម្រប​សម្រួល​គ្នា​នេះ​ បើ​ទោះ​លោក​មិន​យល់​ស្រប​ក៏​ដោយ។​ លោក​ជឿ​ថា ​មាន​កត្តា​ធំៗ​ជាង​នេះ​ជាច្រើន​ដែល​នាំ​ឲ្យ​មានស្ថានការណ៍​នេះ។

លោក​បាន​និយាយ​ថា៖ «ខ្ញុំ​គិត​ថា ​វា​ឆោត​ពេក​ហើយ​ដែល​លោក​ខាង​លិច​គិត​ថា​ប្រជាធិបតេយ្យ​អាច​លូតលាស់​ឡើង​ដូច​ជា​ដើម​ឈើ​មួយ​ដើម។ ខ្ញុំ​គិត​ថា ​ប្រជាធិបតេយ្យ​គឺ​វា​ហាក់​បី​ដូច​ជា​ប្រព័ន្ធ​នៃ​ការ​គិត​ពិចារណា​ នៅ​ពេល​អ្នក​ចង់​ឲ្យ​មនុស្ស​ម្នាក់​ផ្លាស់​ប្តូរ​ពី​គំនិត​របស់​ពួក​គេ​ អ្នក​ត្រូវ​តែ​ជជែក​ខុស​ត្រូវ​ជា​មួយ​គេ ​ហើយ​អ្នក​ត្រូវ​តែ​នៅ​ទី​នោះ​ក្នុង​ជំនុំ​ចំណោម​ពួក​គេ»៕

ប្រែសម្រួល​ដោយ លឹម​ ហ្គេចហៀង

XS
SM
MD
LG