ចក្រភពអង់គ្លេសនៅថ្ងៃចន្ទនេះបានប្រកាសផ្តល់កញ្ចប់ជំនួយយោធាថ្មីទៀត ដល់ប្រទេសអ៊ុយក្រែន ខណៈពេលដែលប្រធានាធិបតីអ៊ុយក្រែនលោក Volodymyr Zelenskyy បានមកដល់ប្រទេសនេះដើម្បីជួបពិភាក្សាជាមួយនាយករដ្ឋមន្ត្រីអង់គ្លេសលោក Rishi Sunak។
កញ្ចប់ជំនួយថ្មីនេះរួមមានគ្រាប់មីស៊ីលការពារដែនអាកាស ក៏ដូចជាយន្តហោះដ្រូនវាយប្រហាររយៈចម្ងាយឆ្ងាយផងដែរ។
លោក Zelenskyy បានបង្ហោះសារលើ Twitter មុនជំនួបរបស់លោកជាមួយនាយករដ្ឋមន្រ្តីអង់គ្លេសថា៖ «ចក្រភពអង់គ្លេសជាមេដឹកនាំមួយរូប ក្នុងការជួយពង្រីកសមត្ថភាពរបស់យើងនៅលើដីនិងលើអាកាស។ កិច្ចសហប្រតិបត្តិការរបស់យើងនឹងបន្តនៅថ្ងៃនេះ។ ខ្ញុំនឹងជួបជាមួយមិត្តរបស់ខ្ញុំគឺលោក Rishi។ យើងនឹងធ្វើការពិភាក្សាចរចាគ្នាយ៉ាងសំខាន់ទល់មុខគ្នានិងតាមរយៈគណៈប្រតិភូផងដែរ»។
កិច្ចពិភាក្សាគ្នារវាងមេដឹកនាំទាំងពីរនៅថ្ងៃចន្ទ ត្រូវកំណត់ធ្វើនៅវិមានផ្លូវការនាយករដ្ឋមន្ត្រីអង់គ្លេសដែលនៅខាងក្រៅទីក្រុងឡុងដ៍។
លោក Sunak និយាយក្នុងសេចក្តីថ្លែងការណ៍មួយថា៖ «នេះជាឱកាសដ៏សំខាន់ ក្នុងការតស៊ូរបស់អ៊ុយក្រែនប្រឆាំងនឹងសង្គ្រាមដ៏ឃោរឃៅមួយ»។
ដំណើរទស្សនកិច្ចរបស់លោក Zelenskyy ទៅកាន់ចក្រភពអង់គ្លេស ជាការឈប់សំចតចុងក្រោយ នៃដំណើរទស្សនកិច្ចរបស់លោក ទៅកាន់ប្រទេសជាដៃគូបស្ចិមប្រទេសនៅក្នុងរយៈពេលប៉ុន្មានថ្ងៃនេះ ដែលក្នុងនោះក៏រួមមានកិច្ចប្រជុំរបស់លោកនៅក្នុងរដ្ឋធានីប៉ារីសប្រទេសបារាំង រដ្ឋធានីប៊ែឡាំងប្រទេសអាល្លឺម៉ង និងរដ្ឋធានីរ៉ូម ប្រទេសអ៊ីតាលីផងដែរ។
ប្រទេសបារាំងបានប្រកាសកាលពីយប់ថ្ងៃអាទិត្យថា ខ្លួននឹងផ្តល់រថក្រោះ រថពាសដែក និងការបណ្តុះបណ្តាលដល់កងទាហានអ៊ុយក្រែន នៅក្នុងកញ្ចប់ជំនួយយោធាថ្មីមួយ ខណៈពេលដែលកងកម្លាំងអ៊ុយក្រែន កំពុងប្រុងប្រៀបខ្លួន ដើម្បីធ្វើការវាយបកប្រឆាំងនឹងការឈ្លានពានរបស់រុស្ស៊ី។
ខុទ្ទកាល័យរបស់ប្រធានាធិបតីបារាំងលោក Emmanuel Macron បាននិយាយនៅក្នុងសេចក្តីថ្លែងការណ៍មួយថា រដ្ឋាភិបាលរបស់លោកនឹងផ្តល់រថក្រោះធុនស្រាល និងរថពាសដែកផងដែរដល់ប្រទេសអ៊ុយក្រែន ក្នុងប៉ុន្មានសប្តាហ៍ខាងមុខនេះ ស្របពេលដែលបារាំងសន្យាថា នឹងផ្តល់ការគាំទ្រផ្នែកមនុស្សធម៌ សេដ្ឋកិច្ច នយោបាយនិងយោធាដល់ប្រទេសអ៊ុយក្រែន ទោះបីយូរប៉ុណ្ណាក៏ដោយឱ្យតែចាំបាច់៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, AFP និង Reuters។
