រដ្ឋមន្ត្រីការបរទេសអាមេរិកលោក Antony Blinken បាននិយាយថា កិច្ចព្រមព្រៀងបទឈប់បាញ់ថ្មីចុងក្រោយបង្អស់សម្រាប់តំបន់ហ្កាហ្សាអាចជាឱកាសចុងក្រោយដើម្បីឱ្យមានការដោះលែងចំណាប់ខ្មាំងនិងបញ្ចប់សង្គ្រាមរវាងក្រុមហាម៉ាស់និងអ៊ីស្រាអែល។
លោក Blinken បានបញ្ជាក់កាលពីថ្ងៃចន្ទនៅក្នុងប្រទេសអ៊ីស្រាអែលថា៖«នេះជាដំណាក់កាលផ្ដាច់ព្រាត់ ប្រហែលជាឱកាសល្អបំផុតនិងចុងក្រោយក្នុងការឱ្យមានការដោះលែងចំណាប់ខ្មាំង ឱ្យមានបទឈប់បាញ់ និងធ្វើឱ្យភាគីទាំងអស់ស្ថិតនៅលើមាគ៌ាដ៏ប្រសើរឆ្ពោះទៅរកសន្តិភាពនិងសន្តិសុខ»។
លោក Blinken បានជួបកាលពីថ្ងៃចន្ទជាមួយប្រធានាធិបតីអ៊ីស្រាអែលលោក Issac Herzog។
នេះគឺជាដំណើរទស្សនកិច្ចលើកទី ៩ របស់លោក Blinken ទៅកាន់តំបន់មជ្ឈិមបូព៌ាតាំងពីសង្គ្រាមរវាងអ៊ីស្រាអែលនិងក្រុមហាម៉ាស់បានចាប់ផ្ដើមកាលពីឆ្នាំមុនមក។ ក្រុមអ្នកចរចាមកពីសហរដ្ឋអាមេរិក អេហ្ស៊ីប និងកាតាបានជួបប្រជុំគ្នានៅក្នុងទីក្រុងដូហា ប្រទេសកាតាកាលពីសប្ដាហ៍មុនដើម្បីតាក់តែងកិច្ចព្រមព្រៀងថ្មីចុងក្រោយបង្អស់ ហើយការពិភាក្សាត្រូវគេរំពឹងថានឹងចាប់ផ្ដើមឡើងវិញនៅក្នុងទីក្រុងគែរនៅពេលក្រោយក្នុងសប្ដាហ៍នេះ។
បន្ទាប់ពីលោក Blinken បានធ្វើដំណើរទៅដល់ប្រទេសអ៊ីស្រាអែលភ្មាមៗកាលពីថ្ងៃអាទិត្យ គ្រាប់បែកមួយបានផ្ទុះនៅជិតវិហារមួយក្នុងទីក្រុង Tel Aviv ដោយធ្វើឱ្យអ្នកបំផ្ទុះគ្រាប់បែកនោះស្លាប់និងអ្នកដើរក្បែរនោះម្នាក់រងរបួស។ នេះបើតាមការបញ្ជាក់របស់ប៉ូលិសអ៊ីស្រាអែល។ កាលពីថ្ងៃចន្ទ ប៉ូលិសបានហៅការបំផ្ទុះគ្រាប់បែកនេះថាជាការវាយប្រហារភេរវកម្ម៕
