ពួកអ្នកចរចាអន្តរជាតិធ្វើការចរចានៅក្នុងរាជធានីដូហានៃប្រទេសកាតាកាលពីថ្ងៃព្រហស្បតិ៍នៅពេលដែលពួកគេមានគោលបំណងឱ្យមានកិច្ចព្រមព្រៀងឈប់បាញ់គ្នាមួយនៅតំបន់ហ្កាហ្សាដើម្បីព្យាយាមនិងមិនធ្វើឱ្យសង្គ្រាមនេះរីកកាន់តែធំឡើងនៅក្នុងតំបន់មជ្ឈិមបូព៌ា។
ពួកអ្នកចរចាមកពីសហរដ្ឋអាមេរិក អេហ្ស៊ីបនិងកាតាមានគម្រោងជួបគ្នាជាមួយគណៈប្រតិភូមួយមកពីអ៊ីស្រាអែល។ ពួកហាម៉ាស់បាននិយាយកាលពីថ្ងៃពុធថាខ្លួននឹងមិនចូលរួមនៅក្នុងការចរចានេះទេ ក៏ប៉ុន្តែ អ្នកតំណាងអាចជួបជាមួយពួកអ្នកសម្របសម្រួលនៅពេលក្រោយមក។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
បន្ថែមដល់ការប្រយុទ្ធដែលកំពុងបន្តឡើងនៅក្នុងតំបន់ហ្កាហ្សានិងតំបន់ West Bank អ៊ីស្រាអែលនិងក្រុម Hezbollah បានធ្វើការវាយប្រហារតបតគ្នានៅតាមបណ្តោយព្រំដែនលីបង់។ ចំណាប់ខ្មាំងជាង១០០នាក់នៅឃុំខ្លួននៅឡើយ។ ការដឹកជញ្ជូនពាណិជ្ជកម្មរងការវាយប្រហារដោយពួកអ្នកប្រយុទ្ធហ៊ូធីដែលមានទីតាំងនៅក្នុងប្រទេសយ៉េមែន ហើយមានការលេចចេញឡើងនៃការវាយប្រហារសងសឹកដែលគំរាមកំហែងដោយអ៊ីរ៉ង់អំពីការសម្លាប់មេដឹកនាំហាម៉ាស់លោក Ismail Haniyeh នៅក្នុងរដ្ឋធានីតេហេរ៉ង់កាលពីខែមុន។ ថ្វីបើ អ៊ីស្រាអែលមិនបានអះអាងទទួលខុស ត្រូវចំពោះការសម្លាប់នេះក៏ដោយ គេបានស្តីបន្ទោសយ៉ាងខ្លាំងចំពោះការស្លាប់របស់លោក Haniyeh នេះ។
ពួកមន្ត្រីជាន់ខ្ពស់អ៊ីរ៉ង់បីនាក់បាននិយាយថាកិច្ចព្រមព្រៀងឈប់បាញ់គ្នានៅក្នុងតំបន់ហ្កាហ្សានឹងក្លាយជាចំណុចមួយដែលអាចរារាំងការសងសឹកចំពោះកាន់សម្លាប់នេះ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AP, Reuters និង AFP
វេទិកាបញ្ចេញមតិ