ប្រធានាធិបតីសហរដ្ឋអាមេរិក លោក Joe Biden និយាយនៅថ្ងៃអង្គារថា ប្រទេសសម្ព័ន្ធមិត្តលោកខាងលិច កំពុងរង់ចាំមើល ថាតើរុស្ស៊ីនឹងបន្ថយការវាយប្រហាររបស់ខ្លួននៅជុំវិញរដ្ឋធានីកៀវ និងទីក្រុង Chernihiv នៅភាគខាងជើងរបស់អ៊ុយក្រែនដែរឬយ៉ាងណានោះ។
លោក Biden បានប្រាប់ក្រុមអ្នកសារព័ត៌មាននៅសេតវិមាន បន្ទាប់ពីបាននិយាយតាមទូរស័ព្ទជាមួយមេដឹកនាំចក្រភពអង់គ្លេស បារាំង និងអ៊ីតាលីថា «យើងនឹងរង់ចាំមើលប្រសិនបើរុស្ស៊ីធ្វើតាមការសន្យាមែន។ ហាក់ដូចជាមានការឯកភាពគ្នាថា យើងត្រូវរង់ចាំមើលសិន ថាតើរុស្ស៊ីនឹងធ្វើអ្វីនោះ»។
យោធារុស្ស៊ីបាននិយាយកាលពីថ្ងៃអង្គារនៅក្នុងការចរចាសន្តិភាពនៅប្រទេសតួកគីថា ខ្លួននឹងកាត់បន្ថយប្រតិបត្តិការយោធានៅជុំវិញទីក្រុងកៀវនិងទីក្រុង Chernihiv។
អនុរដ្ឋមន្ត្រីការពារជាតិរុស្ស៊ី លោក Alexander Fomin បាននិយាយថា ចំណាត់ការនេះធ្វើឡើងក្នុងគោលបំណងបង្កើនការជឿទុកចិត្តគ្នានៅក្នុងការចចាដើម្បីបញ្ចប់ការប្រយុទ្ធគ្នា។
ក្រសួងការពារជាតិអាមេរិក បានបញ្ជាក់ថា កងកម្លាំងយោធារុស្ស៊ីមួយចំនួនតួច បានចាប់ផ្តើមដកចេញពីទីក្រុងកៀវ ប៉ុន្តែបានសម្តែងនូវការមន្ទិលសង្ស័យរបស់ខ្លួនជុំវិញរឿងនេះច្រើនជាងលោក Biden ទៅទៀត។
អ្នកនាំពាក្យក្រសួងការពារជាតិអាមេរិកលោក John Kirby បានប្រាប់ក្រុមអ្នកសារព័ត៌មាននៅក្រសួងការពារជាតិអាមេរិកថា «យើងជឿថា នេះគ្រាន់តែជាការផ្លាស់ប្តូរទីតាំងឈរជើងរបស់កងកម្លាំងរុស្ស៊ីតែប៉ុណ្ណោះ មិនមែនជាការដកកម្លាំងទ័ពចេញនោះឡើយ»។
លោកKirby បន្ថែមទៀតថា «យើងមិនទាន់ជឿជាក់នៅឡើយទេថា ការគំរាមកំហែងទៅលើរដ្ឋធានីកៀវ ត្រូវបានកាត់បន្ថយយ៉ាងច្រើន ដូចដែលបានប្រកាសដោយក្រសួងការពារជាតិរុស្ស៊ីនោះឡើយ»។
ការរុលទៅមុខរបស់កងកម្លាំងរុស្ស៊ី ត្រូវជាប់គាំង ដោយមានការប្រឈមទប់ទល់យ៉ាងខ្លាំងពីសំណាក់ក្រុមប្រយុទ្ធរបស់អ៊ុយក្រែន។
រដ្ឋមន្ត្រីការពារជាតិរុស្ស៊ី លោក Sergei Shoigu បាននិយាយថា កងទ័ពរុស្ស៊ី នឹងផ្តោតទៅលើតំបន់ Donbas វិញ ដែលរួមមានតំបន់បំបែកខ្លួន Luhansk និង Donetsk នៅភាគខាងកើតអ៊ុយក្រែន។ លោកបញ្ជាក់ថារដ្ឋាភិបាលក្រុងមូស្គូ បានសម្រេចនូវគោលដៅរបស់ខ្លួនមួយផ្នែកធំ ក្នុងដំណាក់កាលទី១នៃ«ប្រតិបត្តិការយោធាពិសេស»នេះ ដែលក្នុងនោះរួមមានការបំផ្លាញនូវសមត្ថភាពកងទ័ពរបស់អ៊ុយក្រែនផងដែរ។
អ្នកនាំពាក្យក្រសួងការពារជាតិអាមេរិក បានគូសបញ្ជាក់ថា កងកម្លាំងយោធារុស្ស៊ី បានបង្កើនសកម្មភាពនិងផ្តោតទៅលើតំបន់ភាគខាងកើតវិញ បន្ទាប់ពីត្រូវបានជាប់គាំង នៅក្នុងយុទ្ធនាការយោធានៅក្នុងតំបន់ខាងជើងនិងខាងត្បូងអ៊ុយក្រែននោះ។
មន្ត្រីជាន់ខ្ពស់មួយរូបនៃក្រសួងការពារជាតិអាមេរិក បានប្រាប់ក្រុមអ្នកយកព័ត៌មានថា កងកម្លាំងអ៊ុយក្រែន បានដណ្តើមកាន់កាប់ឡើងវិញនូវទីប្រជុំជន Trostyanets នៅជិតទីក្រុង Sumy ភាគឦសានខណៈពេលដែលប្រធានាធិបតីអ៊ុយក្រែន លោក Volodymyr Zelenskyy បានថ្លែងនៅ ក្នុងសុន្ទរកថារបស់លោកកាលពីយប់ថ្ងៃចន្ទថា កងកម្លាំងអ៊ុយក្រែន បានរំដោះយកទីក្រុង Irpin ដែលនៅជាយរដ្ឋធានីកៀវនោះមកវិញហើយ។
ចំណែកប្រធានាធិបតីតួកគីលោក Recep Tayyip Erdogan បានប្រាប់ក្រុមអ្នកចរចាររុស្ស៊ីនិងអ៊ុយក្រែន នៅមុនពេលចរចាក្នុងទីក្រុងអ៊ីស្តង់ប៊ុល ប្រទេសតួកគីថា វាអាស្រ័យទៅលើភាគីទាំងពីរក្នុងការសម្រេចបាននូវកិច្ចព្រមព្រៀងដ៏រឹងមាំមួយ និង«ក្នុងការបញ្ចប់សោកនាដកម្មនេះ»។ កិច្ចចរចានេះត្រូវគេរំពឹងថា នឹងបន្តធ្វើនៅថ្ងៃពុធនេះ៕
អ្នកស្រី Margaret Besheer បានរួមចំណែកក្នុងសេចក្ដីរាយការណ៍នេះពីទីស្នាក់ការអង្គការសហប្រជាជាតិ។
ព័ត៌មានមួយចំនួននៅក្នុងសេចក្ដីរាយការណ៍នេះ ត្រូវបានដកស្រង់ពីទីភ្នាក់ងារព័ត៌មាន The Associated Press Agence France-Presse និង Reuters។
