ប្រធានាធិបតីសហរដ្ឋអាមេរិកលោក Joe Biden បានបិទបញ្ចប់ដំណើរទស្សនកិច្ចរបស់លោកទៅកាន់ទ្វីបអឺរ៉ុបកាលពីថ្ងៃពុធ ដោយធ្វើការដើម្បីគាំទ្រភាពជាដៃគូជាមួយសម្ពន្ធមិត្តចំពោះសមាជិកអង្គការអូតង់ (NATO) នៅតំបន់អឺរ៉ុបខាងកើតដែលប្រឈមនឹងគ្រោះថ្នាក់ ស្របពេលដែលប្រធានាធិបតីរុស្ស៊ីលោក Vladimir Putin ងាកកាន់តែជិតទៅរកប្រទេសចិនសម្រាប់ការជួយជ្រោមជ្រែងនៅពេលដែលការឈ្លានពានរបស់លោកលើអ៊ុយក្រែនជិតឈានចូលដល់ខួបមួយឆ្នាំ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
ជំនួបរបស់លោក Biden ជាមួយនឹងបណ្ដាមេដឹកនាំនៃក្រុមប្រទេស Bucharest Nine នៅក្នុងទីក្រុងវ៉ាសូវីនៃប្រទេសប៉ូឡូញបានធ្វើឡើងនៅពេលលោកបិទបញ្ចប់ដំណើរទស្សនកិច្ចយ៉ាងរហ័សរយៈពេល ៤ ថ្ងៃរបស់លោកទៅកាន់ប្រទេសអ៊ុយក្រែននិងប៉ូឡូញក្នុងគោលបំណងដើម្បីធានាចំពោះសម្ពន្ធមិត្តថា ការគាំទ្ររបស់សហរដ្ឋអាមេរិកនៅក្នុងការទប់ទល់នឹងរុស្ស៊ីគឺមិនងាយនឹងថមថយនោះទេ។
សម្រាប់លោក Putin វិញ កាលពីថ្ងៃពុធ លោកបានទទួលស្វាគមន៍លោក Wang Yi ដែលជាមន្ត្រីគោលនយោបាយការបរទេសជាន់ខ្ពស់បំផុតរបស់គណបក្សកុម្មុយនីស្តចិននៅក្នុងទីក្រុងមូស្គូ ស្របពេលដែលផ្នែកស៊ើបការណ៍សម្ងាត់របស់សហរដ្ឋអាមេរិកបានព្រមានថា រដ្ឋាភិបាលចិនកំពុងពិចារណាផ្គត់ផ្គង់សព្វាវុធនិងគ្រាប់រំសេវដល់យោធារុស្ស៊ីដែលកំពុងចុះខ្សោយ។
ការបង្ហាញនូវសម្ពន្ធភាពទាំងនេះគឺជាសញ្ញាថ្មីមួយដែលបង្ហាញថា ភាគីទាំងពីរកំពុងប្រកាន់ជំហរមិនងាករេនៅក្នុងសង្គ្រាមអូសបន្លាយដ៏យូរក្នុងប្រទេសអ៊ុយក្រែន។ គេរំពឹងថា ការប្រយុទ្ធរវាងអ៊ុយក្រែននិងរុស្ស៊ីនៅក្នុងសង្គ្រាមនោះនឹងកាន់តែខ្លាំងក្លាឡើងនៅពេលរដូវផ្ការីកចូលមកដល់។
ដំណើរទស្សនកិច្ចរបស់លោក Biden លើកនេះបានផ្ដល់នូវឱកាសមួយទៀតនៃការទាក់ទាញសាធារណជនកាលពីថ្ងៃអង្គារនៅពេលដែលលោកថ្លែងសុន្ទរកថាខ្លាំងៗនៅក្នុងទីក្រុងវ៉ាសូវីនៃប្រទេសប៉ូឡូញអំពីសាមគ្គីភាពរបស់ក្រុមបស្ចិមប្រទេស ក្នុងពេលមួយថ្ងៃក្រោយមកបន្ទាប់ពីលោកបានធ្វើទស្សនកិច្ចដោយមិនប្រកាសឱ្យដឹងជាមុនទៅកាន់ប្រទេសអ៊ុយក្រែនដើម្បីជួបជាមួយប្រធានាធិបតីអ៊ុយក្រែនលោក Volodymyr Zelenskyy។
នៅពេលដែលលោក Biden ថ្លែងសុន្ទរកថានៅក្នុងប្រទេសប៉ូឡូញ លោក Putin បានប្រកាសថា រុស្ស៊ីផ្អាកការចូលរួមរបស់ខ្លួននៅក្នុងសន្ធិសញ្ញា New START ដែលជាសន្ធិសញ្ញាគ្រប់គ្រងអាវុធនុយក្លេអ៊ែររវាងសហរដ្ឋអាមេរិកនិងរុស្ស៊ីតែមួយគត់ដែលនៅសល់។
លោក Biden បានហៅការដកខ្លួនចេញរបស់រុស្ស៊ីពីសន្ធិសញ្ញានេះថាជា«កំហុសដ៏ធំមួយ»។ ការដកខ្លួនចេញរបស់រុស្ស៊ីនេះត្រូវគេរំពឹងថានឹងជះផលភ្លាមៗលើការប្រយ័ត្នប្រយែងរបស់សហរដ្ឋអាមេរិកអំពីសកម្មភាពនុយក្លេអ៊ែររបស់រុស្ស៊ី៕
លោក Biden គាំទ្រសម្ពន្ធមិត្តបស្ចិមប្រទេស ខណៈលោក Putin ប្រកាន់ជំហររឹងរូសរឿងអ៊ុយក្រែន
ទីក្រុងវ៉ាសូវី —
