ប្រធានាធិបតីសហរដ្ឋអាមេរិកលោក Joe Biden បានព្រមានយ៉ាងខ្លាំងថា ប្រទេសរុស្ស៊ីអាចធ្វើការវាយប្រហារប្រព័ន្ធកុំព្យូទ័រប្រឆាំងនឹងផលប្រយោជន៍សហរដ្ឋអាមេរិកឬប្រើប្រាស់អាវុធជីវសាស្ត្រឬគីមីនៅក្នុងប្រទេសអ៊ុយក្រែន នៅពេលដែលការឈ្លានពានរបស់រុស្ស៊ីលើប្រទេសអ៊ុយក្រែនជិតមានរយៈពេលមួយខែហើយនោះ។
លោក Biden បានប្រាប់ក្រុមមេដឹកនាំពាណិជ្ជករសហរដ្ឋអាមេរិកកាលពីយប់ថ្ងៃចន្ទថា ប្រធានាធិបតីរុស្ស៊ីលោក Vladimir Putin មិនបានរំពឹងទុកជាមុនថា ប្រទេសជាច្រើនរួមគ្នាប្រឆាំងនឹងសកម្មភាពរបស់រុស្ស៊ីខ្លាំងក្លាដូច្នេះទេ ហើយនេះជា«ការបរាជ័យរបស់លោក»។
លោក Biden ថ្លែងទៀតថា៖ «ឥឡូវនេះ លោក Putin កំពុងនិយាយអំពីព័ត៌មានមិនពិតដែលលោកកំពុងបង្កើតឡើង រួមទាំងលោកកំពុងពោលអះអាងថា យើងនៅក្នុងប្រទេសអាមេរិក មានអាវុធជីវសាស្ត្រនិងអាវុធគីមីនៅក្នុងអឺរ៉ុបដែលនេះមិនមែនជាការពិតនោះឡើយ។ ពួក គេក៏កំពុងនិយាយដែរថា អ៊ុយក្រែនមានអាវុធជីវសាស្ត្រនិងគីមីនៅក្នុងប្រទេសអ៊ុយក្រែន។ នេះជាសញ្ញាដ៏ច្បាស់ក្រឡែតថា លោក Putin កំពុងពិចារណាប្រើអាវុធទាំង២នេះ»។
លោក Biden ក៏បាននិយាយកាលពីថ្ងៃចន្ទដែរថា មានការស៊ើបការណ៍សម្ងាត់ថា រដ្ឋាភិបាលរុស្ស៊ីបាន«រកជម្រើសធ្វើការវាយប្រហារប្រព័ន្ធកុំព្យូទ័រដ៏ខ្លាំងប្រឆាំងនឹងសហរដ្ឋអាមេរិក ហើយលោក Biden បានជំរុញឲ្យផ្នែកឯកជនពង្រឹង«ការការពារប្រព័ន្ធកុំព្យូទ័រ» របស់ខ្លួន។
លោក Biden បានមានប្រសាសន៍ទៀតថា រុស្ស៊ីអាចចាប់ផ្តើមការវាយប្រហារបែបនេះជាការ សងសឹកចំពោះការដាក់ទណ្ឌកម្មរបស់សហរដ្ឋអាមេរិកទៅលើរុស្ស៊ី។
លោកបានបន្ថែមទៀតថា «វាជាផ្នែកមួយនៃល្បិចកលរបស់រុស្ស៊ី»។
មេដឹកនាំសហរដ្ឋអាមេរិក បារាំង អាល្លឺម៉ង់ អ៊ីតាលីនិងចក្រភពអង់គ្លេស បាននិយាយតាមទូរសព្ទដែលពួកអស់លោក បានពិភាក្សាក្តីកង្វល់អំពីកលល្បិចដ៏ព្រៃផ្សៃរបស់រុស្ស៊ីនៅក្នុងប្រទេសអ៊ុយក្រែន។ មេដឹកនាំទាំងនោះ បានបង្ហាញការបន្តគាំទ្របន្តដល់អ៊ុយក្រែនដោយការផ្តល់ជំនួយសន្តិសុខនិងមនុស្សធម៌ ហើយនឹងពិនិត្យមើលឡើងវិញនូវការខំប្រឹងប្រែងខាងការទូតនៅពេលថ្មីៗនេះ នៅក្នុងការគាំទ្រការប្រឹងប្រែងរបស់អ៊ុយក្រែនដើម្បីឈោងដល់បទឈប់បាញ់គ្នាមួយ។ នេះបើតាមការបញ្ជាក់របស់សេតវិមាន។
នៅចុងសប្តាហ៍នេះ លោក Biden នឹងចូលរួមសន្និសីទកំពូលរបស់អង្គការអូតង់ ជំនួបរបស់ក្រុមប្រទេសដែលមានសេដ្ឋកិច្ចជឿនលឿនទាំង៧ឬG7 និងជំនួបកំពូលរបស់ក្រុមប្រឹក្សាអឺរ៉ុបនៅក្នុងទីក្រុងប៊្រុចសែលដែលជំនួបកំពូលទាំងអស់នេះ ផ្តោតលើស្ថានភាពនៅក្នុងប្រទេសអ៊ុយក្រែន មុនពេលលោកប្រធានាធិបតី Biden ធ្វើដំណើរទៅកាន់ប្រទេសប៉ូឡូញ៕
