នៅពេលដែលការប្រមើលមើលមានកាន់តែច្រើនឡើងថា ជំងឺកូវីដ១៩ប្រហែលបានលេចចេញពីមន្ទីរពិសោធន៍ចិនមួយ ប្រធានាធិបតីសហរដ្ឋអាមេរិកលោក Joe Biden កាលពីថ្ងៃពុធបានបង្គាប់ឲ្យទីភ្នាក់ងារសហព័ន្ធនានា«បង្កើនការប្រឹងប្រែងទ្វេដងដើម្បីប្រមូលនិងវិភាគព័ត៌មានដែលអាចនាំយើងខិតកាន់តែជិតដល់ការសន្មតជាក់លាក់មួយ»។
ក្នុងសេចក្តីថ្លែងការណ៍មួយ លោកប្រធានាធិបតី Biden បានប្រាប់សហគមន៍ស៊ើបការណ៍សម្ងាត់សហរដ្ឋអាមេរិក«ឲ្យរាយការណ៍ជូនលោកក្នុងរយៈពេល៩០ថ្ងៃ»បន្ទាប់ពីលោកបានទទួលរបាយការណ៍មួយនៅខែនេះដែលមិនមានការសន្មតជាក់លាក់។
អ្នកស្រី Karine Jean-Pierre អ្នកនាំពាក្យរងរបស់សេតវិមាន បានប្រាប់ក្រុមអ្នកយកព័ត៌មានបន្ទាប់ពីការចេញផ្សាយសេចក្តីថ្លែងការណ៍របស់លោកប្រធានាធិបតីថា «ការណ៍នេះនឹងក្លាយជាការប្រឹងប្រែងមួយទៀតដោយរដ្ឋាភិបាលទាំងមូល ដោយមន្ទីរពិសោធន៍ជាតិនិងទីភ្នាក់ងារនានារបស់យើង»។
ក្រុមមន្ត្រីសហរដ្ឋអាមេរិក បានបញ្ជាក់អស់ជាច្រើនខែមកហើយថា ការខ្វះកិច្ចសហប្រតិបត្តិការពីរដ្ឋាភិបាលក្រុងប៉េកាំងបានរារាំងដល់ការប្រឹងប្រែងពីខាងក្រៅដើម្បីស្វែងយល់បន្ថែមទៀតអំពីប្រភពនៃវីរុសកូរ៉ូណាដែលបង្កជំងឺកូវីដ១៩ ហើយដែលបានសម្លាប់មនុស្សយ៉ាងតិចណាស់៣លាន៤សែននាក់នៅទូទាំងពិភពលោករួមមាន ជិត៦សែននាក់នៅក្នុងសហរដ្ឋអាមេរិកផង។
កាសែត The Wall Street Journal កាលពីថ្ងៃចន្ទ បានដកស្រង់សេចក្តីរាយការណ៍ស៊ើបការណ៍សម្ងាត់សហរដ្ឋអាមេរិកដែលថា ក្រុមអ្នកស្រាវជ្រាវនៅឯមន្ទីរពិសោធន៍មួយក្នុងទីក្រុង Wuhan ក្នុងប្រទេសចិន បានធ្លាក់ខ្លួនឈឺកាលពី ខែវិច្ឆិកា ឆ្នាំ២០១៩ គឺមួយខែមុនរដ្ឋាភិបាលចិន បានរាយការណ៍ទៅអង្គការសុខភាពពិភពលោកអំពីករណីទី១នៃជំងឺដែលត្រូវបានគេកំណត់ថាជាជំងឺកូវីដ១៩៕
