លោក សួន ផានិត្យ បាននាំសាច់ញាតិមកបោះឆ្នោតក្នុងមណ្ឌលបោះឆ្នោតរៀបចំនៅសាលាបឋមសិក្សាអូរតាគាំ១ នៅសង្កាត់ទួលតាឯក ក្រុងបាត់ដំបង ខេត្តបាត់ដំបង បន្ទាប់ពីលោកបានបោះឆ្នោតរួចហើយនៅមណ្ឌលបោះឆ្នោតផ្សេងទៀតកាលពីព្រឹកថ្ងៃអាទិត្យនេះ។
មានលំនៅឋានក្នុងភូមិកម្មករ សង្កាត់ស្វាយប៉ោ លោក ផានិត្យ អាយុ២៧ឆ្នាំ ថ្លែងនៅក្នុងមណ្ឌលបោះឆ្នោតក្នុងសង្កាត់ទួលតាឯកថា មេឃុំជាប់ឆ្នោតគួរផ្តល់ភាពកក់ក្តៅបន្ថែមទៀត ដល់ពលរដ្ឋរស់នៅតាមភូមិឃុំ ជុំវិញការផ្តល់សេវារដ្ឋបាលនានា។
លោកប្រាប់អ្នកយកព័ត៌មានឱ្យសំឡេងសហរដ្ឋអាមេរិកវីអូអេថា៖ «សម្រាប់ខ្ញុំ ខ្ញុំសំណូមពរឱ្យចៅសង្កាត់ ហើយមេភូមិ ព្យាយាមផ្តល់ភាពកក់ក្តៅសម្រាប់ប្រជាពលរដ្ឋឱ្យបានច្រើនជាងមុនបន្តិច»។
ពលរដ្ឋក្នុងសង្កាត់ស្វាយប៉ោរូបនេះ បន្ថែមថា អាជ្ញាធរភូមិឃុំ គួរមានការពិគ្រោះយោបល់ជាមួយពលរដ្ឋផងដែរ ក្នុងពេលសម្រេចចិត្តធ្វើការអភិវឌ្ឍគម្រោងណាមួយ។ លោក សួន ផានិត្យ និយាយថា៖
«ដូចជាការផ្តល់ដំណឹងដល់ប្រជាពលរដ្ឋសម្រាប់ការធ្វើអីមួយ ដូចជាការធ្វើផ្លូវ អីផ្សេងៗអ៊ីចឹងណា៎ បង ហើយគាត់អត់បានផ្តល់ដំណឹងឱ្យយើង។ ហើយដូចជាការប្រជុំភូមិឃុំ ឬមួយពេលដែលគេទម្លាក់គម្រោងអីមួយ គាត់អត់បានប្រាប់ប្រជាពលរដ្ឋថា យើងត្រូវធ្វើអីៗ អ៊ីចឹងណា៎បង»។
ក្រុងបាត់ដំបងរបស់ខេត្តបាត់ដំបងមានសង្កាត់ចំនួន១០ ហើយបើនិយាយជារួមគឺខេត្តបាត់ដំបងទាំងមូលមានឃុំសង្កាត់សរុបចំនួន១០៣។ គណបក្សយ៉ាងហោចណាស់ចំនួន៨ បានដាក់បេក្ខជនឈរឈ្មោះនៅឃុំសង្កាត់ទូទាំងខេត្ត និងក្រុងបាត់ដំបង។ ក្នុងចំណោមគណបក្សទាំង៨នោះ មានតែគណបក្សសំខាន់ៗពីរតែប៉ុណ្ណោះគឺ គណបក្សប្រជាជនកម្ពុជា និងគណបក្សភ្លើងទៀនដែលបានដាក់បេក្ខជនគ្រប់ឃុំសង្កាត់។
អ្នកបោះឆ្នោតមួយរូបទៀតមកពីភូមិអូរតាគាំ១ សង្កាត់ទួលតាឯក និយាយថា លោកមានគណបក្សស្ថិតក្នុងចិត្តដែលលោកសម្រេចផ្តល់សន្លឹកឆ្នោតជូន។ ទោះជាយ៉ាងណា លោក កែវ ជី អាយុ៣៤ឆ្នាំ និយាយថា មេឃុំរូបណាដែលជាប់ឆ្នោតនៅសង្កាត់លោក គួរពង្រឹងគុណភាពសេវាសាធារណៈជូនប្រជាពលរដ្ឋ។
លោកលើកឡើងក្រោយបោះឆ្នោតរួចថា៖ «មេឃុំដែលគាត់បានជ្រើសរើសដោយសំឡេងឆ្នោតហ្នឹងដែលគាត់មានសិទ្ធិមានអំណាចទាក់ទងនឹងសេវារដ្ឋបាលសូមឱ្យមានភាពល្អប្រសើរជាងមុន ទាក់ទងមានវេទិកាសាធារណៈដើម្បីស្តាប់បញ្ហាពីប្រជាពលរដ្ឋឱ្យបានច្រើន ដើម្បីឱ្យប្រជាពលរដ្ឋមានការចូលរួមច្រើន ហើយសហការជាមួយអាជ្ញាធរភូមិឃុំ»។
អ្នកស្រី សិន ម៉ៅ បានចូលរួមបោះឆ្នោតរៀងរាល់អាណត្តិដែលមានការរៀបចំបោះឆ្នោតឃុំសង្កាត់។ក្នុងអាណត្តិនេះ អ្នកស្រីចង់ឃើញអាជ្ញាធរមូលដ្ឋានជួយប្រជាពលរដ្ឋក្រីក្រឱ្យបានកាន់តែច្រើនឡើង និងប្រឹងប្រែងអភិវឌ្ឍន៍ភូមិឃុំបន្ថែមទៀត។
អ្នកស្រីប្រាប់វីអូអេថា៖ «មេឃុំជាប់ឱ្យគាត់ជួយប្រជាជនក្រីក្រ ឱ្យដឹងពីការងារ សុខទុក្ខរបស់ ប្រជាជន អីអ៊ីចឹងទៅណា៎ ខ្ញុំសុខចិត្តថា បោះជូនខ្ញុំអត់ខានមួយអាណត្តិទេ។»។
អំឡុងពេលនៃការចាប់ផ្តើមបោះឆ្នោតនៅព្រឹកថ្ងៃអាទិត្យ មានពលរដ្ឋមួយចំនួនមិនបានបោះឆ្នោត ព្រោះមិនមានអត្តសញ្ញាណបណ្ណជាប់នឹងខ្លួន បើទោះមានបង្កាន់ដៃសម្រាប់ចូលរួមការបោះឆ្នោត។ ពលរដ្ឋខ្លះទើបតែគ្រប់អាយុបោះឆ្នោត និងមានបណ្ណបោះឆ្នោតដែរ តែក៏មិនត្រូវបានអនុញ្ញាតដោយមន្ត្រីរៀបចំបោះឆ្នោតឱ្យបានចូលរួមបោះឆ្នោត ដោយសារពួកគាត់គ្មានអត្តសញ្ញាណបណ្ណ។
ប្រធានគណៈកម្មការរៀបចំការបោះឆ្នោតសង្កាត់ទួលតាឯក លោក សូ សុង បកស្រាយហេតុផលដែលពលរដ្ឋខ្លះមានបង្កាន់ដៃបោះឆ្នោត តែបែរជាមិនបានបោះឆ្នោតយ៉ាងដូច្នេះ៖
«អ្នកដែលបោះឆ្នោតបានទី១ត្រូវមានឈ្មោះក្នុងបញ្ជីបោះឆ្នោត។ទី២ ត្រូវមានអត្តសញ្ញាណបណ្ណសញ្ជាតិខ្មែរដែលនៅមានសុពលភាព។ ទី៣ ត្រូវតែមានឯកសារបញ្ជាក់អត្តសញ្ញាណបណ្ណបម្រើឱ្យការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ឆ្នាំ២០២២។នោះគឺគាត់បោះបានហើយបាទ»។
បើតាមលោក សូ សុង នៅមណ្ឌលបោះឆ្នោត សង្កាត់ទួលតាឯក ក្រុងបាត់ដំបង ខេត្តបាត់ដំបងមានគណបក្សបី ដាក់បេក្ខជនឈរឈ្មោះ គឺខ្មែរស្រឡាញ់ជាតិ គណបក្សភ្លើងទៀន និងគណបក្សប្រជាជនកម្ពុជា។ ហើយការិយាល័យបោះឆ្នោតមានចំនួន៥ ត្រូវបានរៀបចំសម្រាប់អ្នកបោះឆ្នោតចំនួនសរុប៩៤៣០នាក់។
ដោយឡែកអភិបាលក្រុងបាត់ដំបងលោក ផេង សិទ្ធី លើកឡើងនៅក្នុងមណ្ឌលបោះឆ្នោតមួយផ្សេងទៀតថា ដំណើរការបោះឆ្នោតព្រឹកថ្ងៃអាទិត្យ ប្រព្រឹត្តទៅដោយរលូន និងសន្តិវិធី ពោលគឺគ្មានការគំរាមកំហែងកើតឡើងនោះទេ។
ក៏ប៉ុន្តែក្រុមអ្នកយកព័ត៌មានរបស់សំឡេងសហរដ្ឋអាមេរិក ត្រូវបានស្នើឱ្យចាកចេញពីមណ្ឌលបោះឆ្នោតនៅសាលាបឋមសិក្សាសម្តេចជា ស៊ីម ក្នុងសង្កាត់ព្រែកព្រះស្តេច ក្រោយការផ្សាយផ្ទាល់តាមហ្វេសប៊ុកជិត៣នាទី ក្នុងមណ្ឌលបោះឆ្នោតនោះ។ មន្ត្រីរៀបចំការបោះឆ្នោតថា ក្រុមអ្នកយកព័ត៌មានត្រូវសុំការអនុញ្ញាតពីប្រធានមណ្ឌលដើម្បីបានថតយកទិដ្ឋភាពទូទៅនៅក្រៅការិយាល័យបោះឆ្នោត។
បន្ទាប់ពីការបោះឆ្នោតដែលនឹងបិទបញ្ចប់ទៅនៅម៉ោង៣រសៀលនេះ គេរំពឹងថា លទ្ធផលបឋមអំពីគណបក្សដែលនាំមុខក្នុងការបោះឆ្នោតតាមឃុំសង្កាត់ក្នុងក្រុង និងខេត្តបាត់ដំបងនឹងត្រូវបានប្រកាសតាមមណ្ឌលបោះឆ្នោតនៅល្ងាចថ្ងៃអាទិត្យនេះ៕
