អតីតប្រធានគណបក្សសង្រ្គោះជាតិ លោក កឹម សុខា នាថ្ងៃអាទិត្យនេះ មិនបានបង្ហាញមុខនៅការិយាល័យបោះឆ្នោតក្នុងរាជធានីភ្នំពេញឡើយ ដោយលោកបានសម្រេចចិត្តមិនទៅបោះឆ្នោតក្រុមប្រឹក្សាឃុំសង្កាត់អាណត្តិទី៥នេះ។ នេះបើតាមមន្ត្រីជំនិតរបស់លោក គឺលោក មុត ចន្ថា។
លោក មុត ចន្ថា បានប្រាប់វីអូអេ តាមសារអេឡិចត្រូនិចថា៖ «ឯកឧត្តម កឹម សុខា មិនអញ្ជើញទៅបោះឆ្នោតទេ ព្រោះវាមិនមានជម្រើសសម្រាប់លោក ដើម្បីជ្រើសរើស»។
លោក កឹម សុខា ដែលកំពុងជាប់បណ្តឹងនៅតុលាការក្នុងសំណុំរឿងក្បត់ជាតិ មិនអាចធ្វើនយោបាយបានឡើយ ដោយសារបម្រាមរបស់តុលាការ។ ប៉ុន្តែលោកមានឈ្មោះក្នុងបញ្ជីឈ្មោះបោះឆ្នោតឆ្នាំ២០២២នេះ។
កាលពីឆ្នាំ២០១២ អតីតប្រធានគណបក្សសិទ្ធិមនុស្ស និងលោក សម រង្ស៊ី មេដឹកនាំគណបក្ស សម រង្ស៊ី បានរួមគ្នាបង្កើតគណបក្សសង្រ្គោះជាតិ ដែលត្រូវបានរំលាយដោយតុលាការកំពូល កាលពីឆ្នាំ២០១៧។
គណបក្ស សម រង្ស៊ី បានប្តូរឈ្មោះជាគណបក្សភ្លើងទៀន ហើយគណបក្សនេះបានសម្រេចចិត្តចូលរួមប្រកួតប្រជែងការបោះឆ្នោតក្រុមប្រឹក្សាឃុំសង្កាត់នាអាណត្តិទី៥នេះ។ ចំណែកគណបក្សសិទ្ធិមនុស្សរបស់លោក កឹម សុខា មិនបានចូលរួមការបោះឆ្នោតនេះឡើយ៕
