ប៉ូលិសសហព័ន្ធអូស្ត្រាលីបានការពារកិច្ចសហប្រតិបត្តិការរបស់ពួកគេជាមួយអាជ្ញាធរឥណ្ឌូនេស៊ី ក្នុងករណីយអ្នកជួញដូរគ្រឿងញៀនពីរនាក់ដែលបានត្រូវប្រហារជីវិតកាលពីសប្តាហ៍មុន។ ពលរដ្ឋអូស្ត្រាលីពីរនាក់ឈ្មោះ Myuran Sukumaran និងឈ្មោះ Andrew Chan ជាសមាជិកនៃក្រុមជនអន្ធពាល ជួញដូរគ្រឿងញៀនមួយក្រុមដែលគេស្គាល់ថា ពួកជនអន្ធពាល Bali ៩នាក់ដែលភាសាអង់គ្លេសហៅថា Bali Nine ដែលបានត្រូវកាត់ទោសប្រហារជីវិតដោយសារការរួមចំណែករបស់ពួកគេក្នុងគម្រោងការប្រព្រឹត្តអំពើទុច្ចរិតក្នុងការរត់ពន្ធគ្រឿងញៀនកាលពីមួយទសវត្សរ៍មុននេះ។
ប៉ូលិសសហព័ន្ធអូស្ត្រាលីហៅកាត់ថា AFP បានធ្វើសន្និសីទកាសែតមួយកាលពីថ្ងៃច័ន្ទដើម្បី«បំភ្លឺ»អំពីពួកជនអន្ធពាល Bali ៩នាក់នោះ។
ពួកពលរដ្ឋអូស្ត្រាលីវ័យក្មេងមួយក្រុមនេះបានត្រូវចាប់ខ្លួនពីព្រោះបានព្យាយាមរត់ពន្ធហេរ៉ូអ៊ីន ជាង៨គ.ក្រ.ពីកោះសម្រាកកាយ Bali នៃប្រទេសឥណ្ឌូនេស៊ី ទៅកាន់ក្រុងស៊ីដនី កាលពីឆ្នាំ២០០៥។ សមាជិក៧នាក់នៃក្រុមជនអន្ធពាលនេះកំពុងជាប់គុកក្នុងរយៈពេលយូរ នៅពេលដែលពួកមេៗនៃក្រុមជនអន្ធពាលនេះគឺឈ្មោះ Andrew Chan និងឈ្មោះ Myuran Sukumaran បានត្រូវប្រហារជីវិតក្នុងប្រទេស ប្រទេសឥណ្ឌូនេស៊ី កាលពីសប្តាហ៍មុន។
ភ្នាក់ងារ AFP បានបដិសេធការចោទប្រកាន់ដែលថា ពួកគេមាន«ដៃប្រឡាក់ឈាម»ដោយសារកិច្ចសហប្រតិបត្តិការរបស់ពួកគេជាមួយប្រទេស ប្រទេសឥណ្ឌូនេស៊ី អំពីក្រុមជនអន្ធពាល Bali ៩នាក់នោះ។ ពួកនាយប៉ូលិសជាន់ខ្ពស់បានទទួលស្គាល់ថា ពួកគេបានដឹងថាសកម្មភាពនៃពួកជនទាំង៩នាក់នេះកាលពីមួយទសវត្សរ៍មុននេះ អាចនាំឱ្យពួកបុគ្គលទទួលទោសប្រហារជីវិតបាន។ ពួកមន្ត្រីប៉ូលិសទាំងនេះបានគូសបញ្ជាក់ថា ពួកគេគ្មានហេតុផលអ្វីនឹងត្រូវសុំអភ័យទោសចំពោះការខិតខំព្យាយាមបញ្ឈប់ការហូរចូលគ្រឿងញៀនខុសច្បាប់ក្នុងប្រទេសអូស្ត្រាលីទេ។
ពួកអ្នករិះគន់បាននិយាយទទូចថា ពួកជនអន្ធពាលទាំងនេះអាចត្រូវចាប់ខ្លួននៅមុនពេលពួកគេចាកចេញពីប្រទេសអូស្ត្រាលី ក៏ប៉ុន្តែលោក Andrew Colvin ស្នងការទីភ្នាក់ងារ AFP បាននិយាយថា មានភ័ស្តុតាងមិនគ្រប់គ្រាន់ដើម្បីឃុំឃាំងពួកជនទាំងនេះទេ។ ទោះណាជាសេចក្តីណែនាំរបស់កងកម្លាំងប៉ូលិសសហព័ន្ធអូស្ត្រាលីបានត្រូវកែប្រែហើយក៏ដោយ ក៏លោក Colvin បានព្រមានថាការស៊ើបអង្កេតក្នុងពេលអនាគតអាចនាំឱ្យមានជនជាតិអូស្ត្រាលីប្រឈមមុខនឹងទោសប្រហារជីវិតនៅក្រៅប្រទេសបាន។
«វាជាការពិតជាក់ស្តែងដ៏ពិបាកមួយដែលថា ប្រទេសជាច្រើននៅមានទោសប្រហារជីវិតសម្រាប់ការប្រព្រឹត្តិបទល្មើសធ្ងន់ធ្ងរ។ ព្រោះហេតុនេះហើយ យើងមិនអាចកម្រិតកិច្ចសហប្រតិបត្តិការរបស់យើងត្រឹមតែជាមួយបណ្តាប្រទេសដែលមានប្រព័ន្ធយុត្តិធម៌ស្រដៀងនឹងប្រព័ន្ធរបស់យើងឬមានគោលនយោបាយស្រដៀងគ្នានឹងគោលនយោបាយរបស់យើងទេ។ យើងត្រូវតែអាចធ្វើការដោយមានប្រសិទ្ធិភាពជាមួយប្រទេសទាំងនោះដែលនៅជិតយើងបំផុតនៅពេលយើងពិចារណាអំពីតំបន់ដែលយើងឋិតនៅក្នុងនោះ។ ចំពោះសំណួរសំខាន់ដែលថាការណ៍នេះអាចកើតមានបានទៀតទេ ខ្ញុំសង្ឃឹមថាខ្ញុំអាចធានារ៉ាប់រងដល់លោកអ្នកថា សេណារីយ៉ូនេះមិនអាចកើតមានបានទៀតទេ ក៏ប៉ុន្តែខ្ញុំមិនអាចសន្យាបានឡើយ»។
ពួកអ្នកគាំទ្រឈ្មោះ Andrew Chan និងឈ្មោះ Myuran Sukumaran បាននិយាយថា ពួកគេបានត្រូវកែប្រែជាថ្មីហើយបានក្លាយទៅជាគម្រូល្អសម្រាប់ពួកអ្នកទោសឯទៀតៗ។ Chan បានក្លាយទៅជាអ្នកផ្សព្វផ្សាយគ្រឹស្តសាសនានៅក្នុងគុកហើយ Sukumaran បានក្លាយទៅជាវិចិត្រករចំណានម្នាក់។ ជនទាំងពីរនាក់នេះបានត្រូវប្រហារជិវិតកាលពីអាទិត្យមុនរួមជាមួយពួកអ្នកទោសមានទោសដូចគ្នាមកពីប្រទេសប្រេស៊ីល និងប្រទេសនីហ្សេរីយ៉ា ដែលបណ្តាលឱ្យមានការខឹងសម្បាពីអន្តរជាតិ។ ប្រទសអូស្ត្រាលីបានដកឯកអគ្គរដ្ឋទូតរបស់ខ្លួនចេញពីប្រទេសឥណ្ឌូនេស៊ី ជាការតវ៉ា។ ប្រទេសឥណ្ឌូនេស៊ីបាននិយាយថា ការប្រហារជីវិតពួកជនទាំងនេះជាផ្នែកមួយនៃអ្វីដែលខ្លួនហៅថា«ការទប់ទល់នឹងភាពមានអាសន្នដោយសារគ្រឿងញៀន»។
ប្រែសម្រួលដោយ ឈឹម សុមេធ
