មន្រ្តីប្រទេស ឥណ្ឌូនេស៊ី បានច្រានចោលសេចក្តីស្នើរបស់ប្រទេស អូស្រ្តាលី ដើម្បីប្តូរអ្នកទោសទៅវិញទៅមក ក្នុងគោលបំណងជួយសង្គ្រោះជីវិតអ្នករត់ពន្ធគ្រឿងញៀនជាតិ អូស្រ្តាលី ២ នាក់ ដែលនឹងត្រូវនាំយកទៅប្រហារជីវិត។
លោកស្រីរដ្ឋមន្រ្តីការបរទេស អូស្រ្តាលី Julie Bishop បានថ្លែងថា លោកស្រីបានធ្វើសេចក្តីអំពាវនាវទៅលោករដ្ឋមន្រ្តីការបរទេស ឥណ្ឌូនេស៊ី Retno Marsidi តាមទូរសព្ទ នៅក្នុងកិច្ចប្រឹងប្រែងចុងក្រោយរបស់អូស្រ្តាលី ដើម្បីសុំការលើកលែងទោស។
លោកស្រីថ្លែងជាអាទិ៍ថា អ្វីដែលអូស្រ្តាលីចង់បាន គឺឱកាសដើម្បីនិយាយគ្នាអំពីជម្រើសផ្សេងៗ ដែលអាចធ្វើបានអំពីការបញ្ជូន ឬការប្តូរអ្នកទោសគ្នា និងមធ្យោបាយគ្រប់ផ្លូវទាំងអស់ដែលអាចជួយសង្គ្រោះជីវិតរបស់ជនជាតិអូស្រ្តាលី ២ នាក់នោះ។
មន្រ្តីឥណ្ឌូនេស៊ីថ្លែងនៅថ្ងៃព្រហស្បតិ៍នេះថា ការប្រហារជីវិតនឹងប្រព្រឹត្តិធ្វើតាមពេលវេលាកំណត់ ដោយបានច្រានចោលសេចក្តីស្នើរបស់លោកស្រីរដ្ឋមន្រ្តីការបរទេស អូស្រ្តាលី Julie Bishop ដែលបាននិយាយជាមួយអ្នកសារព័ត៌មានកាលពីប៉ុន្មានម៉ោងមុននេះ។
ឥណ្ឌូនេស៊ី មិនទាន់បានកំណត់ថ្ងៃសម្រាប់ប្រហារជីវិតជនជាតិអូស្រ្តាលី ២ នាក់ គឺ Andrew Chan និង Myuran Sukumaran ដែលគេបានបញ្ជូនកាលពីថ្ងៃពុធនេះ ពីគុកនៅកោះបាលី (Bali) ទៅកាន់កោះដែលអ្នកទាំង ២ ត្រូវប្រហារជីវិតនៅឡើយទេ៕
