ការរឹតត្បិតពាណិជ្ជកម្មដែលបានធ្វើឡើងដោយប្រទេសចិនលើទំនិញប្រើប្រាស់នានា រួមមានធ្យូងថ្ម ស្រា និងសាច់គោមួយផ្នែកធំ ដោយសារជម្លោះភូមិសាស្ត្រនយោបាយរវាងប្រទេសធំពីរនៅតំបន់ឥណ្ឌូប៉ាស៊ីហ្វិក។
មានការរកាំរកូសខាងការទូតក្នុងប៉ុន្មានឆ្នាំថ្មីៗនេះអំពីលទ្ធិប្រជាធិបតេយ្យក្នុងក្រុងហុងកុង សិទ្ធិមនុស្ស ហើយនឹងមហិច្ឆតារបស់រដ្ឋាភិបាលក្រុងប៉េកាំង នៅក្នុងសមុទ្រចិនខាងត្បូងនិងមហាសមុទ្រប៉ាស៊ីហ្វិក។
ទំនិញមានទឹកប្រាក់រាប់ពាន់លានដុល្លាររបស់អូស្ត្រាលីដែលនាំចេញទៅកាន់ប្រទេសចិនត្រូវបានរងការប៉ះពាល់ដោយការដាក់ទណ្ឌកម្មពាណិជ្ជកម្មនេះ។
កាលពីសប្តាហ៍មុន ក្រសួងពាណិជ្ជកម្មចិន បាននិយាយថា ខ្លួននឹងលុបចោលការយកពន្ធគយរបស់ខ្លួនចំនួន ៨០,៥ភាគរយ លើគ្រាប់ធញ្ញជាតិបាលីអូស្ត្រាលី។ អូស្ត្រាលីបានទទូចថា ការរឹតត្បិតនេះជាការដាក់ទណ្ឌកម្ម ហើយនឹងជា«ការបង្ខំខាងសេដ្ឋកិច្ច» ថ្វីបើពួកមន្ត្រីចិនបានបញ្ជាក់ថា មានហេតុផលខាងបច្ចេកទេសប្រឆាំងនឹងការលក់ដូរបង្ខូចថ្លៃ។
រដ្ឋមន្ត្រីពាណិជ្ជកម្មអូស្ត្រាលីលោក Don Farrell សង្ឃឹមថា រដ្ឋាភិបាលក្រុងប៉េកាំងនឹងលុបចោលឆាប់ៗនេះលើការនាំចេញស្រាអូស្ត្រាលីទៅកាន់ប្រទេសចិន។
រដ្ឋាភិបាលក្រុងកង់បេរ៉ានៅពេលបច្ចុប្បន្ននេះកំពុងប្តឹងជំទាស់ប្រឆាំងការយកពន្ធរបស់ចិនរហូតដល់ចំនួន ២១២ ភាគរយលើស្រារបស់អូស្ត្រាលី នៅឯអង្គការពាណិជ្ជកម្មពិភពលោក ដែលបានព្យាយាមធ្វើនិយ័តកម្មពាណិជ្ជកម្មសាកលលោក។ ការរឹតត្បិតរបស់ចិនក៏នៅមានលើសាច់គោ កប្បាស និងម្ហូបអាហារសមុទ្ររបស់អូស្ត្រាលីដែរ។
លោក Farrell បានប្រាប់ទូរទស្សន៍អូស្ត្រាលី ABC កាលពីថ្ងៃចន្ទថា អូស្ត្រាលីបានធ្វើការយ៉ាងសកម្មដើម្បីបន្ធូរបន្ថយការតានតឹងជាមួយដៃគូពាណិជ្ជកម្មដ៏ធំបង្អស់របស់ខ្លួន៖
លោកថ្លែងថា៖ «ដំណើរការទាំងមូលរបស់យើងជាង ១៥ ខែចុងក្រោយនេះ គឺព្យាយាមនិងធ្វើឱ្យមានស្ថិរភាពទំនាក់ទំនងរបស់យើងជាមួយរដ្ឋាភិបាលចិន ដើម្បីឱ្យពួកគេដកចេញឧបសគ្គពាណិជ្ជកម្មដែលជារបាំងនៅក្នុងទំនាក់ទំនងរបស់យើងក្នុងពេលកន្លងមក។ បន្តិចម្តងៗដំណើរការនេះជឿនលឿនទៅមុខ»។
លោក Farrell បាននិយាយទៀតថា រដ្ឋមន្ត្រីពាណិជ្ជកម្មចិនលោក Wang Wentao បានយល់ព្រមបំពេញទស្សនកិច្ចទៅកាន់ប្រទេសអូស្ត្រាលី ថ្វីបើមិនមានសេចក្តីលម្អិតបានចេញផ្សាយក៏ដោយ។
នាយករដ្ឋមន្ត្រីអូស្ត្រាលីលោក Anthony Albanese ក៏បានត្រូវគេរំពឹងថានឹងទៅបំពេញទស្សនកិច្ចទៅកាន់ប្រទេសចិននៅចុងឆ្នាំនេះដែរ។
ពាណិជ្ជកម្មខាងទំនិញនិងសេវាកម្មជាមួយចិន មានប្រហែល ១ភាគ៣ នៃពាណិជ្ជកម្មសាកលរបស់អូស្ត្រាលី។ កិច្ចព្រមព្រៀងពាណិជ្ជកម្មសេរីចិននិងអូស្ត្រាលីបានចូលជាធរមាន កាលពីខែធ្នូ ឆ្នាំ២០១៥។
អូស្ត្រាលីស្ថិតនៅក្នុងចំណោមអ្នកផ្គត់ផ្គង់ផលិតផលដ៏ធំបង្អស់របស់ចិន រួមមានរ៉ែដែក ដែលជាធាតុផ្សំដ៏សំខាន់នៅក្នុងការផលិតដែកថែប។
រដ្ឋាភិបាលក្រុងកង់បេរ៉ាបានស្វះស្វែងធ្វើឱ្យមានភាពចម្រុះនៃពាណិជ្ជកម្មអន្តរជាតិរបស់អូស្ត្រាលីដោយងាកចេញពីការពឹងផ្អែកយ៉ាងខ្លាំងរបស់ខ្លួនលើប្រទេសចិន ដែលរួមមានប្រទេសផ្សេងៗទៀត ដោយរាប់បញ្ចូលទាំងប្រទេសឥណ្ឌានិងឥណ្ឌូណេស៊ីផងដែរ៕
ប្រែសម្រួលដោយលោក ជឹង ប៉ូជីន
