ភ្ជាប់​ទៅ​គេហទំព័រ​ទាក់ទង

​អ៊ុងសាន​ស៊ូជីធ្វើ​ទស្សនកិច្ច​ជាលើក​ដំបូង​នៅ​ប្រទេស​ចិន


លោក​ស្រី​ អ៊ុង​ សាន​ស៊ូជី​ មេដឹកនាំ​បក្ស​ប្រឆាំង​នៃ​ប្រទេស​ភូមា​អញ្ជើញ​មក​ដល់​ព្រលាន​យន្តហោះ​អន្តរជាតិ​ក្រុង​ប៉េកាំង​ កាល​ពី​ថ្ងៃ​ទី​១០​ ខែ​មិថុនា ឆ្នាំ​២០១៥។

លោកស្រី ​អ៊ុង ​សាន​ស៊ូជី (Aung San Suu Kyi) មេដឹកនាំ​គណបក្ស​ប្រឆាំង​នៃ​ប្រទេស​ភូមា ​បាន​ចាប់​ផ្តើម​ដំណើរ​បំពេញ​ទស្សនកិច្ចទៅ​កាន់​ប្រទេស​ចិន​នៅ​ថ្ងៃ​ពុធ​នេះ ​ដែល​មាន​គោល​បំណង​ជំរុញ​ចំណង​ទាក់​ទង​ខាង​ការទូត​ ដែល​ត្រូវ​បាន​សាក​ល្បង​ដោយសារលទ្ធផល​នៃ​កំណែ​ទម្រង់​តាម​បែប​លទ្ធិ​ប្រជា​ធិបតេយ្យ​របស់​ប្រទេស​លោកស្រី។

គណ​បក្ស​កុំម្មុយនិស្ត​ចិន ​ដែល​ជា​សម្ព័ន្ធ​មិត្តដ៏​សំខាន់​មួយ​របស់​អតីត​ក្រុមប្រឹក្សា​កាន់​អំណាច​យោធា​នៃ​ប្រទេស​ភូមា ​កំពុង​រៀប​ចំ​ទទួល​ជន​គំរូប្រជាធិបតេយ្យរបស់​ភូមា​ ដែល​កំពុង​ធ្វើ​ដំណើរ​ជាមួយ​គណប្រតិភូ​មក​ពី​គណបក្ស​សម្ព័ន្ធភាព​ដើម្បី​លទ្ធិ​ប្រជាធិបតេយ្យ​របស់​លោក​ស្រី។

ក្រុម​មន្រ្តីគណបក្ស​សម្ព័ន្ធភាព​ដើម្បី​លទ្ធិប្រជា​ធិបតេយ្យ​រំពឹង​ថា ​លោកស្រី ​អ៊ុង ​សានស៊ូជី ​នឹង​ជួប​ជាមួយ​មេដឹកនាំ​ចិន​កំពូល​ៗ​ រួម​មាន​ប្រធានាធិបតី​ ស៊ី ​ជីង​ពីង ​និង​នាយក​រដ្ឋ​មន្រ្តី Li Keqiang ​ក្នុង​អំឡុង​នៃ​ដំណើរ​បំពេញ​ទស្សនកិច្ច​រយៈ​ពេល​៥​ថ្ងៃ​របស់​លោក​ស្រី​នោះ។

លោក Hong Lei ​អ្នក​នាំពាក្យ​ក្រសួង​ការបរទេសចិន ​បាន​បញ្ជាក់​នៅ​សប្តាហ៍​នេះ​ថា​ ម្ចាស់​ជ័យ​លាភី​ណូបែល​សន្តិភាព​នឹង​ជួប​ជាមួយ​មេដឹកនាំ​រដ្ឋ​និង​បក្ស។

លោក Hong Lei និយាយ​ថា​ «​ចិន​នឹង​រក្សា​ចំណង​ទាក់​ទងមិត្ត​ភាព​យូរ​អង្វែង​ជាមួយ​ភាគី​ពាក់ព័ន្ធ​នៅ​ក្នុង​ប្រទេស​ភូមា​។​ យើង​ជឿ​ជាក់​ថា ​ដំណើរ​បំពេញ​ទស្សនកិច្ច​នេះ​ អាច​បង្កើន​ការយល់​យោគ​និង​ការទុក​ចិត្ត​គ្នា​រវាង​ភាគី​ទាំង​២ ​ដើម្បី​បន្តជំរុញ​មិត្ត​ភាព​និង​កិច្ច​សហប្រតិបត្តិការ​រវាង​ប្រទេស​ចិន​និង​ភូមា‍»។

ទំនាក់​ទំនង​រវាង​ភូមា​និង​ចិន ​បាន​ជួប​ប្រទះ​បញ្ហា​ចាប់​តាំង​ពី​ក្រុម​យោធា​នៃ​ប្រទេស​ក្នុង​តំបន់​អាស៊ី​អាគ្នេយ៍​មួយ​នេះ ​បាន​ប្រគល់​អំណាច​ទៅ​ឲ្យ​រដ្ឋាភិបាល​ស៊ីវិល​មាន​តែ​ឈ្មោះនៅ​ឆ្នាំ​២០១០​ ហើយ​បាន​ចាប់​ផ្តើម​ធ្វើ​កំណែ​ទម្រង់។

ចាប់​តាំង​ពី​ពេល​នោះ​មក ​ភូមា​មាន​ទំនាក់​ទំនង​ខាង​ពាណិជ្ជកម្ម​កាន់​តែ​ជិត​ស្និទ្ធ​ឡើង​ជាមួយ​ប្រទេស​លោក​ខាង​លិច​ បន្ទាប់​ពី​សហរដ្ឋ​អាមេរិកនិង​ប្រទេស​នានា​នៅ​អឺរ៉ុប ​បាន​ចាប់​ផ្តើម​បន្ធូរ​បន្ថយ​ការ​ដាក់​ទណ្ឌកម្ម ​ដែល​បាន​ចូល​ជាធរមាន​អស់​រាប់​ទសវត្សរ៍៕

XS
SM
MD
LG