ប្រធានាធិបតីស៊ីរី Bashar al-Assad និយាយថា លោករង់ចាំមើល«សកម្មភាព»របស់រដ្ឋាភិបាលក្រុងវ៉ាស៊ីនតោន ទៅនឹងពាក្យសម្តីរបស់លោករដ្ឋមន្ត្រីការបរទេសស.រ.អា. John Kerry ដែលកាលពីថ្ងៃអាទិត្យបានសម្តែងការយកចិត្តទុកដាក់លើការចរចាជាមួយរដ្ឋាភិបាលរបស់មេដឹកនាំស៊ីរីរូបនេះ។
បណ្តាញផ្សាយព័ត៌មានរបស់រដ្ឋនៃប្រទេសស៊ីរីបានដកស្រង់ពាក្យសម្តីលោក Assad ដែលបាននិយាយថា៖ «យើងនៅតែឮសេចក្តីប្រកាសទាំងនេះនៅទ្បើយ ហើយយើងគួរចាំមើលសកម្មភាពសិន ហើយបន្ទាប់មកយើងនឹងសម្រេចចិត្ត»។
កាលពីថ្ងៃអាទិត្យ លោក Kerry បានមានប្រសាសន៍ថា ស.រ.អា.ត្រូវតែសម្រេចកិច្ចព្រមព្រៀងមួយជាមួយមេដឹកនាំស៊ីរីរូបនេះដើម្បីឲ្យមានអន្តរកាលអំណាចតាមនយោបាយ នៅពេលប្រទេសស៊ីរីកំណត់ខួបឆ្នាំទីបួននៃសង្គ្រាមស៊ីវិលដែលបានបណ្តាលឲ្យមនុស្សជាង២សែននាក់បាត់បង់ជីវិត។
ស.រ.អា.ក៏មានទាក់ទិនដែរក្នុងការវាយប្រហារតាមអាកាសក្នុងប៉ែកខាងជើងនិងផ្នែកខាងកើតនៃប្រទេសស៊ីរី ដែលដែនដីនោះត្រូវបានពួកជនសកម្មប្រយុទ្ធរដ្ឋអ៊ីស្លាមវាយយកបានកាលពីឆ្នាំទៅមិញ ហើយពួកនេះបានក្លាយទៅជាសត្រូវរួមរបស់រដ្ឋាភិបាលក្រុងដាម៉ាស់(Damascus) និងរដ្ឋាភិបាលក្រុងវ៉ាស៊ីនតោន៕
